Tisaipeli i Jisu Karisito ena Bula Taucoko

Au marau niu tikorawa kei kemuni nikua. Au via vakavinavinakataki Gaye (Strathearn) ena masu totoka oya; Sis Ellen Amatangelo, ena veigauna e nona dau vakaitavi taki koya ena pianoa; kei Brother Kevin Oviatt nona veivuke ena sereivakatagi keina matasere totoka. Vakavinavinakataki kemuni kece ena nomuni vakaitavi.

Au rogoca ni tiko oira na dauvakadewa ka sa vakadewataki ena vuqa na vosa, au na sega ni wasea eso na italanoa lasa me biuta vakatikitiki ena kakabauraki oqo ni dredre na kena vakadewataki. Au tiko mai Tempe. Arizona, vica na yabaki sa oti, ena tekivu ni koniferedi, koniferedi niiteki, e vakadewataki ena vosa vaka Sipeni mai vua edua na daunivakadewa ka tiko ena dua na rumu vakayagataka tiko edua na kani vakarorogo, au vakabauta. E biuta toka edua na itukutuku vei au ena itutu ni vunau. Niu tucake, au raica, ni volai tu: “Kerekere vosa vakamalua. Osa vakadewataki tiko.” [Veidredrevaki] E sega ni vaka kina. Io mona rogoci au nikua.

Meu tekivu ena noqu vakaraitaka na vakavinavinaka ni Mataveiliutaki Taumada kei na Kuoramu ni Apositolo Le Tinikarua—vakakina, na Lotu raraba—ena cakacaka oni cakava tiko vei ira na noda gonevuli e vuravura raraba. Oni tiko sara ga ena iyatu eliu ni kena vakadavori ka taqomaki na yavu ni Lotu oqo, na matanitu ni Kalou e vuravura, baleta na veigauna sa bera mai. Vinaka vakalevu na nomu solibula. Au vakabauta vakaidina na nomuni sasaga e yaco kina eso na veisau vinaka.

O ira na veiliutaki ena Lotu era vakabibitaka tiko na bibi ni vakatoroicaketaki ni bula vakatisaipeli i Jisu Karisito ena bula taucoko. Keitou vakabibitaka qo, me ivakaraitaki, ena sala era tuberi kina na iluliu ni kaulotu kei ira na iliuliu ni noda cauravou kei na goneyalewa ena loma ni Lotu. Keitou vakabibitaka ni oqo ena iulutaga keitou kerea vei ira na Vakaitutu Raraba mera vosa kina nira veilakoyaki voli ena veivanua, kei ira talega na Vakalesilesi Raraba .

E matata, na kena tauyavutaki na bula vakatisaipeli ni noda iVakabula e iusutu bibi vei keda. Ena ivurevure ni CES na “Strengthening Religious Education,” eda vulica:

“Na inaki ni vulici ni veikavakalotu oya me vakatavulici na kosipeli vakalesui mai i Jisu Karisito mai na ivolanikalou kei ira na parofita ni gauna oqo ena sala era na vukei kina na noda gonevuli mera:

1. Vakatorocaketaka na nona vakabauta kei na nona ivakadinadina me baleta na Tamada Vakalomalagi kei na Nona ‘ituvatuva cecere,’

2. Yaco mera tisaipeli i Jisu Karisito ena bula taucoko, ka ra caka ka maroroi veiyalayalati, [ka]

3. Vaqaqacotaka na nodra igu me kunea na isau ni taro, walia na vakatitiqa, bula ena vakabauta, ka tukuna na vu ni inuinui e lomadra nira sotava na veibolebole cava ga.”¹

E vakakina , Na iNaki ni Semineri kei na Inisitute ni Veikavakalotu e tukuna: “E neitou inaki mera vukei na itabagone kei ira na itabagone qase cake mera vakatitobutaka na nodra saumaki vei Jisu Karisito kei na nona kosipeli vakalesui mai, rawata na veivakalougatataki ni valetabu, ka vakarautaki ira, kei na nodra vuvale, kei ira tale eso kina bula tawamudu vata kei Tamadra mai Lomalagi.”

Na bula tikoga vakatisaipeli e tiki bibi ni vakavuvuli i Karisito. Na ivakavuvuli i Karisito e vakaraitaka na sala eda rawa ni gole kina vei Karisito ka ciqoma na isolisoli ni Nona veisorovaki, ni loloma soli wale. Eda vakayagataka na noda galala meda vakabauti Koya, veivutuni, papitaiso, ka ciqoma na isolisoli ni Yalo Tabu. Ia, me rawa ni yaco taucoko na kaukauwa ni Veisorovaki i Karisito, na kena veisautaki keda e gadrevi meda muria tikoga na salatu ni veiyalayalati—na salatu ni bula vakatisaipeli—me yacova ni sa cava na noda bula vakayago. Ena vosa nei Nifai: “Kau a rogoca e dua na domo mai vei Tamada, ni sa kaya: Io, sa mana ka dina na vosa i Koya au Daulomana. Ko koya sa vosota me yacova na ivakataotioti, ena vakabulai. Ia oqo, oi kemudou na wekaqu lomani, au kila mai na veika oqo ni kevaka ena sega ni vosota na tamata me yacova na ivakataotioti, ka muria na nona ivakarau na Luve ni Kalou Bula, ena sega ni vakabulai ko koya.”²

O Peresitedi Russell M. Nelson e vakavulica, “O ira na tisaipeli dina i Jisu Karisito era tuvakarau mera kilai tani, tukuna na lomadra, ka duatani mai vei ira na tamata e vuravura. Era sega ni yalolailai, era yalodina, ka yaloqaqa.”³ E rawati vakacava na mataqali bula vakatisaipeli oqo? Na cava na kena ibalebale oya veikeda na dauniveituberi vakalotu? Eda na rawa ni veivakavulici vakacava ena sala mera na bulataka kina oira na noda tabaogne kei na tagbaogne qasecake na bula vakatisaipeli ena nodra bula taucoko?

Ena bogi edai, au na tekivu ena vakasamataki ni sala e vakatitobutaka kina na saumaki na galala ni digidigi yadua ka veimuataki kina bula vakatisaipeli ena bula taucoko. Au na qai sureti keda meda na raica na vakasama oqo ena vakavinakataka kina na noda veivakavulici na dauniveituberi vakalotu, ka me vakanamata kina Vua na iVakabula me vaka e vakavulici ratou kina na Nona tisaipeli. Au na qai tinia ena so na vosa me baleta na sala e rawa ni vukei kina o ira na gonevuli ena kena vakalevutaki na madigi mera raica vakai ira na nodra vuli ka me vukei ira mera na raica lesu na nona kerekere o Peresitedi Nelson mera taukena na nodra ivakadinadina.

Matai, na galala ni digiddigi ena bula vakatisaipeli. E dua vei ira na isolisoli bibi a solia na Kalou vei ira na Luvena oya na galala ni digidigi. Na kaukauwa kei na lewa—kei na itavi—meda vakatulewa vakataki keda e bibi me kunei kina na noda rawa ka vaka luve ni Kalou. E uto ni noda toso iliu ena salatu ni veiyalayalati. E ituvatuva ni Kalou, mo kila, me caka na ka kece vei keda ia me vakarautaka edua na ituvatuva e vakatarai keda meda cakava vakai keda na noda digidigi meda tubu yadudua kina. Na digidigi e idola ni noda tubu me vaka na yalotabu e liu, ka idola kina na cava eda rawa ni yaco me vakataka ena ituvatuva ni marau ni Kalou edaidai kei na tawamudu.

E kila vinaka oqo na vunica ka tovolea me vakacacana na noda galagala ni digidigi. Ena Mosese, eda wilika kina:

“Raica au sa lewa me vakasavi sobu mai ko Setani ni sa vorati au, ka segata me voroka na galala ni digidigi kau sa solia vua na tamata, koi Au na Turaga na Kalou; io sa vinakata tale ga meu solia vua na noqu kaukauwa kei na nona kaukauwa na noqu Le Duabau Ga, Au vakatara me cemuri sobu;

Ka sa yaco kina ko koya me Setani, io, na tevoro, na tama ni veika lasu kecega, me vakaisina ka vakamatabokotaka na tamata, ka me kauti ira vakabobula me vaka na lomana, io ko ira kecega era na sega ni via rogoca na domoqu.”⁴

Na iValu mai Lomalagi e rawa ni raici, ni yaco, me dua na ivalu me taqomaki kina na galala ni digidigi ni tamata. Ka tomani tiko na ivalu oya ena bula vakayago. O Setani e valuta tiko na galala ni digidigi mai na rua na yasana. Ena dua na yasana, e vakauqeta na ile vakapolitiki kei na toso e vakalailaitaka na itavi ni tamata yadua se vakayagataka na kaukauwa me kauta tani kina na madigi ni caka digidigi. Na Turaga e tukuna, me ivakaraitaki, ni inaki levu duadua a vakavuna me tauyavutaki kina na Yavu ni Vakavulewa e Amerika baleta “me taqomaki kina na nodra dodonu na tamata kecega Mera muria na tamata yadua na ivunau kei na ivakavuvuli me vaka na galala ni digidigi au sa solia vua, ni na tarogi na tamata yadua ena nona ivalavala ca ena siga ni veilewai.”⁵ A qai tukuna o Koya edua na ivakaraitaki bibi ni voroki ni galala ni digidigi, ka kaya, “O koya, sa sega sara kina ni dodonu me dua na tamata me bobula vua e dua tale.”⁶ Na ituvatuva i Lusefa e ituvatuva ga ni veivakabobulataki ena sala cava ga.

Edua tale na vakanamata ni meca ena valuti ni galala ni digidigi ena bibi sara vei keda na qasenivuli. Me vaka e kilai ena ivolanikalou se qai cavuti oti, nio Setani, “na tama ni veika lasu kecega,” e cakacaka “me vakaisini ira na tamata ka vakamatabokotaki ira.”⁷ Ena sega ni vakaibalebale na galagala ni digidigi ke da sega ni kila na ka dina kei na kena e sega, o koya gona eda na sega ni vaakraitaki vei keda, na vuku ni digidigi. Na iwali ni veivakacalai sai koya na dina. Me vaka e tukuna na iVakabula, “Kevaka dou sa muria tikoga na noqu vosa dou sa qai noqu tisaipeli dina; ia dou na kila na ka dina, ia na ka dina ena sereki kemudou.”⁸ Au nanuma ni vakaibalebaletaka o Koya meda sereki mai na ivesu ni valavala ca kei na cala, ka da galala tale ga meda vakayacora na noda galala ni digidigi ena kilaka—ena galala ka rawa ni digidigi vakayalomatua. Oya na vanua eda lako mai kina vaqasenivuli ni vosa ni Kalou. O Setani ena rawa ga ni kaukauwa vei ira era sega ni “muria na domo ni [Turaga].” Na Kalou a tala mai na Luvena me o Koya na “sala, kei na vu ni dina, kei na vu ni bula.”⁹ A soli ira mai na parofita vei keda o Koya meda vakavulici ka tuberi kina ki na dina. E solina isolisoli ni Yalo Tabu me vakadeitaka na dina, sa noda itavi meda vukei ira na gonevuli mera rogoca ka digitaka mera bulataka na dina.

Ia na galala ni digidigi ena vakasama ni vulici ni veikavakalotu, e gadreva edua tale na ikalawa mai na vakadewataki ga ni dina vakosipeli. E gadrevi meda veivakavulici ena dua na sala ena sureti ira na gonevuli mera cakacakataka na nodra galala ni digidigi nira vuli tiko. Eda vinakata meda vukei ira mera vakaitavitaki ira ena cakacaka ni vuli ka qarava vakataki ira na nodra vuli ka. Na cakacakataki ni nodra galala ni digidigi na gonevuli mera qarava vakataki ira na nodra vuli me vukea na kena vakatorocaketaki na nodra vakabauta, kei na ivakadinadina tawamudu. Ena kena vakayacori oqo era na rawa ni yaco kina mera bulabula ka tisaipeli i Jisu Karisito ena bula taucoko. Au na qai tukuna eso tale na ka e muri, ia meu kuria eso na ka me baleta na veiyalayalati.

Na digidigi vakataki keda edua vei ira na vuna e vakanamata kina vakalevu o Peresitedi Nelson ena veiyalayalati. Nida digitaka meda caka ka maroroi veiyalayalati, eda sa digitaka tiko kina vakaikeda meda muria na iVakabula. E vakamacalataka o Peresitedi Nelson:

“Ena bula oqo sa rawa mo digitaka na lawa cava o lomasoli mo muria—na kena ena matanitu vakasilesitieli, se vakateresitieli, se vakatilesitieli—ka, me vakakina, na matanitu ni lagilagi cava o na lai bula tawamudu kina. Na veidigidigi dodonu kece o cakava eke ena kauta mai e levu na ka vinaka vei iko edaidai. Ia na veidigidigi dodonu kece ena bula vakayago ena sega ni tukuni rawa na levu ni kena isau tawamudu. Ke o digitaka mo caka veiyalayalati kei na Kalou ka yalodina kina veiyalayalati oqori, e yalataki vei iko na ‘lagilagi ni na vakaikuritaki ki [ulumu] me tawamdu.’”¹⁰

Ia, nomu vakatulewataka vakataki iko na nomu digidigi ena vaqaqacotaka na veika o vakabauta. Eda sega ni cakacaka vakataki keda, eda na rawa ni kunea ni noda vakabauta e sega ni qaqaco vinaka me vorata na veitaro kei na veibolebole ni bula ka meda tisaipeli i Jisu Karisito ena noda bula taucoko. Ena vosa ni Turaga vakai Koya:

“Ia ko ira sa yalomatua ka vakabauta na dina, ka ra sa taura na Yalo Tabu me nodra idusidusi, ka ra qai sega ni rawai—au sa kaya vakaidina vei kemudou, era na sega ni tamusuki sobu ka biu ki na bukawaqa, raica era na tu ena siga ko ya.”¹¹

QO, na yavu ni itavi ni galala ni digidigi e tiki bibi ni noda tubu ka na vakayaco ka kina sala eda veivakavulici kina vaka dauveituberi ni veika vakalotu. Keitou kerei ira na iliuliu ni kaulotu mera nanuma na ka oqo nira solia vei ira na nodra kaulotu na madigi mera veiliutaki ka dusimaka na cakacaka ni kaulotu. Keitou kerei ira na iliuliu ni itabagone mera solia vei ira na itabagone na madigi mera “colata na ivua” ni veiliutaki vata kei ira na nodra dauniveituberi tabaqase. Ka keitou kerei kemuni, na neimami dauveituberi ni veikavakalotu, moni veivakavulici ena sala ena sureta mera malele mai ka vuli vakataki ira. Ena veituvaki yadua oqo, na tubu dina ena yaco vakavinaka sara ni soli vei ira na itabagone na madigi mera cakacaka ka sega ni ra cakacakataki.

Au vakananuma ena marau na noqu gauna vaka dua na qasenivuli ni semineri ena mataka lailai. Au vulica ena veika au sotava ni oya edua na veikacivi e dodonu meda vinakata. E rua vei ira na yabaki oya vaka qasenivuli ni semineri a yaco ena gauna au vuli loya tiko kina. Ena noqu vinakati ira na noqu gonevuli mera kila se vakacava tu na kena irairai mera yaloqaqa ka bula ena vakabauta, au a sureta kina edua na lewe ni noqu kalasi, sega ni lewenilotu ia e tamata vakabauta, me mai vosa ena noqu kalasi ena dua na mataka. O noqu itokani e sega ni rai vakavinaka na matana e dau gadrevi e veigauna, na veiqaravi ka oka kina, keo vaksamataka, me leuti mai na yaloka ni matana ka me qaravi vakavuniwai. Na vuli loya e gadrevi kina e levu sara na wilivola, ia e sega ni dau rai vakavinaka sara me wilivola. Sa qai dau sauma o koya eso na gonevuli me wilivola vua ni sa oti na kalasi e veisiga. E dina ni tiko vua na veibolebole bibi vakaoqo, ia e a ivakarau vinaka ka dau taleitaki mai vei ira na itokani gonevuli. Keimami a dauvakauqeti kece mai na nona ivakaraitaki.

E talanoataka o RIchard na nona italanoa ena noqu kalasi ni semineri, oka kina na nona vakabauta na Kalou kei na sala a vakila kina na Nona sauma na Kalou na nona masu. A rawa vei ira na gonevuli mera raici koya ka rogoci koya sara vakavoleka, ka taroga vua eso na taro. Ea dolavi na matadra kina kaukauwa ni mana ni vakabauta kei na kena ibalebale oya kina nodra bula. Ena gauna vata oya, e dolava na matai Richard na veika e sotavi oya, kina talei ni noqu kalasi ni Semineri. (Dua na ka e kurabui kina okoya ni raici ira na tabagone ena kalasi ni 6.00am.)

Qo, vakasamataka mada na sala e veivakavulici kina na iVakabula. O Jisu a sega ni tukuna vei ira Nona tisaipeli na ka e dodonu mera cakava, se cakava na veika kece vei ira. E vakavulici ira o Koya ena sala ka gadrevi kina vei ira mera nanuma, vakaitavi, veiwasei, ka bulataka na Nona ivakavuvuli. Ena vuku ni ka oqo, ena gauna a sega ni tiko vakatamata kina kei iratou na Nona tisaipeli na iVakabula, eratou sa vakarau vinaka tu me ciqoma ka liutaki mai vua na Yalo Tabu vakai iratou.¹² Ena Veivakavulici ena iVakarau ni iVakabula, eda wilika kina: “Ea ka vakamatalau dina me raica na iVakabula ni lako e dela ni wai. Ia oya a sega ni rauta vei Pita. A vinakata [ka gadreva] me cakava na ka a cakava na iVakabula, me tu ena vanua a tu kina o Koya, ka sotava vakataki koya na veika vata oya.”¹³ Io, ena cakava tale ga o Pita eso na cala, ia na iVakabula a solia vei Pita—veikeda kece tale ga—na madigi meda cakacaka ka vakaukauwataki ena nona sasaga, oka kina ena nona malumalumu.¹⁴

Me buli cake na veimataqali ivakarau ni vuli vakaoqo vei ira na Nona tisaipeli, a kunea kina na iVakabula eso na sala me vukei iratou me vuli vakai iratou. Vakasamataka e tolu mada ga na sala a veimaliwai kina o Jisu kei iratou na Nona tisaipeli: (1) vosa vakatautauvata, (2) taroga na taro veivakauqeti, ka (3) sureta na tamata yadua.

Vuli mai na Vosa Vakatautauvata. Na ivakamacala ena veika oqo. Matai, talanoa vakaibalebale. Vakasamataka mada na Nona vakayagataka o Karisito na italanoa vakatautauvata. A sega ni dau sauma se vakamacalataka vakadodonu na iVakabula na ibalebale ni italanoa, ia a dau sureti ira vakavuqa na muri Koya mera vakasamataka vakatitobu na ibalebale ni ka e vakavulica tiko o Koya. A gadrevi kina na sasaga mai vei ira. Au rawa ni nanuma na veisala eso sa vaqaqacotaki kina na noqu kila vakavinaka na talairawarawa niu vulica na vosa vakatautauvata ni Daukakaburaki.¹⁵ Au sa kila vakavinaka na veivosoti ena vulici ni gone cidroi.¹⁶ Na noqu gagadre meu vakila ka vakaraitaka na loloma uasivi vei ira kece e vakatakilai ena vosa vakatautauvata ni kai Samaria dauloloma.¹⁷

Ena sala vata oya, au sa mai tisaipeli ka iliuliu vinaka cake niu vakananuma na cakacaka vakadauniyau e vakamacalataki ena vosa vakatautauvata ni taledi.¹⁸ Edua vei ira na ka a basika mai vei au niu vakananuma na vosa vakatautauvata oqo oya o rau na imatai ni rua na tamata cakacaka—edua a ciqoma e lima na taledi ka dua a ciqoma e rua, ka rau a dui vakatubura na nodrau taledi—erau a ciqoma na veivakacaucautaki kei na isau vata ga ka dina ga ni a duidui na ilevu ni nodrau taledi. Na kena imatai, e lima na taledi, o kila, a vakaruataka na nona me tini, kei na kena ikarua, ka tekivu ena rua a vakalesuya tale mai e va. Ia erau a ciqoma na veivakacaucautaki vata ga mai vua na nodrau turaga, “E vinaka, a tamata vinaka ka dina: ko sa dina ena ka e vica ga, au na lesi iko mo lewa na ka e vuqa: curu kina marau ni nomu turaga.”¹⁹ Au taura oqo me kena ibalebale ni sega ni gadrevi meda rawaka ena sala vata ga se ena gauna vata ga me ciqoma kina na veivakalougatataki ni turaga ka qai tarava mai na bula tawamudu. E gadrevi ga meda vakamareqeta na isolisoli kei na igu kei na madigi e tu vei keda. Au vakabauta nio koya mada ga na tamata ka dua na nona taledi, ke a cakacaka ka veiqaravi me rawata edua tale ka sega ni lai vunitaka na nona taledi, ke ciqoma tale ga na isau vata ga ka soli vei rau na tacina e rua. Au vakavulica vei ira na iliuliu kei ira eso ni kevaka era cakava ga na ka era rawata, na Turaga ena vakalevutaka ka sauma na nodra sasaga, ka ra na ciqoma na taucoko na Nona veivakalougatataki ena kena gauna ga.

Taroga na Taro Veivakauqeti. Na kena tarogi na taro e veivakauqeti, e vakatavulcia na iVakabula ena sala vata ga. Kena ivakaraitaki, ni tarogi iratou na Nona tisaipeli o Koya, “Ia dou sa kaya se ko cei koi au?” E kila vakamatata na kena isau ka vakatitobu o Koya na kena isau mai vei iratou na Nona tisaipeli, ia a solia o Koya vei Pita na madigi me vakasama ka qai sauma na taro vakataki koya. Au vakabauta na veika a tukuna o Pita a vakatitobutaka na nona ivakadinadina ena nona cavuta, “Oi kemuni na Karisito, na Luve ni Kalou bula.”²⁰ Ni oti na Nona Tucaketale, a tarogi Pita vakatolu na iVakabula ena dua tale na taro: “Saimoni, na luvei Jona, ko sa lomani au se segai?” Ena veigauna yadua a sauma o Pita, “Io, na Turaga; ko ni sa kila niu sa lomani kemuni.” Ena gauna oqo na taro a vakatara vua na iVakabula me vakavulici Pita me sauma lesu ena gauna kece, “Vakania na noqu sipi.”²¹

Vakatetea na Veisureti. Kena otioti, veisureti raraba. Ena dua na gauna, ena so na gauna a dau sauma vakaikoya na iVakabula na taro a taroga o Koya, ia ena sala e vaka e veisureti kina. Ena Nona vosa vei ira Nona tisaipeli ena Ra ni vuravura, e taroga na iVakabula, “Ia a cava na ivalavala sa kilikili kei kemudou?” E qai sauma lesu, “Au sa kaya vakaidina vei kemudou, mo dou vakataki au.”²² Eda rawa ni vakananuma eso tale na veisureti bibi mai vua na iVakabula. Vakasamataka, kena ivakaraitaki, na Nona veisureti, “Lako mai, mo muri au.” Ena so na gauna na Nona veisureti e salavata kei na iyalayala—e se lako vata tu ga mai kei na iyalayala. Me ivakaraitaki, ena Vunau kei na Veiyalayalati, na Turaga e veisureti: “Toro voleka mai vei au kau na qai toro voleka yani vei kemudou; dou vakasaqarai au vagumatua dou na qai kunei au; dou kerekere ka na soli vei kemudou; dou tukituki ka na dolavi vei kemudou.”²³ Ena veisureti kece ni iVakabula, e solia o Koya vei iratou na Nona tisaipeli na madigi me ratou cakacakataka, vakasama, ka vakatulewataka vakai iratou na nodratou vuli kei na tubu.

Ena itekivu ni yabaki oqo, e vakatetea kina o Elder Clark Gilbert edua na veisureti vei ira na noda qasenivuli ni semineri kei na inisitute me kunei kina na sala eso me soli kina vei ira na gonevuli na madigi eso ni cakacaka ka cakava vakataki ira na nodra vuli. A tautauri vakadodonu mai na iwasewase ena Veivakavulici ena iVakarau ni iVakabula ka kena iulutaga na “Sureta na Vuli Gugumatua.”²⁴ Au kunea ni bibi sara na iulutaga ni wase oqo ni vakanamata ena vuli ka sega kina veivakavulici. Vei au, oqo e ivakananumi nio ira na qasenivuli rawa ka era sureti ira na gonevuli mera cakacakataka vakataki ira na nodra vuli. Nida veivakavulici ena sala ka sureta ga na vakarorogo ka vakawalena mera vakaitavi mai o koya e vuli, eda vakaraitaka tiko vei ira na gonevuli ni bibi cake vei keda na noda veivakavulici mai na nodra vuli.

Ena Veivakavulici ena iVakarau ni iVakabula, eda vakananumi kina ni veisureti kina vuli gugumatua e gadrevi kina vei keda meda vukei ira na gonevuli mera vakatulewataka vakataki ira na nodra vuli. E tiko e vica na sala e rawa ni yaco kina, ia meu vakabibitaka e tolu mada ga mai na ivurevure ni veivakavulici oya:

• iMatai, eda rawa ni tauyavutaka eso na lesoni ni vuli meda “sureti ira na vuli mera vakavakarau mera vuli.” Oqo e rawa ni yaco ena kena wiliki taumada na lesoni, na taro vulici, kei na veisureti vakatamata yadua.

• iKarua, e dodonu meda “vakayaloqaqataki ira na vuli mera wasea na dina era vulica tiko.” E levu tu na sala ni kena vakayacori na ka oqo, ka o kemuni yadudua oni na kila na iwalewale e cakacaka vei iko kei ira nomu gonevuli. Niu a vuli loya tiko, au dau vuli vakalevu ena ka e vakatokai na iwalewale ni vuli vaka Sokarati, oya ena nodra dau vukei keimami na qasenivuli me keimami kila vinaka edua na kisi vakalawa ena nodra dau tarogi keimami ena so na veitaro titobu sara. Keimami na dau yaco mai kina kalasi ka vakarau tu me wasea na neimami raititobu ka vakarorogo tale ga vei ira na kena vo. Au raica nio ira na qasenivuli ni inisitute era solia na madigi vei ira na gonevuli mera wasea na veika era vulica tiko ena veivosaki tuvanaki vakamaqosa vakalasi, ka gadrevi kina na me vakavakarau vinaka o dauniveituberi me semati ira na gonevuli-era vakavavakarauvinaka ena yalo ni vakatataro kei na veitalanoa. Au kila ni dodonu me vaka oya ena noda kalasi. Era vakavakarau-vakavinaka na gonevuli kece. Era vakavakarau-vakavinaka na qasenivuli kece. Ia oya na veisureti.

• iKatolu, e dodonu meda “sureti ira na vuli mera bulataka na ka era sa vulica tiko” (kuria na kala).²⁵ E dodonu meda dau vaqara eso na sala mera sureti kina na gonevuli mera bulataka ena nodra bula na ka era sa vulica tiko. Oqo e rawa ni yaco ena veisureti ki na tamata yadua, na vakasama vakatitobu, kei na veisasaga tale eso me vukei ira na gonevuli mera veisau ka vakataki Karisito vakalevu cake.

Na sasaga oqo mera vakavakarau ka wasea ka bulataka ena taura na vakasama ka gadrevi kina ena so na gauna e levu na cakacaka mai vua na qasenivuli. Oqo ena dina vakalevu nio sasaga mo vukei ira na gonevuli mera veiwasei ka veivakavulici vakai ira. Oqo e sega ni kena ibalebale ni sega ni tiko eso na gauna meda vosa kina vakamatata ka vakadodonu, vakauasivi nida vakabibitaka tiko edua na itukutuku bibi se da tuvana tiko na yavu ni dua na ivakavuvuli bibi. Na soqoni ena bogi edai edua na ivakaraitaki ni kena tauyavutaki na yavu ni dua na itukutuku bibi. Ia na itukutuku oqo e dodonu me salamuria mai na veimadigi matau eso meda vuli vata kece kina ena noda wasea na veika eda sa vulica ka bulataka na veika eda vulica me tiki no noda veivakavulici.

Au nuitaka nio ni raica na taro vulici kei na ivola me wiliki taumada mai ka a kerei vei kemuni moni vakavakarau mai kina ni bera na bogi edai. Ni mataka kei na veimacawa ka lako mai, keitou na sureti kemuni moni veitalanoataka na veika oni vulica tiko me baleta na veivakavulici ena ivakarau ni iVakabula vata kei ira na nomuni tokani kei na icaba. Keitou na kerea tale ga vei kemuni moni vakatakila mai na veitikina oni rawa ni vaqaqacotaka ena nomuni veivakavulici ka yavutaki mai na itukutuku ena bogi edai kei na ivurevure ni veivakavulici eso ena wasei ni mataka.

Meu tei cegu mada ka vakatututaka edua tale na ivurevure ni veivakatavulici ka yaga me vulici, dina ga ni a volai me baleta edua tale na ilawalawa. Au tukuna tiko na Wase e 10 ena ivolavakarau ni kaulotu, na Vunautaka na Noqu Kosipeli. Na iwase oqo e kena ulutaga na “Veivakavulici mo Taracake na Vakabauti Jisu Karisito.” Na veivakatavulici vakadaukaulotu, e dina, e sala mana mera vukei kina na tamata mera veisautaka na nodra bula ka vakayagataka na nodra galagala ni digidigi. Na takete sai koya na saumaki ena veivakayarayarataki ni Yalo Tabu kei na loloma soliwale i Karisito ka veimuataki ki na bula vakatisaipeli ena bula taucoko. Oqo na veika saraga me baleta na IVakarau ni Vuli ni Lotu, e vakakina. Au rawa ni tukuna ni sa vakaiukuritaki mai na ivurevure oqo vaka kina ena Veituberi, Ena iVakarau ni iVakabula. E dina sara, ni rau wasea vata na ivolavakarau erua oqo e vuqa sara na ka, ia na wiliki ni dua ga na vakasama ena duatani tale na sala edau solia edua tale na raititobu vou kei na titobu ni kilaka. Eso na taro ka golevi ena Wase e 10 ni Vunautaka na Noqu Kosipeli na “Ena rawa vakacava meu veivakavulici ena Yalo?” “Ena rawa vakacava meu veivakavulici mai na ivolanikalou?” “Ena rawa vakacava meu wasea na noqu ivakadinadina ena gauna ni veivakavulici?” “Meu na tuvanaka ka moica vakacava na noqu veivakavulici me sotava na nodra gagadre na tamata?” kei “Na sala cava au rawa ni taroga kina na vei taro vinaka ka dau vakarorogo vakavinaka cake?” Au vinakata moni kila niu sega ni saumi meu vakatututaka na ka oqo.

Kena iotioti, nodra vukei na gonevuli mera vaqaqacotaka na nodra ivakadinadina. Sureta na vuli vagumatua e yavu ni tarai cake ni bula vakatisaipeli i Jisu Karisito ena bula taucoko baleta e vukei ira na vuli mera vakaitavi ena nodra vuli vakataki ira. Edua vei ira na sala e vakauqeta kina o Peresitedi Nelson meda vakaitavi ena noda tubu vakayadudua e tiko ena nona veisureti vei ira na itabagonne qase cake mera vaqaqacotaka na nodra ivakadinadina. Ena lotu ni vuravura raraba vei ira na itabagone qasecake ena 2022, a kaya kina o Peresitedi Nelson:

“Au kerei kemuni moni vaqaqacotaka na nomuni ivakadinadina. Cakacakataka. Taukena. Karona. Susuga me na tubu kina. Vakania ena dina. Kua ni vakaduka ena nodra vuku lasu na tagane kei na yalewa tawavakabauta ka qai vakataroga se cava sa malumalumu kina na nomu ivakadinadina. Daumasu vagumatua e veisiga, ena yalomalumalumu. Vakani iko ena nodra vosa na parofita ni gauna makawa kei na gauna oqo. Kerea vua na Turaga me vakavulici iko mo rogoci Koya vakavinaka cake. Vakayagataka e levu na gauna e valetabu kei na cakacaka ni tuvakawa. Nio cakava na nomu ivakadinadina me ka bibi duadua vei iko, sarava na cakamana ena yaco kina nomu bula.”²⁶

E tokaruataka oPeresitedi Nelson na vakamamasu oqo kina Lotu raraba ena nona vosa ena koniferedi raraba ni Okotova 2022 “Vakamalumalumutaka na Vuravura ka Kunea na Vakacegu.”²⁷

Nona vosa vei ira na tabagone qasecake, a taroga o Peresitedi Nelson e vica vata na taro: “O vinakata beka mo vakila na vakacegu mai na kauwai ka vakaleqai iko tiko ena gauna oqo? O vinakata beka mo kilai Jisu Karisito vakavinaka cake? O vinakata beka mo vulica na sala e rawa ni vakabula kina na nomu mavoa kei na malumalumu na Nona kaukauwa vakalou? O vinakata beka mo vakila na kamica, kamica ni veivakacegui ni Veisorovaki i Jisu Karisito ni cakacaka tiko ena nomu bula? Na kena vaqarai me saumi na veitaro oqo ena gadrevi kina na sasaga—na sasaga levu.”²⁸ A vakadeitaka na nodra kauwai na gonevuli ena nona kaya: “Ke tiko na nomu taro—au nuitaka ni tiko—vakasaqara na isaunitaro ena gagadre dina mo vakadinata. Vulica na veika kece o rawata me baleta na kosipeli, ka vakadeitaka mo gole kina ivurevure vakasinaiti ena dina mo dusimaki.”

Vei au, oqo na ibalebale ni veisureti kina vuli gugumatua, ka oqo na ka ena gadrevi vei keda meda sureti ira na noda gonevuli mera vaqaqacotaka na nodra ivakadinadina. Ena gadrevi me tokoni na nodra vakaitavi ena vuli ena sala eda tuvanaka kina na noda veivakavulici, me rawa kina vei ira na gonevuli mera vakaitavi vakatitobu ka yaco mera tubu ena bula dina vakatisaipeli. Vakananuma tale na veisureti ni parofita me “Cakacakataki. Taukena. Karona. Susuga me na tubu kina.” Era veisureti beka na noda rumu ni vuli mera vakaitavi mai na gonevuli me vakatorocaketaki kina na ivakadinadina kei na bula vakatisaipeli? E tiko beka eso na sala eda rawa ni yacova—se vakavinakataka kina na noda sasaga vakayadua meda yacova ka sureta na vuli gugumatua?

Ena bogi edai, au a tekivu ena noqu railesuva na inaki ni vulici ni veikavakalotu ena Lotu, oka kina na gagadre mera vukei na noda gonevuli:

1. “Vakatorocaketaka na vakabauta kei na ivakadinadina baleta na Tamada Vakalomalagi kei na Nona ‘ituvatuvva cecere,’

2. Yaco me tisaipeli i Jisu Karisito ena bula taucoko, ka caka ka maroroi veiyalayalati,  [ka]

3. Vaqaqacotaka na nodra igu me kunea na isau ni taro, walia na vakatitiqa, bula ena vakabauta, ka tukuna na vu ni inuinui e lomadra nira sotava na veibolebole cava ga.”²⁹

Nida vukei ira na gonevuli mera cakacakataka na nodra galala ni digidigi, ena titobu na nodra saumaki ena veisala ka na veimuataki kina bula vakatisaipeli ena bula taucoko. Ena Okotova sa oti, e kaya kina o Peresitedi Nelson, ”Oqo na gauna meda vakaliuca kina na noda bula vakatisaipeli.”³⁰ E kuria, “E sega ni sa rui totolo se sa rui bera na nomu yaco mo tisaipeli yalodina i Jisu Karisito.”³¹ Meda cakacaka vagumatua edaidai de eda na qai bera. Oqo na gauna, e tukuna. Vakavqa ka vakavuqa, au vakila vakalevu sara ena ivakasala ni vakamamasu nei taciqu o Paula ena nona vosa ni vakadre, nona vakadreti ira na qase mai Efeso:

“O koya ga, mo dou vakaraici kemudou, kei ira kecega, na qele ni sipi sa lesi kemudou kina na Yalo Tabu mo dou nodra ivakatawa, mo dou vakania na isoqosoqo lewe ni lotu ni Kalou; ko ira sa volia ko Koya ena Nona dra ga.

“Niu sa kila oqo, niu sa lako tani eke ena qai curu mai vei kemudou eso na wolifa ca sara; era na sega ni lomani ira na qele ni sipi.

“Ena tubu cake tale ga eso na tamata vei kemudou, era na vosataka na ka e veivakacalai, me mari ira kina era sa lotu mera muri ira.”³²

O ira na gonevuli ka eda sa, ena vosa i Paula, nodra “ivakatawa” era sa talei dina, voli ena dra talei ga ni iVakabula. Eda vakaroti meda vakarautaka edua na ivakaraitaki yalodina ka vakani ka vakaukauwataki ira mai na “wolifa ca sara” era rawa ni sotava e taudaku ni Lotu ka vakakina ena loma sara ga ni Lotu—vaka e kaya o Paula, ena “keda maliwa”—era vosataka na ka lasu ka ra vaqara mera qisi ira mera nodra tisaipeli ka sega ni tisaipeli ni iVakavuvuli. E dodonu meda vukei ira mera vulica na dina, na vakayagataki vakavuku ni digidigi, ka vakauasivi, na loloma titobu ka dei vua na Tamada kei na Luvena.

Au vakadinadinataka na Tamada Vakalomalagi lomani ka dauloloma kei na Nona ituvatuva ni Veivueti. Au vakadinadinataka na dina ni Nona bula na Luvena e Duabau Ga sa Vakatuburi o Jisu Karisito, na Dauveivueti sa tucaketale, ka dabe tiko ena liga i matau i Tamada, ka kerea kina na Nona dodonu me vosoti ira na luve ni tamata.³³ Vata kei Momani, au vakatusa niu dua na tisaipeli i Jisu Karisito³⁴ ka vaqara meu tisaipeli i Karisito ena gauna au bula tiko kina. Meda qai vaqaqacotaki vakayadua ena noda bula vakatisaipeli kei na noda sasaga meda vukei ira eda rawata mera yaco mera tisaipeli yalodina i Jisu Karisito ena bula taucoko.

Me vakalougatataki kemuni na Kalou. Ena yacai Jisu Karisito, emeni.