ព្យាការី និងព្រះអង្គសង្គ្រោះរបស់លោក
តាមរបៀបមួយ រឿងរ៉ាវនៃការស្ដារឡើងវិញគឺជារឿងអំពីការខិតទៅកាន់តែជិតព្រះយេស៊ូវគ្រីស្ទរបស់ យ៉ូសែប ស្ម៊ីធ ។
Every Knee Shall Bow [ គ្រប់ជង្គង់នឹងលុតចុះ ] ដោយ ឌេន វិលសុន
រឿងរ៉ាវជីវិតរបស់ យ៉ូសែប ស្ម៊ីធ គឺលើសពីដំណើររឿងអំពីជីវិតរបស់ យ៉ូសែប ស្ម៊ីធ ។
នៅពេលយើងប្រាប់អំពីដំណើររឿងនៃការស្ដារឡើងវិញនូវដំណឹងល្អរបស់ព្រះយេស៊ូវគ្រីស្ទ យើងតែងតែចាប់ផ្ដើមដោយប្រាប់ពីរឿងរ៉ាវរបស់ យ៉ូសែប ស្ម៊ីធ ។ ហើយវាសមហេតុសមផល ។ លោកផ្ទាល់បានប្រាប់ពីរឿងរ៉ាវនៃជីវិតតាំងពីក្មេងរបស់លោកបីបួនដងផ្សេងៗគ្នា ដើម្បីជួយមនុស្សឲ្យយល់ពីរបៀបដែលការស្ដារឡើងវិញបានចាប់ផ្តើម ។ ប៉ុន្តែតាមរបៀបមួយ រឿងរ៉ាវអំពីជីវិតរបស់ យ៉ូសែប ស្ម៊ីធ គឺជាដំណើររឿងអំពីការខិតទៅកាន់តែជិតព្រះយេស៊ូវគ្រីស្ទរបស់លោក ។
ការនិមិត្តអំពីការអភ័យទោស
យ៉ូសែប ស្ម៊ីធ វ័យក្មេងមានអារម្មណ៍ច្របូកច្របល់អំពីសាសនា ។ ហើយមានអារម្មណ៍មួយបន្ថែមទៀតដែលបានជំរុញលោកឲ្យអធិស្ឋាននៅក្នុងព្រៃ ជាកន្លែងដែលលោកបានទទួលការនិមិត្តដំបូងរបស់លោក ៖ « ខ្ញុំមានអារម្មណ៍សោកសង្រែងចំពោះអំពើបាបរបស់ខ្ញុំផ្ទាល់ » ។
ពេលដែលព្រះអង្គសង្គ្រោះបានមានបន្ទូលទៅកាន់យ៉ូសែប ទ្រង់មានបន្ទូលថា « យ៉ូសែប កូនប្រុសអើយ បាបទាំងឡាយរបស់អ្នកត្រូវបានអត់ទោសឲ្យហើយ » ។
យ៉ូសែបបានរៀនដោយផ្ទាល់ថា ព្រះយេស៊ូវគ្រីស្ទមានព្រះជន្មរស់ ។ លោកក៏បានរៀនផងដែរថា ព្រះយេស៊ូវគ្រីស្ទមានសេចក្ដីមេត្តាករុណា និងអភ័យទោសដល់អំពើបាប ។ ចំណេះដឹងផ្ទាល់ខ្លួននេះគឺសំខាន់ចំពោះយ៉ូសែប ។ លោកធ្លាប់បាននិយាយថា « សេចក្ដីសង្គ្រោះនៃព្រលឹងរបស់ខ្ញុំគឺមានសារៈសំខាន់បំផុតចំពោះខ្ញុំ [ ពីព្រោះ ] ខ្ញុំដឹងច្បាស់ពីរឿងដ៏អស់កល្បជានិច្ច » ។
ចំណេះដឹងនេះអំពីព្រះយេស៊ូវគ្រីស្ទក៏មានសារៈសំខាន់ផងដែរនៅក្នុងកិច្ចការដែលយ៉ូសែបត្រូវបានហៅឲ្យធ្វើក្នុងនាមជាព្យាការីមួយរូប ។ លោកបានថ្លែងទីបន្ទាល់ដ៏មានឥទ្ធិពលអំពីព្រះគុណ និងសេចក្ដីមេត្តាករុណារបស់ព្រះយេស៊ូវគ្រីស្ទអស់មួយជីវិតលោក ។ ឧទាហរណ៍ មានម្ដងនោះលោកបានបង្រៀនថា « ដួងចិត្តទាំងអស់ត្រូវតែប្រែចិត្ត និងបរិសុទ្ធ ហើយព្រះនឹងគោរព ហើយប្រទានពរពួកគេតាមរបៀបមួយដែលពួកគេមិនអាចទទួលបានតាមរបៀបផ្សេងទៀត » ។
កំហុស និងសេចក្តីមេត្តាករុណា
កិច្ចការដែល យ៉ូសែប ស្ម៊ីធ ត្រូវបានហៅឲ្យធ្វើគឺសំខាន់ខ្លាំងណាស់ ។ ហើយយ៉ូសែបបានរៀនទទួលយកបទបញ្ញត្តិ និងដំបូន្មានរបស់ព្រះអម្ចាស់ដោយម៉ឺងម៉ាត់ ពេលខ្លះតាមរយៈកំហុសដែលលោកបានធ្វើ ។
ឧទាហរណ៍ នៅពេលដែលឯកសារសំណេរដោយដៃនៃព្រះគម្ពីរមរមនបានបាត់ នោះព្រះអម្ចាស់បានដកយកអំណោយទាននៃការបកប្រែចេញពីយ៉ូសែប ហើយក្រោយមកបានមានបន្ទូលទៅកាន់លោក ៖ « អ្នកតែងតែរំលងព្រះបញ្ញត្តិ និងក្រឹត្យវិន័យទាំងឡាយនៃព្រះ ។ … អ្នកមិនត្រូវខ្លាចមនុស្សជាងព្រះឡើយ » ( គោលលទ្ធិ និងសេចក្តីសញ្ញា ៣:៦–៧ ) ។
ប៉ុន្តែព្រះអម្ចាស់ក៏មានសារនេះសម្រាប់យ៉ូសែបដែរ ៖ « ចូរចាំចុះថា ព្រះទ្រង់ប្រកបដោយសេចក្ដីមេត្តាករុណា ហេតុដូច្នេះហើយ ចូរប្រែចិត្ត » ( គោលលទ្ធិ និងសេចក្តីសញ្ញា ៣:១០ ) ។
យ៉ូសែបពិតជាបានប្រែចិត្ត ហើយបានទទួលអំណោយទាននៃការបកប្រែម្ដងទៀត ។ បទពិសោធន៍ទាំងមូលប្រហែលជាមានការឈឺចាប់ចំពោះលោក ប៉ុន្តែលោកបានរៀនមេរៀនសំខាន់ៗ—រួមទាំងថាយើងអាចប្រែចិត្ត ហើយទទួលបានពរជ័យដោយសារព្រះអម្ចាស់មានសេចក្ដីមេត្តាករុណា ។
ព្រះអង្គសង្រ្គោះ និងមិត្ត
យ៉ូសែប ស្ម៊ីធ មានការនិមិត្ត ការយាងមកជួប និងវិវរណៈមួយចំនួន ដែលលោកបានឃើញ ឬបានឮព្រះអម្ចាស់ព្រះយេស៊ូវគ្រីស្ទ ឬបានរៀនអំពីនិស្ស័យ ចរិតលក្ខណៈ និងបេសកកម្មរបស់ទ្រង់ ( ឧទាហរណ៍ សូមមើល គោលលទ្ធិ និងសេចក្ដីសញ្ញា ១៩; ៧៦; ៩៣; ១១០ ) ។
សេចក្ដីពិតមួយដែលលោកបានរៀនគឺថា កិច្ចការប្រោសលោះរបស់ព្រះអង្គសង្គ្រោះគឺសម្រាប់មនុស្សទាំងអស់ ដែលធ្លាប់រស់នៅលើពិភពលោកនេះ—និងគ្រប់ពិភពលោកទាំងអស់ដែលបុត្រា និងបុត្រីរបស់ព្រះរស់នៅ ( សូមមើល គោលលទ្ធិ និងសេចក្ដីសញ្ញា ៧៦:២៤ ) ។
នៅពេលជាមួយគ្នានេះដែរ លោកបានរៀនថា កិច្ចការរបស់ព្រះអង្គសង្គ្រោះមានទំហំធំប៉ុនណា យ៉ូសែបក៏បានរៀនផងដែរថា ព្រះវរបិតាសួគ៌ និងព្រះយេស៊ូវគ្រីស្ទស្គាល់ និងស្រឡាញ់យើងម្នាក់ៗ ។ ទ្រង់ទាំងទ្វេចង់បានទំនាក់ទំនងកាន់តែជិតស្និទ្ធជាមួយយើងម្នាក់ៗ ។ ទ្រង់ទាំងទ្វេមានព្រះទ័យចង់ឲ្យយើងចុះសេចក្ដីសញ្ញា រក្សាសេចក្ដីសញ្ញាទាំងនោះ ហើយស៊ូទ្រាំដោយស្មោះត្រង់រហូតដល់ទីបញ្ចប់ ។ ទំនាក់ទំនងដ៏ជ្រាលជ្រៅនេះនឹងនាំឲ្យយើងមានអំណរ និងទំនុកចិត្ត ។
ទំនាក់ទំនងផ្ទាល់ខ្លួនរបស់យ៉ូសែប ជាមួយនឹងព្រះវរបិតាសួគ៌ និងព្រះយេស៊ូវគ្រីស្ទជ្រាលជ្រៅខ្លាំងណាស់ ដែលនៅពេលមួយក្នុងគ្រាដ៏ដុនដាបបំផុតក្នុងជីវិតលោក ខណៈពេលលោកត្រូវគេឃុំក្នុងគុកលិបើទី លោកអាចនិយាយបានថា ៖
« ខ្ញុំនឹងព្យាយាមពេញចិត្តនឹងវាសនារបស់ខ្ញុំ ដោយដឹងថាព្រះជាមិត្តរបស់ខ្ញុំ ។ ខ្ញុំនឹងរកឃើញការលួងលោមនៅក្នុងទ្រង់ ។ ខ្ញុំបានថ្វាយជីវិតខ្ញុំទៅក្នុងព្រះហស្ដទ្រង់ ។ ខ្ញុំត្រៀមខ្លួនជាស្រេចដើម្បីទៅពេលទ្រង់ហៅខ្ញុំ ។ ខ្ញុំប្រាថ្នាចង់នៅជាមួយព្រះគ្រីស្ទ » ។
នៅពេលដែលប្អូនៗសិក្សាអំពីជីវិត និងការបង្រៀនរបស់ យ៉ូសែប ស្ម៊ីធ ប្អូនៗអាចធ្វើតាមគំរូរបស់លោក ។ ប្រែចិត្តចុះ និងរក្សាសេចក្ដីសញ្ញា ហើយបន្តស្មោះត្រង់ ។ បន្ទាប់មក ប្អូនៗក៏អាចដឹងដែរថា ព្រះអង្គសង្គ្រោះគឺជាមិត្តរបស់ប្អូនៗ ។