Sa Noda Lalawa na Saumaki

Na inaki ni kena vulici ka vakatavulici na kosipeli taucoko sai koya me vakatitobutaka na noda saumaki ka vukei keda meda vakataki Jisu Karisito vakalevu cake. Ena vuku ni ka oqo, nida vulica na kosipeli, eda sega walega ni vakaraica na itukutuku vou; eda vinakata meda “buli vou” (2 Korinica 5:17). E kena ibalebale oqo meda vakararavi kivua na Tamada Vakalomalagi kei Jisu Karisito me vukei keda meda veisautaka na lomada, noda rai, noda ivalavala, kei na keda ituvaki sara ga.

Ia na mataqali vuli kosipeli e vaqaqacotaka na noda vakabauta ka veimuataki ki na cakamana ni saumaki e sega ni yaco ena dua ga na gauna. E tete yani ki na taudaku ni rumu ni vuli ki na loma kei na itikotiko ni tamata yadua. E gadrevi kina na sasaga vagumatua e veisiga, me kilai vakamatata ka bulataki kina na kosipeli. Na saumaki dina e gadrevi kina na veivakayarayarataki ni Yalo Tabu.

Na Yalo Tabu e tuberi keda ki na dina ka vakadinadinataka na dina oya (raica na Joni 16:13). E vakararamataka na noda vakasama, vakayadrata na noda kilaka, ka vukei keda meda ciqoma na ivakatakila maivua na Kalou, na ivurevure ni dina kecega. Na Yalo Tabu e vakasavasavataka na lomada. E vakauqeta vei keda na gagadre meda bulataka na dina, ka vakasolokakanataka vei keda na veisala eso me vakayacori kina. Sa dina sara, “na Yalo Tabu … ena vakavulici [keda] ena ka kecega” (Joni 14:26).

Ena vuku ni veika oqo, ena noda sasaga me bulataka, vulica, ka vakatavulica na kosipeli, sa dodonu meda vakasaqara e liu ka taumada na veitokani ni Yalo. Na lalawa oqo sa dodonu me vakatulewataka na noda digidigi ka dusimaka na noda vakanananu kei na ivalavala. Sa dodonu meda qara na veika e sureta na veivakayarayarataki ni Yalo ka kua ni ciqoma na veika e kauta tani na veivakayarayarataki oya—nida kila kevaka eda rawa ni bula kilikili kaya me tiko na Yalo Tabu kei keda, sa rawa talega nida bula kilikili me bula vata kei na Tamada Vakalomalagi kei na Luvena, o Jisu Karisito.