Ang Inyong Langitnong Amahan Gusto nga Makig-istorya Kaninyo

Usa ka anghel ang misugo kang Adan ug Eva ug sa tanan kinsa mosunod kanila nga “maghinulsol ug motawag sa Dios diha sa ngalan sa Anak hangtod sa kahangtoran” (Moises 5:8).

Si Jesus mitudlo:

• “Pangayo, ug kamo pagahatagan; pangita, ug kamo makakaplag; panuktok ug ang pultahan ablihan alang kaninyo” (Mateo 7:7).

• “Ug kon mag-ampo ka, … pag-ampo ngadto sa imong Amahan … sa tago” (Mateo 6:6).

• “Busa, ingna hinuon niini pag-ampo: Amahan namo nga anaa sa langit, balaanon ang imong ngalan” (Mateo 6:9).

Si Jesus kanunay nga nag-ampo ngadto sa Iyang Amahan (tan-awa sa Lucas 6:12; Marcos 6:46). Sa Getsemani, Iyang gisultihan ang Iyang mga disipulo, “Panglingkod kamo dinhi samtang mag-ampo ako” (Marcos 14:32). Samtang anaa sa krus, si Jesus nag-ampo alang sa mga sundalo kinsa milansang Kaniya, “Amahan, pasayloa sila; kay wala sila makasabot sa ilang gibuhat” (Lucas 23:34).

Kita gitambagan sa “pag-ampo kanunay.” Samtang kita “[makigtambag] sa Ginoo sa tanan [natong] buhaton, … moagak siya [kanato] alang sa kaayohan;” (Alma 37:37). Dugang pa, kita “mopahinungod sa tanang pasalamat ug pagdayeg nga [atong] gibati pinaagi sa tibuok kalag nga paningkamot” (Mosiah 2:20).

Apan mas mahimayaon pa gayod, ang atong Amahan sa Langit motubag sa atong mga pag-ampo! Usa ka mahunahunaong pangutana alang kanato mao ang sa unsang paagi kita mas makadawat ug makasabot sa mga tubag, direksiyon, ug kahupayan nga gikan sa atong Amahan?

Ang pagdawat og mga tubag sa atong mga pag-ampo magsugod sa hugot nga pagtuo ngadto sa Langitnong Amahan ug sa Iyang Anak, si Jesukristo. Mosalig kita sa atong Amahan, mobuhat sa atong labing maayo sa pagtuman sa mga sugo, ug mangita alang sa Iyang impluwensiya sa tanan nga mga butang (tan-awa sa Doktrina ug mga Pakigsaad 59:21).

Ang inyong Langitnong Amahan mohatag og tabang ug suporta kaninyo, molig-on sa inyong mga abilidad, mohupay kaninyo, ug “ipahinungod … ang [inyong] mga kasakit alang sa [inyong] kaayohan.” (2 Nephi 2:2) samtang kamo motawag Kaniya.

Samtang kita magpakita og hugot nga pagtuo sa Dios ug motuman sa Iyang mga sugo, kita natural nga makakat-on aron mas makadungog sa Iyang tingog.

Niadtong 1993, si Presidente James E. Faust (1920–2007), kaniadto usa ka sakop sa Korum sa Napulog Duha ka Apostoles, midapit sa akong asawa, si Kathy, ug kanako nga motambong og usa ka debosyonal sa Brigham Young University uban kaniya. Kini nga debosyonal nahitabo sa wala pa kaayo magamit ang mga smartphone, social media, ug sa internet.

Sa iyang pakigpulong, si Presidente Faust mipasidaan, “Sa inyong henerasyon kamo makadungog og daghang mga tingog nga nagsulti ninyo kon unsaon sa pagpakabuhi, unsaon sa pagtuman sa inyong mga kahinam, unsaon sa pagbaton niining tanan.” Apan “ang tingog nga kinahanglan ninyong makat-onan nga patalinghogan mao ang tingog sa Espiritu.” Sa pagbuhat sa ingon, “kinahanglang atong ablihan usab ang atong mga dunggan, ipunting ang mata sa pagtuo ngadto sa gigikanan sa tingog, ug makanunayong mohangad ngadto sa langit.”

Pipila ka tuig ang milabay, si Presidente Russell M. Nelson mitudlo, “Apan kon mas tagdon ninyo ang mga post sa social media kay sa mga paghunghong sa Espiritu, niana gibutang ninyo ang inyong kaugalingon sa espiritwal nga peligro.”

Ang tingog sa Espiritu moabot sa atong hunahuna ug sa atong mga pagbati. “Ako mosulti kanimo diha sa imong hunahuna ug sa imong kasingkasing, pinaagi sa Espiritu Santo, nga moabot diha kanimo ug nga mopuyo diha sa imong kasingkasing” (Doktrina ug mga Pakigsaad 8:2). Paminaw sa inyong tanlag—ang pagpadayag kasagaran magsugod diha.

Ang mga tubag ug mga impresyon gikan sa Dios dili mahimong ipugos. Mag-ampo kita ug maghulat uban ang usa ka matuohon nga kasingkasing. Ang pipila ka tubag dili moabot niining kinabuhia, apan alang sa mga matarong, ang Ginoo sa kanunay mopadala sa Iyang kalinaw (tan-awa sa Juan 14:27). Sa pipila ka higayon, ang mga tubag moabot “pagtulun-an ngadto sa lain nga pagtulun-an, lagda ngadto sa lain nga lagda” (Doktrina ug mga Pakigsaad 98:12).

Ang tingog sa langit mahimong moabot nga wala damha kasagaran sa hilom nga mga luna ug sagradong mga dapit. Sa kahilom sa akong sayo sa buntag nga mga pag-ampo ug pagpamalandong, ako nakakaplag og talagsaong mga panalangin. Ang adlaw-adlaw, personal, walay pagbalda nga pagbasa sa mga kasulatan, samtang naandan na usahay, makadala sa tingog sa Espiritu ngadto sa atong mga kasingkasing sama sa kalayo sa ubang mga higayon.

Samtang ang kasaba ug ang mga makabalda sa kalibotan naglibot gayod kanato, ang Ginoo midirekta sa Iyang propeta sa pagtukod og mas daghan pang mga templo. Dinhi niining sagrado nga mga balay sa Ginoo, samtang biyaan nato ang atong mga hagit sa gawas ug mosulod uban sa atong mga pag-ampo ug mga kabalaka, kita tudloan sa mga kamatuoran sa kahangtoran. Usa ka tuig ang milabay, si Presidente Nelson misaad nga samtang kita mosimba diha sa templo, “Walay laing labaw pa nga makapaabli sa kalangitan. Wala!”

Ang matag kinatibuk-ang komperensiya magdala usab og dugang nga abunda nga mga panalangin. Sa umaabot nga bulan sa Abril, magpundok kita usab sa kinatibuk-ang komperensiya aron maminaw sa tingog sa Ginoo. Ako mosaad nga kon kamo mangandam ug mainampoon nga motambong sa kinatibuk-ang komperensiya, makakaplag kamo og mga tubag sa inyong mga kabalaka ug masayod nga ang “impluwensya sa langit,” anaa kaninyo.

Pagbaton og hugot nga pagtuo nga ang inyong Langitnong Amahan nakig-istorya kaninyo. Siya nakig-istorya gayod kaninyo! Tugoti nga ang inyong hugot nga pagtuo diha Kaniya ug sa Iyang Pinalangga nga Anak motabang kaninyo sa pagbulag sa tabil ug makadawat sa tingog sa inyong Amahan. Ako mopamatuod nga Siya anaa diha ug nahigugma kaninyo labaw pa sa masulti sa mga pulong.