Te Rairannano Bon Te Bwai Ae Raoiroi n Tainako

N tainako ti iangoa te rairannano bwa te bwai ae kamweengabuaka man kananokawaki. Ma ana babaire te Atua bon te baire ni kakukurei, ao tiaki te kananokawaki! Te rairannano bon kamaiuakira (man ara bure ao n rawawatara, n aron te katooto). Bon te bure are e uota te nanokawaki. Te rairannano bon kawaira nakon te kamaiuaki! E kabwarabwara Unimwaane D. Todd Christofferson: “N akean te rairannano, bon akea te rikirake ni koaua ke te nakoraoi ni maiura. … Ti rinanon te rairannano ae ti na karekea iai ana nanoanga ni kamaiu Iesu Kristo ao te kamaiuaki. Te Rairannano … e kairiira nakon te kainaomataaki, te mweengaraoi, ao te rau.” Au rongorongo nakoia ni kabane—riki nakoia kairake—e kangai bwa te rairannano bon te bwai ae raoiroi n tainako.

Ngkana ti taetae iaon te rairannano, tiaki ti taetae iaon kanakoraoan arora. Te rairannano ni koaua e raka riki nakon anne—e kairaki man te onimaki ni mwakan te Uea Iesu Kristo ao Mwaakana ni kabwarai ara bure. N aron are e a tia Unimwaane Dale G. Renlund n reireiniira, “N akean te tia Kabooira, … e na riki te rairannano bwa kaungaan aroaro aika a kamweengabuaka.” Ti kona ni kataia ni bita maiura i bon iroura, ma ti te Tia Kamaiu ae kona ni kanakoi ara bure ao ni buoki rawawatara, ni kona ni kairi kawaira nakon te ongotaeka ma te mweengaraoi ao te korakora. Kakukurein te rairannano e raka riki nakon te kimwareirei man maiuakinan te maiu ae karaunano. Bon kakukurein te kabwarabure, ao ni manga kaitiakaki riki, ao ni kaan riki nakon te Atua. Ngkana ko rinanon te kimwareirei anne, akea riki onean mwiina ae kona ni karaoia.

Te rairannano ni koaua e kaungaira bwa ti na karaoa te ongeaba bwa ara motinnano—te berita, ni moa man te bwabetito ao ni kaboua ni katoa wiiki n ana toa te Uea. Ikekei ti karekea te berita ae ti kona iai “bwa e na memena Tamneina n taainako i [roura],” ma te kimwareirei ni kabane ao te rau aika roko man Ana iraorao ae teimatoa. Aio uaan te rairannano, ao aio are e karika te rairannano bwa e na kakukurei!

I tangira te taetae ni kaikonaki ibukin te nati ae bakatae. Iai te bwai ae kakawaki n te bitaki ae karaoaki ngke te nati ae bua “e a manga reke nanona ae wanawana.” N tekatekana n aia tabo beeki, e tangiria ni kani “kaona biritona ni uaan te keratio ake a kangi beki,” e kunea imwiina bwa e aki ti bakataea ana bwai tamana ma maiuna naba. Karekean te onimaki ae e na kona ni kariaia tamana bwa e na oki—ngkana tiaki natina tao ngkanne e riki bwa te toro—e nanomatoa ni katuka nanona n aki ongotaeka ao n okira mweengana.

I a tia n iangoa aron nakonakon natina ae abwabwaki n okira mweengana. A roko taai are ngkana e rawa ao n iango, “N na kanga ni butimwaeaki iroun tamau?” Tao e na oki rikaaki tabeua te rangata nakon te tabo ni beeki. Iangoia bwa e na kanga te karaki ni bitaki ngke arona bwa e bwarananona. Ma e kateimatoa ana onimaki, ao te onimaki e kateimatoa tamana n tarataraia ao n tataningaia, ni karokoa n tokina:

“Ao ngke e mena i kiraroa, ao e noria tamana, ao e nanoangaia, ao e biri, ao e baka iaon roroana, ao e kaboria ma ngaia.

“Ao e taku te nati nakoina, Tamau, I bure nakoni karawa, ao I matam, I aki riai ba n na manga atongaki ba natim.

“Ma e taku te tama nakoia ana toro, Kam na kawaetataingkami n uota mai te ninira are moan te raoiroi, ao karinna i aona; ao karina te burenibai i baina, ao kaau i waena: …

“Ba e mate natiu aei, ao e a manga maiu; e bua, ao e a manga reke.”

Tariu ao mwaneu, ti bane ni katootonga te nati ae bakatae. Ti na bane “n oki i bon iroura”—n tainako e raka iaon teuana—ao n rinea te kawai n oki nakon mweengara. Bon te rinerine ae ti na karaoia ni katoabong, rinanon maiura.

Ti aki toki ni karekerekea te rairannano ma te bure ae kakaiaki ae kainnanoa “te bitaki ae korakora.” Ma te rairannano bon ibukira ni kabane—naake a nako nanon “kawai aika katabuaki ao[a] bua” n raonaki ma naake a “toua [te] kawai ae eti ao n irariki” ao ngkai e kainnanoia ni “waaki nako.” Te rairannano e katikuira n te kawai ae eti ao ni kateimatoaira n te kawai ae eti. Bon ti ibukiia naake a tibwa moanna ni kakoaua, naake a tia n onimaki inanon maiuia, ao naake a riai ni manga kakoaua. N aron are e reirei Unimwane David A. Bednar: “Angiia mai ibuakora a matata n ataia bwa te Mwakuri ni Kamaiu bon ibukiia taan bure. I aki koaua raoi, bwa, ti ataia ao ti ota bwa te Mwakuri ni Kamaiu bon ibukiia naba aika itiaki—ibukiia mwane ao aine aika raoiroi man ongotaeka, n tau,ao … ni kataia n tamaroa riki.”

N te tai aei I kawara aia tienta mitinare ni kataneiai ngke a roko te kurubu ni mitinare ae boou. I rangi n rootaki ngke I taraiia ao n noora nanoia ae kukurei iaon moaia. A taraa ni kimwareirei ao ni kukurei ao n ingainga nanoia. Ngkanne e roko te iango nakoiu: “A tia n rinanon te onimaki nakon te rairannano. Aio bukina ngkai a onrake n te kimwareirei ao te kaantaninga.”

I taku bwa e aki nanonaki nakoia mitinare aika boou bwa iai aia bure aika kakaiaki n taai aika nako, ma a ataa aron te rairannano; a tia n reiakinna bwa te rairannano e raoiroi, ao a tauraoi nanoia n tibwaua te koaua ae te rairannano e kakukurei nakon te aonaaba.

Aio te bwai ae riki ngkana ti namakina kakukurein te rairannano. Iangoa ana katooto Enoti. Iai oin “nanona ae wanawana”, ao imwiin ae a “mauna ana bure,” e waekoa ni bitaki ana namakin nakon buokaia tabeman. Enoti e kabanea nikiran maiuna ni kaoia aomata ni kabane bwa a na rairinanoia ao “ni kimwareirei iai n riao riki bwain nako te aonaaba.” Te rairannano e karaoa anne; e biti ara namakin nakoia raoraora ibukina bwa ti ataia bwa te kimwareirei ae ti namakinna e nanonaki bwa e na ataaki irouia aomata ni kabane.

Iai raoraou te ataeinimwaane ae ikawairake n aia utu Aika Itiaki ni Boong Aika Kaitira aika aki rangin ni kakaonimaki. Ngke te kairake n ikawai ngaia, e roko “naba irouna” ao n iangoia bwa e na katauraoia ibukin te mition.

E riki bwa te mitinare ae moan te tamaroa. N ana kabanea ni bong imwain ae okira mweengana, te beretitenti n te mition e intawiunna ao n tuangnga bwa e na kaota ana koaua. E karaoia, ao imwiin ana inga ma te beretitenti n te mition, e taku te beretitenti, “Unimwaane, ko kona ni mwaninga ke n aki tabe ma bwaai ni kabane aika ko a tibwa tia ni kakoauai inanon teuana te namwakaina ngkana ko aki teimatoa ni karaoi bwaai aika a na kakorakora am koaua n te moan tai.”

E tuangai raoraou imwiina ae a tia n tataro ao ni wareki booki aika tabu ni katoa bong man te tai are e oki iai man ana mition. N teimatoa ni “kamwarakeaki n ana taeka te Atua” e a tia ni kawakinna “n te kawai ae eti.”

Ngkoe ae ko katauraoiko ibukin te mitinare ae bwanin ana tai ao ngkoe ae ko a oki, kakauongo ao korei bwai aikai! E aki tau ti karekean te koaua; ko riai ni kateimatoa ao ni kakorakoraa. Ao mitinare ni kabane a ataia, ngkana ko katoka toutouan rangan te bwatika, e na bwaka, ao ngkana ko katoka kakorakoraan am koaua, e na mamaara. Te aekaki n tua naba aei e kaineti ma te rairannano—bon te mwakuri ae teimatoa, tiaki te taneiai ae ti teuana ni maiura.

Nakoia ni kabane naake a ukoukora te kabwarabure—kairake, kairake n ikawai aika a tuai iein, kaaro, tiibu, ao eng, riki te tibutoru—I kaoi ngkami bwa kam na okira te kawai ae eti. Aio ngkai te tai ni waaki. Tai kawaeremwea bongin ami rairannano.

Ngkanne, n te tai are ko a tia ni karaoa te babaire anne, teimatoa n ira te kawai. E tataaninga Tamara, n ingainga ni kan karekea. E arora baina “inanon te bong ae bwanin” ibukim. Te kaniwanga e materaoi rekena.

Uringa ana taeka Nibwaai: “Ngaia ae kam waaki nako man teimatoa inanon Kristo, ma te kaantaninga ae tamaroa ma ni kororaoi, ma tangiran te Atua ma aomata ni kabane. Mangaia ae kam na waaki nako, ni kaawakin ana taeka Kristo, ao n teimatoa ni karokoa te toki, ao taraia, e kangai ana taeka te Tama: E na reke iroumi te maiu ae akea tokina.”

N tabetai e na taraa n abwabwaki te mwananga—ma n tokina, bon te mwananga nakon te maiu ae akea tokina. Ma e kona n riki bwa te mwananga ae kakimwareirei ngkana ti karaoia ma te onimaki iroun Iesu Kristo ma te kaantaninga are ti na karekei kakabwaia n Ana Mwakuri ni Kamaiu. I kakoaua bwa te tai are ti moana karaoan iai te rairannano, ti kaoa mwakan te Tia Kamaiu ni kabooi maiura. Te mwaaka anne e na kamatoaira n ara rairannano, karababai ootara, ao ni kakorakorai nanora n teimatoa ni waaki nako, terangatana imwiin te rangatana, ni karokoa te bong ae kakukurei anne ngkana ti oki nakon mweengara i karawa ao n ongo ana taeka te Tama nakoira, “E nakoraoi.” N aran Iesu Kristo, amen.