Na Lalawa na Bula Vakatisaipeli ena Noda Bula Taucoko
Na Veivakayarayarataki ni Veivakavulici Vinaka ena Kosipeli
Koniferedi ni Dauveituberi ni Veikavakalotu, 12 ni June 2025
O au mai Tennessee, na ivau ni iVolatabu, niu se vuli torocake tiko, au lewena e dua na isoqosoqo ka vakatokai na Mataveitokani ni Dauqito Vakarisito. O na sega ni kila rawa nio raici au qo, ia ena gauna oya, au a dua na dauqito vinaka ka bulicaki kaukauwa. Ena vica na yabaki sa oti, a vakauta vei watiqu o tinaqu edua na kequ itaba mai koronivuli ni a se tu na drau ni uluqu ka toka vakalailai na masela. A sala vata mai kei na itaba edua na itukutuku ni veivakacegui vei watiqu mai vei tinaqu ka vaka, “Oqo na ka mo na vakanamata kina ena Tucaketale.”
Ia, Na Mataveitokani ni Dauqito Vakarisito edua na isoqosoqo ka cecere na kena inaki mai liu ka vakina nikua. E na itikotiko raraba nodra na dauqito, mai na veimatalotu, era vakabauta vata na Karisito. Ni oti noqu vuli ena ivakatagedegede e ra, au a digitaki meu peresitedi ni tabana ni vuli torocake ena yabaki ka tarava, ni noqu vuli torocake.
Na yacaqu, vata kei na noqu lotu, a vakau kina valenivolavola liu ni yasana meu peresitedi ni wasewase vou. Vakalailai i muri, a lesu mai edua na itukutuku kina neitou daunivakasala ni vuli ni gadrevi edua tale na yacavou me vakau yani. O neitou daunivakasala a kaya vei au nia tukuni vua niu na sega ni rawa ni peresitedi baleta eratou tukuna nio ira na lewenilotu i Jisu Karisito ni Yalo Dodonu Edaidai era sega ni okati mera lotu Vakarisito. E se bera vakadua ni vakatovolei vakaoqo na noqu vakabauta.
A digitaki edua na peresitedi vou, ia ni oti e vica na vula, au ciqoma edua na itukutuku ni sa wali na leqa mai vua edua na mata ni lotu ena nona veitalanoa kei Na Mataveitokani ni Dauqito Vakarisito. Au tomana tiko na noqu vakaitavi ena ilawalawa baleti ira na tamata vinaka era a lewena tiko.
Ena iotioti ni yabaki ni noqu vuli torocake, era dau digia me dua na dauqito vinaka duadua ni yabaki kei ena icavacava nomu yabaki vakavuli, au a digitaki mai vei ira na noqu icaba meu “Dauqito ni Yabaki ni Mataveitokani Dauqito Vakarisito.” Oqo, meu kaya vakaidina au a vakila ni oya e dua na veisausaumi dodonu. Ni bera na yabaki oya, au a sega ni okati meu lotu Vakarisito, ia oqo au sa mai ciqoma na nodra icocovi.
Ia, na yacaqu, vata kei na noqu lotu, a vakau kinaivalenivolavola liu ni yasana meu dauqito ni yabaki ni noqu koronivuli. Ia, vakadua tale, a yaco mai edua tale na itukutuku vua na neitou daunivakasala ni vuli ni gadrevi edua tale na yaca vou me vakau yani. E kena irairai, ni se bera ni wali na leqa.
O neitou dauniveitokoni, ka dauveivakavulici ena soka kei na veibo, a kaya vei au ni vinakata me lako mai edua mai na valenivolavola ni yasana me mai vakamacalataka vei au e koronivuli edua na vakatulewa ka sega ni tokona o koya.
A mai sikovi au edua na turaga yalovinaka ka dauloloma. Keirau a sota ena nona rumu na dauveivakatavulici ena dua na gauna galala. A vakamacalataka na o koya ni vinakata meu kila na vuna era sega ni okati kina na lewe ni noda Lotu meda lotu Vakarisito.
A dreta mai edua na drau ni veva mai na nona kato. Ena pepa, e tiko kina e 10 na poidi ni noda ivunau ka tukuna o koya ni sega ni salavata kei na nodra ibalebale ni lotu Vakarisito. Ona rairai kila vinaka na veipoidi oya: na noda vakabauta nio iratou na Lewe Tolu Vakalou eratou duidui, ka tiko eso tale na ivolanikalou mai na iVolaTabu, kei na so tale.
E wasea o koya na veipoidi oya, a yalovinaka—au rawa ni kaya ni Vakarisito sara ga. A tamata vinaka, ia a vakacalai. A dolava na nona kato ka biuta lesu na pepa ka taroga ena yalodina se tiko noqu taro.
Au a kaya: “Io, e tiko.” Au tukuna, “Na iVolatabu beka au raica tiko e loma ni nomu kato?”
A sauma o koya,“Io.”
Au ttukuna, “E rawa beka ni daru raica vata eso na tikina e loma?”
Au via tukuna veikemuni oqo, nira a tiko eso na noqu qasenivuli ni semineri vinaka. Ka keimami a matai sara ena vakamuria na veitikini ivolanikalou. ENa veisiga sa sivi, edau soliv ei keimami e 40 na tikinivolatabu ena veiyabaki, kei ena vei vakaraubuka kece ena kalsi ni semineri keimai dau kana dougnuts, ka keimami dau vakaqasara na ivolanikalou, au dau veiqatitaka vakalevu. A sega walega niu makataki ira na veitikina ena peni damudamu, au a vulica tale ga, au madua meu tukuna, ni keu lobika na drauni pepa era tiko kina veitikina, ena rawarawa na kedra cegai. Kei ni, bera ni keitou veisisivi ni iteki ena vakamuri ni ivolanikalou, au vakamiraka na pauta ni gone ena draunipepa. Keu voleka kina noqu ivolanikalou ka vidika ga na noqui qaqalo, ena tadola na noqu ivolanikalou kina dua na tikina ni vakamuri tikinivolatabu.
Ia, e yalovinaka na turaga me wasea na nona na nona iVolatabu, ka, sega tu, ni makataki me baleta na vakamuri ni tiki ni ivolanikalou. Keirau a gole kina Maciu 3, Cakacaka 7, 1 Veigauna 29, keina so tale. Au qoroya, nona vakarorogo ena vakarokoroko. A sega ni veisautaki na vakatulewa, ia au a veisau.
Niu raica lesu tiko na vei ivolanikalou oya, au a vakila vakatitobu sara na kedra dina ka sega ni vaka mai liu. So na gauna na ivakadinadina ena qai yaco mai ni oti na vakatovolei.1 Na noqu ivakadinadina, noqu saumaki, a sega ni yaco baleta na ka a sotavi oya; edua na soqoni ena sega ni vakavudera me tawamudu na vakabauta. Ia oya edua vei ira na vuqa na ka au sotava ka solia edua na ivakadinadina ka sa tubu tiko ena toso ni gauna.
Au vakavinavinaka vei ira na noqu qasenivuli ni semineri ni mataka lailai era a vukei au me tara edua na yavu meu cakacaka kina. Era vinakata me rawata na neimami tabanalevu na icovi ni veisisivi ni vakamuria na ivolanikalou, ia era a kauwai vakalevu cake mera vukei keimami me yaco me tisaipeli i Karisito ena bula taucoko. Era kauta mai na veisau kina noqu bula. Au nuitaka ni ena gauna vakanomodi ni nomu vakananuma na nomu veivakavulici, ona kila na veiuqeti vakaibalebale e tiko vei iko kina nodra bula o vakavulica.
Na itabatamata ka tubu tiko mai oqo era sa vakasakiti. Ena koniferedi raraba se qai oti qo, a cavuta kina o Peresitedi Russell M. Nelson, “Na itabatamata ni mataka e tubu tiko mera yalodina na muri Jisu Karisito.”2 Ena dua tale na gauna, a kaya vei ira, “E tu vei kemuni na kila kei na vuku kei na igu mo rawai vuravura kina ni vakatauvatani kei na itabatamata taumada.” 3 Me yacovi na itagede oya, era gadreva, kei na so tale na ka, na qasenivuli vinaka ni kosipeli.
Era sinai ena vakabauta, ia “na vakabauta e rawa ena vakarorogo, ia na vakarorogo ena vosa i Karisito.” 4 “Era na qai rogoca vakcava ni sega na dauvunau?” 5 Era kila vakavinaka na kosipeli mai vei ira na itabatamata mai liu, ia ena rawa vakacava mera “kila na ka [era] wilika kevaka sa sega na [qasenivuli] me tuberi [ira]?” 5
Vei ira na kai Koronica, a vola kina o Paula: “Sa lesi ira na Kalou e so ena isoqosoqo lewe ni Lotu, a kena imatai, ko ira na i apositolo, ikarua na parofita, ikatolu na ivakavuvuli, sa qai muri ko ira na daucaka mana.”6 O na kunei iko nio ciqi tiko ena kedra maliwa na apositolo kei ira na parofita kei na daucakamana vata kei na dua na itavi bibi ena gauna cecere oqo ena kena vakusakusataki na cakacaka ni Turaga. 88
Na Takete na Bula Vakatisaipeli ena Bula Taucoko
Ena vosa nei Elder D. Todd Christofferson ena bogi, a tekivuna ka tinia na nona vosa ni taleva lesu na inaki eso ni veituberi ena veika vakalotu ena Lotu. E tarai au na nona taleva lesu ka vakabibitaka na nodra vukei na gonevuli mera yaco me tisaipeli i Jisu Karisito ena bula Taucoko. A vaka me vakananumi keda tiko ena ka eda nuitaka meda rawata ena noda veivakavulici.
Ni oti ga e ono na vula mai na nona kacivi kina Kuoramu ni Apositolo Le Tinikarua, a vosa o Elder Russell M. Nelson ena univesiti oqo ena dua na lotu ena Sigatabu. A veivakauqeti ka sinai ena raititobu na nona vosa, ia na ulutaga ni nona vosa au via laveta cake. A tekivu vakaoqo o koya: “E ulutaga ni noqu vosa na ‘Tekivu ena Nanumi Taumada ni iCavacava.’” A qai vakamacalataka: “Au nanuma ni so na ka oqo e lako mai na noqu cakacaka vakadauveisele. Na veisele ena sega ni caka ke sega ni nakiti mena sogoti na we ni isele. Na ivakavuvuli vata oqo e vakayagataki raraba. O ira na daucici era na sega ni cici ke sega ni kilai taumada na vanua e tiko kina na icavacava.” 99
Na nanumi tiko ni cavacava—na kilai ni vanua e tiko kina na icavacava kei na kilai ni takete—e bibi, ia vakauasivi ena vakatavulici ni kosipeli. Nida vakanamata tiko ga ki na inaki vakalou oya, ena rawa meda yacova.
O Peresitedi Thomas S. Monson a vakabibitaka: “Na inaki ni vakatavulici ni kosipeli e sega ni kena ‘sovaraki na itukutuku’ kina nodra vakasama na lewe ni kalasi. Na nakinaki sai koya me vakauqeta na tamata yadua me vakasamataka, vakila, ka qai cakacakataka na bulataki ni ivakavuvuli ni kosipeli.” 10
E tukuni ena iVoladuidusi ni Raraba “Eda vakatavulica na kosipeli me vukea na tamata me vaqaqacotaka na nodra vakabauta na Tamada Vakalomalagi kei Jisu Karisito. Eda qara mera vukei na tamata me ra vakataka vakalevu cake na iVakabula, ciqoma na Nona kaukauwa ki na nodra bula, ka yaco me rawata na bula tawamudu.” 11
Oni sa cakava tiko oqo ena dua na sala e vakasakiti sara. Keitou raica na nomuni vakayaco ka ena nodra bula na itabatamata era tubu tiko mai. E levu era sa vuli tiko ena semineri kei na Inisitute, e levu era sa lai kaulotu, e levu era sa veiqaravi tiko e valetabu, e levu era sa yaco mera tisaipeli i Jisu Karisito ena nodra bula taucoko.
E rawarawa na noqu veisureti edai: veivakavulici tiko ga ka nanuma tiko na takete oya na bula vakatisaipeli ena bula taucoko. Raica na veika kece o cakava ena rai vaka oya. Railesuva vagauna na ka o vakatavulica, ivalavala ni nomu veivakavulici, kei na veika o veitarogitaka. Kua ni railesuva ga na cava o vukei ira tiko kina mera kila ia railesuva tale ga na cava o vakauqeti ira tiko kina mera cakava ka yaco me vakataka. Veivakavulici ena inaki me vukei mera “buli vou” 12 vei Karisito.
Edua na taro me vakasamataki: E vakayaco ka vakacava beka kina veika era na vakila na noqu gonevuli baleta na taro ni veivakatarogi ni valetabu, na ka au vakavulica kei na sala au vakavulica kina? E tara cake beka na vakabauta na Tamada Vakalomalagi, Jisu Karisito kei na Yalo Tabu na noqu veivakavulici? E vaqaqacotaka beka na ivakadinadina ni Vakalesui tale mai ni kosipeli i Jisu Karisito kei ira na parofita bula kei na apositolo? E vaqaqacotaka beka na nona lalawa na gonevuli me muria na ivakaro ka veivutuni e veisiga?
Sureta na Vuli Gugumatua
Kevaka e noda takete na bula vakatisaipeli ena bula taucoko, e dodonu meda, me vaka e sureti keda kina o Elder Christofferson meda cakava, “vakasamataka na ivalavala ni nona veivakavulici na iVakabula.” E bibi na sala eda veivakavulici kina.
Ona nanuma beka na ivakavuvuli nei Peresitedi Boyd K. Packer baleta “na ivakarau ni veivakavulici” ena Koniferedi ni wasewase ni a se peresitedi ni kaulotu. A vavia o Sister Packer edua na keke taba tolu, ka ukutaki vakamatau ena kirimu duiroka. A volai toka e dela ni keke na vosa; “Na Kosipeli.”
Nira sota na kaulotu, ea kau mai na keke vata kei na kena marautaki. A vakaraitaka o Peresitedi Packer ni keke e vakatakarakataka na kosipeli. Qai taroga o koya, “O cei e vinakata me tovolea?”
Ia, e sega ni dredre na kunei ni dua na kaulotu e via kana keke. A kacivi sara i liu edua na kaulotu. A qai taura o Peresitedi Packer na ligana ka vakadromuca i loma ni keke ka kauta mai edua na tikina levu. A qumia na nona ivacu me rawa ni drodro mai maliwa ni nona iqaqalo na kirimu. A qai kolotaka na tiki ni keke oya vua na kaulotu, ka sisika na kirimu ena nona sutu.
Ni cegu vakalailai, a vuki vei ira na vo ni kaulotu ka taroga se dua tale beka e vinakata eso na keke. A kaya o koya, “A sega sara ga ni dua e makutu.”
A qai kauta mai o koya edua na disi iloilo, dua na icula siliva, dua na isulu ni kana lineni, kei na dua na isele lailai siliva totoka. A vukica na keke. Ena vakarokoroko, a musuka o koya edua na tikina mai yasana kadua, biuta vakamalua ena disi, ka taroga, “Edua beka e via kana keke?”
A vakamacalataka o Peresitedi Packer, “A matata na lesoni. Erau a keke vata ga, tautauvata na kedrau ikanakana, kei na veika erau solia. Nai vakarau ga ni kena soli mai a vakavuna me dua e veisiwati, se veibacani, ka dua e sega ni taleitaki ka vakasisila.” A vakananumi ira na kaulotu ni keke a matataka na kosipeli ka tarogi ira se sala cava era wasea tiko kina. 13
Na ivakarau ni noda vakavulica na kosipeli ena rawa ni vakasinaiti ira ga na gonevuli ena itukutuku se vakauqeti ira mera yaco me tisaipeli i Jisu Karisito ena bula taucoko ka ra veisautaka na lomadra, nodra rai, ivakarau, kei na itovo ni bula. 14
Meda veivakavulici ena nona ivakarau na iVakabula, eda lomani ira eda vakavulica, eda veivakavulici ena Yalo, ka vakavulica na ivunau. 15 Oya na ka eda cakava na qasenivuli.
Ia vakaevei o ira na gonevuli? Na cava na nodra itavi? Sa nodra itavi mera vuli vagumatua, vuli vakataki ira, mera cakacaka, ka bulataka na ivakavuvuli ni kosipeli ena nodra bula ni veisiga.
A kerei keda ena bogi o Elder Christofferson meda sureta na vuli vagumatua. A vakavulici keda o koya ena ivakarau ni Nona veisureti na iVakabula kina vuli vagumatua. A kaya, “A veivakavulici o Koya ena sala ka gadrevi kina vei iratou [Nona tisaipeli] mera vakasama, vakaitavi, veitalanoa, ka bulataka na Nona i vakavuvuli.” Meda qai cakava vakakina.
iTinitini
Me kena itinitini, vinaka vakalevu na veika ko ni sa cakava tiko vei ira o ni vakavulica kei na ka o ni cakava tiko me baleta na matanitu. Na inaki ni noda veivakavulici oya me vakatorocaketaki na bula vakatisaipeli i Jisu Karisito ena bula taucoko. Mo ni qai dusimaki nio ni “wasea na kosipeli” ena sala e sureta na vuli vagumatua.
Au wasea na noqu ivakadinadina me baleta na Qasenivuli Levu, o Jisu Karisito, noda Dautataro, e tekivuna ka sauma tale ga na noda vakabauta,” 16 ka noda “bete levu ena ka vinaka ena muri mai.” 17
Ena yacai Jisu Karisito, emeni.