Ang Pagkadisipulo sa Tibuok Kinabuhi Mao ang Atong Tumong
Ang Epekto sa Maayong Pagtudlo sa Ebanghelyo
Debosyonal sa Komperensiya alang sa mga Magtutudlo sa Relihiyon, Hunyo 12, 2025
Taga Tennessee ko, nga taliwala sa dapit sa Estados Unidos nga kusog ang pagka-Kristiyano, ug sa dihang anaa ko sa high school, kabahin ko sa usa ka organisasyon nga gitawag og Fellowship of Christian Athletes. Dili ninyo kini mailhan pinaagi sa pagtan-aw kanako karon, apan kaniadto, usa ako ka maayo nga atleta ug anaa sa maayong pisikal nga kondisyon. Pipila ka tuig ang milabay, ang akong inahan nagpadala sa akong asawa og usa ka hulagway kanako gikan sa high school sa dihang puno pa og buhok ang akong ulo ug may pagkamaskulado. Uban sa hulagway mao ang usa ka makapahupay nga mensahe gikan sa akong inahan ngadto sa akong asawa nga miingon, “Mao kini ang imong paaboton sa Pagkabanhaw.”
Aw, ang Fellowship of Christian Athletes kaniadto ug karon usa ka organisasyon nga adunay talagsaon nga misyon. Kini usa ka komunidad sa mga atleta gikan sa lainlaing mga tinuohan, nga nag-ambit sa usa ka hugot nga pagtuo ni Kristo. Sa kataposan sa akong junior nga tuig, napili ko nga mahimong presidente sa lokal nga grupo sa akong high school alang sa sunod tuig, ang akong senior nga tuig.
Ang akong ngalan, uban sa akong konektado nga simbahan, gisumiter ngadto sa punoang buhatan sa estado isip usa ka bag-ong presidente sa lokal nga grupo. Taudtaod, usa ka mensahe ang mibalik ngadto sa among tigpasiugda nga magtutudlo nga kinahanglan isumiter ang usa ka bag-ong ngalan. Ang among tigpasiugda misulti nako nga siya gisultihan nga ako dili mahimong presidente tungod kay sila wala moila sa mga miyembro sa Ang Simbahan ni Jesukristo sa mga Santos sa Ulahing mga Adlaw isip mga Kristiyano. Ang akong hugot nga pagtuo wala pa gayod masulayi og sama niana.
Usa ka bag-ong presidente ang gipili, apan human sa pipila ka bulan, nakadawat ko og balita nga ang pipila ka representante gikan sa Simbahan nakigsulti sa The Fellowship of Christian Athletes, ug ang isyu nasulbad na. Mipadayon ko nga nahimong aktibo sa grupo tungod sa maayo gayod nga mga tawo nga kabahin niini.
Sa kataposan sa matag tuig ting-eskwela, ang matag lokal nga grupo sa high school mobotar alang sa usa ka atleta sa tuig, ug sa kataposan sa akong senior nga tuig, gibotaran ko sa akong mga kaedad isip ang “The Fellowship of Christian Athletes Athlete of the Year.” Karon, sa tinuod lang, gibati nako nga kana usa ka matam-is nga hustisya. Sa miaging tuig, wala gani ko giila nga Kristiyano, ug karon nakadawat na ko sa ilang ganti.
Aw, ang akong ngalan, uban sa akong konektado nga simbahan, gisumiter ngadto sa punoang buhatan sa estado isip atleta sa tuig sa akong high school. Apan usab, usa ka mensahe ang nahibalik sa among magtutudlo nga tigpasiugda nga kinahanglan isumiter ang usa ka bag-ong ngalan. Dayag lang, ang isyu wala pa masulbad.
Ang among tigpasiugda, kinsa mao ang akong football ug wrestling coach, misulti kanako nga siya midemanda nga adunay usa ka tawo nga moanhi gikan sa ilang mga buhatan sa estado nga mobisita uban kanako sa among high school aron ipasabot ang usa ka desisyon nga wala niya gisuportahan.
Usa ka buotan kaayo, maayo og intensiyon nga tawo ang miabot aron makigkita kanako. Nagkita kami sa lawak klasehanan sa akong coach atol sa usa sa iyang libre nga mga panahon. Ang tawo mipasabot nga siya gusto nga ako makasabot kon ngano nga ang mga miyembro sa atong Simbahan wala gitan-aw isip mga Kristiyano.
Gikuha niya ang usa ka panid sa papel gikan sa iyang bag. Diha sa papel, adunay napulo ka punto sa atong doktrina nga giingon niya nga dili uyon sa ilang kahulogan sa Kristiyanidad. Pamilyar kamo sa maong mga punto: ang atong pagtuo nga ang Dios Kapangulohan managlahi nga mga binuhat, nga adunay laing mga kasulatan gawas sa Biblia, ug uban pa.
Gipakigbahin niya kadto nga mga punto, ug buotan kaayo siya—moingon gani ko nga Kristiyano. Siya maayo nga tawo, natudloan lang og sayop. Giablihan niya ang iyang bag ug gisulod ang iyang papel ug sinsero nga nangutana kon ako adunay bisan unsa nga mga pangutana.
Ug miingon ko, “Oo, ako aduna.” Miingon ko, “Biblia ba kanang akong nakita sulod sa imong bag?”
Ug mitubag siya, “Oo.”
Miingon ko, “Mahimo ba kitang motan-aw og pipila ka kasulatan diha niini?”
Karon kinahanglan kong mosulti kaninyo, ako adunay maayo kaayo nga mga magtutudlo sa seminary. Ug maayo kaayo kami sa scripture chase. Niadtong mga panahona, duna kami kap-atan ka mga bersikulo sa kahanas sa kasulatan matag tuig, ug matag Biyernes sa among klase sa seminary duna kami mga donut, ug mag-scripture chase kami, ug mas maindigon ako kaniadto kaysa gikanahanglan. Wala lang nako gimarkahan og pula ang mga bersikulo sa kahanas sa kasulatan, nakat-on usab ko, maulaw ko nga moingon, nga kon akong kunoton ang mga pahina mas sayon ang pagpakli ngadto sa mga bersikulo sa kahanas sa kasulatan. Ug dayon, sa dili pa gayod ang among sangka sa scripture chase sa stake, akong sabligan og pulbos ang mga pahina. Kon ako igo nga maduol sa akong mga kasulatan ug mo-snap lang sa akong mga tudlo, kini moabli ngadto sa usa sa mga bersikulo sa kahanas sa kasulatan.
Aw, ang buotan nga lalaki mabination kaayo sa pagpakigbahin sa iyang Biblia kanako, nga wala markahi alang sa scripture chase. Gipakli namo ngadto sa Mateo 3, Mga Buhat 7, 1 Cronicas 29, ug uban pa. Sa pagdayeg kaniya, naminaw siya og maayo. Ang desisyon wala mausab, apan ako nausab.
Sa usa ka paagi, samtang nagrebyo niadto nga mga kasulatan, nabati nako ang kamatuoran niini nga mas lawom kaysa kaniadto. Usahay ang saksi moabot human sa pagsulay.1 Ang akong pagpamatuod, ang akong pagkakabig, wala miabot tungod niana nga kasinatian; ang mga panghitabo nga kausa ra mahitabo talagsa ra nga makamugna og malungtarong hugot nga pagtuo. Apan kadto usa sa daghang kasinatian nga naghatag ug saksi nga milambo paglabay sa panahon.
Mapasalamaton kaayo ko sa akong sayo sa buntag nga mga magtutudlo sa seminary nga mitabang nako sa pag-establisar og pundasyon nga mapalambo. Ingon nga gusto gayod nila nga makadaog ang among ward sa sangka sa scripture chase sa stake, mas nagpakabana gayod sila sa pagtabang kanamo nga mahimong tibuok kinabuhi nga mga disipulo ni Kristo. Nakahimo sila og kalainan sa akong kinabuhi. Nanghinaot ko nga sa inyong hilom nga mga gutlo sa pagpamalandong mahitungod sa inyong pagtudlo nga inyong mailhan ang makahuloganon nga epekto nga anaa kamo diha sa mga kinabuhi niadtong inyong gitudloan.
Kini nga nagtubo nga henerasyon makapahingangha. Niining labing bag-o nga kinatibuk-ang komperensiya, si Presidente Russell M. Nelson miingon, “Ang nagtubo nga henerasyon mitubag sa tawag nga magmaisogon nga mga sumusunod ni Jesukristo.”2 Sa laing higayon, siya misulti kanila, “Aduna kamoy kapasidad nga mahimong mas lantip ug mas maalamon ug adunay mas dakong epekto sa kalibotan kay sa nangaging henerasyon.” 3 Aron makab-ot kana nga kapasidad, nagkinahanglan sila, lakip sa ubang mga butang, og maayong mga magtutudlo sa ebanghelyo.
Sila puno sa hugot nga pagtuo, apan “ang pagtuo naggikan sa pagpamati sa mensahe ug ang nabati naggikan sa pulong ni Kristo.” 4 “Ug unsaon man nila pagkadungog kon walay magwali niini?” 5 Sila nakasabot sa ebanghelyo sama sa walay laing kaliwatan nga nauna kanila, apan unsaon nila “[m]akasabot … sa [ilang] gibasa… kon walay [magtutudlo nga] motudlo [kanila].” 6
Ngadto sa mga Taga-Corinto, si Pablo misulat: “Gipahimutang sa Dios ang tanan sa husto nga dapit: una ang mga apostoles, ikaduha mga propeta, ikatulo mga magtutudlo ug kadtong naghimog mga milagro.”7 Busa, inyong makita ang inyong kaugalingon nga diha mismo sa taliwala sa apostoles ug sa mga propeta ug sa mga milagro uban sa usa ka mahinungdanon nga tahas sa kahalangdon niini nga higayon ug sa pagpadali sa buhat sa Ginoo. 88
Ang Pagkadisipulo sa Tibuok Kinabuhi mao ang Tumong
Sa mensahe ni Elder D. Todd Christofferson kagabii, iyang gisugdan ug gitapos ang iyang mga pakigpulong pinaagi sa pagrebyo sa mga katuyoan sa relihiyosong edukasyon diha sa Simbahan. Natandog ko sa iyang pagbalik-balik ug sa paghatag og gibug-aton sa pagtabang sa mga estudyante nga mahimong mga disipulo ni Jesukristo sa tibuok kinabuhi. Siya nagtinguha gayod sa pagpahinumdom kanato kon unsa ang atong gilaoman nga makab-ot sa atong pagtudlo.
Unom lang ka bulan human siya gitawag ngadto sa Korum sa Napulog Duha ka Apostoles, si kanhi Elder Russell M. Nelson namulong niini nga kampus sa usa ka debosyonal sa Dominggo. Ang iyang mensahe makapadasig ug puno sa panabot, apan ang ulohan sa iyang pakigpulong ang gusto nakong hatagan og importansiya. Gipaila niya kini niining paagiha: “Akong giulohan ang akong pakigpulong og, ‘Mosugod nga Maghunahuna sa Kataposan’” Siya dayon mipasabot: “Tingali ang pipila niini naggikan sa akong kasinatian sa pag-opera. Ang usa ka giplano nga paghiwa sa usa ka operasyon dili gayod himoon nga walay plano sa pagsira niini. Apan, ang sama nga baroganan sa kinatibuk-an magamit sa tanan nga mga propesyon. Ang mga sikat nga atleta sa track and field dili magsugod sa usa ka lumba nga wala makahibalo sa lokasyon sa finish line.” 99
Ang paghunahuna sa kataposan—masayod kon asa nahimutang ang finish line ug ang pagsabot sa kataposang tumong—kanunay nga importante, apan kini ilabi na nga importante sa pagtudlo sa ebanghelyo. Kon kita magpabilin nga nakatutok nianang balaanong tumong, mas dako ang atong kalagmitan nga makab-ot kini.
Si Presidente Thomas S. Monson mihatag og gibug-aton: “Ang tumong sa pagtudlo sa ebanghelyo … dili ang ‘pagbubo og impormasyon’ ngadto sa hunahuna sa miyembro sa klase. … Ang tumong mao ang pagdasig sa indibidwal sa paghunahuna, pagbati, ug unya pagbuhat og usa ka butang bahin sa pagpuyo sa mga baroganan sa ebanghelyo.” 10
Sama sa gipahayag sa Kinatibuk-ang Tamdanan nga Basahon: “Kita motudlo sa ebanghelyo aron sa pagtabang sa mga tawo nga malig-on ang ilang hugot nga pagtuo diha sa Langitnong Amahan ug ni Jesukristo. Kita magtinguha sa pagtabang sa mga tawo nga mahimong mas sama sa Manluluwas, modawat sa Iyang gahom sa ilang kinabuhi, ug sa kataposan makaangkon og kinabuhing dayon.” 11
Gihimo na ninyo kini sa usa ka talagsaon nga paagi. Nakita namo ang inyong epekto sa mga kinabuhi sa nagtubo nga henerasyon. Mas daghan ang miapil sa seminary ug institute, mas daghan ang miadto sa mga misyon, mas daghan ang nagserbisyo sa templo, mas daghan ang nahimong tibuok kinabuhi nga mga disipulo ni Jesukristo.
Ang akong imbitasyon karon yano lang: nga kamo mahimong adunay katuyoan mahitungod sa pagtudlo uban sa tibuok kinabuhi nga pagkadisipulo isip ang tumong. Tan-awa ang tanan nga inyong buhaton pinaagi niana nga panglantaw. Matag karon ug unya rebyoha kon unsay inyong gitudlo, giunsa ninyo pagtudlo, ug bisan kon unsay inyong gihimong pasulit. Rebyoha dili lamang kon unsa ang inyong gitabang nga sila mahibalo apan usab rebyoha kon unsa ang inyong gidasig kanila nga buhaton ug mamahimo. Pagtudlo uban sa katuyoan sa pagtabang kanila nga mahimong “[mga] bag-o nang binuhat” 12 diha ni Kristo.
Pipila ka pangutana nga ikonsiderar: Sa unsang paagi nga unsay akong gitudlo ug giunsa nako sa pagtudlo makaapekto sa paagi nga ang akong mga estudyante mobati mahitungod sa mga pangutana nga gipangutana diha sa usa ka interbiyo sa rekomend sa templo? Ang akong pagtudlo ba makapalambo og hugot nga pagtuo sa Langitnong Amahan, ni Jesukristo, ug sa Espiritu Santo? Kini ba makapalig-on sa mga pagpamatuod sa Pagpahiuli sa ebanghelyo ni Jesukristo ug sa buhi nga mga propeta ug apostoles? Kini ba makapalig-on sa determinasyon sa mga estudyante sa pagsunod sa mga sugo ug sa paghinulsol kada adlaw?
Pagdapit og Makugihon nga Pagkat-on
Kon ang atong tumong mao ang tibuok kinabuhi nga pagkadisipulo, kita kinahanglan, sama sa gidapit ni Elder Christofferson nga atong buhaton, “mokonsiderar kon giunsa sa Manluluwas pagtudlo.” Mahinungdanon ang paagi kon giunsa nato pagtudlo.
Mahinumdoman ninyo ang pagtulun-an ni Presidente Boyd K. Packer bahin sa “ang pamaagi sa pagtudlo” diha sa mga komperensiya sa zone sa dihang siya usa ka presidente sa misyon. Si Sister Packer nagluto og cake nga adunay tulo ka ang-ang, nindot nga gidekorasyonan og mabulokon nga mga layer sa frosting. Siya misulat sa ibabaw sa mga pulong: “Ang Ebanghelyo.”
Sa dihang ang mga misyonaryo nagkapundok, ang cake gisulod uban sa pipila ka seremonya. Si Presidente Packer mipunting nga ang cake nagrepresentar sa ebanghelyo. Dayon nangutana siya, “Kinsay gusto og gamayng cake?”
Aw, dili lisod ang pagpangita sa usa ka misyonaryo nga gusto og cake. Usa ka wala nagdahom nga boluntaryo ang gitawag sa atubangan. Gikuha dayon ni Presidente Packer ang iyang kamot ug gilubong kini sa kinaibabwan sa cake ug milangkat og dako nga piraso. Iyang gikumkom ang iyang kumo aron ang frosting manggawas agi sa iyang mga tudlo. Dayon iyang gilabay ang piraso sa cake ngadto sa nahibulong nga elder, nga mipisik sa frosting sa atubangan sa iyang amerikana.
Human sa paghunong para dunay gamayng epekto, siya milingi ngadto sa nahibilin sa mga misyonaryo ug nangutana kon aduna bay lain nga gusto og cake. Moingon siya, “Sa pipila ka rason, walay ganahan.”
Dayon gikuha niya ang usa ka kristal nga plato, usa ka pilak nga tinidor, usa ka linen nga panyo, ug usa ka matahom nga pagsilbi nga pilak nga kutsilyo. Iyang gituyok ang cake. Dayon, uban sa dakong dignidad, mainampingon niyang gihiwa gikan sa pikas nga bahin, hinayhinay nga gibutang kini sa kristal nga plato, ug nangutana, “Aduna bay ganahan og usa ka piraso nga cake?”
Mipasabot si Presidente Packer: “Klaro ang leksiyon. Parehas kini nga cake sa duha ka kahimtang, parehas og lami, parehas og nutrisyon. Ang matang sa paghatag ang naghimo niini nga madapiton, gani madanihon, o dili madanihon, gani law-ay.” Gipahinumdoman niya ang mga misyonaryo nga ang cake nagrepresentar sa ebanghelyo ug gipangutana sila kon giunsa nila kini paghatag. 13
Ang paagi sa atong paghatag ang ebanghelyo makahimo sa kalainan tali sa pagbubo og impormasyon ngadto sa mga hunahuna sa atong mga estudyante ug pagdasig kanila nga mahimong makugihon nga mga tigkat-on nga mousab sa ilang mga kasingkasing, mga panglantaw, mga lihok, ug ang mismong mga kinaiya aron mahimong tibuok kinabuhi nga mga disipulo ni Jesukristo. 14
Sa pagtudlo sama sa pagtudlo sa Manluluwas, kita mohigugma niadtong atong gitudloan, kita motudlo pinaagi sa Espiritu, ug kita motudlo sa doktrina. 15 Kadto ang mga butang nga atong buhaton isip mga magtutudlo.
Apan unsa man ang bahin sa estudyante? Unsa man ang ilang tahas? Ang ilang tahas mao ang makugihon nga pagkat-on, sa pag-ako sa responsibilidad alang sa ilang pagkat-on, sa paglihok, ug sa paggamit sa mga baroganan sa ebanghelyo sa ilang inadlaw-adlaw nga mga kinabuhi.
Si Elder Christofferson mihangyo kanato kagabii sa pagdapit og makugihon nga pagkat-on. Siya mitudlo kanato kon sa unsang paagi ang Manluluwas midapit og makugihon nga pagkat-on. Miingon siya, “Siya mitudlo sa mga paagi nga nagkinahanglan [sa Iyang mga disipulo] sa paghunahuna, pag-apil, paghisgot, ug paggamit sa Iyang mga pagtulun-an.” Hinaot nga buhaton nato ang sama.
Panapos
Sa pagtapos, salamat sa inyong gibuhat alang niadtong inyong gitudloan ug sa inyong gibuhat alang sa gingharian sa Dios. Ang tumong sa atong pagtudlo mao ang pag-ugmad og mga tibuok kinabuhi nga mga disipulo ni Jesukristo. Hinaot nga magiyahan kamo samtang kamo “mohatag sa ebanghelyo” ug mobuhat sa paagi nga magdapit og makugihon nga pagkat-on.
Akong ipakigbahin ang akong pagpamatuod sa Bantogang Magtutudlo, gani si Jesukristo, ang atong Manlalaban, “ang mag-uugmad ug maghihingpit sa atong hugot nga pagtuo,” 16 ug ang “pangulong pari sa mga maayong butang nga umaabot.” 17
Sa ngalan ni Jesukristo, amen.