ដំណឹងល្អ សម្រាប់ក្មួយៗ និងពិភពលោក

ដោយអែលឌើរ ផាទ្រីក ខៀរ៉ុន

ក្នុងកូរ៉ុមនៃពួកសាវកដប់ពីរនាក់

ក្មួយៗអាចទទួលបានដំណឹងល្អនៃសេចក្ដីស្រឡាញ់ និងអំណរ ដោយសារតែព្រះយេស៊ូវគ្រីស្ទបានស្ដារសាសនាចក្ររបស់ទ្រង់ឡើងវិញ ដើម្បីប្រទានពរដល់បុត្រាបុត្រីទាំងអស់របស់ព្រះ ។

សារលិខិតនៃសេចក្ដីសង្ឃឹម និងសេចក្ដីសុខសាន្តរបស់យើងចំពោះមនុស្សទាំងអស់ គឺថាព្រះយេស៊ូវគ្រីស្ទមានព្រះជន្មរស់ ហើយបានស្ដារដំណឹងល្អ និងសាសនាចក្ររបស់ទ្រង់ឡើងវិញនៅថ្ងៃចុងក្រោយនេះ ។ ព្យាការី យ៉ូសែប ស្ម៊ីធ បានប្រកាសថា « អ្វីៗទាំងនេះអស្ចារ្យណាស់សម្រាប់មនុស្សលោក ! » ។ ទាំងនេះជា « ដំណឹងនៃអំណរដ៏ធំធេងដល់មនុស្សគ្រប់រូប… ដែលគួរតែពេញផែនដី ហើយត្រេកអរដល់ចិត្តមនុស្សគ្រប់គ្នា ពេលបានឮហើយ » ។

ដំណឹងល្អទាំងនេះគឺជាការបង្ហាញដ៏ជ្រាលជ្រៅមួយនៃសេចក្ដីស្រឡាញ់ដែលមិនចេះចប់មិនចេះហើយរបស់ព្រះវរបិតាយើងដែលគង់នៅស្ថានសួគ៌ និងព្រះអង្គសង្រ្គោះរបស់យើង ។ ដំណឹងល្អទាំងនេះនឹងផ្ដល់ពរដល់មនុស្សទាំងអស់ ហើយរៀបចំពិភពលោកសម្រាប់ថ្ងៃដែលព្រះយេស៊ូវគ្រីស្ទយាងមកវិញ ។ ខ្ញុំរីករាយដែលខ្ញុំអាចចំណាយពេលក្នុងជីវិតខ្ញុំប្រកាសសេចក្ដីពិតទាំងនេះដល់មនុស្សទាំងអស់ក្នុងពិភពលោកនេះ ។

មិនទំនង និងអស្ចារ្យ

នៅក្នុងព្រៃ ព្រះដ៏ជាព្រះវរបិតា និងព្រះរាជបុត្រារបស់ទ្រង់ ព្រះយេស៊ូវគ្រីស្ទ បានបង្ហាញព្រះកាយ ហើយបានមានព្រះបន្ទូលទៅកាន់ យ៉ូសែប ស្ម៊ីធ ដើម្បីឆ្លើយតបទៅនឹងការអធិស្ឋានរបស់យ៉ូសែប អំពីសាសនាចក្រមួយណាដែលលោកគួរចូលរួម ( សូមមើល យ៉ូសែប ស្ម៊ីធ—ប្រវត្តិ ១:១៦–២០ ) ។ ព្រះយេស៊ូវបានប្រាប់យ៉ូសែបកុំឲ្យចូលរួមក្នុងព្រះវិហារណាមួយឡើយ ។ ទ្រង់បានសន្យាថា ភាពពេញលេញនៃដំណឹងល្អរបស់ទ្រង់នឹងត្រូវបានបង្ហាញដល់យ៉ូសែបនៅពេលខាងមុខ ។

ចំពោះមនុស្សជាច្រើន យ៉ូសែបហាក់ដូចជាមិនទំនងសោះដែលត្រូវបានហៅឲ្យធ្វើកិច្ចការដ៏សំខាន់បែបនេះ ។ នៅក្នុងក្រសែភ្នែករបស់ពួកគេ លោកគ្រាន់តែជាក្មេងប្រុសដែលគ្មានការអប់រំម្នាក់មកពីកសិដ្ឋានតូចមួយប៉ុណ្ណោះ ។ ប៉ុន្តែតាមរយៈយ៉ូសែប ព្រះវរបិតាសួគ៌ និងព្រះយេស៊ូវគ្រីស្ទនឹងធ្វើអ្វីដែលពិតជាអស្ចារ្យណាស់ ។ យ៉ូសែបនឹងទទួលបានព្រះបញ្ញត្តិ វិវរណៈដ៏មានតម្លៃ និងគោលលទ្ធិដ៏ចាំបាច់អំពីផែនការដ៏ពោរពេញដោយសេចក្ដីស្រឡាញ់របស់ព្រះវរបិតាសួគ៌ និងសេចក្ដីស្រឡាញ់ដ៏ប្រោសលោះរបស់ព្រះយេស៊ូវគ្រីស្ទ ព្រមទាំងដង្វាយធួនដើម្បីផ្ដល់ពរដល់យើង ហើយជួយយើងឲ្យដឹងពីរបៀបដែលយើងអាចត្រឡប់ទៅផ្ទះវិញបាន ។

សាក្សីដ៏មានឥទ្ធិពលអំពីសេចក្ដីស្រឡាញ់របស់ព្រះ

ទេវតាមរ៉ូណៃបានបង្ហាញកាយដល់ យ៉ូសែប ស្ម៊ីធ ហើយបានប្រាប់យ៉ូសែបអំពីកំណត់ត្រាមួយ ដែលបានសរសេរនៅលើផ្ទាំងមាសដែលបានកប់នៅក្បែរនោះ ( សូមមើល យ៉ូសែប ស្ម៊ីធ–ប្រវត្ដិ ១:៣៣–៣៤ ) ។ នៅទីបំផុត យ៉ូសែបបានបកប្រែកំណត់ត្រានោះទៅជាអ្វីមួយដែលក្លាយជាព្រះគម្ពីរមរមន ដែលឈរទន្ទឹមនឹងព្រះគម្ពីរប៊ីប ជាសាក្សីមួយទៀតអំពីព្រះយេស៊ូវគ្រីស្ទ ។

នៅពេញទាំងព្រះគម្ពីរមរមន មនុស្សដែលបានរស់នៅរាប់រយឆ្នាំមុនព្រះគ្រីស្ទ បានដឹងនិងបានប្រាប់ជាមុនអំពីការយាងមករបស់ទ្រង់ ហើយបានទន្ទឹងរង់ចាំការយាងមកនោះ ។ យើងក៏បានអានផងដែរអំពីរបៀបដែលព្រះអង្គសង្គ្រោះបានបង្ហាញព្រះកាយ ហើយបានផ្តល់ការបម្រើដល់ពួកសាសន៍នីហ្វៃ ។ ទ្រង់បានអញ្ជើញមនុស្សទាំងអស់ឲ្យមកឯទ្រង់ ។ ទ្រង់បានព្យាបាលអ្នកឈឺ ខ្វិន ខ្វាក់ និងអស់អ្នកដែលរងទុក្ខ ។ បន្ទាប់មក ទ្រង់បានប្រទានពរដល់កូនក្មេងតូចៗ ហើយបានអធិស្ឋានឲ្យពួកគេ ( សូមមើល នីហ្វៃទី៣ ១១:១៤–១៥; នីហ្វៃទី៣ ១៧:៧–៩; នីហ្វៃទី៣ ១៧:២១ ) ។

ព្រះគម្ពីរមរមនបង្រៀនយើងជាច្រើនអំពីសេចក្ដីស្រឡាញ់ និងសេចក្តីអាណិតអាសូររបស់ព្រះអង្គសង្គ្រោះ ។ វាពិតជាថ្លែងទីបន្ទាល់ថា « ព្រះយេស៊ូវគឺជាព្រះគ្រីស្ទ » ។ វាមាននូវភាពស្រស់ស្អាតនៃដំណឹងល្អដ៏អស់កល្បជានិច្ចរបស់ទ្រង់ ។ ព្រះគម្ពីរមរមនផ្តល់នូវរូបភាពច្បាស់លាស់អំពីរបៀបដែលព្រះវរបិតារបស់យើងដែលគង់នៅស្ថានសួគ៌ និងព្រះអង្គសង្គ្រោះរបស់យើងស្រឡាញ់យើងលើសពីអ្វីដែលយើងអាចស្រមៃបាន ។

ពរជ័យនៃបព្វជិតភាព និងសាសនាចក្រ

សារទូតមកពីស្ថានសួគ៌ផ្សេងៗទៀតបានមករក យ៉ូសែប ស្ម៊ីធ ។ យ៉ូហានបាទីស្ទបានមកស្តារសិទ្ធិអំណាចដើម្បីធ្វើពិធីបុណ្យជ្រមុជទឹកឡើងវិញ ។ ពេត្រុស យ៉ាកុប និងយ៉ូហាន បានស្ដារភាពជាសាវក និងកូនសោនៃសិទ្ធិអំណាចបព្វជិតភាពឡើងវិញ ។ « អ្នកផ្សេងទៀតបានមកផងដែរ រួមមានទាំងអេលីយ៉ា ដែលបានស្ដារសិទ្ធិអំណាចដើម្បីចងក្រុមគ្រួសារជាមួយគ្នាជារៀងរហូតនៅក្នុងទំនាក់ទំនងអស់កល្បជានិច្ច ដែលហួសពីសេចក្ដីស្លាប់ » ។

ក្រោយមកតាមរយៈព្យាការីយ៉ូសែប ព្រះយេស៊ូវគ្រីស្ទបានស្ថាបនាសាសនាចក្រមួយ ដែលមានលំនាំតាមសាសនាចក្រដែលទ្រង់បានរៀបចំនៅសម័យព្រះគម្ពីរសញ្ញាថ្មី ( សូមមើល មាត្រានៃសេចក្ដីជំនឿ ១:៦ ) ។ តាមរយៈព្រះយេស៊ូវគ្រីស្ទ និងពួកសាវក និងព្យាការីរបស់ទ្រង់ សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ធ្វើឲ្យពរជ័យនៃអំណាចបព្វជិតភាពដែលបានស្ដារឡើងវិញ មានសម្រាប់បុត្រាបុត្រីទាំងអស់របស់ព្រះ ។

ខ្ញុំនឹងនិយាយថា ប្រសិនបើក្មួយៗមានអារម្មណ៍ធ្លាក់ចុះ ហើយមានអារម្មណ៍ថា ក្មួយៗមិនល្អគ្រប់គ្រាន់ ឬថាក្មួយៗមិនមានចំណែក នោះសូមមានក្ដីមេត្តាដល់ខ្លួនឯង ហើយដឹងថា ព្រះវរបិតាសួគ៌ និងព្រះរាជបុត្រារបស់ទ្រង់ ព្រះអង្គសង្គ្រោះរបស់យើង ស្រឡាញ់ក្មួយៗច្រើនជាងអ្វីដែលក្មួយៗអាចស្រមៃឃើញ ។ យើងទាំងអស់គ្នាត្រូវបានអញ្ជើញឲ្យមកឯព្រះគ្រីស្ទ និងសាសនាចក្ររបស់ទ្រង់ ។ សាសនាចក្រមិនមែនសម្រាប់មនុស្សល្អឥតខ្ចោះនោះទេ ។ វាប្រៀបដូចជាមន្ទីរពេទ្យដែលយើងស្វែងរកការព្យាបាល ។ នៅព្រះវិហារ យើងបង្វែរខ្លួនយើងទៅខាងក្រៅ បម្រើអ្នកដទៃដោយសេចក្ដីស្រឡាញ់ ហើយចែកចាយដំណឹងល្អ ។ យើងអាច « បាននឹកចាំ ហើយចិញ្ចឹមបីបាច់ដោយព្រះបន្ទូលដ៏ល្អនៃព្រះ » ( មរ៉ូណៃ ៦:៤ ) ។ យើងអាចរកឃើញសេចក្ដីសុខសាន្ត និងការព្យាបាល ។ នេះគឺជាពរជ័យដ៏អស្ចារ្យណាស់ !

ជាហេតុផលមួយសម្រាប់អំណរដ៏អស្ចារ្យ

ព្រះវរបិតាសួគ៌ និងព្រះរាជបុត្រាដ៏ជាទីស្រឡាញ់របស់ទ្រង់គឺព្រះយេស៊ូវគ្រីស្ទ ស្រឡាញ់ក្មួយៗ ហើយមានព្រះរាជបំណងប្រាថ្នា—ច្រើនជាងអ្វីៗទាំងអស់—គឺនាំក្មួយៗទៅផ្ទះ ហើយមានជីវិតដូចជាទ្រង់ទាំងទ្វេមានជារៀងរហូត ។ ការស្តារឡើងវិញបានបង្ហាញថា ទ្រង់ទាំងទ្វេបានធ្វើអ្វីៗគ្រប់យ៉ាងដើម្បីធ្វើឲ្យការណ៍នេះក្លាយជាលទ្ធភាពដ៏រុងរឿងសម្រាប់ក្មួយៗ ។ ពេលខ្លះ ក្មួយៗអាចជួបការសាកល្បង និងការលំបាក ប៉ុន្តែក្មួយៗមានជីវិត « ដើម្បីឲ្យ [ ក្មួយៗ ] អាចមានសេចក្ដីអំណរ » ( នីហ្វៃទី២ ២:២៥ ) ក្នុងជីវិតនេះ និងជីវិតបន្ទាប់ទៀត ។ ព្យាការីយ៉ូសែបបានដឹងរឿងនេះច្បាស់ជាងមនុស្សភាគច្រើន ។ ក្មួយៗនឹងរកឃើញថា ក្មួយៗអាចមានអំណរពេលក្មួយៗប្រែចិត្តជាប្រចាំ ហើយបែរទៅរកព្រះវរបិតារបស់ក្មួយៗដែលគង់នៅស្ថានសួគ៌ និងព្រះអង្គសង្រ្គោះរបស់ក្មួយៗ ។

យ៉ូសែបបានប្រឈមមុខនឹងការប្រឆាំង និងការធ្វើទុក្ខបុកម្នេញជាញឹកញាប់ ប៉ុន្តែលោកបានរក្សា « ចរិយារួសរាយ » របស់លោក ( យ៉ូសែប ស្ម៊ីធ—ប្រវត្តិ ១:២៨ ) ។ លោកនៅតែមានអំណរ រឹងមាំ និងអត់ធន់ ហើយលោកបានសម្រេចកិច្ចការដែលលោកត្រូវបានប្រទានឲ្យធ្វើ ។ ដូចគ្នាដែរចំពោះអស់អ្នកដែលបានស្នងតំណែងពីលោក ។

វាមានការលំបាកនៅសម័យដើមដំបូងនៃសាសនាចក្រ ហើយវាអាចមានការលំបាកនៅសព្វថ្ងៃនេះដែរ ប៉ុន្តែការស្តារឡើងវិញបានបន្តនៅពេលនោះ ហើយកំពុងបន្តនៅសព្វថ្ងៃនេះ ។ ព្រះយេស៊ូវគ្រីស្ទដឹកនាំសាសនាចក្ររបស់ទ្រង់ ។ ព្យាការីដែលរស់នៅបន្តដឹកនាំយើង ។ ដំណាក់នៃព្រះអម្ចាស់នឹងបន្តសាងសង់ ។ សេចក្ដីស្រឡាញ់របស់ព្រះ និងព្រះយេស៊ូវគ្រីស្ទនឹងលាតសន្ធឹងទូទាំងពិភពលោក នៅពេលយើងធ្វើតាមការត្រាស់បង្គាប់របស់ព្រះអង្គសង្គ្រោះ ឲ្យចំណីដល់ហ្វូងចៀមរបស់ទ្រង់ ហើយចែកចាយដំណឹងល្អរបស់ទ្រង់ ។ សេចក្តីពិតនៃការស្ដារឡើងវិញនឹងឆ្ពោះទៅមុខតាមផ្លូវ និងកន្លែងដែលស្ទើរតែមិននឹកស្មានដល់ក្នុងជំនាន់របស់យ៉ូសែប ។ យើងនឹងព្យាយាមធ្វើឲ្យពិភពលោកនេះមានក្តីសប្បុរសជាងមុន និងមិនសូវបែកបាក់គ្នា ។

ពេលក្មួយៗសិក្សាដំណឹងល្អជាទៀងទាត់ អធិស្ឋានជាញឹកញាប់ ហើយបម្រើអ្នកដទៃ នោះសារលិខិតនៃការស្ដារឡើងវិញនឹងប៉ះពាល់ដួងចិត្តរបស់ក្មួយៗ ហើយផ្លាស់ប្ដូរជីវិតរបស់ក្មួយៗ ។ វាប្រហែលជាមិនកើតឡើងភ្លាមៗទេ ប៉ុន្តែវានឹងនាំអំណរដល់ក្មួយៗ—ដូចដែលវាបាននាំអំណរដល់ព្យាការីយ៉ូសែបផងដែរ ។

សូមឲ្យដំណឹងល្អនៃសេចក្ដីស្រឡាញ់ និងអំណរនៃការស្តារឡើងវិញនាំមកនូវពរជ័យ និងដឹកនាំជីវិតរបស់ក្មួយៗ—ឥឡូវនេះ និងជានិច្ច ។