Dali, Sunod Kanako

Ang Labing Bililhon nga mga Gasa

Ni Kate Stewart ug Brynn Wengler

Mga Magasin sa Simbahan

Niini nga panahon sa pagpanghatag og regalo, tutoki ang talagsaon nga mga gasa nga gihatag sa Langitnong Amahan ug ni Jesukristo kaninyo ug unsa ang inyong ikahatag Kanila.

Mga Gasa nga Gihatag Kanato

Ang propeta nga si Moroni nagpahinumdom kanato nga “matag maayo nga gasa” nagagikan ni Kristo (Moroni 10:18). Ang Langitnong Amahan ug si Jesukristo mao ang labing maayo nga tighatag sa tanang gasa! Kon kita mosulay sa paglista sa tanang gasa nga Ilang gihatag kanato (sama sa hangin nga atong giginhawa, ang ulan, ang abilidad sa pagkanta ug pagsayaw, ug uban pa), ang lista walay kataposan! Ang tanang maayo sa atong kinabuhi nagagikan sa Manluluwas ug sa Langitnong Amahan.

Ania ang pipila lang sa Ilang mga gasa kanato:

Ang kinabuhi, kamatayon, maulaong sakripisyo, ug Pagkabanhaw ni Kristo (tan-awa sa Juan 3:16)
Ang posibilidad sa kinabuhing dayon—“ang labing mahinungdanon sa tanan nga mga gasa sa Dios” (tan-awa sa Juan 10:28; Doktrina ug mga Pakigsaad 14:7)
Ang ehemplo sa Manluluwas (tan-awa sa Juan 13:15)
Bunyag ug ang gasa sa Espiritu Santo (tan-awa sa 2 Nephi 31:12; Juan 14:16)
Ang pagkapari, o ang awtoridad ug gahom sa Dios dinhi sa kalibotan (tan-awa sa Moises 6:67; Mateo 10:1)
Mga sugo sa Dios (tan-awa sa Juan 13:34)
Kaalam ug kahibalo (tan-awa sa Santiago 1:5; 2 Nephi 28:30)
Mga pakigsaad ug mga ordinansa, sama sa sakramento ug pagtuga sa templo (tan-awa sa Mateo 26:26–28; Doktrina ug mga Pakigsaad 124:39)
Kahuyang—oo, kana mahimo usab nga usa ka gasa! (tan-awa sa Ether 12:27)
Talagsaon nga mga espirituhanong gasa (tan-awa sa Moroni 10:8)

Kini pipila lamang sa daghang gasa nga gihisgotan diha sa mga kasulatan, apan adunay daghan pa gayod!

Hagit: Sulayi og dugang niini nga lista ug tan-awa kon unsa ka taas ang imong mahimo niini!

Unsa ang Imong Espirituhanong mga Gasa?

Nakahibalo ba kamo nga matag usa kanato gipanalanginan og espirituhanong mga gasa? Ang Dios naghatag og espirituhanong mga gasa niadtong kinsa nahigugma Kaniya ug mituman sa Iyang mga sugo—ug kadtong naningkamot sa pagbuhat niini. Pipila niini nga mga gasa naglakip sa hugot nga pagtuo, pag-ila sa Espiritu, ug pagsulti og mga pinulongan. (Tan-awa sa Doktrina ug mga Pakigsaad 46:9–27,)

Kita makapaningkamot sa pag-angkon og espirituhanong mga gasa sa atong tibuok kinabuhi! Gusto nga modiskobre ug mopalambo sa pipila sa inyong espirituhanong mga gasa? Sulayi kini:

Hunahunaa kon unsa ang natural nga maayo ka o unsa ang makalingaw nimo.
Pangayo sa Ginoo pinaagi sa pag-ampo unsa nga mga gasa ang Iyang gihatag kanimo.
Pangutan-a ang imong mga sakop sa pamilya, suod nga mga higala, o mga lider sa Simbahan unsa nga mga gasa ang ilang nakita nimo.
Pangitaa ang mga gasa nga naa sa imong patriyarkal nga panalangin kon nakadawat na ka niini.
Samtang imong naila ang imong mga gasa, paningkamot sa pagpalambo niini.
Gamita ang imong mga gasa sa pagpanalangin sa uban.

Mga Gasa nga Atong Mahatag

Unsa ang imong ikahatag sa usa ka tawo nga nakahatag na nimo sa tanan? Ang mga kasulatan adunay pipila ka nindot kaayo nga mga ideya alang sa mga gasa nga imong mahatag sa Langitnong Amahan ug ni Jesukristo. (Ang mga kasulatan usab nagpakita kanato kon giunsa Nila pagpanalangin dayon nato og dugang pa nga mga gasa kon kita mohatag Kanila.)

Mga Gasa nga Atong Ikahatag sa Dios	Mga Gasa nga Iyang Gihatag Kanato isip Ganti
Pagsunod sa mga sugo.	Ang Dios mopanalangin kaninyo ug mopauswag kaninyo. (Tan-awa sa 1 Nephi 2:20; Mosiah 2:22.)
Molimod sa inyong mga kaugalingon sa tanan nga dili diosnon ug mohigugma sa Dios.	Ang Iyang grasya igo alang kaninyo. (Tan-awa sa Moroni 10:32.)
Mohalad og usa ka masulub-on nga kasingkasing ug mahinulsolon nga espiritu.	Kamo panalanginan sa Espiritu Santo. (Tan-awa sa 3 Nephi 9:20.)
Mohigugma niadtong anaa sa inyong palibot.	Ang uban makahibalo nga kamo disipulo ni Kristo. (Tan-awa sa Juan 13:34–35.)
Moduol ngadto ni Kristo, mopas-an sa iyang yugo, ug magkat-on bahin Kaniya.	Makakita kamo og kapahulayan sa inyong kalag. (Tan-awa sa Mateo 11:28–29.)
Mopakigbahin sa ebanghelyo sa uban.	Si Kristo magauban kaninyo. (Tan-awa sa Mateo 28:19–20.)

Karong Pasko, pagpili og gasa nga inyong ikahatag sa Manluluwas ug sa Langitnong Amahan. Makapili kamo og usa gikan niini nga lista, pangita og uban nga mga ideya gikan sa mga kasulatan, o pangutana sa Langitnong Amahan alang sa usa ka piho o personal nga gasa nga inyong ikahatag. Samtang ang inyong gasa mahimong dili ikatandi sa Ilang mga gasa, ang inyong gasa—kon gihatag inubanan sa inyong kasingkasing—makahatag gihapon Kanila og tumang kalipay. Kon inyo kining buhaton, mahimo ninyo kini nga Pasko nga usa ka kasinatian nga mahinumdoman kanunay!