Ang Inyong Buhi, Maayo, ug Labaw nga Maayo nga Paglaom
Si Jesukristo mao ang inyong tinubdan sa espirituhanong gasa sa paglaom karon ug sa kahangtoran .
Jesus of Nazareth [Si Jesus sa Nazaret], ni Jay Bryant Ward
Si Apostol Pedro ug ang mga propeta sa Basahon ni Mormon nga si Jacob ug Moroni naghatag og gibug-aton sa espirituhanong gasa sa paglaom diha ni Kristo sa samang mga paagi.
Si Pedro mipahayag nga kita adunay “[usa ka] buhing paglaom” diha ni Kristo.
Si Jacob mipahayag nga ang pagbaton og hugot nga pagtuo diha ni Kristo magdala kanato og “usa ka buhing paglaom.”
Ug si Moroni mipahayag nga kita adunay “labaw nga maayo nga paglaom” tungod ni Kristo.
Unsa ang Paglaom diha ni Kristo?
Ang espirituhanong gasa sa paglaom diha ni Kristo mao ang hingpit nga kalipay sa pagpaabot sa kinabuhing dayon pinaagi sa “maayong buhat, ug kaluoy, ug grasya sa Balaan nga Mesiyas” ug ang usa ka kusganong tinguha alang sa gisaad nga mga panalangin sa kamatuoran. Ang mga pulong “buhi,” “maayo,” ug “labaw nga maayo” naghulagway sa atong paglaom diha ni Jesukristo. Kini usa ka kanunay nga nagkalapad ug madasigon nga kaseguroan sa Pagkabanhaw ug sa kinabuhing dayon pinaagi sa hugot nga pagtuo diha Kaniya.
Si propeta Mormon mipasabot, “ako mamulong nganha kaninyo mahitungod sa paglaom. Unsaon nga kamo makakab-ot ngadto sa hugot nga pagtuo, gawas nga kamo magbaton og paglaom?
“Ug unsa kana nga kamo molaom? Tan-awa ako moingon nganha kaninyo nga kamo magbaton og paglaom pinaagi sa pag-ula ni Kristo ug sa gahom sa iyang pagkabanhaw, aron mabanhaw ngadto sa kinabuhi nga dayon, ug kini tungod sa inyong hugot nga pagtuo diha kaniya. …
“Busa, kon ang usa ka tawo adunay hugot nga pagtuo siya kinahanglan nga magbaton og paglaom; kay kon wala ang hugot nga pagtuo wala usab ang paglaom.”
Ang Plano sa Amahan sa Kalipay
Ang inyong buhi, maayo, ug labaw nga maayo nga paglaom diha ni Kristo magsugod sa kahibalo nga ang Dios nga Amahan sa Kahangtoran buhi. Siya ang inyong Amahan. Kamo sa tinuod Iyang espiritu nga anak nga lalaki o babaye, ug kamo nakapanunod sa balaanong mga hiyas gikan Kaniya.
Ang Amahan mao ang tigpasiugda sa plano sa kalipay. Isip Iyang espiritu nga anak nga lalaki o babaye, kamo “midawat sa Iyang plano nga naghatag og higayon sa Iyang mga anak nga makaangkon og pisikal nga lawas ug makaangkon og yutan-on nga kasinatian sa paglambo ngadto sa kahingpitan ug sa kataposan makakab-ot sa atong walay kataposan nga kapalaran ingon nga mga manununod sa kinabuhing dayon.”
Kamo binuhat nga may duha ka bahin. Ang inyong espiritu, ang mahangtorong bahin ninyo, anaa sa pisikal nga lawas nga ubos sa tinguha ug mga gana sa pagka-mortal. “Ang plano sa Amahan sa kalipay gidesinyo sa paghatag og direksiyon alang kaninyo, sa pagtabang ninyo nga makabalik nga luwas ngadto Kaniya nga adunay nabanhaw, nahimayang lawas, ug aron madawat ang mga panalangin sa mahangtorong hingpit nga kalipay ug kamaya.
Ang Matubsanon nga Papel ni Jesukristo
Si Jesukristo mao ang Bugtong Anak sa Dios nga Amahan sa Kahangtoran. Siya mianhi dinhi sa kalibotan aron sa pagbuhat sa kabubut-on sa Iyang Amahan. Siya ang atong Manluluwas ug Manunubos tungod kay Siya mibuntog sa kamatayon ug sala.
Si Alma nanagna: “Ug magpadayon siya, mag-antos sa mga sakit ug mga kasakit ug mga pagtintal sa matag matang; …
“Ug mag-antos siya sa kamatayon, aron iyang mabadbad ang mga higot sa kamatayon nga nagbugkos sa iyang katawhan; ug siya modala diha kaniya sa ilang mga kahuyang, aron ang iyang kasingkasing mapuno uban sa kaluoy, … aron iyang masayran sumala sa unod unsaon sa pagtabang ang iyang katawhan sumala sa ilang mga kahuyang.
“… Ang Anak sa Dios [usab] mag-antos sumala sa unod nga siya unta modala diha kaniya sa mga sala sa iyang katawhan, nga siya unta mopapas sa ilang mga kalapasan sumala sa gahom sa iyang kaluwasan.”
Ang unang baroganan sa ebanghelyo mao ang hugot nga pagtuo diha ni Ginoong Jesukristo. Ang tinuod nga hugot nga pagtuo nagtutok diha ug diha sa Manluluwas ug makapahimo kanato nga mosalig Kaniya ug adunay hingpit nga pagsalig sa Iyang gahom sa pagluwas kanato gikan sa kamatayon, paglimpyo kanato gikan sa sala, ug pagpanalangin kanato og kalig-on nga labaw pa sa atong kaugalingon.
Ako nagpamatuod nga ang Manluluwas mibugto sa higot sa kamatayon. Siya nabanhaw ug “nagpahinabo sa [atong] pagkabanhaw [ug] katubsanan.” Siya buhi. Siya mao lamang ang tinubdan sa buhi, maayo, ug labaw nga maayo nga paglaom.
Usa ka Kalig-on sa Kalag
Ang propeta nga si Ether nagpamatuod, “Busa, kinsa kadto nga motuo diha sa Dios tingali uban sa kaseguroan molaom alang sa maayo nga kalibotan, oo gani usa ka dapit diha sa tuo nga kamot sa Dios, kansang paglaom moabot pinaagi sa hugot nga pagtuo, naghimo og kalig-on ngadto sa mga kalag sa mga tawo, diin makahimo kanila nga lig-on ug makanunayon, sa kanunay puno sa maayo nga mga buhat, gitultolan ngadto sa paghimaya sa Dios.”
Niining espesyal nga panahon sa pagsaulog sa pagkatawo sa bata sa Betlehem, hinaot nga kanunay ninyong hinumdoman nga si Jesukristo mianhi sa kalibotan aron mahimo natong Manluluwas ug Manunubos. Siya nagtanyag kaninyo sa bililhong espirituhanong mga gasa sa kinabuhi, kahayag, pagbag-o, gugma, kalinaw, panglantaw, hingpit nga kalipay, ug paglaom.
The Days Were Accomplished [Ang mga Adlaw Natuman], ni Justin Kunz
Nagdapit ako kaninyo sa pagpangita sa tukma nga paagi alang sa espirituhanong gasa sa paglaom diha sa Manluluwas pinaagi sa pagtuon sa mga pagtulun-an ug sa mga pagpamatuod sa karaan ug modernong mga propeta kalabot sa Iyang maulaong sakripisyo ug literal nga pagkabanhaw. Sa inyong pagbuhat sa ingon, ako mosaad nga ang inyong pagpamatuod sa kabalaan sa Manunubos malig-on. Ang inyong pagkakabig ngadto Kaniya mas mapalawman. Ang inyong tinguha ug abilidad sa pagpabarog isip Iyang maisogon nga saksi molambo. Ug kamo mapanalanginan og kalig-on sa inyong kalag—ingon nga buhi, maayo ug labaw sa maayo nga paglaom.
Uban sa Apostoles kinsa mihatag og pagpamatuod mahitungod Kaniya sa tanang katuigan, malipayon akong mopahayag sa akong pagsaksi nga si Jesukristo mao ang buhi nga Anak sa buhi nga Dios. Siya ang atong nabanhaw nga Manunubos. Tungod sa katubsanan ug pakig-uli sa Dios nga Iyang gihimong posible alang sa tanang katawhan, makadawat kamo sa espirituhanong kaseguroan ug usa ka buhi, maayo, ug labaw nga maayo nga paglaom nga “diha kang Kristo ang tanan mangabuhi.”