Ana Boki Moomon: Tera Aron Maium Ngkana Arona bwa Akea?

N te 1986, I kaoaki bwa N na anga te reirei n te iuniwetiri i Accra, Ghana. Ikekei ao I kaitibo ma angiina aobitia man te tautaeka, n ikotaki ma te uea mai Aberika. Ngkai ti marooro imarenara imwaain waakinan au reirei, e taetae te uea nakoiu rinanon ana tia raitaeka, are ngaia ae e rairia ibukiu. I kaeka te tia raitaeka, ao te tia raitaeka e raira ngkanne au kaeka nakon te uea.

Imwiin au angareirei, e karaoa kawaina ni kainetai te uea, ma n te tai aei akea ana tia raitaeka. Ni miimiu, e taetae ma tamaroan ana taetae n Imatang—te taetae n Engiran, ni koaua!

E taraa n nanououa te uea. “Bon antai ngkoe?” e titiraki.

I kaeka, “Ngai ana Abotoro Iesu Kristo ae e a tia ni katabuaki.”

E titiraki te uea, “Tera ae ko kona n reireinai iai n taekan Iesu Kristo?”

I kaeka ma te titiraki, “I kona n titiraki tera rongorongona ae ko ataia?”

Ana kaeka te uea e kaotia bwa ataein te reirei ngaia ae e a tia ni kamatebwaia te Baibara ao ngaia temanna ae tangira te Uea.

I titiraki ngkanne ngkana e ataa ana mwakuri Iesu Kristo nakoia aomata ake ngkoa i Amerika.

N aron ae I kantaningaia, e bon aki.

I kabwarabwara bwa imwiin Taurakin te Tia Kamaiu n te Kaibangaki ao Mangautina, E kawariiia aomata ake ngkoa i Amerika. E baronga Ana Ekaretia ao ni butiia Ana reirei bwa a na kawakina rongorongon Ana mwakuri ibuakoia.

“Te rongorongo anne,” I reitia, “ae ti ataia bwa ana Boki Moomon. Bon teuana kakoauan Iesu Kristo. Bon te boki ae tabu n ai aron te Baibara.”

N te iango aei, e a moanna n rangi ni kukurei nanon te uea. I taraa te mition beretitenti are e raonai ao n titiraki ngkana iai irouna kaobiin ana Boki Moomon. E buuta teuana man ana buribikeiti.

I kaukia nakon te ka 3 Nibwaai mwakoro 11, ao Ngai ma te uea ti kaai ni wareka ana kabwarabwara te Tia Kamaiu nakoia Nibwaite. I anganna ngkanne kaobiin ana Boki Moomon. N na bon aki mwaninga ana kaeka n au iango ao nanou n aki toki: “Ko na kaman anganai taian taiman ma taian rubii, bwa akea te bwai ae kakawaki riki irou nakon te rabakau ae raka aei n rongorongon te Uea Iesu Kristo.”

Imwiin nooran mwaakan ana taeka te Tia Kamaiu n te ka 3 Nibwaai, e taku te uea, “Ngkana I rairaki ni kaaina te Ekaretia, N na kairiia au baronga ni kabane bwa a na irai.”

“O, te Uea,” I taku, “e aki mwakuri n arona anne. Te rairaki bon ana bwai te aomata. Te Tia Kamaiu e buokiia Nibwaite temanna imwiin temanna. Aomata n tatabemaniia nako a karekea aia kakoaua ao aia koaua ibukin ana euangkerio Iesu Kristo.”

Tariu ao mwaaneu, kakawakira ana Boki Moomon iroumi? Ngkana ko anga taian taiman ao taian rubii ke ana Boki Moomon, e nga ae ko na rineia? Ni koauana, e nga ae kakawaki riki iroum?

Uringnga n Ingabongin te Tabati n Eberi 2017 n te maungatabu ni kabuta, e onnon Beretitenti Thomas S. Monson “nakoira n tatabemaniira nako bwa ti na tataromwaaka ni kamatebwaia ao n iangoa raoi ana Boki Moomon ni katoa bong.” Angiina a kaeka ana bubuti te burabeti.

N na taekinna bwa tiaki Ngai ke Riley ae waniua ana ririki ti aki ataa temanna ae rawea tamneira. Taraia bwa Riley e wareka ana Boki Moomon ma buokana “Ngai natin te Atua” kanikinaean ana boki.

Te bwai ae korakora ae e na riki ngkana natin te Atua a ukoukora reiakinan riki rongorongona ao Natina ae Tangiraki. Akea riki koaua aika reiakinaki n ae mataata ao ni korakora nakon ana Boki Moomon.

Man ana kakaewenako Beretitenti Monson onoua namwakaina n nako, I kataia n ira ana reirei. Ibuakon bwaai tabeua, I karaoi rinanin ana Boki Moomon bwa aekakira, tera ae kamatoa, tera ae kakoaua bwa e bure, tera ae kakoroa bukina, tera ae kamataata, ao tera ae kaotia. Tuoan ana Boki Moomon n te anga anne e riki bwa te mwakuri ae kawanawana man anainano! I taekinna nakoimi n tatabemani ngkami nako.

Inanon onoua namwakaina aikai, I kaoia kurubu aika mwaiti—n raonaki ma Taari n te Kooram n te Tengaun ma Uoman, mitinare i Chile, ao mition beretitenti ma buuia a ikotaki i Argentina—n iangoi teniua titiraki aika a irekereke ake I kaumakii ngkami bwa kam na iangoi ngkai:

Te moan, tera aron maium ngkana akea ana Boki Moomon? Te kauoua, tera ae ko na aki ataia? Ao te kateniua, tera ae a na akea iroum?

Kaeka aika kakukurei mairouia kurubu aikai a nako mai inanoia. Aikai tabeua aia taeka:

“Ngkana akea ana Boki Moomon, N na mengomengo ni kaangaangan te reirei ao iango n taekan bwaai aika mwaiti. N na bae n tiku n arou are mai imwaaina imwaain ae I kunea te Ekaretia, ngke I tabe n ukoukora te rabakau, te onimaki, ao te kantaninga.”

E taku temanna: “N na bae n aki ataa ana mwakuri te Tamnei ae Raoiroi ni kona ni mwakuri inanon maiu.”

E taku riki temanna: “N na bae n aki mataata raoi ibukin rokou ikai iaon te aba!”

Te tia kaeka riki temanna e taku: “N na aki ataia ae iai te rikirake ae reitinako imwiin te maiu aei. Ibukin ana Boki Moomon, I ataia bwa iai raoi te maiu aei imwiin te mate. Anne te kabanea n rietaata ni kouru ae ti mwakuriia.”

Te kabanea n taeka aei e karika okin au ururing ni maiu tebubua te ririki n nako ngke I ataeinimwaane n au kataneiai n riki bwa te tia korokoro. Teuana te katabeaki ae kaangaanga ae rinanona te tia korokoro, ni baika a riki, bon kaongoaia ana utu maten temanna ae a tangiria. N teuana te onaoraki are I mwakuri iai, e kateaki te ruu ae onoti ma oona ae warawara ike a kona iai kaain te utu ni karekei rongorongo mai iai. Ikanne, tabeman aomata a kaota rawawataia man ororean atuuia ma te oo ae warawara. E korakora nanou ni kan reireiniia koraki akanne bwa te mate, e ngae ngke e kaangaanga irouia ake a maiu ake a tangiriia, bon te itera ae kakaawaki ni maiura ae aki mamate.E karekea nakoira te mate bwa ti na rikirake nakon te maiu are imwiina.

Temanna te tia kaeka au titiraki e taku: “Akea nanon maiu ni karokoa are I wareka ana Boki Moomon. E ngae ngke I a tia n tataro ao n nako n au bootaki n taromauri inanon maiu, e buokai ana Boki Moomon n reitaki raoi ma te Tama are i Karawa n te moan tai.”

E taku temanna: “Ngkana akea ana Boki Moomon, N aki ataia ae te Tia Kamaiu e aki tii karawawataki ibukin ara bure, ma e kona ni katoka marakiu ao nanokawakiu.”

Ao temanna riki ana kaeka: “N na bae n aki ataia ae iai ara burabeti ae e na kairiira.”

Kamatebwaian koaua ake n ana Boki Moomon ni katoa bong e kona n riki bwa te taneiai ni bitakin te maiu. Temanna tibura te aine ae mitinare, Titita Olivia Nelson, e berita nakon ana aomata ae te mwaane bwa ngkana e wareka ana Boki Moomon ni katoa bong, a na nakoraoi riki ana bwi n ana ukeuke n te iuniwetiri. E karaoia, ao a nakoraoi.

Tariu ao mwaaneu, I kakoaua bwa ana Boki Moomon bon ana taeka ni koaua te Atua. Iai inanona kaekaan titiraki aika kakawaki man anainano ibukin maiura. E reireia taekan ana reirei Kristo. E karababai ao ni kamataatai angin koaua aika “mataata ma ni kakawaki” ake a tia ni bua rinanon tienture ao angiin rairairi n te Baibara.

Ana Boki Moomon e katauraoi atatai aika bwanin ao ni kakaawaki n ana Mwakuri ni Kamaiu Iesu Kristo ae e kona n reke n taabo nako. E reireia bwa tera raoi ae e nanonaki n te manga bungiaki. Man ana Boki Moomon ti reiakinaki taekan ikotakiia Iteraera ake a uamaenako. Ti ataa bukin menara ikai iaon te aba. Koaua aikai ao ake tabeua a korakora riki reiakinaia ao n anainano n ana Boki Moomon nakon booki riki tabeua. Mwaakan ana euangkerio Iesu Kristo ae bwanin iai inanon ana Boki Moomon. E toki.

Ana Boki Moomon e kamataatai ana reirei te Mwaatita ao ni kaoti ana bwai ni kamwane teuare e buakaka. Ana Boki Moomon e taekin reirei aika koaua ni kamaunai katein aaro aika kewe—n aron karaoan te bwabetito ibukiia ataei aika tibwa bungiaki. Ana Boki Moomon e anga te kantaninga ibukin te maiu ni kaumakiira ni iangoa raoi kakawakin te maiu ae akea tokina ao “te kukurei ae aki totoki.” Ana Boki Moomon e urui koaua aika kewe bwa te kukurei e kona ni kuneaki n te buakaka ao tamaroan te aomata anne ni kabane ae kainnanoaki n oki nakon matan te Atua. E katokii reirei aika kewe are te kaotioti e toki ma te Baibara ao karawa a kainaki n te bong aei.

Ngkana I iangoa ana Boki Moomon, I iangoa te taeka ae mwaaka. Koauan ana Boki Moomon iai mwaakana ni kamarurung, ni karaunano, ni kaoka, ni buoka, ni kakorakora, ni kabebete, ao ni kakukurei tamneira.

Tariu ao mwaaneu, I berita bwa ngkai ko tataromwaaka ni kamatebwaia ana Boki Moomon ni katoa bong, ko na karaoi babaire aika nakoraoi—ni katoa bong. I berita bwa ngkai ko iangoa te bwai ae ko kamatebwaia, a na uki wintoon karawa, ao a na kaekaaki am titiraki ao kaetieti ibukin maium. I berita bwa ngkana ko kamatebwaia ana Boki Moomon, ko na kamanoaki man buakakan te bong, n ikotaki ma kaorakin tamnei aika buakaka ao tabeua anua aika kareke ae kamatuua te iango.

Ngkana I ongo iroun temanna, n raonaki ma boni ngai, ni kangai, “I ataa ana Boki Momoon bwa e koaua,” I kan takarua, “E tamaroa anne, ma e aki tau!” Ti riai n namakinna, mai “kabin nanora”, bwa ana Boki Moomon e matata bwa bon ana taeka te Atua. Ti riai n namakinna mai kabin nanora bwa ti bon aki tangiria ni maiu teuana te bong ngkana akea. N na taekina aekakin ana rongorongo Beretitenti Brigham Young ni kangai, “I bia karekea itiua rebwen te baa bwa a na kautiia aomata” bwa a na ata koauan ao mwaakan ana Boki Moomon.

Ti riai n riki n aron te kairake ni mitinare aei ae e beku i Eurobe are e korakora ana namakin bwa e koaua ana Boki Moomon are e biri ma kaobiiin te rongorongo ae tabu aei nakon te mwaane are e kunea n te bwaake ngaia ma toana.

I kakoaua bwa bon Iotebwa Timiti bon te burabeti ngkoa ao ni boong aikai. Boni ngaia are, rinanon ana bwaintangira ao mwaakan te Atua, e raira te boki ae tabu aei. Aio te boki are e na ibuobuoki ni katauraoa te aonaaba ibukin Kauaokin te Uea.

I Kakoaua bwa Iesu Kristo bon Natin Atuara ae maiu. Boni Ngaia ara Tia Kamaiu ao te Tia Kabooira, te tia Tei Imarenara ma te Tama. Boni Ngaia te Mesia are e taekinaki n te berita, te Mesia n te rabwata, ao te Mesia ae e na tautaeka n te Mereniam. I kakoaua ma nanou ae bwanin bwa n te kawai ae rang kamiimi man onoti, ana Boki Moomon e reireiniira taekan Iesu Kristo ao Ana euangkerio.

I ataia bwa Beretitenti Thomas S. Monson bon ana burabeti te Atua ngkai iaon te aba. I tangiria ao ni boutokaia ma nanou ni kabane. I kakoaua n aran Iesu Kristo ae tabu, amen.

Ana Riiti Beretitenti Nelson n ana Boki Moomon.

Ana Boki Moomon bon:

• Teuana Kakoauan Iesu Kristo. Taan korea te boki—Nibwaai, Iakobwa, Momoon, Moronaai—ao ana tia raitaeka, Iotebwa Timiti, ngaiia ni kabane a tia n noora te Uea i mataia.

• Rongorongon Ana mwakuri nakoia aomata ake a maeka i Amerika n taai ake Ngkoa.

• E koaua, n aron ae e taekinaki iroun te Uea n tii Ngaia.

Ana Boki Moomon e kamatoa:

• Kinaakin te Tama are i Karawa ao Natina ae Tangiraki, Iesu Kristo.

• Riain Bwakan Atam ao wanawanan Nei Ewa, bwa aonga aomata ni karekea te kimwareirei.

Ana Boki Moomon e kaoti iango aika bure bwa:

• Te kaotioti e toki n te Baibara.

• Ataei aika uarereke a riai ni bwabetitoaki.

• Te kukurei e kona n reke man karaoan te buakaka.

• Tamaroan te aomata e tau ibukin te karietataaki (otenanti ao berita aika tabu a kainnanoaki).

• Bwakan Atam e kabarekaia aomata ma “te moan bure.”

Ana Boki Moomon e kakoroi bukin taetae ni burabeti n te baibara are:

• “Tiibu tabemwaang” a na ongo bwanaana.

• Te Atua e na karaoa “te mwakuri ae kamiimi ma ni kakubanako,” n taetae “man bubun te tano.”

• Ana “kai Iuta” ao ana “kai Iotebwa” a na riki n tii teuana.

• Iteraera ae uamae e na manga ikotaki “boong aika kaitira” ao e na kanga ni karaoaki anne.

• Abaia taan bwaibwai ibukin kanoan Iotebwa bon Iteran te Aonaaba i Mainuku.

Ana Boki Moomon e kamataata taekan:

• Rikira n te aonaaba n tamnei

• Te Mate Bon mwakoron ana baaire ni kakukurei ae korakora te Atua.

• Te aonaaba n tamnei imwiin te mate, e moanaki n te bwaretaiti.

• Mangautin te rabwata, n ikotaki ma tamneina, e riki bwa te tamnei ae aki mamate.

• Motikan taekara iroun te Uea e na kaineti man ara mwakuri ao ara iango inanora.

• A kanga otenanti ni karaoaki raoi: n aron te katooto, te bwabetitio, te toa, anganakina te Tamnei ae Raoiroi.

• Ana Mwakuri ni Kamaiu Iesu Kristo.

• Te Mangauti.

• Tabeia ae kakawaki anera.

• Rikin te nakoanibonga ae akea tokina.

• E kanga te anua n aomata ni kairoro riki man mwaakan te taeka nakon mwaakan te kabaang.

Ana Boki Moomon e kaoti rongorongo aika tuai ataaki mai imwaaina:

• Bwabetito a karaoaki imwaain bungiakin Iesu Kristo.

• A kateaki tembora ao ni kamanenaaki irouia aomata n taai ake ngkoa i Amerika.

• Iotebwai, ana ka te 11 n nati ni mwaane Iteraera, e a kaman noora te taetae ni burabeti ibukin ana beku Iotebwa Timiti.

• Nibwaai (n 600–592 B.C.) e a kaman noora kuneakin ao tautaekanakin Amerika.

• Mwakoron te Baibara aika mataata man kakawaki a tia ni bua.

• Ootan Kristo a anganaki aomata n tatabemaniia nako.

• Kakawakin ana rinerine te aomata ao riain kaitaraan bwaai ni kabane.

• Kauring ibukin “mwakuri aika raba.”