Kayo. Mga kutsilyo. Nagsayaw. Ug ang Ebanghelyo.

Ang Samoan nga pagsayaw sa fireknife, o ailao afi, usa ka modernong pagdawat sa usa ka tradisyonal nga sayaw nga panggubat. Kini usa ka talagsaon nga talento, usa ka matang sa arte ug pagpahayag, ug, para sa kadaghanan, usa ka paagi sa pagpasidungog sa ilang kultura.

Ania kon giunsa sa tulo ka batan-on gikan sa Hawaii, USA, sa pagpasabot niini:

Vivian, 18: “Sumala sa tradisyon, mao kadto ang mga butang nga gibuhat sa mga manggugubat gamit lang ang usa ka kutsilyo. Pagkataodtaod, ang kayo ug ang pagtuyok gidugang. Kini susama kaayo sa pagpatuyok sa baton, nga adunay kayo sa isig ka tumoy.”

Tui, 12: “Ang Fireknife nga pagsayaw naglambigit og dakong kainit. Aduna usab kini daghang pagpatuyok. Ang kutsilyo iitsa pa gani nimo ug ibalhin balhin kini samtang kini nagtuyok.”

Joseph, 18: “Kon ang kayo mokurog, ang hangin managhoy, ug ang mga tambol gipatugtog, kini kusog kaayo. Apan sa tinuod, usa kini ka hilom nga espirituhanong higayon alang kanako, tungod kay kini dako kaayo og kahulogan para nako. Ang Fireknife usa ka paagi nga ako makakonektar sa akong pamilya ug sa akong kultura.”

Alang sa niining mga kabatan-onan, ang fireknife nga pagsayaw dili lang usa ka maanindot ug talagsaon nga talento. Nakatudlo usab kini kanila og daghang bililhong mga leksiyon sa kinabuhi mahitungod sa pagpabiling suod sa Ginoo pinaagi sa pagsunod sa ebanghelyo ug pagtabang sa uban.

Kon kamo magsayaw og fireknife, daghang butang ang lagmit masipyat. Ang gunitanan mahimong mahumod sa gasolina, makapadangog niini. Ang hangin mahimo usab nga makapausab sa mga hitabo ug mahimong lisod ang pagsalo sa kutsilyo. Ang pagsalig sa Ginoo samtang nagsayaw nahimong dakong tabang para nako.

Usa sa akong paboritong kasulatan mao ang Mga Panultihon 3:5, nga naghisgot mahitungod sa pagsalig sa Ginoo sa tibuok mong kasingkasing. Tingali importante kana tungod kay sa panahon sa pasundayag inyong maamgohan nga inyong gibuhat ang tanan niana nga pagbansay, apan suma total ang tanan anaa ra gayod kana kaninyo, sa kutsilyo nga nagkayo, ug sa Langitnong Amahan.

Ganahan ko nga mag-ampo sa Langitnong Amahan, “OK, giandam na nako ang buluhaton, karon palihog giyahi ang akong mga kamot.”

Adunay daghang pagpangandam ngadto nianang mga kompetisyon sa fireknife. Nagpraktis ako matag adlaw sulod sa mga unom ka bulan padulong sa kompetisyon.

Mahimong lisod usab kini, tungod kay ang akong iskedyul busy kaayo. Apan kanunay kong mogahin og panahon alang sa Ginoo pinaagi sa pag-adto sa simbahan, mga kalihokan sa Young Men, ug seminary ug pinaagi sa pagbasa sa akong mga kasulatan ug pag-ampo. Kon buhaton nako kining mga butanga, akong namatikdan ang kalainan sa akong adlaw. Ang tanang butang mahapsay ra.

Ako siguradong mobati nga si Kristo anaa alang kanako. Kon mosalig kamo sa Ginoo ug maningkamot sa pag-una Kaniya, Siya motabang kaninyo sa bisan unsa nga kinahanglan ninyong buhaton.

Sa pagdako, motan-aw ko sa akong mga uyoan ug mga ig-agaw nga mosayaw sa fireknife. Nagtuo ko nga maanindot kaayo kini, apan ambot kon makahimo ba ko mismo niini. Sa high school, gihimo nako kini nga usa sa akong mga tumong ang pagkat-on kon unsaon sa pagbuhat niini. Pagkahuman nga ako nakat-on, akong gihimo ang akong tumong nga mas piho: Gusto ko nga moapil og sangka sa kompetisyon sa fireknife.

Ang Fireknife nakatabang kanako nga makabaton og pagsalig sa akong kaugalingon. Kon ikaw nagsayaw, adunay piho nga mga lihok diin imong iitsa ang kutsilyo, motan-aw niini diha sa kahanginan, ug dayon saluon kini. Naandan nakong molikay gikan sa suwab human nako kini iitsa. Gitudloan ko sa akong papa nga kinahanglan kong mosalig ngadto sa paglihok ug magmasaligon sa akong kaugalingon.

Paglabay sa panahon, nagsugod ako sa pagdala sa akong kaugalingon nga mas masaligon samtang mopasundayag ug sa tanan pang mga butang. Nindot gayod kini karon tungod kay usahay ang mga batang babaye moduol kanako pagkahuman sa mga pasundayag ug moingon nga nadasig sila ug gusto usab nga sulayan ang pagsayaw sa fireknife. Mahinamon kaayo ko nga ako makadasig sa ubang mga tawo sa pagbuhat og butang nga sa ilang hunahuna nga tingali dili nila kayang buhaton.

Kon mopasundayag ko, dili ko makulbaan. Mobati ko og kulbahinam. Akong nakat-onan nga bisan og masayop ko, mapanindot ko kini. Hapit parehas ra kini sa pagdibuho. Kon ang usa ka pintor masayop, mahimong ilaha kining mahimo ngadto sa usa ka bag-ong butang. Usahay ihulog nako ang akong fireknife, apan puniton ko kini ug magpadayon sa pagsayaw.

Ang pagdasig sa kaugalingon nakatabang kaayo nako batok sa akong kahadlok. Imbis nga magbaton og mga hunahuna sama sa, “Unsaon na lang kon masipyat ko?” Naningkamot ko nga makabaton og dugang mga hunahuna sama sa, “Aw, unsa kaha kon mobuhat ko og maayo!”

Nahimo usab kining tulumanon para nako ang paglitok og usa ka gamayng pag-ampo sa matag higayon sa dili pa ang usa ka pasundayag sa fireknife. Ang pag-ampo nanalipod kanako ug nagtabang kanako nga makahimo og maayong pagsayaw. Kon mag-ampo ko, ako mobati og kamasaligon nga makahimo ko og maayo.

Sa dili pa ko mopasundayag sa fireknife, kasagaran makulbaan ko. Sa matag higayon sa dili pa ko mopadayon, molitok ako og usa ka pag-ampo. Usa ka higayon, sa wala pa ko mopadayon nag-ampo ko, ug mibati ko og kainit ug wala na mahadlok. Sa dihang misayaw na ko, gibati nako nga adunay usa nga nagbarog didto sa akong tupad.

Ang pag-ampo nakatabang gayod kanako nga dili makulbaan. Pagkahuman nako sa pag-ampo, nakaamgo ko nga nalingaw lang ko!

Niining miaging ting-init, mipasundayag kami og fireknife didto sa Romania ug Bulgaria. Ang akong papa sa kanunay mohangyo nga among tun-an ang “Gugma sa Panimalay” (Mga Himno, nu. 294) sa pinulongan sa mga nasod nga among bisitahan. Gihimo namo kini aron makaawit kami og dungan isip usa ka pamilya human kami magpasundayag.

Sa akong hunahuna ang mensahe sa gugma sa panimalay importante tungod kay nagpahinumdom kini kanato sa pagbaton og gugma bisan asa kami moadto. Gibati nako nga akong gibayaw ang ubang tawo ug makalipay kanila. Ug bisan usahay dili sila makasulti sa akong pinulongan, nasayod ko nga ilang nabati ang ebanghelyo nga gipaambit pinaagi sa among mga talento.

Nainoa A., 13

Ang mensahe sa gugma sa panimalay importante tungod kay kon ang mga tawo wala masayod nga adunay gugma sa ilang palibot, nan sila mahimong miserable. Kon dunay gugma sa akong panimalay, mobati ko nga malinawon ug kalma.

Ang Fireknife nga pagsayaw usa ka paagi nga kining kabatan-onan mopadan-ag sa ilang kahayag ug pagpakigbahin sa ilang mga talento ngadto sa uban. “Makahimo ko sa pagpasundayag ug pagpakigbahin sa akong mga talento sa tibuok kalibotan uban sa akong pamilya. Makapahimo kini nako nga mobati og kalipay sa kahiladman nga mahibalo nga kon imong ipakigbahin ang imong mga talento, nan ikaw mobayaw sa uban,”miingon si Nainoa.

Ang mas magulang nga igsoong lalaki ni Nainoa, si Kawiki, nag-ingon nga ang fireknife nga pagsayaw nagpahinumdom kaniya kon giunsa ang kahayag makaapas sa kangitngit. Para niya, ang pagpakigbahin sa iyang mga talento sama ra og nagpaambit sa iyang kahayag ngadto sa uban.

Si Joseph miingon nga kon kita mosanag, kita mosanag alang sa Langitnong Amahan. “Kon kita mopakigbahin sa unsay anaa kanato, dili lamang kita mopanalangin sa atong kaugalingon, o mopanalangin niadtong atong gipakigbahinan sa atong mga talento, apan kita usab ingon og nagdayeg sa atong Langitnong Amahan.”

Si Vivian miingon nga ang iyang apohang lalaki kanunayng mopakigbahin sa kasulatan sa Mateo 5:16, nga naghisgot bahin sa pagpasidlak sa atong kahayag atubangan sa mga tawo. “Sa akong hunahuna usa ka kini ka maayo nga kasulatan tungod kay wala kinahanglana nga maayo kamo sa fireknife aron makapakigbahin sa ebanghelyo. Mahimo kang maayo sa bisan unsa ug gamiton ang imong mga talento sa pagpakigbahin sa ebanghelyo niana nga paagi.”