Soo o Iesu Keriso i le Olaga Atoa

Ou te matua faafetai lava e faatasi ma outou. Ou te fia faafetai atu ia Gaye (Strathearn) mo lena tatalo amata agamalu; o Sister Ellen Amatangelo, o le sa faatinoa i taimi uma le galuega matagofie i le piano; ma Brother Kevin Oviatt mo le fesoasoani ia i matou i le musika ma lenei aufaipese matagofie. Ou te faafetai atu ia te outou uma mo lo outou auai mai.

Sa ou faalogo o ta’ua ia faamatalaupu ma le faaliliuina o lenei mea i gagana eseese, o lea e le mafai ai ona ou teena sina tala malie lea e mafai ona aveesea mai le toe faasalalauga ona e faigata ona faaliliu. Sa ou i ai i Tempe, Arisona, i tausaga ua mavae, ma o taualumaga o lenei konafesi, konafesi faalesiteki, sa faaliliuina i le faaSipaniolo e se faamatalaupu lea sa i ai i le isi potu e faaaoga ai mea faalogo, ou te matea. Ae sa ia tuuina se fasipepa o i ai se faamatalaga mo a’u i luga o le pulelaa. Sa ou vaai i ai, ina ua ou tu i luga, ma na fai mai: “Faamolemole faalemu le tautala. O loo faaliliuina oe.” [Talie] E le’i aoga. E tatau la ona e faalogo ia te a’u i le po nei.

Se’i ou amata atu i le momoli atu o le faafetai tele a le Au Peresitene Sili ma le Korama a Aposetolo e Toasefululua—o le mea moni, o le Ekalesia atoa—mo le galuega o outou faia i tamaiti a’oga i le lalolagi atoa. Ua outou i ai i le laina ta’imua o le faataatiaina ma le puipuia o le faavae o lenei Ekalesia, le malo o le Atua i le lalolagi, mo le lumanai. Faafetai atu mo lo outou tuuto. Ou te talitonu ma le mautinoa o a outou taumafaiga ua faia ai se eseesega ofoofogia mo le lelei.

Ua faamamafaina e le au taitai o le Ekalesia le taua o le atina’eina o soo o Iesu Keriso i le olaga atoa. Ma ua matou faamamafaina lenei mea, mo se faataitaiga, i le ala matou te aoao ai taitai o misiona ma taitai i lotoifale mo o tatou alii talavou ma tamaitai talavou i le Ekalesia atoa. Ua matou faamamafaina lenei mea i autu matou te talosagaina le Au Pulega Aoao e talanoaina pe a latou femalagaa’i mai lea mea i lea mea, faapea foi ma Taitai Aoao.

E manino lava, o le atiina a’e o soo o le Faaola i le olaga atoa e taua foi mo i tatou i aoaoga a le Ekalesia. I le punaoa a le OAE “Faamalolosia o Aoaoga o Mataupu Faalelotu,” ua aoaoina ai i tatou:

“O le faamoemoega o aoga faalelotu o le aoao atu ai o le talalelei toefuataiina a Iesu Keriso mai tusitusiga paia ma perofeta o ona po nei i se ala e fesoasoani ai i a tatou tagata aoga:

1. Atia’e le faatuatua i, ma se molimau i le Tama Faalelagi ma Lana ‘fuafuaga sili,’ …

2. Avea ma soo o Iesu Keriso i le olaga atoa, o e osia ma tausia feagaiga, … [ma]

3. Faamalolosia lo latou tomai e sue tali, foia faafitauli, tali atu ma le faatuatua, ma avatu mafuaaga mo le faamoemoe i o latou loto i soo se luitau latou te ono feagai.”¹

E faapena foi, o le faamoemoega o Seminare ma Inisitituti o Mataupu Faalelotu o le fesoasoani lea i le autalavou ma talavou matutua e faalolotoina lo latou liua ia Iesu Keriso ma Lana talalelei toefuataiina, ia agavaa mo faamanuiaga o le malumalu, ma ia saunia i latou lava, o latou aiga, ma isi mo le ola e faavavau faatasi ma lo latou Tama oi le Lagi.”

O le avea ma soo i le olaga atoa o se vaega taua o le aoaoga faavae a Keriso. O le aoaoga faavae a Keriso ua faaalia ai le ala tatou te o mai ai ia Keriso ma maua le meaalofa o Lona alofa tunoa togiola. Tatou te faaaogaina lo tatou faitalia e faatuatua ai ia te Ia, salamo, papatisoina, ma maua le Agaga Paia. Ae mo le Togiola a Keriso ina ia i ai lona aafiaga atoatoa ma le liua i totonu o i tatou e manaomia ai lo tatou faaauau pea i lenei ala o feagaiga—le ala o le avea ma soo—e oo i le iuga o o tatou olaga faaletino. I upu a Nifae: “Ma sa ou faalogo i se siufofoga mai le Tamā, ua fetalai mai: Ioe, ua tonu ma faamaoni upu a laʼu Pele. O ia o lē e tumau e oo i le iuga, o ia lava lea o le a faaolaina. Ma o lenei, oʼu uso pele e, ua ou iloa i lenei mea vagana ai ua tumau le tagata sei oo i le iuga, i le mulimuli lea i le faataitaiga a le Alo o le Atua soifua, e lē mafai ona faaolaina o ia.”²

Sa aoao mai Peresitene Nelson, “O soo moni o Iesu Keriso ua loto e tutu atu, tautatala atu, ma ia ese ai mai tagata o le lalolagi.” E le fefefe i latou, ae tuuto ma lototetele.”³ E ausia faapefea lenei ituaiga o le avea ma soo? O le a le uiga o lena mea mo i tatou o o faiaoga mo mataupu faalelotu? Ma e mafai faapefea ona sili atu ona tatou faiaoga i se ala e avea ai o tatou talavou ma talavou matutua ma soo o Iesu Keriso i le olaga atoa?

O le po nei, o le a ou amata ai i le mafaufauina o se ala e faaaoga ai le faitalia patino e faaloloto ai le liua ma taitai atu ai i le avea ma soo i le olaga atoa. Ona ou valaaulia ai lea o i tatou e mafaufau pe tatau faapefea e nei manatu ona aafia ai le ala tatou te aoao atu ai o ni faiaoga o mataupu faalelotu, a o taulai atu i le ala na aoao ai e le Faaola lava Ia Ona soo. Ma ona ou faaiu atu lea i ni manatu e uiga i le tuuina atu i tagata aoga o avanoa faateleina e tauave ai le tiutetauave mo lo latou aoaoina, o le a fesoasoani ai foi ia i latou e tali atu i le augani a Peresitene Nelson e pulea a latou molimau.

O le mea muamua, o le matafaioi a le faitalia i le avea ma soo. O se tasi o meaalofa taua na tuu mai e le Atua i Ana fanau o le faitalia e filifili ai le mea tonu. O lenei mana ma le avanoa—ma le avanoa—e faatino ai mo i tatou lava e taua tele i lo tatou gafatia atoa o fanau a le Atua. E totonugalemu i lo tatou alualu i luma i luga o le ala o feagaiga. O le fuafuaga a le Atua, e pei ona outou silafia, e le o le faia o mea uma mo i tatou ae ia saunia se faatulagaga e mafai ai e i tatou ona faia a tatou lava filifiliga e ola ae ai taitoatasi. O le faitalia o le autu lea i lo tatou alualu i luma o ni agaga i le tuanai, ma o le autu foi i mea e mafai ona avea ai i tatou i lalo o le fuafuaga o le fiafia a le Atua i le taimi nei ma i le faavavau.

Ua iloa e le fili lenei mea ma ua saili e fetuunai lo tatou faitalia. I le Mose tatou te faitau ai:

“Ona sa fouvale Satani ia te aʼu, ma saili e faaumatia le faitalia a le tagata, lea na tuu atu e Aʼu, o le Alii …, ia te ia, ma le tasi foi, ia Ou avatu ia te ia loʼu lava mana; i le mana o laʼu Toatasi na Fanaua, na Ou faia ai ia lafoina o ia i lalo;

“Ma sa avea o ia ma Satani, ioe, o le tiapolo lava lea, o le tamā o pepelo uma, e faasese ma faatauaso tagata, ma taitai faatagataotaua i latou i lona loto, le toatele lava lea o i latou o e e lē faalogo mai i loʼu leo.”⁴

E mafai ona vaaia le Taua i le Lagi, i ni vaega tetele, o se taua e tausisia ai le faitalia a le tagata. Ma o loo faaauau pea lena taua i lenei lalolagi o tatou ola ai. E osofaia e Satani le faitalia i tafātaua a itiiti o le lua. I le tasi itu, na te musuia mataupu faapolotiki ma mau e tuuitiitia ai le tiutetauave patino pe faaaogaina le malosiaga ma le faamalosia. Ua ta’ua mai e le Alii, mo se faataitaiga, o le uluai mafuaaga na ia faia ai ia faatuina ma faatumauina le Faavae o le Iunaite Setete o le, upusii, “tausisia o aia tatau ma le puipuiga o tagata uma, … Ina ia mafai e tagata taitoatasi ona faia e tusa ma mataupu faavae ma mataupu autu … e tusa ma le faitalia ua Ou tuu atu ia te ia, ma ia mafai e tagata taitoatasi ona tali atu mo ana lava agasala i le aso o le faamasinoga.”⁵ Ona Ia ta’ua lea o se faataitaiga e matuai matautia o le faatautala o le faitalia, ma tautino mai ai, “O lea, e le sa’o ona nofo pologa soo se tagata o le tasi i le isi.”⁶ O le fuafuaga a Lusifelo i taimi uma a lē o lea o se isi ituaiga o le nofo pologa.

O le isi taula’iga o osofaiga a le fili o le faitalia e faapitoa le taua mo i tatou faiaoga. Pei ona faailoa mai i le mau faatoa ta’ua nei, Satani, “o le tamā o pepelo uma,” e galue “e faasese ma faatauaso tagata.”⁷ E leai se uiga o le faitalia pe afai tatou te le iloa le mea e moni ma le mea e le moni, ma o le a le mafai ai ona faia filifiliga pulea ma le atamai. O le tali i le taufaasese o le upumoni. Pei ona tautino mai le Faaola, “Afai tou te tumau pea i la’u mataupu o o’u soo moni outou; e iloa foi e outou le mea moni, e tuu saoloto foi outou e le upu moni.”⁸ Ou te manatu o le uiga o Lana fetalaiga o le saoloto mai noataga o le agasala ma mea sese, ae saoloto foi e faaaoga lo tatou faitalia ma le malamalama—saoloto ma mafai ona faia filifiliga poto. Ma o iina tatou te tulai mai ai o ni faiaoga o le afioga a le Atua. E mafai ona i ai le mana o Satani i le tulaga faapea e le “faalogo [se tasi] i le siufofoga [o le Alii].” Na auina mai e le Atua Lona Atalii o “le ala, le upumoni, ma le ola.”⁹ Ua Ia aumai ia i tatou o perofeta e aoao ma taiala i tatou i le upumoni. Ua tuuina ia te ia le meaalofa o le Agaga Paia e faamaonia le upumoni, ma o la tatou matafaioi o le fesoasoani i tagata aoga ia lagona ma filifili ia opomau le upumoni.

Ae o le faitalia i le matalalaga o aoaoga faalelotu e manaomia ai isi laasaga i talaatu e faasoa atu ai upumoni o le talalelei. O se mea e tatau ai lo tatou aoao atu i se ala e valaaulia ai tagata aoga e faaaoga lo latou faitalia i le faagasologa o le aoaoina. Tatou te mananao e fesoasoani ia i latou ia avea ma tagata e auai atoatoa i le faagasologa ma tauave le tiutetauave mo lo latou lava aoaoina. O le faaaogaina o le faitalia a tagata a’oga e fai mona le tiutetauave i le aoaoina, e i ai aafiaga mo le atina’ega o le talitonuga tumau, ma le molimau tumau. O le faia o lena mea e mafai ai ona avea ma soo toaaga o Iesu Keriso i le olaga atoa. O le a ou toe tautala atili ai i se taimi, ae sei ou faaopoopo atu se manatu e faatatau i feagaiga.

O le filifili mo i tatou lava o se tasi o mafuaaga na taulai ai Peresitene Nelson i feagaiga. Pe a tatou filifili e ulu atu i feagaiga ma tausia, ua tatou faia filifiliga patino tulagaese e mulimuli i lo tatou Faaola. Ua faamalamalama mai e Peresitene Nelson:

“I lenei olaga tatou te filifili ai po o a tulafono ua tatou loto e usita’ia—po o tulafono o le malo selesitila, po o le teresitila, po o le telesitila—ma, o le mea lea, o le fea malo o le mamalu o le a tatou ola ai e faavavau. O filifiliga amiotonu uma e te faia iinei o le a e matua manuia ai i le taimi nei. Ae o filifiliga amiotonu i le olaga nei o le a matua manuia ai e faavavau i mea e lei mafaufauina. Afai e te filifili e osia ni feagaiga ma le Atua ma faamaoni i na feagaiga, e te maua le folafolaga o “[mamalu] o le a faaopoopo i luga o [o outou ulu] e faavavau ma faavavau lava.”¹⁰

O le taliana la o le tiutetauave mo taunuuga o filifiliga e loloto ai le talitonuga maumautu patino. Pe a tatou le gaoioi mo i tatou lava, e mafai ona tatou iloa ai ma le lē loto i ai, e lē o lava le loloto o lo tatou faatuatua e moomia e faatoilalo ai fesili ma luitau o le olaga, ma avea o ni soo o Iesu Keriso i le olaga atoa. I upu a le Alii lava ia:

“Aua o i latou o e e popoto ma ua latou talia le upumoni, ma ua latou ave le Agaga Paia mo o latou taiala, ma sa lei faaseseina—e moni Ou te fai atu ia te outou, o le a lē taia i latou ma lafo i le afi, ae o le a latou gafatia le aso.”¹¹

O lenei la matafaioi faavae a le faitalia o loo faia i a tatou lava atina’ega patino, ua i ai le aafiaga o le auala tatou te aoao atu ai o ni faiaoga faalelotu. Ua matou talosagaina taitai o misiona ia manatua lenei mea pe a latou avatu avanoa i faifeautalai e taitai ma faatonutonu ai le galuega faafaifeautalai. Ua matou talosagaina taitai o autalavou e tuu atu avanoa i talavou e “tausoa ai le amo” o le taitaiga faatasi ma o latou faufautua matutua. Ua matou talosagaina foi outou, o tatou faiaoga faalelotu, e aoao atu i auala e valaaulia ai le faaauai ai ma tauave le tiute o le aoaoina. I nei faatulagaga taitasi, e sili ona lelei le tuputupu a’e moni pe a tuu avanoa i le autalavou e gaoioi ai ae e le faagaoioia.

Ou te manatua ma le fiafia lo’u taimi o se faiaoa seminare i le vaveao. Sa ou aoaoina e ala i aafiaga, o se valaauga e tatau ona manaomia moni e se tasi. O le lua o nei tausaga o se faiaoga seminare, na oo mai i le taimi na ou a’oga faaloia ai. O le manao i a’u tamaiti a’oga ia maua se aafiaga e vaai ai i foliga o le i ai o le lototoa e ola ai i le faatuatua, sa ou valaaulia ai se tasi sa ma vasega, e le o se tagata o le Ekalesia, ae o se tagata e i ai ona talitonuga faalelotu, e sau e lauga i la’u vasega i se tasi taeao. O la’u uo o Lisati sa i ai ni faafitauli tugā o lana vaai sa manaomia ai togafitiga tiga faavaitaimi, ma sa aofia ai, pe a mafai ona e vaai faalemafaufau i ai, le ave i fafo o polo o ona mata mo togafitiga faafomai. O le a’oga faaloia e tele tusi e moomia ona faitau, ae sa lē lava le lelei o lana vaai e faitau ai. O lea, sa ia totogia ai se tamaitiiti a’oga kolisi e faitau mo ia pe a uma vasega i aso uma. E ui i nei luitau matuiā, ae sa fiafia lava o ia ma tausaafia e ana paaga a’oga. Sa musuia uma i matou i ana faataitaiga.

O lea sa faamatala mai e Lisati lana tala i la’u vasega seminare, e aofia ai ma lona talitonuga i le Atua ma ona lagona sa tali mai e le Atua ana tatalo. Sa maua e tamaiti a’oga se avanoa e vaai latalata ai ma faalogo ia te ia ma fai atu i ai fesili. Na latou malamalama ai i le mana o le faatuatua i le olaga moni, ma le uiga moni o lena mea i o latou olaga. I le taimi lava lea e tasi, o le aafiaga na pupula ai mata o Lisati i le agalelei o a‘u tamaiti aoga faapelepele o le seminare. (Tasi le mea na ia maofa ai o le vaai i talavou i se vasega i le 6 i le vaveao.)

Ia, mafaufau pe na faapefea ona aoao atu le Faaola. Sa le’i na ona ta’u atu e Iesu i Ona soo le mea e tatau ona latou faia, na te le’i faia foi mea uma mo i latou. Sa ia aoao atu i ala na moomia ai i latou e mafaufau, ia auai e faatino, talanoaina, ma faaaoga Ana aoaoga. Ona o lena mea, ina ua le toe faatasi le Faaola ma Ona soo i la le tino, sa lava lo latou saunia e talia ma taitaiina e le Agaga Paia i le galueaina mo i latou lava.¹² I le Aoao Atu i le Ala a le Faaolaua tatou faitau ai, “Sa mautinoa lava le maofa o le matamata i le Faaola o savali i luga o le vai. Ae sa lei lava lena mo Peteru. Sa ia manao [ma moomia] e fai le mea na faia e le Faaola, ia i ai i le mea sa i ai o Ia, ma maua foi lea lava aafiaga e ia.”⁴ Ioe, o lona uiga foi o le a faia e Peteru ni mea sese, ae na tuu atu faafia e le Faaola ia Peteru—ma aumaia foi ia i tatou—ia avanoa e gaoioi ai ma faamalosia e ala i ana taumafaiga, e aofia ai ma ona toilalo.¹⁴

Ina ia fatuina nei ituaiga o aafiaga e aoao ai mo Ona soo, sa maua e le Faaola ia auala e fesoasoani ai ia te i latou e tauave le tiutetauave o lo latou aoaoina. Mafaufau tau o le tolu ni auala sa faaauai ai e le Faaola Ona soo: (1) faaaoga faataoto, (2) faia o fesili musuia, ma le (3) tuuina atu o valaaulia patino.

Faaaogaina o Faataoto O se manatu faaalia i nei mea taitasiL Muamua. faataoto. Mafaufau i le faaaogaina e Keriso o faataoto. Nai lo le aumaia sa’o o le faamalamalamaga po o se tautinoga tuusa’o, sa tele lava ina valaaulia e le Faaola Ona soo e mafaufau i le uiga loloto atu o mea sa Ia aoao atu. E manaomia ai se taumafaiga i la latou vaega. E mafai ona ou mafaufau i auala na faamalosia ai lo’u malamalama i le usitai atoatoa e ala i le suesueina o le faataoto i le Tagata Lūlū Saito.¹⁵ Ua sili atu lo’u malamalama i le faamagalo atu i le suesueina lea o le atalii faama’umau ‘oa.¹⁶ O lo’u manao ia lagonaina ma faaali atu le alofa moni i fanau uma a le Atua, ua faalauteleina e ala i le faataoto i le Samaria agalelei.¹⁷

E faapena foi, ua avea au o se soo sili atu a o o’u manatunatu i le tausimea e pei ona talanoaina i le faataoto i taleni.¹⁸ O se tasi o mea na oo mai ia te au a’o ou manatunatu loloto i lenei faataoto o auauna muamua e toalua—o le tasi na maua taleni e lima ma le isi na maua le lua, ma sa tonu faateleina e i la’ua a la taleni—na tutusa le faaviivii ma taui na la maua e ui e eseese le aofa’i o a la taleni. O le muamua e lima taleni, tou te manatua, na faaluaina le aofa’i i le sefulu, ma le lona lua, sa amata i le lua ae toefoi mai ua fa. Ae na tofu maua e i la’ua le tali e tutusa mai lo la’ua alii: “Ua lelei ia, le auauna lelei e, ma le faamaoni: ua e faamaoni i nai mea iti, ou te tofia oe e pule i mea e tele: ina ulufale mai ia i le fiafia o lou alii.”¹⁹ Ou te faauigaina lenei mea faapea, e le faapea e tatau ona tatou ausia uma i le maualuga e tasi ma agaigai i luma i le taimi e tasi ina ia selesele ai faamanuiaga a le Alii ma i’u ai i le meaalofa o le ola e faavavau. Ua na ona moomia lava o lo tatou galulue malosi i meaalofa ma tomai ma avanoa ua tatou maua. Ou te talitonu e oo lava i le auauna e tasi le taleni, a na faapea sa galue ma auauna atu ia maua ai se taleni lona lua nai lo le nana o lana taleni, semanu e maua foi lena lava taui lea na tuu atu i ona uso e toalua. Ou te aoao atu i taitai ma isi e faapea, afai ia tau lava ina fai le mea latou te mafai, o le a faateleina e le Alii ma tauia a latou taumafaiga e oo mai le taimi, o le a latou maua ai le atoaga o Ana faamanuiaga.

Faia o ni Fesili Musuia E pei o le faia o ni fesili musuia, sa aoao mai le Faaola i lena lava foi ala. Mo se faataitaiga, ina ua Ia fesili atu i Ona soo, “O le a sa outou upu o ai Au?” Sa Ia silafia lelei le tali ma le tele atu o le manino ma le loloto nai lo le pei o Ona soo, ae sa ia tuu atu ia Peteru le avanoa e tomanatu ai ona tali atu lea e ia lava le fesili. Ou te talitonu o le faaupuga a Peteru na faalolotoina ai lana lava molimau ina ua ia tautino atu, “O oe o le Keriso, le Alo o le Atua soifua.”²⁰ I le mavae ai o Lona Toetu, sa fai faatolu atu ai e le Faaola ia Peteru se isi fesili ese: “Simona, le atalii o Iona, pe e te alofa mai ea ia te au?” Na tali atu Peteru i taimi taitasi, “Ioe, le Alii e; ua e silafia ou te alofa ia te oe.” Ma o le taimi lea na mafai ai e le Faaola ona aoao Peteru e ala i le tali mai i taimi taitasi, “Fafaga i a’u mamoe.”²¹

Tuuina Atu Valaaulia Ma le mea mulimuli, tuuina atu ia valaaulia. Sa i ai taimi, isi taimi na tali ai e le Faaola le fesili na Ia tuuina atu, ae i ni auala na avea ai o se valaaulia. I Lana auaunaga i Ona soo i le itulagi i Sisifo, sa fesili ai le Faaola, “O a ituaiga o tagata e tatau ona outou i ai?” Ona tali lea e Ia Lava, “E moni ou te fai atu ia te outou, e pei lava o au nei.”²² E mafai ona tatou mafaufau i isi valaaulia taua mai le Faaola. Mafaufau, mo se faataitaiga, i Lana valaaulia, “Sau, mulimuli mai ia te a’u.” Ma o nisi taimi na oo mai Ana valaaulia faatasi ma folafolaga o loo avatu faatasi ai—ma o loo latou o mai pea ma folafolaga. Mo se faataitaiga, i le Mataupu Faavae ma Feagaiga, o loo valaaulia mai e le Alii ia “Faalatalata mai ia te au ma o le a Ou faalatalata atu ai ia te outou; saili mai ia te au ma le filiga ma o le a outou maua ai au; ole mai, ma o le a outou maua ai; tuitui mai, ma o le a tatala atu ai ia te outou.”²³ I valaaulia uma a le Faaola, Na Te tuu atu ai avanoa i Ona soo e gaoioi, e mafaufau, ma tauave le tiutetauave o lo latou aoaoina ma lo latou tuputupu a’e.

I le amataga o lenei tausaga, sa tuuina atu ai e Elder Clark Gilbert se valaaulia i o tatou faiaoga seminare ma inisitituti e matuai sue ni auala e maua ai e tagata aoga ia avanoa e gaoioi ai ma tauave le tiutetauave mo lo latou aoaoina. Sa ia faaaoga sa’o mai le vaega o le Aoao Atu i le Ala a le Faaola ua faaigoaina o le “Valaaulia le Aoaoina ma le Filiga.”²⁴ Ua ou iloa le taua o le taulai atu o lenei vaega i le aoaoina mai nai lo le aoao atu. Ia te a’u, o se faamanatu faapea, o faiaoga lelei e valaaulia tagata aoga e tauave le tiutetauave i lo latou lava aoaoina. Ma pe a tatou aoao atu i se ala e na ona valaaulia ai o le faalogo ae faatuatuana’i le auai patino i le vaega a le tagata aoao, e lamatia lo tatou faailo atu i tagata aoga tatou te faatauaina a tatou aoaoga nai lo lo latou aoaoina.

I le Aoao Atu i le Ala a le Faaola, ua faamanatu mai ai ia i tatou e faapea, o le valaaulia o le aoaoina ma le filiga e moomia ai ona tatou fesoasoani i tagata aoga ia avea ma pule i la latou lava faagasologa o le aoaoina. E tele ni auala e mafai ona tupu ai lenei mea, ae se’i ou faamamafa atua le tolu pe a itiiti mai lena punaoa faafaiaoga.

• Muamua, e mafai ona tatou fatuina ni aafiaga o le aoaoina i le mea tatou te “valaaulia ai tagata aoao e sauniuni e aoao.” E mafai ona tupu lenei mea i le āluga o faitauga atofa, fesili e suesue ai, ma valaaulia patino.

• Lua, e ao ona tatou “fautuaina tagata a’oa’o e fefaasoaai mea moni o loo latou aoaoina.” E tele naua auala e faia ai lenei mea, ma o le a tofu maua e outou ni faiga faaletagata lava ia e aoga mo oe ma au tamaiti a’oga. Ina ua ou i ai i le aoga faaloia, sa tele ina ou aoao mai le mea sa ta’ua o le metotia FaaSokarate, lea sa fesoasoani ai faiaoga i tamaiti a’oga e vailiili se mataupu faaletulafono e ala i le talosagaina o le vasega e faaaoga anomea e ala i se soloa’iga o fesili e atia’e ma le faautauta. Sa tatau ona matou o mai i le vasega ua saunia e tolaulau manino o matou lava malamalamaaga ma faalogologo i isi. Ua ou vaaia faiaoga inisitituti e avatu avanoa i tamaiti a’oga e faasoa ai mea o latou aoaoina e ala i talanoaga faatulagaina lelei i le vasega, ma e manaomia e lenei mea ni faiaoga e saunia lelei i se agaga o le tuufesilisili ma talanoaga. Ou te iloa o le tulaga lava lena i au vasega. E matua saunia lelei lava tamaiti aoga. E matua saunia lelei lava faiaoga. Ae o le valaaulia lena.

• Ma le tolu, e tatau ona tatou “valaaulia tagata a’oa’o e ola i mea latou te aoaoina” (ua faaopoopo le faatusilima).²⁶ E tatau ona tatou vaavaai mo auala e valaaulia ai tamaiti a’oga e faaaoga mea latou te aoaoina i o latou olaga. E mafai ona auala lenei mea i valaaulia patino, o mea fai ‘anoa, ma se anoanoai o isi taumafaiga e fesoasoani i tamaiti a’oga ia suia ma avea o se mea sili atu ia Keriso.

O nei taumafaiga e saunia ma ia faasoa atu ma faaaoga e mafaufau toto’a i ai ma e mafai i nisi taimi ona manaomia le tele o galuega i le vaega a le faiaoga. Atonu e moni lava i au taumafaiga e fesoasoani ai i tamaiti a’oga e fefaasoaa’i ai ma aoao atu e le tasi le isi. E le faapea la e leai ni tulaga patino tatou te talanoa tuusa’o ai taitoatasi, aemaise pe a tatou faamamafaina se savali autu po o le faataatia o se mataupu faalefaavae. O le fonotaga i le po nei o se tasi o na faataitaiga o le faatuina o se savali faalefaavae. Ae ona manaomia ai lea e lenei savali le tulitatao i le tele o avanoa masani mo i tatou uma e auai ai i le faagasologa o le aoaoina e ala i le faasoa atu o mea o loo tatou aoaoina ma faaaoga na mea ua aoaoina o se vaega o lo tatou lava aoao atu.

Ou te faamoemoe ua outou silafia tapenaga ua matou talosagaina outou e faia i lenei afiafi i fesili suesue ma le faitauina o anomea, na muai faasoa atu. O a taeao ma i vaiaso a sau, o le a matou valaaulia ai outou e talanoaina mea o loo outou aoaoina e uiga i le aoao atu i ala a le Faaola ma a tou uo ma paaga. O le a matou talosagaina foi oe e faailoa itu e mafai ona e faamalosia ai lou lava aoao atu e faavae i le savali o le po nei ma isi punaoa faafaiaoga o le a faasoa atu taeao.

Se’i ou taofi ii ae sui le taulaiga i se isi punaoa faafaiaoga e aoga ona suesue, e ui ina sa tusia mo se aofia e ese. O loo ou faasino i le Mataupu 10 i le tusi lesona a faifeautalai, Tala’i La’u Talalelei. Ua faaigoaina lenei mataupu o le 10: Aoao Atu e Fausia le Faatuatua ia Iesu Keriso.” O le aoao atu faafaifeautalai, e moni, o le taualuga i le fesoasoani i tagata e auai ai ma suia o latou olaga, e faaaoga ai lo latou faitalia e filifili tonu ai. O le sini o le liua e ala i le tosinaga a le Agaga Paia ma le alofa tunoa o Keriso e taitai atu ai i le avea ma soo i le olaga atoa. O le vaega atoa lenei e faatatau ia i tatou faapea foi i le Ofisa Aoga a le Ekalesia. Ma o lea ou te fai atu ai e mafai foi ona outou maua se malamalamaaga faaopoopo i le faapogai lenei o le Aoao Atu i le Ala a le Faaola. E masani lava, o loo i ai se fesopoa’i tele i le va o tusi lesona e lua, ae o le faitauina o se mea e fai si ese e ta’u mai ai se mataupu faavae po o se manatu e mafai ona aumaia ai se vaaiga fou po o se malamalama loloto atu. O nisi o fesili o loo talanoaina i le Mataupu 10 o le Tala’i La’u Talalelei o “E mafai faapefea ona ou aoao atu e ala i le Agaga?” “E mafai faapefea ona ou aoao atu mai tusitusiga paia?” “E faapefea ona ou faasoa atu la’u molimau pe a aoao atu?” “E mafai faapefea ona ou fuafuaina ma fetuunai lo’u aoao atu ia fetaui ma manaoga o tagata?” ma “E mafai faapefea ona ou faia ni fesili sili atu ma avea o se tagata faalogo sili atu?” Ou te manao foi ia outou iloa e le o totogia a’u mo lenei lagolago.

Ma le mea mulimuli, i le fesoasoani ai i tamaiti aoga e pulea a latou lava molimau. O le valaaulia o le aoaoina ma le filiga o se faavae i le atina’ega o soo o Iesu Keriso mo le olaga atoa ona e fesoasoani i tagata aoao e tauave le tiutetauave mo lo latou aoaoina, e pei ona matou fai atu. O se tasi o auala na fautuina i tatou e Peresitene Nelson ia tauave le tiutetauave o lo tatou lava tuputupu a’e patino, o lana valaaulia i talavou matutua e pulea a latou molimau. I le faigalotu i le lalolagi atoa mo talavou matutua i le 2022, na saunoa ai Peresitene Nelson:

“Ou te augani atu ia te outou ia pulea lau molimau. Galue i ai. Umia. Tausi i ai. Faafailele ina ia tuputupu ae. Fafaga i upumoni. ’Aua ne’i faaleagaina i filosofia sese o alii ma tamaitai le talitonu ona e tuufesili lea pe aisea ua vaivai ai lau molimau. Punouai i tatalo faatauanau ma lotomaualalo i aso taitasi. Tausia lelei oe lava ia i afioga a perofeta anamua ma aso nei. Ole atu i le Alii e aoao oe i le auala e faalogo lelei ai ia te Ia. Faaalu atili se taimi i totonu o le malumalu ma i galuega o talafaasolopito o aiga. A o e faia lau molimau ma au faamuamua sili ona maualuga, vaavaai mo ni vavega e tutupu i lou olaga.”²⁶

Na toe faia foi e Peresitene Nelson lenei lava augani i le Ekalesia atoa i lana saunoaga “Faatoilalo le Lalolagi ma Maua le Malologa” i le konafesi aoao ia Oketopa 2022.²⁷

Ina ua ia saunoa atu i le autalavou matutua, na faia e Peresitene Nelson se soloa’iga o fesili: “E te fia maua le filemu e uiga i atugaluga o loo faapologaina ai oe i le taimi nei? E te fia manao ia iloa atili Iesu Keriso? E te fia manao e aoao i le auala e mafai ai e Lona mana paia ona faamalolo ou manu’a ma vaivaiga? E te fia manao e lagona le mana matagofie ma mālū o le Togiola a Iesu Keriso o galue i lou olaga? O le saili e tali nei fesili o le a manaomia ai se taumafaiga—se taumafaiga tele.”²⁸ Ua ia faamautuina atugaluga o tagata a’oa’o i le faapea mai: “Afai e i ai ni au fesili—ma ou fe faamoemoe o i ai—saili tali ma se naunautaiga faamaoni e talitonu. Aoao mea uma e te mafaia e uiga i le talalelei ma ia mautinoa e te liliu atu i puna e faatumulia i upumoni mo le taitaiga.”

Ia te a’u, o le uiga lea o le valaaulia o le aoaoina ma le filiga, ma o le mea lea o le a moomia ai tatou e valaaulia a tatou tamaiti a’oga e pulea a latou molimau. O lena tiutetauave o le aoaoina e manaomia ona lagolagoina i ni auala tatou te faatulaga ai a tatou aoaoga ina ia maua ai avanoa e tagata aoga e auai ma le loloto ma le maua’i e moomia e atia’e ai le avea ma soo moni. Toe tomanatu i le valaaulia a le perofeta e “Galue i ai. Umia. Tausi i ai. Faafailele ina ia tuputupu ae.” Pe o valaaulia e o tatou potu a’oga lenei ituaiga o auai ai taitoatasi ia faatupuina ai le molimau ma le avea ma soo? Pe o i ai ni auala e mafai ona tatou aapa atu—pe faaleleia a tatou lava taumafaiga e aapa atu ma valaaulia le aoaoina ma le filiga?

O le po nei, sa ou amata i le toeiloiloina o faamoemoega o aoaoga faalelotu a le Ekalesia, e aofia ai le manaomia e fesoasoani i o tatou tamaiti a’oga.

1. “Atia’e le faatuatua i, ma se molimau i le Tama Faalelagi ma Lana fuafuaga sili,’ …

2. Avea ma soo o Iesu Keriso i le olaga atoa e osia ma tausia feagaiga, … [and]

3. Faamalolosia lo latou tomai e sue ai tali, faaiuga, masalosaloga, tali atu ma le faatuatua, ma tuu atu mafuaaga mo le faamoemoe i totonu o i latou i soo se luitau latou te feagai.”²⁹

Pe a tatou fesoasoani i tamaiti a’oga e faaaoga la latou lava faitalia, o le a loloto lo latou liua i ni ala e tau atu ai i le avea ma soo i le olaga atoa. Ia Oketopa talu ai na ta’ua ai e Peresitene Nelson, “O le taimi lenei mo i tatou e fai ai lo tatou avea ma soo o la tatou faamuamua aupito maualuga.”³⁰ Ma sa ia faaopoopo, “E le o vave tele pe tuai tele foi mo oe le avea ma se soo tuuto o Iesu Keriso.”³¹ Ia tatou galulue nei ma le filiga a o le’i tuai tele. O le taimi lenei, e pei ona ia saunoa ai. Ua saga uunaia atili lava au i le lapataiga a le uso a Paulo, lana augani lapatai i toeaina i Efeso:

“Ina tausi ia outou ia te outou, atoa ma le lafu mamoe uma lava, ua tofia ai outou e le Agaga Paia, e fai ma leoleo, ia leoleo atu i le ekalesia a le Atua, ua faatauina e ia mona i lona lava toto.

“Aua o a’u nei ua ou iloa lenei mea, pe a mavae ona ou alu, e oo mai ia te outou luko saua, o e e le faasaoina le lafu mamoe.

E tupu mai foi ia te outou lava tagata, e tautala mai i mea faapiopio, e fetoso ese ai le au soo ia mulimuli ia te i latou.”³²

O tamaiti a’oga ua i upu a Paulo, “ua tofia” i ai i tatou, e le uma lo latou taua, na faatauina i le toto o le Faaola lava ia. Ua poloaiina i tatou e avatu se faataitaiga famaoni ma fafaga ma faamalolosia i latou mai “luko saua” latou te ono fetaiai i fafo atu o le Ekalesia, e oo lava foi i totonu o le Ekalesia—i fuaitau a Paulo, i totonu o “i tatou lava”—ou te tautala atu i e uiga i mea sese ma le sailia ia avea i latou o o latou lava soo nai lo soo o le Matai. E tatau ona tatou fesoasoani ia i latou e faaaoga ma le poto le faitalia, ma i luga o na mea uma, le alofa tumau loloto o le Tama male Alo.

Ou te molimau atu i lo tatou Tama Faalelagi alofa ma le faapelepele ma Lana fuafuaga o le Togiola. Ou te molimau atu i le moni o loo soifua Lona Alo Pele e Toatasi, o Iesu, le Togiola toetu, o loo afio i le itu taumatau o le Tama, lea ua Ia maua ai Ana aia tatau o le alofamutimutivale i luga o le fanauga a tagata.³³ Faatasi ai ma Mamona, ou te tautino atu o se soo o Iesu Keriso³⁴ ma saili ia avea ma soo o Keriso i le umi ou te ola ai. Ina taitasi ia i tatou ma faamalolosia i lo tatou lava avea ai ma soo ma i a tatou taumafaiga e fesoasoani i le toatele tatou te mafaia ia avea ma soo totoa o Iesu Keriso i le olaga atoa.

Ia faamanuia le Atua ia te outou. I le suafa o Iesu Keriso, amene.