Pagkahimong mga Disipulo ni Jesukristo sa Tibuok Kinabuhi

Mapasalamaton kaayo ko nga makauban ninyo. Gusto nakong pasalamatan si Gaye (Strathearn) alang nianang malumo nga pangbukas nga pag-ampo; si Sister Ellen Amatangelo, kinsa kanunayng mipahigayon sa ingon ka tahom nga obra sa piano; ug ni Brother Kevin Oviatt sa pagtabang kanato sa musika ug nianang maanindot nga choir. Salamat kaninyong tanan sa inyong partisipasyon.

Nakadungog ko nga naghisgot ang mga nag-interpretar ug kini gihubad sa nagkadaiyang pinulongan, mao nga dili ko makapugong nga mosulti og gamayng kataw-anan nga istorya nga mahimo ninyong tangtangon sa mga subli nga pagsibya kay lisod hubaron. Didto ko sa Tempe, Arizona, mga tuig nang milabay, ug ang mga tulumanon niadto nga komperensiya, ang komperensiya sa stake, gihubad ngadto sa Spanish sa usa ka tig-interpretar nga naa sa laing kwarto gamit ang usa ka headset, tingali. Apan nagbilin siya og usa ka mubo nga sulat alang nako diha sa podium. Busa nakit-an nako, dihang mibarog ko, matod niini: “Palihog hinaya lang sa pagsulti. Gihubad ka.” [Laughter] Wala kadto magsilbi. Mao nga kinahanglan nga maminaw kamo nako karong gabhiona.

Tugoti ko nga magsugod sa pagpahayag og pasalamat sa Unang Kapangulohan ug sa Korum sa Napulog Duha ka Apostoles—ug sa pagkatinuod sa tibuok Simbahan—alang sa buhat nga inyong gihimo uban sa atong mga estudyante sa tibuok kalibotan. Kamo ang anaa sa pangunahan sa pagpahimutang ug pagdepensa sa pundasyon niining Simbahan, ang gingharian sa Dios dinhi sa yuta, alang sa umaabot. Salamat sa inyong pagpahinungod. Hugot kong motuo nga ang inyong mga paningkamot nakahimo og dalaygon nga kalainan alang sa maayo.

Ang liderato sa Simabahan naghatag og pagpasabot sa kaimportante sa pagpalambo sa pagkadisipulo ni Jesukristo sa tibuok kinabuhi. Ug kami nagpasabot niini, pananglitan, sa paagi nga atong gibansay ang mga lider sa misyon ug lokal nga mga lider sa atong mga young men ug young women sa tibuok simbahan. Kami nagpasabot niini sa mga tema nga among gihangyo sa Kinatibuk-ang Awtoridad sa pagpamulong samtang sila mobiyahe sa lain-laing dapit, ug sa Kinatibuk-ang mga Opisyales usab.

Dayag lang, ang pagpalambo sa pagkadisipulo sa Manluluwas sa tibuok kinabuhi mao usab ang atong kinauyokan sa edukasyon sa Simbahan. Diha sa kapanguhaan sa CES “Strengthening Religious Education,” kita gitudloan:

“Ang katuyoan sa relihiyoso nga edukasyon mao ang pagtudlo sa gipahiuli nga ebanghelyo ni Jesukristo gikan sa mga kasulatan ug sa modernong mga propeta sa paagi nga matabangan ang atong mga estudyante:

1. Pagpalambo sa hugot nga pagtuo ug pagpamatuod sa Langitnong Amahan ug sa Iyang dakong plano,’ …

2. Mahimong mga disipulo ni Jesukristo sa tibuok kinabuhi, nga mohimo ug motuman sa mga pakigsaad, … [ug]

3. Palig-onon ang ilang abilidad sa pagpangita og mga tubag, mosulbad sa mga pagduha-duha, motubag sa hugot nga pagtuo, ug mohatag og rason alang sa paglaom diha kanila sa bisan unsang mga hagit nga ilang atubangon.”¹

Sa samang paagi, ang katuyoan sa Seminaries and Institutes of Religion mao ang pagtabang sa kabatan-onan ug mga young adult nga mapalawman ang ilang pagkakabig ngadto ni Jesukristo ug sa Iyang gipahiuli nga ebanghelyo, mahimong sarang alang sa mga panalangin sa templo, ug makaandam sa ilang mga kaugalingon, sa ilang mga pamilya, ug sa uban alang sa kinabuhing dayon uban sa ilang Amahan sa Langit.”

Ang pagkadisipulo sa tibuok kinabuhi mahinungdanong aspeto sa doktrina ni Kristo. Ang doktrina ni Kristo namahayag kon unsaon nato pagduol ngadto ni Kristo ug makadawat sa gasa sa Iyang maulaon nga grasya. Kita mogamit sa atong kabubut-on sa pagbaton og pagtuo diha Kaniya, maghinulsol, magpabunyag, ug modawat sa Espiritu Santo. Apan alang sa Pag-ula ni Kristo ang pagbaton niini hingpit, makapausab nga epekto ngari kanato nagkinahanglan nga kita mopadayon niining dalan sa pakigsaad—ngadto sa kataposan sa atong kinabuhi. Sa mga pulong ni Nephi, “Ug ako nakadungog og usa ka tingog gikan sa Amahan, nag-ingon: Oo, ang mga pulong sa akong Hinigugma tinuod ug kasaligan. Siya nga molahutay hangtod sa kataposan, siya usab maluwas. Ug karon, hinigugma kong kaigsoonan, nahibalo ako niini nga gawas kon ang usa ka tawo molahutay hangtod sa kataposan, sa pagsunod sa panig-ingnan sa Anak sa buhi nga Dios, siya dili maluwas.”²

Si Presidente Nelson miingon, Ang tinuod nga mga disipulo ni Jesukristo andam nga mobarog, motingog, ug magpalahi gikan sa mga tawo sa kalibotan. Sila walay kahadlok, maunongon, ug maisogon.”³ Sa unsang paagi nga kining matang sa pagkadisipulo makab-ot? Unsay gipasabot niana alang kanatong mga religious educator? Ug sa unsang paagi nga kita epektibong makatudlo sa paagi nga ang atong kabatan-onan ug mga young adult mahimong mga disipulo ni Jesukristo sa tibuok kinabuhi?

Karong gabii, magsugod ko pinaagi sa paghunahuna kon unsaon sa paggamit ang personal nga kabubut-on nga mopalawom sa panag-istorya ug mosangpot ngadto sa pagkadisipulo sa tibuok kinabuhi. Akong sundan sa pagdapit kanato sa paghunahuna kon sa unsang paagi kining mga ideya makaapekto sa paagi nga kita magtudlo isip mga magtutudlo sa relihiyon, nakatutok kon giunsa pagtudlo Mismo sa Manluluwas ang Iyang mga disipulo. Ug Dayon akong taposon uban sa mga komentaryo bahin kon sa unsang paagi nga ang paghatag sa mga estudyante og dugang nga mga oportunidad sa pagkuha og responsibilidad sa ilang pagkat-on makatabang nila nga motubang sa hangyo ni Presidente Nelson sa pagdumala sa ilang mga pagpamatuod.

Busa una, tahas sa kabubut-on sa pagkadisipulo. Usa sa labing importante nga mga gasa nga gihatag sa Dios sa Iyang mga anak mao ang moral nga kabubut-on. Kini nga gahom ug prebilihiyo—ug responsibilidad—sa paglihok alang sa atong kaugalingon mahinungdanon sa pag-amgo sa atong hingpit nga potensiyal isip mga anak sa Dios. Kini ang sentro sa atong pag-uswag diha sa dalan sa pakigsaad. Ang plano sa Dios, sama sa inyong nahibaloan, dili ang pagbuhat sa tanang butang alang kanato apan ang paghatag og estraktura nga motugot kanato sa paghimo sa atong kaugalingong mga pagpili aron molambo sa indibidwal nga paagi. Ang kabubut-on mao ang yawe sa atong pag-uswag isip mga espiritu sa nangagi, ug mao ang yawe alang sa unsa kita mahimo ubos sa plano sa Dios sa kalipay, karon ug sa kahangtoran.

Ang kaaway nasayod niini ug nagtinguha sa pagbutang sa peligro sa atong kabubut-on. Sa Moises, atong mabasa:

“Tungod kay si Satanas misukol nako, ug nagtinguha sa pagguba sa kabubut-on sa tawo, diin Ako, ang Ginoo …, mihatag kaniya, ug usab, nga Ako kinahanglang mohatag kaniya sa akong kaugalingong gahom; pinaagi sa gahom sa akong Bugtong Anak, Ako misugo nga siya isalikway;

“Ug siya nahimong Satanas, oo, gani ang yawa, ang amahan sa tanang bakak, sa pag-ilad ug pagbuta sa mga tawo, ug sa pagdala nila nga maulipon sumala sa iyang kabubut-on, gani kutob sa dili maminaw sa akong tingog.⁴

Ang Gubat sa Langit mahimong makita, sa dakong bahin, kon ang usa ka gubat nagpreserbar sa kabubut-on sa tawo. Ug ang gubat nagpadayon niining mortal nga kalibotan. Si Satanas moataki sa kabubut-on diha sa pinakapangunahan. Sa laing bahin, siya modasig sa politikanhong mga doktrina ug mga kalihokan nga mopaminos sa personal nga responsibilidad o mogamit sa pwersa ug pagpugos. Ang Ginoo namahayag, pananglitan, nga ang nag-unang rason nga siya mitugot nga ang Konstitusyon sa Estados Unidos maistablisar ug mapatunhay mao nga “alang sa mga katungod ug sa pagpanalipod sa tanang tawo … Aron ang matag tawo molihok sumala sa doktrina ug baroganan … sumala sa matarong nga kabubut-on nga akong gihatag kaniya, nga ang matag tawo mao ang manubag sa iyang kaugalingong mga sala sa adlaw sa paghukom.”⁵ Dayon siya mikutlo og usa ka partikular mangil-ad nga pagsupak sa kabubut-on, nagdeklarar, “Busa, dili matarong nga si bisan kinsa nga tawo mahimong ulipon ngadto sa usag-usa.”⁶ Ang plano ni Lucifer kanunay usa ka paagi o sa lain nga matang sa pagpang-ulipon.

Ang laing gitutokan sa pag-ataki sa kaaway batok sa kabubut-on adunay dakong kahulogan alang kanato isip mga magtutudlo. Sama sa giila sa kasulatan nga bag-o lang gikutlo, si Satanas, “ang amahan sa tanang bakak,” molihok “sa paglingla ug pagbuta sa katawhan.”⁷ Ang kabubut-on mahimong walay kahulogan kon kita wala masayod kon unsa ang tinuod ug unsa ang dili, ug busa dili makahimo og kahibalo, intelehenting mga pagpili. Ang tambal sa paglingla mao ang kamatuoran. Sama sa gipamahayag sa Manluluwas, “Kon magpabilin kamo sa akong pulong, nan, kamo tinuod gayod nga akong mga tinun-an, ug kamo mahibalo sa kamatuoran, ug ang kamatuoran magahatag kaninyo og kagawasan.”⁸ Tingali Siya nagpasabot nga gawasnon gikan sa pagkaulipon sa sala ug sayop, apan gawasnon usab sa paglihok sa atong kabubut-on inubanan sa pagsabot—gawasnon ug makahimo og maalamon nga mga pagpili. Dinhi kita mosulod isip mga magtutudlo sa pulong sa Dios. Si Satanas makabaton lang og gahom sa punto nga ang usa dili “mopatalinghog ngadto sa tingog sa [Ginoo].” Ang Dios mipadala sa Iyang Anak isip “ang dalan, ang kamatuoran, ug ang kinabuhi.”⁹ Siya naghatag kanato sa mga propeta aron motudlo ug mogiya kanato sa kamatuoran. Siya naghatag sa gasa sa Espiritu Santo aron sa pagkompirmar niana nga kamatuoran, ug ang atong papel mao ang pagtabang sa mga estudyante nga madungog ug makapili sa paghangop sa kamatuoran.

Apan ang kabubut-on diha sa konteksto sa edukasyon sa relihiyon nagkinahanglan og pagpadayon og lakang lapas sa pagpaambit sa mga kamatuoran sa ebanghelyo. Mahinungdanon nga kita motudlo sa paagi nga magdapit sa mga estudyante sa paggamit sa ilang kabubut-on diha sa proseso sa pagkat-on. Kita gustong motabang kanila nga mamahimong aktibong mga partisipante diha sa proseso ug modawat sa responsibilidad alang sa ilang kaugalingong pagkat-on. Ang pagpagana sa kabubut-on sa mga estudyante sa pagdawat og personal nga pagpanag-iya sa pagkat-on adunay implikasyon alang sa pagpalambo sa molahutay nga pagtuo ug pagpamatuod. Anaa ra kini sa pagbuhat nga sila mahimong aktibo ug mga disipulo ni Jesukristo sa tibuok kinabuhi. Mosulti ko og dugang bahin niini unya, apan tugoti ko nga modugang og komentaryo dinhi kalabot sa mga pakigsaad.

Ang pagpili alang sa atong kaugalingon maoy usa sa mga rason nga si Presidente Nelson nakatutok og maayo diha sa mga pakigsaad. Kon kita mopili sa pagsulod ug motuman sa mga pakigsaad, kita naghimo og lahi nga personal nga mga pagpili sa pagsunod sa Manluluwas. Si Presidente Nelson mipasabot:

“Atol niining kinabuhia makapili kita kon unsa nga mga balaod ang andam natong tumanon—kadto bang sa celestial nga gingharian, o sa terrestrial, o sa telestial—ug, busa, hain nga gingharian sa himaya kita magpuyo sa kahangtoran. Ang matag matarong nga pagpili nga inyong himoon dinhi maghatag gayod og dakong kaayohan karon. Apan ang matarong nga mga pagpili sa mortalidad mohatag og mas dakong kaayohan gayod sa kahangtoran. Kon kamo mopili nga mohimo og mga pakigsaad sa Dios ug magmatinud-anon niadto nga mga pakigsaad, kamo adunay saad sa “himaya nga idugang diha sa [inyong ulo] hangtod sa kahangtoran.’”¹⁰

Busa, ang pagpanag-iya sa mga pagpili makapalawom sa personal nga konbiksiyon. Kon kita dili molihok alang sa atong kaugalingon, dili nato tuyoon nga makakaplag nga atong pagtuo kulang sa gilawmon nga gikinahanglan sa pagbuntog sa mga pangutana sa kinabuhi ug mga hagit ug sa pagkahimong mga disipulo ni Jesukristo sa tibuok kinabuhi. Sa kaugalingong pulong sa Ginoo:

“Kay sila mga maalamon ug nakadawat sa kamatuoran, ug nakadawat sa Balaan nga Espiritu Santo nga mahimo nilang giya, ug wala malimbongi—sa pagkatinuod sultihan ko kamo, dili sila pagaputlon ug itambog sa kalayo, apan molahutay niana nga adlaw.”¹¹

Karon, kini nga sukaranang tahas nga ang kabubut-on naay kalabotan diha sa atong kaugalingong paglambo, adunay mga implikasyon ngadto sa paagi sa atong pagtudlo isip mga magtutudlo sa relihiyon. Kami naghangyo sa mga lider sa misyon sa paghinumdom niini samtang sila mohatag sa ilang mga misyonaryo og mga oportunidad sa pagpangulo ug pagdirekta sa buhat sa misyonaryo. Kami naghangyo sa mga lider sa kabatan-onan sa paghatag sa kabatan-onan og mga oportunidad sa “pagpas-an sa yugo” sa pagkapangulo uban sa ilang mga hamtong nga mga mentor. Ug kami naghangyo, among mga magtutudlo sa relihiyon, sa pagtudlo diha sa mga paagi nga magdapit og personal nga paglambigit ug pagpanag-iya sa pagkat-on. Niini nga mga kahimtang, ang tinuod nga paglambo mahitabo sa labing epektibo kon ang mga batan-on nahatagan og mga oportunidad sa pagbuhat ug dili lang aghaton sa pagbuhat.

Malipayon kong mohisgot sa akong panahon isip magtutudlo sa seminary sa sayo sa buntag. Akong nakat-onan pinaagi sa kasinatian nga kini usa ka calling nga kinahanglan tinguhaon sa usa ka tawo. Duha ka tuig niadto isip magtutudlo sa seminary miabot atol sa akong panahon isip usa ka estudyante sa law. Gusto nga ang akong mga estudyante makabaton og kasinatian nga makita kon unsa ang makabaton og kaisog sa pagsunod pinaagi sa pagtuo, akong gidapit ang usa sa akong mga kauban sa klase, dili miyembro sa Simbahan apan usa ka tawo nga adunay pagtuo, nga moadto aron mamulong sa akong klase usa ka buntag. Ang akong higala nga si Richard adunay grabing problema sa panan-aw nga gikinahanglan ang matag karon ug unya, sakit nga mga pag-tambal nga naglakip sa pagtangtang sa mata gikan sa mga bayanan niini alang sa medikal nga mga procedure. Ang eskwelahan sa balaod nagkinahanglan og daghang pagbasa, apan dili kaayo siya makakita aron makabasa. Mao nga, siya nagsuhol og wala pa migradwar nga mga estudyante sa pagbasa para niya sa gawas sa klase kada adlaw. Bisan pa sa seryuso nga mga hagit, siya buotan ug nagustohan kaayo sa iyang isigka estudyante. Kaming tanan nadasig sa iyang ehemplo.

Mao nga misulti si Richard sa iyang istorya sa akong klase sa seminary, lakip sa iyang pagtuo sa Dios ug sa unsang paagi nga siya mibati sa Dios nga mitubag sa iyang mga pag-ampo. Ang mga estudyante adunay higayon aron makakita ug makadungog pag-ayo niya ug mangutana niya. Kini nakapaamgo kanila sa tinuod nga gahom sa pagtuo sa kinabuhi ug unsa ang gipasabot niini sa ilang kinabuhi. Sa samang higayon, ang kasinatian nagpasabot og bukas nga paglantaw ni Richard sa kaayohan sa akong bililhon nga mga estudyante sa seminary. (Usa ka butang nga nakapadani kaniya mao ang makita ang mga tinedyer sa 6:00 sa buntag sa klase.)

Karon, Ikonsiderar giunsa pagtudlo sa Manluluwas. Si Jesus wala lang nagsulti sa Iyang mga disipulo kon unsa ang ilang buhaton, wala sab siya mobuhat sa tanang butang para nila. Siya nagtudlo sa mga paagi nga gikinahanglan nilang maghunahuna, moapil, maghisgot, ug mogamit sa Iyang mga pagtulun-an. Tungod niini, sa dihang ang Manluluwas wala na nag-uban sa Iyang mga disipulo, sila mas naandam sa pagdawat ug magiyahan sa Espiritu Santo sa paglihok sa ilang kaugalingon.¹² Diha sa Pagtudlo Sumala sa Pamaagi sa Manluluwas, atong mabasa: “Kini sa tinuod makapahingangha nga magtan-aw sa Manluluwas nga naglakaw sa tubig. Apan dili pa kadto igo para ni Pedro. Gusto niya [ug kinahanglan] nga buhaton unsa ang gibuhat sa Manluluwas, kon hain Siya atua siya, ug siya mismo makasinati og samang kasinatian.”¹³ Syempre, kini usab nagpasabot nga si Pedro makahimo og kasaypanan, apan ang Manluluwas balik-balik nga mihatag ni Pedro—og mga oportunidad sa paglihok ug mahimong lig-on pinaagi sa iyang mga paningkamot, lakip ang iyang mga kapakyasan.¹⁴

Aron makahimo niining mga matang sa mga kasinatian sa pagkat-on alang sa Iyang mga disipulo, ang Manluluwas nakakita og mga paagi sa pagtabang kanila nga modawat og responsibilidad alang sa ilang pagkat-on. Ikonsiderar lang ang tulo ka paagi ang Manluluwas miapil sa Iyang mga disipulo: (1) paggamit og mga sambingay, (2)nangutana og dinasig nga mga pangutana, ug (3) paglugway og personal nga mga imbitasyon.

Paggamit og mga Sambingay. Usa ka komentaryo sa matag usa niini. Una, mga sambingay. Hunahunaa ang paggamit ni Kristo og mga sambingay. Imbis mohatag lang dayon og pagpasabot o direktang pamahayag, ang Manluluwas kasagaran nagdapit sa Iyang mga sumusunod sa pagpangita sa mas lawom nga kahulogan sa unsa Iyang gitudlo. Nagkinahanglan kini og paningkamot sa ilang bahin. Dili ko kahunahuna og mga paagi sa akong pagsabot sa pagkamasulundon nga nakapalig-on sa akong pagtuon sa sambingay sa Magpupugas.¹⁵ Mas nasabtan nako ang kapasayloan diha sa pagtuon sa anak nga nawala.¹⁶ Ang akong tinguha nga mobati ug mopakita og gugmang putli ngadto sa tanan napalapdan na pinaagi sa sambingay sa maayo nga Samaryanhon.¹⁷

Sa samang paagi, ako mahimong mas maayong disipulo ug lider samtang ako mamalandong sa pagkatinugyanan sama sa nahisgotan diha sa sambingay sa mga talanton.¹⁸ Usa sa mga butang nga misantop nako samtang namalandong niining sambingay mao nga ang unang duha ka sulugoon—ang usa nga nakadawat og lima ka talanton ug ang lain nga nakadawat og duha, ug matag usa mipadaghan sa ilang mga talanton—nakadawat og samang pagdayeg ug gigantihan bisan og ang ilang gidaghanon sa talanton nagkalahi. Ang una, nga dunay lima ka talanton, inyong mahinumdoman, nadoble ang gidaghanon nahimong napulo, ug ang ikaduha nga nagsugod sa duha miuli og upat. Ang duha nakadawat og parehas nga tubag gikan sa ilang agalon: “Maayo! Buotan ug kasaligan nga sulugoon: kasaligan ikaw sa diyotay, busa piyalan ko ikaw sa daghan. Duyog sa kalipay sa imong agalon.”¹⁹ Ako kining gisabot nga nangahulogan nga kitang tanan dili makakab-ot sa samang ang-ang ug pag-uswag sa samang tukma aron madawat ang panalangin sa Ginoo ug sa kataposan ang gasa sa kinabuhing dayon. Kita kinahanglan lang gyod nga magmakugihon sa mga gasa, mga abilidad, ug mga oportunidad nga anaa kanato. Ako motuo nga bisan ang mga sulugoon nga adunay usa ka talanton, kon mitrabaho pa siya ug miserbisyo aron maangkon ang ikaduha kaysa pagtago sa iyang talanton, makadawat unta sa samang ganti nga nahatag sa iyang duha ka igsoon. Ako motudlo sa mga lider ug sa uban nga kon ilang buhaton kutob sa ilang mahimo, ang Ginoo mopadako ug moganti sa ilang mga paningkamot, ug sa tukmang panahon sila modawat sa kahingpitan sa Iyang mga panalangin.

Pagpangutana og Dinasig nga mga Pangutana. Bahin sa pagpangutana og mga dinasig nga mga pangutana, ang Manluluwas nagtudlo nianang paagiha usab. Pananglitan, dihang nangutana Siya sa Iyang mga disipulo, “Unsa may inyong sulti, kinsa man Ako?” Siya klaro nga nasayod sa tubag nga adunay mas tin-aw ug lawom kaysa Iyang mga disipulo, apan Siya mihatag ni Pedro og oportunidad sa pagpamalandong ug dayon gitubag ang pangutana mismo. Ang gipanglitok ni Pedro nagpalawom sa iyang kaugalingong pagsaksi dihang siya namahayag, “Ikaw mao ang Kristo, ang Anak sa buhi nga Dios.”²⁰ Human sa Iyang Pagkabanhaw, ang Manluluwas nangutana og lahi nga pangutana ngadto ni Pedro sa pila ka higayon sa managlahing higayon: “Simon, anak ni Jonas, gihigugma mo ba ako?” Mitubag si Pedro, “Oo, Ginoo; nasayod ka nga gihigugma ko ikaw.” Ug niining higayona ang pangutana nagtugot sa Manluluwas sa pagtudlo ni Pedro pinaagi sa pagtubag sa matag higayon nga, “Pakan-a ang akong karnero.”²¹

Paghatag sa mga Imbitasyon. Sa kataposan, paghatag sa mga imbitasyon. Adunay mga higayon, laing mga higayon nga ang Manluluwas mitubag sa Iyang gipangutana, apan sa mga paagi nga naghatag og lahi nga imbitasyon. Namulong sa Iyang mga disipulo sa Kasadpang bahin, ang Manluluwas nangutana, “Unsa nga matang sa tawo kamo mahisama?” Ug dayon Siya mitubag sa Iyang kaugalingon, “Sa pagkatinuod Ako moingon nganha kaninyo, gani sama nga Ako mao.”²² Kita makahunahuna pa og laing importanteng mga imbitasyon gikan sa Manluluwas. Hunahunaa, pananglitan, ang Iyang imbitasyon nga, “Dali, sunod kanako.” Ug usahay ang Iyang mga imbitasyon miabot kuyog sa nag-uban nga mga saad—ug kini gihapon moabot nga dunay mga saad. Pananglitan, sa Doktrina ug mga Pakigsaad, ang Ginoo nagdapit: “[Pa]duol ngari kanako ug Ako mopaduol kaninyo; pangita kanako nga makugihon ug kamo makakita kanako; pangayo, ug kamo makadawat; tuktok, ug kini pagabuksan nganha kaninyo.”²³ Sa tanang imbitasyon sa Manluluwas, Siya naghatag sa Iyang mga disipulo og mga oportunidad sa paglihok, sa paghunahuna, ug sa pag-angkon sa ilang nakat-onan ug sa ilang paglambo.

Sa sayo pa niining tuiga, si Elder Clark Gilbert mihatag og imbitasyon sa atong mga magtutudlo sa seminary ug institute sa pagkaplag og mga paagi nga tuyoon sa paghatag og mga oportunidad sa mga estudyante aron makalihok ug modawat og responsibilidad alang sa ilang pagkat-on. Siya mikuha direkta gikan sa seksiyon sa Pagtudlo sumala sa Pamaagi sa Manluluwas giulohan og “Makugihon Magdapit og Pagkat-on.”²⁴ Nasuta nako nga makahuloganon nga ang ulohan niining seksiyon nakatutok sa pagkat-on kaysa pagtudlo. Para nako, kini usa ka pahinumdom nga ang epektibong mga magtutudlo modapit sa mga estudyante sa pagdawat og responsibilidad sa ilang kaugalingong pagkat-on. Ug kon kita magtudlo sa paagi nga magdapit lang sa pagpaminaw ug mobaliwala sa aktibong paglambigit diha sa bahin sa tigkat-on, kita nagrisgo ngadto sa mga estudyante nga kita naghatag og bili sa atong pagtudlo ibabaw sa ilang pagkat-on.

Sa Pagtudlo Sumala sa Pamaagi sa Manluluwas, kita gipahinumdoman nga ang makugihon nga pagdapit og pagkat-on nagkinahanglan kanato nga motabang sa mga estudyante nga mahimong mga tinugyanan sa ilang kaugalingong proseso sa pagkat-on. Adunay mga pipila ka mga paagi nga kini mahitabo, apan akong ipasabot ang labing minos tulo gikan niana nga kapanguhaan sa pagtudlo.

• Una, kana makamugna og mga kasinatian sa pagkat-on diin kita “modapit sa mga tigkat-on nga mangandam sa pagkat-on.” Kini mahitabo pinaagi sa pagbasa daan sa mga tun-anan, mga pangutana sa pagtuon, ug personal nga mga imbitasyon.

• Ikaduha, kita kinahanglan “moawhag sa mga tigkat-on sa pagpakigbahin sa mga kamatuoran nga ilang nakat-onan.” Adunay daghan kaayong paagi sa pagbuhat niini, ug matag usa ninyo makakaplag og kinaugalingong pamaagi nga mogana para nimo ug sa imong mga estudyante. Dihang anaa pa ko sa law school, kasagaran makat-on ko kon unsa ang gitawag og Socratic nga pamaagi, diin ang mga magtutudlo mitabang sa mga estudyante sa pagsuhid og legal nga kaso pinaagi sa paghangyo sa klase sa iapil ang materyal pinaagi sa usa ka sunod-sunod nga gihunahuna nga gipalambong mga pangutana. Kami moadto sa klase nga andam na sa pagbatbat sa among mga panghunahuna ug maminaw sa uban. Nakakita ko og mga magtutudlo sa institute nga naghatag sa mga estudyante og mga oportunidad sa pagpakigbahin kon unsa ang ilang nakat-onan pinaagi sa maayong pagkahan-ay nga mga panaghisgotan sa klase, ug kini nagkinahanglan og maayong pagpangandam sa mga magtutudlo nga mopaapil sa mga andam na nga mga estudyante diha sa usa ka diwa sa pagpakisayod ug dialogo. Ako nasayod nga kana ang kanunayng mahitabo sa inyong klase. Ang tanang estudyante nangandam og maayo. Ang tanang magtutudlo nangandam og maayo. Apan kana ang imbitasyon.

• Ikatulo, kita kinahanglan “modapit sa mga tigkat-on sa pagsunod kon unsa ang ilang nakat-onan”.²⁵ Kita kinahanglan kanunay nga mangita og mga paagi sa pagdapit sa mga estudyante sa paggamit kon unsa ang ilang makat-onan diha sa ilang mga kinabuhi. Kini mahimong moabot pinaagi sa personal nga mga imbitasyon, mga kalihokan sa pagpamalandong, ug sa daghan pang paningkamot sa pagtabang sa mga estudyante nga mag-usab ug mahimong mas mahisama ni Kristo.

Kini nga mga paningkamot sa pagpangandam ug pagpakigbahin, ug paggamit nadawat nga hunahuna ug usahay magkinahanglan og dugang buhat sa habig sa mga magtutudlo. Mahimong tinuod kini ilabi na sa inyong mga paningkamot sa pagtabang sa mga estudyante sa pagpakigbahin ug pagtudlo sa usag usa. Wala kini nagpasabot nga walay mga gitudlo nga mga kahimtang diin kita naghisgot direkta ug gikauyonan, ilabina kon kita nagpasabot sa importanteng mensahe o nagpahimutang sa pundasyon sa baroganan. Ang miting karong gabii usa sa ehemplo sa pag-establisar og usa ka pundasyon nga mensahe. Apan kini nga mensahe kinahanglan dayon masundan og dugang regular nga mga oportunidad alang natong tanan aron maapil diha sa proseso sa pagkat-on pinaagi sa pagpakigbahin kon unsa ang atong nakat-onan ug pinaagi sa paggamit niana nga pagkat-on isip kabahin sa atong kaugalingong pagtudlo.

Manghinaot ko nga inyong giila ang pagpangandam nga among gihangyo nga inyong buhaton daan niining gabhiuna uban sa mga pangutana sa pagtuon ug mga basahon nga materyal nga among gipakigbahin nang daan. Ugma ug sa umaabot nga semana, kami modapit kaninyo sa paghisgot kon unsa ang inyong nakat-onan bahin sa pagtudlo diha sa pamaagi sa Manluluwas uban sa inyong mga katrabaho ug mga kaedad. Kami usab mohangyo kaninyo sa pag-ila sa mga dapit diin kamo makapalig-on sa inyong kaugalingong pagtudlo base sa mensahe karong gabii ug sa ubang kapanguhaan sa pagtudlo nga ipakigbahin ugma.

Tugoti ko nga mohunong dinhi ug mohimo og paminawa ang laing kapanguhaan sa pagtudlo nga angay lang tun-an bisan ug kini gisulat alang sa lahi nga tigpaminaw. Ako nagpasabot sa Kapitulo 10 diha sa manwal sa misyonaryo, Isangyaw ang Akong Ebanghelyo. Kini nga kapitulo giulohan og “Pagtudlo aron Mapalig-on ang Hugot nga Pagtuo diha ni Jesukristo.” Ang misyonaryo nga pagtudlo, siyempre, ang pinakataas sa pagtabang sa mga tawo nga makaapil ug magbag-o sa ilang mga kinabuhi sa paggamit sa ilang moral nga kabubut-on. Ang tumong mao ang pagkabig pinaagi sa impluwensiya sa Espiritu Santo ug sa grasya ni Kristo nga mosangpot sa pagkadisipulo sa tibuok kinabuhi. Mao usab kini ang atong katuyoan diha sa Church Education System, syempre. Ug busa ako moingon nga kamo makabaton og dugang nga panabot gikan niini nga kapanguhaan ingon man sa Pagtudlo Sumala sa Pamaagi sa Manluluwas. Natural lang, adunay daghang pagkapareho sa duha ka manwal, apan ang pagbasa sa usa ka butang nga mahimong magpahayag sa usa ka baroganan o ideya nga medyo lahi ang pamaagi usahay makahatag og bag-ong panglantaw o mas lawom nga panabot. Pipila sa mga pangutana gitubag diha sa Kapitulo 10 sa Isangyaw ang Akong Ebanghelyo mao ang “Unsaon nako sa pagtudlo pinaagi sa Espiritu?” “Unsaon nako sa pagtudlo gikan sa mga kasulatan?” “Unsaon nako sa pagpakigbahin sa akong pagpamatuod kon magtudlo?” “Sa unsang paagi makaplano ug makaadjust ko sa akong pagtudlo aron makab-ot ang panginahanglan sa tawo?” ug “Sa unsang paagi nga makapangutana ko og mas maayong mga pangutana ug mahimong mas maayong tigpaminaw?” Ug gusto ko nga masayod mo nga ako wala bayari alang sa pag-endorso niini.

Sa kataposan, bahin sa pagtabang sa mga estudyante sa pag-ako sa responsibilidad sa ilang kaugalingong mga pagpamatuod. Ang makugihon nga pagdapit og pagkat-on mao ang sukaranan sa pagpalambo sa pagkadisipulo ni Jesukristo sa tibuok kinabuhi tungod kay kini magtabang sa mga tigkat-on nga moako og responsibilidad alang sa ilang pagkat-on, sama sa atoa nang gikasulti. Usa sa mga paagi nga si Presidente Nelson modasig kanato niining pagpanag-iya sa atong personal nga paglambo anaa sa iyang imbitasyon ngadto sa mga young adult sa pag-ako sa ilang mga pagpamatuod. Sa iyang tibuok kalibotan nga debosyonal ngadto sa mga young adult niadtong 2022, si Presidente Nelson mipahayag:

“Ako mangamuyo kaninyo sa pag-angkon sa responsibilidad sa inyong pagpamatuod. Trabahoa kini. Angkona kini. Atimana kini. Amumaha kini aron motubo kini. Palamboa kini gamit ang kamatuoran. Ayaw kini hugawi sa sayop nga mga pilosopiya sa dili matuohon nga mga lalaki ug mga babaye ug dayon matingala nganong nagkahuyang ang inyong pagpamatuod. Buhata ang inadlaw, sinsero, mapainubsanon nga pag-ampo. Amumaha ang inyong kaugalingon gamit ang mga pulong sa karaan ug sa modernong mga propeta. Hangyoa ang Ginoo sa pagtudlo kaninyo kon unsaon nga mas maayong makapaminaw Kaniya. Paggahin og dugang nga panahon diha sa templo ug sa buhat sa family history. Samtang inyong himoon ang inyong pagpamatuod nga inyong kinatas-an nga prayoridad, bantayi ang mga milagro nga mahitabo sa inyong kinabuhi.”²⁶

Gibalik-balik ni Presidente Nelson kini nga hangyo sa tibuok simbahan sa iyang pakigpulong sa Oktubre 2022 nga kinatibuk-ang komperensiya “Buntoga ang Kalibotan ug Pangita og Kapahulayan.”²⁷

Sa dihang namulong siya ngadto sa mga young adult, si Presidente Nelson nangutana og sunod-sunod nga mga pangutana: “Gusto ba kamong mobati og kalinaw mahitungod sa mga kabalaka nga kasamtangang naghasol kaninyo? Gusto ba kamong mas makaila ni Jesukristo? Gusto ba kamong makat-on kon sa unsang paagi ang Iyang balaanon nga gahom makaayo sa inyong mga samad ug mga kahuyang? Gusto ba kamong makasinati sa tam-is, makahupay nga gahom sa Pag-ula ni Jesukristo nga naglihok sa inyong kinabuhi? Ang pagtinguha sa pagtubag niini nga mga pangutana magkinahanglan og paningkamot—dakong paningkamot.”²⁸ Giuyonan pa gani niya ang kabalaka sa estudyante pinaagi sa pag-ingon “Kon kamo adunay mga pangutana—ug ako naglaom nga kamo aduna—pangita og mga tubag nga inubanan og mainiton nga tinguha nga motuo. Pagkat-on sa tanan nga inyong mahimo mahitungod sa ebanghelyo ug seguroha nga modangop ngadto sa mga tinubdan nga puno sa kamatuoran alang sa giya.”

Para nako, kini ang gipasabot sa makugihon sa pagdapit og pagkat-on, ug mao kini ang gikinahanglan nga atong dapiton ang atong mga estudyante sa pag-ako sa ilang mga pagpamatuod. Kana nga pagpanag-iya sa pagkat-on nagkinahanglan nga suportado sa mga paagi nga atong giestraktura ang atong mga instruksiyon, aron ang mga estudyante makabaton og mga oportunidad sa pag-apil sa lawom ug kahago nga gikinahanglan sa pag-ugmad sa tinuod nga pagkadisipulo. Pamalandongi pag-usab ang imbitasyon sa propeta nga “Trabahoa kini. Angkona kini. Atimana kini. Amumaha kini aron motubo kini.” Ang atoa bang klasehanan nagdapit niining matang sa indibidwal nga paglambigit sa pagpadayon sa pagpamatuod ug pagkadisipulo? Aduna bay mga paagi nga kita makatabang—o makapalambo sa atong mga paningkamot sa pagtabang ug pagdapit og makugihon nga pag-kat-on?

Karong gabhiuna, gisugdan nako sa pagrebyo ang mga katuyoan sa edukasyon sa relihiyon sa Simbahan, lakip ang panginahanglan sa pagtabang sa atong mga estudyante:

1. “Palamboa ang hugot nga pagtuo ug pagpamatuod sa Langitnong Amahan ug ang Iyang ‘talagsaong plano,’ …

2. Mahimong mga disipulo ni Jesukristo sa tibuok kinabuhi, nga mohimo ug motuman sa mga pakigsaad, … [ug]

3. Palig-onon ang ilang abilidad sa pagpangita og mga tubag, mosulbad sa mga pagduha-duha, motubag sa hugot nga pagtuo, ug mohatag og rason alang sa paglaom diha kanila sa bisan unsang mga hagit nga ilang atubangon.”²⁹

Kon kita motabang sa mga estudyante sa paggamit sa ilang personal nga kabubut-on, ilang mapalawman ang ilang personal nga kabubut-on, ang ilang pagkakabig mopalawom sa iyang pamaagi nga modala ngadto sa pagkadisipulo sa tibuok kinabuhi. Karon mao ang panahon nga atong himoon ang atong pagkadisipulo nga atong kinatas-an nga prayoridad.”³⁰ Siya midugang, “Dili pa sayo kaayo o ulahi na kaayo nga kamo mahimong usa ka matinguhaon nga disipulo ni Jesukristo”³¹ Magkugi kita karon sa dili pa ulahi ang tanan. Karon ang panahon, sama sa iyang gisulti. Nagkadako ug nagkadako, nga akong gibati nga giaghat sa pasidaan ni Igsoong Pablo, nga naghangyo ngadto sa mga anciano sa Ephesus:

“Bantayi ninyo ang inyong kaugalingon ug ang tanang mga magtutuo nga gitugyan sa Espiritu Santo aron inyong amomahon. Atimana usab ang simbahan sa Dios nga naiya pinaagi sa dugo sa iyang Anak.

“Nahibalo ako nga inig biya ko kaninyo, anhaon kamo sa mapintas nga mga lobo ug wala silay sayloan sa panon sa mga magtutuo.

“May pipila unya ka mga tawo diha sa inyong pundok nga manudlog bakak aron pagdani sa mga magtutuo sa pagsunod kanila.”³²

Ang mga estudyante nga mao kita, sa pulong ni Pablo, mga “manalagna” walay kinutoban ang kabililhon, gipalit sa kaugalingong dugo sa Manluluwas. Kita gitahasan sa paghatag og matinud-anong ehemplo ug mopakaon ug molig-on kanila batok sa “mangtas nga mga lobo” nga mahimo nilang masugatan gawas sa Simbahan bisan sa sulod sa Simbahan—diha sa mga pulong ni Pablo, tali sa atong “kaugalingon”—nagsulti og mga bakak ug nagtinguha sa paghimo sa ilang kaugalingon nga mahimong disipulo kaysa disipulo sa Agalon. Kita kinahanglan gayod motabang kanila nga makat-on sa kamatuoran, maalamon nga paggamit sa kabubut-on, ug labaw sa tanan, lawom ug magpabilin nga gugma sa Amahan ug Anak.

Ako mopamatuod sa atong mahigugmaon ug pinalangga nga Langitnong Amahan ug sa Iyang plano sa Katubsanan. Ako mopamatuod sa buhi nga reyalidad sa Iyang Bugtong Anak, si Jesus, ang nabanhaw nga Manunubos, kinsa naglingkod sa tuo nga bahin sa Amahan, diin Siya miangkon sa Iyang mga katungod sa kaluoy ngadto sa mga anak sa tawo.³³ Uban ni Mormon, akong giangkon ang pagkadisipulo ni Jesukristo³⁴ ug magtinguha sa pagkahimong disipulo ni Kristo hangtod nga kita buhi. Hinaot matag usa nato mapalig-on sa atong kaugalingong pagkadisipulo ug sa atong mga paningkamot sa pagtabang og daghan kutob sa mahimo nga kita mahimong deboto, mga disipulo ni Jesukristo sa tibuok kinabuhi.

Panalanginan kamo sa Dios. Sa ngalan ni Jesukristo, amen.