Pagpakigbahin sa Pasko

Sa miaging panahon sa Pasko, nagtutok ko sa pagbasa sa mga istorya sa Pasko diha sa mga kasulatan ug sa pagpakigbahin niini ngadto sa uban. Usa ka gabii samtang nag-atiman sa akong kwatro anyos nga ig-agaw, si Boedi, nangutana ko niya nganong espesyal kaayo ang Pasko. Nagsugod siya sa paghisgot bahin sa Santa ug mga regalo. Gipasabot nako siya nga ang Pasko importante kaayo tungod ni Jesus.

Gipakita nako kang Boedi ang gamay nga kalendaryo sa adbiyento nga diha sa bungbong nga adunay litrato sa cartoon sa istorya sa Pasko. Namatikdan niya nga ang litrato sa batang si Jesus daw nagsiga, ug akong gipasabot kaniya nga si Jesus espesyal kaayo. Giingnan nako siya nga mianhi Siya sa yuta aron magpakamatay alang kanato aron usa ka adlaw makapuyo kita uban Kaniya. Nagtan-aw mi og mga bidyo ug nagtan-aw sa mga litrato Niya.

Nag-ampo ko nianang gabhiona nga mahinumdoman nako ang espiritu nga akong gibati ug nga mahinumdoman ni Boedi ang mga butang nga akong gitudlo kaniya.

Duha ka sa semana ang milabay, ang among pamilya nagkauban alang sa Bisperas sa Pasko. Human kami magdula, miabli og mga regalo, ug mitan-aw sa bidyo sa Simbahan nga “The Christ Child,” miadto si Boedi sa lamesa aron magkolor. Nagtan-aw ko samtang gipakita niya sa among dos anyos nga ig-agaw, si Jerett, ang iyang drowing sa batang si Jesus sa pasongan, uban ni Maria ug Jose. Ang akong paborito nga detalye mao ang kahayag nga iyang gibutang sa palibot sa masuso. Iyang gipasabot ngadto kang Jerett nga Siya misanag tungod kay Siya espesyal kaayo.

Nahinumdom si Boedi sa akong gitudlo kaniya. Nakapatandog kini sa akong kasingkasing nga makita nga iyang gipakigbahin ang istorya sa uban, sama sa akong gibuhat.

Nasayod ko sa importansya sa pagpakigbahin sa mga istorya ni Kristo niadtong naglibot kanako, ma bata man ug tigulang. Ako karon adunay mas lig-on nga pagpamatuod kon unsa ka espesyal si Kristo.