Nakatago nga mga Bahandi

Doktrina ug mga Pakigsaad 19 nagpasabot og duha ka butang bahin sa Manluluwas.

Si Lucas nag-ingon nga ang singot sa Ginoo didto sa Tanaman sa Getsemani “sama sa dagkong tulo sa dugo” (Lucas 22:44). Ang “sama” nagsugyot nga kana usa lang ka pasumbingay.

Giklaro kini ni Jesus. Siya nag-ingon nga ang Iyang pag-antos mihimo Kaniya “sa pag-agas sa dugo sa matag lungag sa panit” (Doktrina ug mga Pakigsaad 19:18). Walay mga pasumbingay. Ang Iyang kasakit hilabihan kaayo nga siya misingot gayod og dugo.

Sa laing mga dapit, ang mga kasulatan migamit og mga hugpong sa mga pulong sama sa “walay kataposan nga pag-antos” ug “walay kataposan nga silot.” Si Alma nga Batan-on nag-ingon nga siya “gisakit … sa mahangtorong kahasol” (Alma 36:12). Apan ang iyang kahasol milungtad lamang og tulo ka adlaw (tan-awa sa Alma 36:16). Sa unsang paagi kana “mahangtoron”?

Usab, giklaro ni Jesus. Tungod kay ang Langitnong Amahan ug si Jesus mahangtoron ug walay kataposan, ang bisan unsang silot nga ilang ihatag mao, pinaagi sa kahulogan, “mahangtoron” o “walay kataposan” nga silot, bisan unsa pa ang gidugayon (tan-awa sa Doktrina ug mga Pakigsaad 19:6–12). Sa pagkatinuod ang pag-antos sa mga anak sa kapildihan ang molungtad lamang sa kahangtoran (tan-awa sa Doktrina ug mga Pakigsaad 76:30–38).

Ang potensiyal nga mga kinabig kasagaran mangutana sa mga misyonaryo: Unsa man kon nabunyagan na ko sa laing simbahan? Kinahanglan ba akong bunyagan og usab?

Ang Doktrina ug mga Pakigsaad nagpasabot nga kon wala ang pagkapari—ang awtoridad sa paglihok sa ngalan sa Dios—“bisan og ang usa ka tawo bunyagan og usa ka gatos ka higayon kini dili makatabang kaniya,” (Doktrina ug mga Pakigsaad 22:2).

Busa ang tubag ingon niini: “Ang imong una nga bunyag usa ka matarong nga buhat base sa unsay imong nahibaloan niadtong higayona. Karon ikaw nasayod og dugang, ug ang Ginoo gusto nga ikaw molihok niana nga kahibalo.”

Si Propeta Joseph Smith dili maayo sa patigayon o sa ekonomiya. Sa kalibotanon nga mga pulong, dili siya malamposon.

Gisultihan siya sa Ginoo nga ingon niana gayod kana: “Sa temporal nga mga paghago ikaw dili makabaton og kusog, kay kini dili imong balaan nga tawag” (Doktrina ug mga Pakigsaad 24:9).

Kamo maanaay mga higala ug mga kauban sa klase nga makaeskwela sa mas maayo nga mga unibersidad kaysa kaninyo, makakuha og mas nindot nga mga trabaho kaysa kaninyo, ug makabaton og mas kalibotanon nga kalamposan kaysa kaninyo.

Pero ngano man diay?

Ang kinabuhi dili usa ka sangka. Kinahanglan nga himoon ninyo ang inyong labing maayo, siyempre. Apan ayaw kabalaka kon makita ninyo nga ang uban mas nakabaton og kalibotanon nga kalamposan. Sila tingali wala nagpadulong sa samang destinasyon sama kaninyo! Padayon sa pagbuhat sa unsay gusto sa Ginoo nga inyong buhaton—inyong “calling”—ug ayaw kabalaka mahitungod sa Iyang mga plano alang ni bisan kinsa.

Ang Manluluwas kanunay nga mipahinumdom ni Propeta Joseph Smith nga ang tanan kinahanglan nga himoon “sa husto nga paagi.” (tan-awa sa Doktrina ug mga Pakigsaad 20:68–28; 28:13; 58:55; 107:84). Nagkinahanglan kamo og mga lagda o adunay kagubot.

Apan wala kana magpasabot nga wala gayoy mga kahigayonan sa pagpahaom-haom. Sama pananglit, ang Ginoo misulti kang Joseph Smith nga “dili importante unsay inyong kan-on o unsay inyong imnon kon ikaw moambit sa sakramento”—basta gihimo ninyo kini agi og paghinumdom sa Iyang pag-antos ug Pag-ula (Doktrina ug mga Pakigsaad 27:2).

Apan, kon kabahin sa pagpangulo sa Simbahan, wala gayoy pagpahaom-haom. Usa lang ka tawo matag higayon ang makadawat og pagpadayag alang sa Simbahan: una si Joseph Smith (tan-awa sa Doktrina ug mga Pakigsaad 28:2); dayon si bisan kinsa nga gitudlo sa Ginoo “puli sa iyang dapit” (Doktrina ug mga Pakigsaad 28:7) -Brigham Young, John Taylor, ug uban pa hangtod sa propeta karon.

Ang ubang dinasig nga mga lider sa Simbahan makatudlo, makaabiso, ug makahatag og tambag (tan-awa sa Doktrina ug mga Pakigsaad 28:4–5). Apan ang Presidente sa Simbahan lamang ang makapamulong alang sa Dios bahin sa mga butang nga makaapekto sa tibuok Simbahan.