Talia le Meaalofa

I le taimi o le Kerisimasi, e masani a ona liliu atu o tatou mafaufau i manatu i le aiga—o tatou aiga faalelalolagi ma lo tatou aiga faalelagi. Peitai, o se tasi o a’u Kerisimasi e sili ona manatua pea na oo mai i le taimi muamua na ou faaaluina ai le Kerisimasi a o aluese mai le aiga.

O a’u sa o se faifeautalai faamisiona fou i Pasila, sa tau faamasani pea i se aganuu ma se gagana e le masani ai. I se tasi aso, a o ma savavali ma la’u soa i se favela faatauvaa, sa ma faalogoina se tasi o valaau mai ia i ma’ua: "Lua te aoao atu e uiga ia Iesu?"

Sa ma faliu ma vaaia ai se tamaitai o le sa valaauliaina i maua i totonu o si ona tamai fale, e fola palapala. Sa ma feiloai i lona tina ua matua ma lana fanau e toafitu, o e sa nonofo faatasi uma i lena tamai pa’usisi. Sa amata ona ma aoaoina i latou i le talalelei toefuataiina a Iesu Keriso ma sa latou naunau e aoao.

A o latalata mai le taimi o le Kerisimasi, sa valaaulia i maua e le aiga matou te faitoonai o le Kerisimasi i lo latou fale. Ou te tautino atu ou te lei sagisagi i la latou valaaulia. Sa faigata ona ou vaai faalemafaufau po o le a le ituaiga toonai o le Kerisimasi e mafai ona ofo mai e lenei aiga matitiva. Sa leai foi se latou laulau e nonofo ai! I lo’u mafaufau faatamaitiiti sa ou mafaufau ai e uiga i aiga e sili atu ona tulelei i le uarota ma mafaufau ai pe tatau ona ma faatali mo se ofo sili atu mai se tasi o i latou.

O le mea e lelei ai, sa sili atu le poto o la’u soa sinia nai lo a’u, ma sa vave ona ia taliaina le valaaulia. I le aso Kerisimasi, sa faafeiloaia i ma’ua i le fale faatauvaa o lenei aiga.

Ou te lei saunia mo le mea na ou vaai i ai.

I le ogatotonu o le potu sa i ai se laulau e i ai ipu e tutumu i araisa, pi, aano o manu, ma pateta, ma se faguinu suamalie telē. Ma sa na o le lua nofoa—tasi mo a’u, ma le tasi mo la’u soa.

Na ou lemagagana ma lofituina i lagona ootia. Sa latou saunia lenei toonai o le Kerisimasi mo na o i ma’ua lava. Atonu sa o se osigataulaga tele lea mo i latou. Ae peitai, a o ou nofo i le laulau ma tilotilo atu i tamaiti, o saofafai faalagolago i le puipui, ma matamata mai a o ma aai, sa ou vaaia ni ’ata’ata i o latou foliga. O le faia o se osigataulaga mo i ma’ua—o ni tagata ese mai se isi atunuu—na aumaia ai ia i latou le olioli moni. Sa latou tuuina mai ia i ma’ua se meaalofa matagofie, ma i le taimi muamua, sa ou tau musu e talia.

O lena Kerisimasi na suia ai lo’u olaga e faavavau. E ui lava ua tele tausaga ua mavae atu, ae ou te mafaufau soo i ai. O le manatuaina o le taulaga fiafia a lena aiga e liliu atu ai o’u mafaufauga i le taulaga a Iesu Keriso, Lana meaalofa paia o le togiola ma le faamalologa. O le mea moni, o Lana meaalofa o le mafuaaga lea tatou te faamanatu ai le Kerisimasi.

Ou te mafaufau i le fesili a lo tatou Tama Faalelagi: "O ai ou te auina atu?" ma le tali lototele a le Alo, "O A’u lenei, auina atu a’u."

Ou te mafaufau i le soifua mai ma le ola faamaualalo o Iesu—Lona naunautai e "afio mai i lalo mai le lagi i le fanauga a tagata, ma … nofo i se falefetafa’i o le ele."

Ou te mafaufau i Lona puapuagatia i Ketesemane, lea na Ia tauaveina ai "o tatou tiga," "tauave o tatou faanoanoaga," ma tauave i Ona lava luga a tatou agasala.

"Ou te mafaufau i ona lima na tuituia ma tafetotoi e totogi [la tatou] aitalafu!"

Ou te mafaufau i Lona Toetu, Lona manumalo mamalu i le oti.

Ona ou fesili ifo lea ia te au lava, "Pe o o’u taliaina ea le meaalofa ua Ia ofoina mai ma le fiafia?" Sa ou mafaufau loloto i lena fesili i le tele o taimi talu mai lena taumafataga o le Kerisimasi i Pasila.

I ni tausaga mulimuli ane, sa ou toe foi ai i Pasila, o le taimi lea sa ma galulue faatasi ai ma lo’u toalua o ni taitai misiona. Sa ou aoaoina ni mea se tele mai faifeautalai taitasi o e na matou auauna faatasi. Ou te faamemelo i lo latou finafinau ma le naunautai e tuuina atu i le Alii se taulaga e taliaina.

Ou te manatua, aemaise lava, o se talanoaga sa ou faia ma se tuafafine pele a o ia faaiuina lana misiona. Sa ia ta’u mai ia te au sa fefe o ia e alu i le fale. Sa popole o ia nei toe tepa i tua i lana misiona ma le faanoanoa, ma mafaufau i auala sa ono mafai ona ia auauna lelei atu ai, ma le popole semanu sa mafai ona ia faia nisi mea se tele atu. A o ou taumafai e faamautinoa atu i lenei faifeautalai lelei, sa ma talanoa e uiga i se auala ese e vaai ai i lana misiona—ma lona olaga. O lo tatou tuuto atu ia Iesu Keriso e le pei o se poloketi a le a’oga lea tatou te ave i totonu, ma le faamoemoe mo se togi atoatoa. O Iesu Keriso ua na o le pau lea o le tagata atoatoa, ma o Lona soifua ua na o le pau lea o le ola atoatoa. A o tatou saili e faaleleia atili, tatou te liliu atu ia te Ia, ma e le o se agaga o le "Ua ou faia!" po o le "Ua ou ausiaina!" po o le "Ua ou taunuu!" ae nai lo lena o le "ua ou talia."

Ioe, tatou te mananao e ola i se ala e taliaina e le Alii. Tatou te faamoemoe lava e talia e Ia a tatou taulaga. Ae e tutusa lava le taua—pe atonu foi e sili atu—o le fesili la "Pe ou te talia Lana [meaalofa]?"

Ou te le manatu o le taliaina o le meaalofa a le Faaola e mafai ona faia ma le faaleano pe faasamasamanoa. Ia te au, o le upu talia e aofia ai se filifiliga magafagafa ma se faatinoga faamoemoeina. E pei lava ona ofofua mai Lana taulaga mo i tatou, e finagalo foi o Ia ia tatou talia ma le lotofuatiaifo. E pei lava o soo se tagata foai lelei, e nofouta le Alii e le na o o tatou manaoga ae faapena foi i o tatou faanaunauga. E pei ona aoao mai Alema, "E tuu mai e ia i alii [ma tamaitai] e tusa ma o latou manao."

Ina ua alu atu Iesu i le taelega i Petesa ma vaai i se tagata sa le mafai ona savali mo le 38 tausaga, sa Ia fesili atu i le tagata pe manao e faamaloloina o ia. E foliga mai o se fesili manino, ae e le faamaloloina i tatou e le Fomai pe a tatou le loto i ai. Na faatoa oo mai le vavega ina ua uma ona faaalia e le tagata lona manao.

O a ni ou faanaunauga? O le a se mea e te manao moni lava e oo i ai ma ausia i lenei olaga—i le asō, taeao, ma le faavavau? E te manaomia se faamafanafanaga? Toomaga? O e faamoemoe e toe maua le filemu? Malosi mai le Alii? E te manao e faamaloloina oe? Faamagaloina? Togiolaina? Pe e te manao moni lava ia avea atili e faapei o Iesu Keriso—ia mau faatasi ma Ia ma lo tatou Tama Faalelagi e faavavau?

Afai o lea, ona talia lea o le meaalofa o loo ofoina atu e Iesu Keriso ia te oe.

"Aua o le a se aoga i se tagata pe afai e faaee atu se meaalofa i ona luga, a e le talia e ia le meaalofa? … E le olioli o ia i le mea ua tuuina atu ia te ia, e le olioli foi ia te ia lē na foaiina mai le meaalofa."

O le a le faamalosia e le Atua Lona ala i o tatou olaga pe faamalosia Lana meaalofa i o tatou luga. Nai lo lena, Na te faatagaina i tatou e filifili e talia. "Liliu mai ia te au," na Ia fetalai ai, ona e iloa ai lea e le gata ua uma ona Ia liliu mai ia te oe, ae o loo faaloaloa mai pea Ona aao o le alofa mutimutivale.

Ina ia fesoasoani e faamalamalama le uiga o le liliu atu i le Alii, ou te fia faasoa atu se mea na ou aoaoina mai ia Blakely le afafine o lo’u atalii ina ua faatoa lua ona tausaga.

O tausaga uma lava i le taimi o le Kerisimasi, e o mai ai Blakely ma fanau uma a fanau i lo maua fale e fefaasoaai i se tasi o a matou tu masani o le Kerisimasi e sili ona matou fiafia i ai: fiafia i vaaiga matagofie o le fanau mai o Iesu i le Kerisimasi. Ua i ai ia i ma’ua ma lo’u toalua se faaputuga o vaaiga o le fanau mai o Iesu mai le lalolagi atoa, ma o Kerisimasi uma lava ma te faatulagaina faataamilo ai i le fale mo fanau a fanau e sue.

O se ata lenei o se tasi o a matou faatusa o le fanau mai o Iesu. E pei ona outou tagai mai i ai, o le pepe o Iesu o loo i le ogatotonu, ae o isi faatagata—o Maria, Iosefa, o leoleo mamoe, o le Au Makoi, ma isi mea faapena—ua faatulagaina i se laina ina ia mafai ona iloa atu i latou uma. E foliga mai o se auala masani aulelei lea e faatulaga ai se faatusa o le fanau mai o Iesu i le Kerisimasi.

I se tasi tausaga, sa ou matauina ai se mea ese e uiga i a matou faatusa o le fanau mai o Iesu. Sa alu se tasi i le fale atoa ma toe faatulaga i latou. O faatagata uma o le faatusa sa faliu i se li’o e faasaga i le pepe o Iesu. Sa ou iloaina mulimuli ane o Blakely lea na faia lenei suiga matagofie i a matou teuga o le Kerisimasi.

Faatasi ai ma lenei faatinoga faigofie, na aoao mai ai e Blakely ia te au se lesona loloto: "E le lava le na o le i ai i le eria masani e tasi pei o le Faaola. E le lava le faapio teisi i Lona itu, po o autafa o se tasi e latalata atu ia te Ia. Ina ia talia atoatoa le meaalofa a Keriso, e manaomia e i tatou taitoatasi ona liliu atoatoa atu ia te Ia.

E faapefea la ona tatou faia? E faape’i foliga o le liliu atoa atu i le Faaola? E faapefea ona tatou faaalia ua tatou talia Lana meaalofa o le togiola ma le faamalologa?

Ou te talitonu o loo maua le tali i lenei fautuaga mai ia Peresitene Russell M. Nelson: "e manaomia ona tatou iloa le olioli o le salamo i aso taitasi."

E matuai faigofie moni lava. Tatou te talia le meaalofa a le Faaola e ala i le salamo, e ala i le liliu atu ia te Ia. Sa Ia ofoina mai Lona soifua ina ia mafai ona tatou suia, faaleleia, ia faamaloloina, ma ia togiolaina. O lea tatou te taliaina ai lena ofo e ala i le suia, faaleleia, ma le taliaina o Lona mana faamalolo i o tatou olaga.

Ma e le na o le faa-tasi ona tatou faia. Tatou te faia i aso taitasi, aua tatou te manaomia i aso taitasi. O le taliaina o le meaalofa a le Faaola o se tautinoga i le olaga atoa. O Ia moni o le meaalofa lea e faaauau pea ona foai atu, a o tatou taliaina pea e ala i le liliu atu ia te Ia.

O nisi taimi tatou te talanoa ai e uiga i le faatumauina o le agaga o le Kerisimasi faatasi ma i tatou i le aluga o le tausaga. Ou te iloa tamaiti e tele ina moomoo maimau pe ana mafai ona avea aso uma ma Kerisimasi. O le mea moni, e mafai—ma e tatau ona tatou—faamanatuina le Kerisimasi i aso taitasi e ala i le liliu atu i le Faaola ma talia ma le agaga faafetai Lana meaalofa. A o tatou taliaina le olioli o le salamo i aso taitasi, o le a tatou iloa ai o faamanuiaga o le Kerisimasi ma le vavega o Lana meaalofa e mafai ona avea pea ma a tatou meaalofa.

Uso e ma tuafafine pele, ou te molimau atu o Iesu Keriso, le Alo o le Atua, na tuuina atu ma le naunautai ma le alofa ma le olioli Lona soifua o se meaalofa taua ina ia mafai ai e oe ma a’u ona faamaloloina, togiolaina, ma faaeaina. Ou te tatalo ia taitasi i tatou ma liliu atu ia Iesu Keriso ma talia Lana meaalofa—i lenei Kerisimasi, ma aso uma o o tatou olaga. I le suafa o Iesu Keriso, amene.