E kaira Ana Ekaretia Te Uea

Tariu aika tangiraki ake iai irouia ana nakoanibonga te Atua, n te tairiki aio I kan taetae ibukin te kawai ae tamaroa n te kawai are kaira iai Abanueana te Uea i aonaaba. Kam a tia n atai aan taian reirei. I tataro bwa te Tamnei ae Tabu e na kamatoai nakoimi.

Te moan, Iesu Kristo bon atuun te Ekaretia i aonaaba ni kabuta.

Kauoua, E kaira Ana Ekaretia n te bong aei man te taetae nakoia mwane ake a weteaki bwa burabeti. E karaoia rinanon te kaotioti.

Kateniua, E anga te kaotioti nakoia Ana burabeti n taai akea ngkoa, ao e teimatoa n anganiia te kaotioti.

Kaaua, E anga kaotioti ni kamatoa nakoia ake a mwakuri iaan aia kairiiri Ana burabeti.

Man bukina aikai, ti ataia bwa Ana kairiiri te Uea n Ana Ekaretia e tangira ae korakora ao ni matoa n te onimaki mairouia ake a beku Ibukina i aon te aonaaba.

Te katoto e tangira te onimaki ni kakoaua bwa te Uea ae e a tia n uti e bon tararuai bwaai ni katoa bong ibukin Abanueana.E tangira te onimaki ni kakoaua bwa E weteia aomata aika aki kororaoi nakon nakoaia aika onimakinaki. E tangira te onimaki ni kakoaua bwa E kinaia aomata ake E weteia, ni korakoraia ao aia ataibwai, ao e aki kona ni karaoa ae kairua n Ana wewete.

Anne are e na uota te moangare ke ioioan atuia taan ongora aikai—ao nakoia naba ake a taku bwa weteakiia ni mwakuri e kairua naba ao ai aroia naba ao tabeman ake a katamneia tabeman aika a ataia ake a taraa n aki tau n aia tabo n abanuean te Uea. Au reirei nakon kurubu aika uoua bwa ti na kabaenikaian te motikitaeka anne ni karokoa kam kona n noora are nooria te Uea. Te motikitaeka are ko riai ni karaoia, n onean mwiina, bwa iai iroumi te konabwai ni karekea te kaotioti ao ni mwakuriia n aki maaku.

E bon riai te onimaki ni karaoana. E kainnanoa te onimaki riki ae korakora ni kakoaua bwa te Uea e a tia ni weteia aomata aika tooro aika aki kororaoi bwa a na kairiko. Au kantaninga n te tairiki aio bwa N na katea ami onimaki bwa te Atua E kairi ngkami n ami beku ibukina. Ao ae kakaawaki riki, au kantaninga bwa e na kamatoa ami onimaki bwa te Uea e kaungai nanoia aomata ake aki kororaoi ake e weteia bwa ami tia kairiiri.

Ko kona ni iangoia, n te moan tai bwa te onimaki anne e aki bongana ni waakina Ana Ekaretia te Uea ao abanueana. E ngae n anne, ko na kunea—n aki tabe bwa tera nakoam n te nakoanibonga, mairoun ana burabeti te Uea nakon te tia taua te nakoanibonga ae te Aaron ae boou—bwa te onimaki e kakaawaki.

Ti na waaki ma nanon te onimaki ibukin te tia reirei ke te riikan ae te beretitenti n te kooram. E kakaawaki irouna bwa e na karekea te onimaki bwa te Uea e weteia, n ataakin mamaaran te tia reirei anne ao korakorana. E na iai ana onimaki bwa te mwane are karaoa te wewete e a tia ni karekea te kaotioti iroun te Tamnei are Raoiroi. Ana Kauntira ao kaain ana kooram a kainnanoa te aekaki n onimaki anne n rimwiina ma te mweengaraoi n aki maaku.

I a tia n noora te onimaki anne ngke e tekateka te ataeinimwane n te beretitentii n aia kooram riikan n te ingabong n Taabati teuana. Bon aia tia koroboki ae boou ae e a tibwa weteaki. Te beretitenti ae ataei a uaia n reirei. A taekin tabeua kawai are a na kona ni kakoroa nanon ana bubuti te bitiobi ni kairia ataeinimwane aika a aki bati ni kakaonimaki n oki nakon te ekaretia. Mwiin te tataro ao te maroro, a rinea te tia koroboki n nakon mweengan te ataeinimwane are e tuai roko n te bowi ao ni kaoa.

Te tia koroboki e aki kinaa te ataeinimwane, ma e ataia ana karo temanna te ataeinimwane arei ae e aki kakaonimaki ao are temanna tiaki te membwa ao e aki iraorao. E raraoma te tia koroboki ma e aki maaku. E ataia bwa ana burabeti te Atua e a tia ni bubutia taan taua te nakoanibonga ni uota ni kaoka te tibu ae bua. Ao E a tia n ongo ana bubuti te beretitentii. E ongo n aia boraraoi n aran te ataeinimwane are e na kamaiuaki ao bon arana.

I matakuakina te tia koroboki ngke e nakonako n te kawai nakon ana auti te ataeinimwane are e aki kakaonimaki. E karaurau n nakonako kanga aekakin are e nakon te kaangaanga ae korakora. Ma inanon te itera n aoa e oki rikaki n te kawai ma te ataeinimwane, ni matangare ma te kukurei. I aki koaua bwa e ataa ngkanne, ma a tia n nako ma te onimaki bwa e mwananga ni kawain te Uea. Te onimaki anne e tiku irouna ao n tia n rikirake inanon ririki ngke e mitinare, te karo, te tia kairiiri ibukiia ataeinimwane, ao te bitiobi.

Ti na taekinna bwa tera nanon te onimaki iroun te bitiobi. E weteaki te bitiobi n taai tabetai ni mwakuri ibukiia aomata ake a kinaa raoi. Membwa n te uoote a ataa teutana mamaarana n aomata, ao korakorana n tamnei, ao a ataia tabeman bwa a kona ni weteaki—tabeman ake a taraa n raoiroi riki aia reirei, a mwaatai riki, e kakukurei riki, ke a tararaoi riki.

Membwa aikai a na ataa te wewete nakon te mwakuri bwa te bitiobi e roko mairoun te Uea, n te kaotioti. N akean aia onimaki, te bitiobi are weteaki iroun te Atua e na matoatoa ni karekea te kaotioti are kainnanoia ibukin buokaia. E na aki tokanikai n akean aia onimaki membwa are a na kamatoa.

Ae kakukurei, kaitaraana bon te koaua. Iangoa ana toro te Uea are Beniamina, are kairiia ana aomata nakon te rairannano. E kamarauaki nanoia aomata man aia onimaki bwa e weteaki iroun te Atua, n aki tara mamaarana n aomata, ao ana taeka a roko mairoun te Atua. Kam uringa are a taku aomata ni kangai: Eng, ti kakoauai taeka ni kabane ake ko a tia n taekin nakoira; ao riki tonutonuia ma koauaia, mairoun Tamnein te Uea ae Moan te Mwaaka, are e a tia ni karika te bitaki ae moan te korakora iroura, ke inanora, n te aro are akea te nano ni kan karaoa ae buakaka, ma n teimatoa ni karaoa ae raoiroi” (Motiaea 5:2).

Ibukin te tia kairiiri bwa e na tokanikai n Ana mwakuri te Uea, a kakoaua aomata bwa e weteaki iroun te Atua e riai ni korakora aia taratara n ana aki kororaoi ao mamaaran te rabwata. Kam uringa aron King Beniamina ni kabwarabwara karaoa aron tabena n te aro ni kairiiri:

“I aki tuatua bwa kam na nakomai bwa kam aonga ni maakai, ke n taku inanomi bwa I korakora riki nakon te aomata ae e maamate.

“Ma bon ti te arona arou ma ngkami, ae N na kabaeaki ni mamaaran te rabwata ma te kaantaninga; bwa I a tia n rineaki irouia te botanaomata aio, ma ni katabuaki iroun tamau, ao ni kariaiakaki mairoun te Uea bwa N na riki bwa te tia tautaeka ao te uea irouia te botanaomata aio; ao I a tia ni kaawakinaki ma ni kateimatoaki ni mwaakana ae akea kabotauana, bwa N na beku ibukimi n au kona, au kaantaninga ma korakorau ni kabane ake e a tia n anganai te Uea.” (Motiaea 2:10–11).

Ami tia kairiiri n Ana Ekaretia te Uea e na taraa ni mamara iroumi ao n aomata ke e na taraa ni korakora ao ni kaunga te nano. Te iango bwa taan kairiiri ni kabane bon mai buakoia te koraki anne ao e raka riki. Are a buokia ana toro te Uea ake a weteaki bwa a na kairiirira boni ngke ti kona n noriia n aron are karaoia te Uea ngke E weteiia.

E nooria raoi Ana toro te Uea. E noori aia konabwai ao aia tai aika a na roko. Ao E ataia bwa a kona ni bitaki kateia. E ataia naba bwa a kona ni bitaki man aia taneiai ma aomata aika a na kairiia.

Ko kona ni karekea te taneiai ni kakorakora riki mairouia aomata are ko weteaki bwa ko na beku ibukiia. I weteaki tetaina bwa te bitiobi ibukiia te roronrikirake. I aki koaua bwa ana mwakuri te Uea e mwaiti ibukin bitaki ake I kona ni buokia iai ni karaoa te bitaki inanoia ke bitaki ake E ataia bwa a na karaoaki irou.

N te aekaki are I aki oota iai, mwaitia aomata aika ataei aikai inanon te uoote a mwakuri ngkana Ngai ae I weteaki iroun te Atua tii ibukiia. A noora mamaarau ma e aki roota taraakiu irouia.

I uringa te ataeinimwane temanna are e bubuti te reirei ibukin ana rinerine n te reirei. E ira te moan koraki n te iuniwetiri ae tamaroa. Teuana te wiiki imwiin are I anga te reirei, e kabaea ana tai bwa e na kawarai.

Ngke e roko inanon te aobiti, e kakubanakoai man titirakinai, “Bitiobi, ti kona n tataro imwain ara taetae?Ao ti kona ni katorobubua?Ao I kona n tataro?”

I kubanako n ana bubuti. Ma ana tataro e kakubanakoai riki. Ngke e tataro n aekakin aio: “Tamara are i Karawa, Ko ataia e anganai te reirei Bitiobi Eyring n te wiki ae nako, ao e aki mwakuri. Taiaoka kaira ana iango bwa e na ataa ae I karaoia ngkai.”

Tao kam na ngare ngkai n anne, ma I aki. E a tia n ataa are tangiria te Uea bwa e na karaoia. Ma e karinea nakoan te bitiobi n Ana Ekaretia te Uea ao tao e tangirai bwa e na reke au tai ni karekea te mwiokoaki ae korakora riki ni karekei kaotioti n te weteaki anne.

E mwakuri. Ngke ti waetata n teirake ao ni manga tekateka, e roko irou te kaotioti. I tuanga are I namakinna are e tuangnga te Uea bwa e na karaoia. Ai tibwa 18 ana ririki ngkanne, ma e a korakora n te aro n tamnei.

E a tia n ataia bwa e na aki manga nakon te bitiobi n te aekaki ni kaangaanga anne. Ma e a tia n reiakina kamatoan ana toro te Uea ni bon mamaaran te maiu ae mamate. E bon riki bwa te titeiki beretitenti. E uotii reirei ake ti uaia n reiakin: ngkana iai ami onimaki are E kaira iai Ana Ekaretia rinanon te kaotioti nakoia tooro ake a aki kororaoi ake E weteia, E na kauki mataroan karawa nakoina, are E na karaoia nakoim.

Man te namakin anne, I reiakina te reirei are aia onimaki aomata ake ti beku ibukiia, n taai tabetai e raka riki nakon ara onimaki, e karokoi kaotioti nakoira n ana mwakuri te Uea.

Iai ngkoa teuana te reirei ibukiu. Ngke arona bwa te ataeinimwane arei e motika taekau ibukin kabwakau n anganna te reirei ae tamaroa n te moan tai, e na bon aki manga bubuti riki.Ao man rineakina bwa e na aki baireia, e karekea kamatoakina are tangiria.

Teuana riki te reirei man te taneiai arei e a tia ni mwakuri ibukiu. N aron ae I ataia, e aki tuanga temanna n te uoote are I aki anga te reirei ae raoiroi n te moa n tai. E a tia ni karaoa anne, e kona ni kamemeerea aia onimaki tabeman n te uoote ni kakoaua kairan te bitiobi iroun te tamnei.

I kataia n aki motikitaekaia ana toro te Atua ke n taekina mamaaraia. Ao I kataia n reirei te katoto anne nakoia natiu. Beretitenti James E. Faust e taekina rongorongon te kakoaua are I kataia ni karaoia ni maiu. I tibwaia nakoimi:

Ti … tangiraki ni boutokaia ao ni kamatoaia taan kairiiri, ibukina bwa…a tia ni ‘weteaki ao n rineaki.’ Membwa n tatabemaniia nako n te Ekaretia aio a na karekei reirei mairoun te bitiobi ke te beretitenti n te mwaanga, te titeiki ke te mition beretitenti, ao te Beretitenti n te Ekaretia ao raona. Akea temanna ae bubuti weteakina. Akea ae kororaoi. Ma bon ana toro te Uea, aika weteaki Irouna rinanoia aika katauaki. Ake a weteaki, a kamatoaki ao a katabuaki n ara boutoka ni kamatoa.

“… Te aki karinerine nakoia taan kairiiri n te aro e karika mamaaran maiun tamneia ao bwakaia. Ti na kabwarai aia bure aika aki kororaoi ke aia mwakuri aomata aika weteaki n babaire iaora, ao ni kamatoai nakoia ake a mena iai.” (“Called and Chosen,” Riaona, Nobembwa 2005, 54–55).

Te reirei arei e kakabwaiaia ana toro te Atua n aro ni kabane.

N ana bong Ana Ekaretia te Uea ngkoa, taan kairiiri ake a kaan ma te burabeti Iotebwa Timiti a moana taekin ana kairua. N aitara ma ake a tia n noori ao n tia n ataa teina ma te Uea, aia katei n tiribure ao ni bakantang e buta nako ni waetata kanga te aoraki. Temanna mai buakoia Tengaun ma Uoman are e karaoi ibukira taian katei n onimaki ao ni karietata are e na riai n reke iroura ngkana ti na mwakuri n abanuean te Uea.

Aio te Ribooti: “Tabeman unimwane a karaoa te bootaki n te tembora ibukiia aika a kataua Iotebwa Timiti bwa te Burabeti ae buakaka. A iangoa rinean David Whitmer bwa te Tia Kaira te Ekaretia ae Boou. … Imwiin ongoraeakinan kauntaeka ibukin te Burabeti, Brigham [Young] e teirake ao n taekina, ‘Iotebwa bwa te Burabeti, ao I ataia, ao a kona ni kamatoa ao ni kamangoria n ae bati n aron are a tangiria; a aki kona n urua rinean ana Burabeti te Atua, a ti kona ni urua oin aia kariaia, ni korea te toma are a kabaeaki nakon te Burabeti ao nakon te Atua ao n nako ngaia nako moone’” (Church History in the Fulness of Times Student Manual [Church Educational System manual, 2003], 2nd ed., 174; taraa naba Teachings of Presidents of the Church: Brigham Young [1997], 79).

Iai te karai are tomaira nakon te Uea n ara mwakuri. E moa man are ti weteaki iai ni beku inanon te abanuea, rinanoia ake a weteaki bwa n kairiira inanon te nakoanibonga, ao nakon te burabeti, are kabaeaki nakon te Uea. E na karekea te onimaki ao te nanorinano ni beku n te tabo are ti weteaki nako iai, ni kakoaua bwa te Uea e weteira ao te koraki ake a tararuaira, ao ni kamatoaia ma te onimaki ae korakora.

A na iai taai, ae n aekakin boong ake i Kirtland, ngkana ti na kainnanoa te onimaki ao ana kokoaua Brigham Young n tei n te tabo are e weteira iai ara Uea, ni kakaonimaki nakoia ana burabeti ao taan kairiiri ake E kateia n aia tabo.

I kaota nakoimi au koaua ae kakukurei bwa te Uea Iesu Kristo e tararua. E kaira ana Ekaretia ao Ana toro.E kaira ana Ekaretia ao Ana toro. I kakoaua Thomas S. Monson bwa tii ngaia ae taua ao ni kamwakuri kingin ni kabane te nakoanibonga are manga kaokaki nakon te aonaaba n te tai aei. Ao I tataroi kakabwaia ni kabane iaoia tooro aika nanorinano ake a mwakuri ma nanoia ni koaua ao ni marurung n Ana euangkerio Kristo. I kakoaua bwa Iotebwa Timiti e noora te Tama ao Iesu Kristo. A taetae nakoina. Kiingin te nakoanibonga a kaokaki ibukin kakabwaiakia ni kabane natin te Atua. Bon ara mwakuri ao ara koaua ni mwakuri n ara tabo n ana mwakuri te Uea. N aran Iesu Kristo, amen.