Dali, Sunod Kanako
Usa ka Bag-o nga Panglantaw sa Paghinulsol
Ang paghinulsol labaw pa sa pagpangayo lang og pasensya alang sa inyong mga sala—pagkahimo kining labaw nga sama ni Jesukristo.
Sa Ang Simbahan ni Jesukristo sa mga Santos sa Ulahing mga Adlaw, maghisgot kita og kadaghan—og paghinulsol. Ngano?
Nagbuhat kita niini tungod kay ang paghinulsol usa sa mahinungdanong mga baroganan sa ebanghelyo ni Jesukristo (tan-awa sa Mga Artikulo sa Hugot nga Pagtuo 1:4). Dili lang usa ka maayong butang ang paghimo o usa ka paagi nga “hikalimtan” ang atong mga sala (tan-awa sa Doktrina ug mga Pakigsaad 58:42). Hingpit ang kamahinungdanon niini sa atong pagkahimong labaw nga sama sa Manluluwas ug nga sa usa ka adlaw magpuyo uban sa Langitnong Amahan ug sa atong mga pamilya sa hangtod.
Ang paghinulsol usa ka “pag-usab sa hunahuna ug sa kasingkasing nga magdala og bag-o nga kinaiya ngadto sa Dios, sa kaugalingon, ug sa kinabuhi sa kinatibuk-an.” Busa, ang punto sa paghinulsol mao ang pagtabang nga kita mausab ug makakita sa Dios, sa atong kaugalingon, ug sa mortalidad sa lahi nga paagi, sa mas maayong paagi. Apan unsaon man nato sa paghimo niana?
Pagpangita kang Kristo
Si Elder Dale G. Renlund sa Korum sa Napulog Duha ka Apostoles mitudlo nga ang Swedish nga pulong alang sa “paghinulsol” mao ang omvänd, sa literal nagpasabot sa “pagpangita kang kristo.” Miingon siya, “Ang tinud-anay nga paghinulsol kinahanglang maglakip og hugot nga pagtuo diha ni Ginoong Jesukristo, hugot nga pagtuo nga makapausab Siya kanato, hugot nga pagtuo nga makapasaylo Siya kanato, ug hugot nga pagtuo nga tabangan kita Niya nga makalikay sa dugang pang mga sayop. Kini nga matang sa hugot nga pagtuo maghimo sa Iyang Pag-ula nga epektibo sa atong kinabuhi.”
Ang paghinulsol dili lamang pagtalikod sa sala apan usa ka kompleto, tinuyo, hingpit nga pag-atubang kang Jesukristo. Hunahunaa kini sa ingon niini nga paagi: Kon mosulay ka sa pagduol ngadto sa usa ka tawo aron makigsulti kaniya, paatras ba ang imong pagduol? Ikaw ba nakaabot ngadto niya patakilid padulong sa tuo o sa wala? Ingon og lisod kana nga mga paagi sa pagpakigtagbo og usa ka tawo. Kon wala pa gayod ka nakalingi sa hingpit kung asa ka padulong (o kinsay imong himamaton), mas sayon ang pagliko sa sayop nga direksyon. Sa kinatibuk-an, mas dali ang pag-ingon nga ang pag-istoryahanay mas sayon ug mas maayo nga duolon nimo ang tawo samtang nag-atobang kanila.
Mao usab alang sa paghinulsol. Ang Manluluwas modawat ug malipay sa atong mga paningkamot nga maghinulsol, apan epektibo lamang kini kon nakatutok sila Kaniya. Kon dugangan pa nato ang paggamit og pagtuo kang Jesukristo, moila sa atong mga sayop, mangayo og pasaylo niini, ug maningkamot nga masulbad kini, mas mahisama kita Kaniya.
Ang Panawagan sa Manluluwas Kanato
Hunahunaa kung unsa kamalipayon ang Manluluwas nga makita ka nga hilabihan ang paningkamot aron molambo! Miingon siya: “Kay, tan-awa, ang Ginoo nga inyong Manunubos nag-antos sa kamatayon diha sa unod; mao nga nag-antos siya sa kasakit sa tanang tawo, aron ang tanang tawo maghinulsol ug moduol kaniya. …
“Ug pagkadako sa iyang kamaya sa kalag nga naghinulsol!” (Doktrina ug mga Pakigsaad 18:11, 13).
Si Jesukristo nag-antos aron kita adunay kahigayonan nga maghinulsol. Kon dili kita maghinulsol, wala nato tugoti ang Iyang makaula nga gahom nga moimpluwensiya sa atong kinabuhi. Kon magpaubos kita sa atong kaugalingon ug mosalig sa Manluluwas, mas momaayo kita, ug mas mahisama kita Kaniya.
Sama nga ang Manluluwas magmaya kon kita maghinulsol, kita usab mobati niana nga kamaya. Si Elder Craig C. Christensen sa Seventy mitudlo, “Kon kita maghinulsol sa atong mga sala, kita kinahanglan gayod nga motutok sa talagsaong hingpit nga kalipay nga mosunod. Ang espirituhanon nga kangitngit ingon og taas, apan sa kataposan mobati kita og kalipay, ug oh, pagkatalagsaon sa kalinaw ug kasanag sa kalipay nga atong mabati tungod kay ang Pag-ula sa Manluluwas nakapalingkawas kanato gikan sa sala ug pag-antos.”
Ug dili nato hikalimtan: Ang Langitnong Amahan gusto nga ang tanan sa Iyang mga anak makabalik pauli Kaniya. Gitawag kita sa paghinulsol, sa pagpakigbahin sa ebanghelyo, ug pagdapit sa tanan sa paghinulsol ug paglambo. Wala kana magpasabot nga molibot kita sa pagsinggit og “Paghinulsol, paghinulsol!” ngadto sa katawhan diha sa kadalanan. Kondili, kon tukma man, mapinanggaon kitang moawhag niadtong mga anaa sa atong palibot sa pagduol ngadto sa ilang Manluluwas nga si Jesukristo ug magmahimong mas maayo pa kay sa unsay ilang mahimo sa ilang kaugalingon.