O Le Malamalama Faavavau

Ou te matua faafetai lava i le faapotopoto ai faatasi ma outou i lenei vaitau paia o le Kerisimasi ia manatua ai ma olioli i le soifua mai o Iesu Keriso, le Alo o le Atua, le Faaola o tagata uma!

O le Po o le Vaeluaga o le Kerisimasi o le po lea e sili ona ou fiafia i ai o le tausaga. A o gaga ifo le la, e liliu atu o tatou mafaufauga i manatunatuga filemu o le soifua mai o le Faaola o le lalolagi. Mo po uma o le Kerisimasi e mafai ona ou manatua, sa matou faapotopoto faatasi ma le aiga, susue i le Feagaiga Fou, ma faitau upu masani i le Luka e 2 :

"Ua alu ae foi Iosefa … mai Kalilaia, mai le aai o Nasareta, … i le aai o Tavita, ua igoa ia Peteleema, … ia tusia faatasi ma Maria lana ava sa faufautane ia te ia, ua to o ia."

Mafaufau e uiga i le ava talavou, o Maria, faatasi ai ma lona toalua alofa, o Iosefa, sa malaga atu i le auala pefua i Peteleema, ma le le iloa po o fea o le a latou nonofo ai po o le taimi o le a fanau mai ai lana Tama.

Ia, faaopoopo atu i lenei manatu ia mea na tutupu i le afa i le salafa o le lalolagi. O iina, i le laueleele o Saraemila i le konetineta o Amerika, o loo faanoanoa ai se vaega o tagata talitonu a o latou "mataituina ma le mausali" mo le faailoga o le soifua mai o le Faaola, lea na valoia e Samuelu le sa Lamana o se ao ma se po ma se ao e aunoa ma le pogisa, aua afai e le tuuina mai le faailoga, o le a fasiotia uma e talitonu.

O Nifae, o lo latou perofeta, "na punou ifo o ia lava i luga o le eleele, ma tagi faatauanau atu i lona Atua mo ona tagata. … Ma faauta … sa oo mai le siufofoga o le Alii ia te ia, ua fetalai mai: Ia ea i luga lou ulu ma ia fiafia; aua faauta, ua oo mai lava le taimi, ma o le po nei o le a tuuina atu ai le faailoga, ma o le aso a taeao ou te alu atu ai i le lalolagi."

O taimi uma lava ou te faitauina ai nei fuaiupu ou te taofi ma maofa ai.

Ou te maofa ona o Iesu Keriso, o le na foafoaina le lalolagi i lalo o le taitaiga a le Tama, o le na talanoa ma perofeta ma musuia perofeta ma atalii ma afafine amiotonu o le Atua i le talafaasolopito atoa, na tautino atu ia Nifae o le a le pine ae afio mai o Ia i le lalolagi o se pepe meamea.

Ou te maofa foi ona sa soifua mai o Ia, le Faaola o tagata uma, i Peteleema i le taimi e tuuina atu ai le faailoga lea na faasaoina ai tagata talitonu o sa Nifae i Saraemila. O loo tusia i tusitusiga paia: "Aua faauta, o le alu ifo i lalo o le la sa leai se pogisa."

Pe mafai ona e vaai faalemafaufau i le uiga o lena mea i e ua faatuatua, ia i latou o e na moomoo, ola mo, ma tatalo mo le faataunuuga o lenei valoaga? E mautinoa lava, sa latou olioli! Oka se molimau mamana e faapea na afio mai Iesu Keriso i le lalolagi e laveai i latou uma o e o le a talitonu i Lona suafa. Sa goto le la, ae sa faatumulia le lagi i le malamalama.

Na molimau mai le perofeta o Apinati, "O Ia o le malamalama ma le ola o le lalolagi; ioe, o se malamalama e lē gata, e le mafai lava ona faapouliuligia." Na fetalai Iesu Keriso, “O A’u o le malamalama o le lalolagi: o ia o le mulimuli mai ia te au e le savali i le pogisa, ae maua e ia le malamalama o le olaga.”

I o tatou olaga o le a i ai taimi e ono goto ifo ai le la i o tatou faamoemoega ma miti. E mafai ona goto ifo le la pe a tatou feagai ma le oti po o luitau faaletino ma faalelagona. Ae ona sa afio mai Iesu Keriso i le lalolagi ma toetu mai i le aso tolu, ua manumalo i le agasala ma le oti, o le a leai se pouliuli tumau i le alu ifo o le la. E mafai ona tatou saili ma maua Lona malamalama e tuuina mai ai le ola.

Sa faatumuina le po pogisa i luga ae o leoleo mamoe lotomaualalo i le malamalama a o "afio ifo i o latou luga le agelu a le Alii" ma folafola atu tala fiafia, "Aua o le aso nei ua fanau ai i le aai o Tavita lo outou Faaola, o le Alii ia o Keriso." O nisi taimi e mafai ona tatou mulimuli ai i le malamalama o le Faaola ma vave ona maua o Ia ao tatou, pei o leoleo mamoe, mulimuli i le taitaiga faalelagi "ma le faanatinati," ma aoao mo i tatou lava i Lona paia. Ona mafai foi lea e i tatou ona agai atu i lo tatou ala, e "vivii atu ma faaneenee i le Atua mo mea uma ua [tatou] faalogo ma vaai i ai."

I nisi taimi, atonu tatou te lagona tele le pei o le Au Makoi, ma o la tatou malaga e sue o Ia e ono alu ai ni vaiaso, masina, po o ni tausaga. Ae a o tatou mulimuli pea i le malamalama o Lona fetu taiala, e tusa lava po o le a le tau pulapula, o le a tatou latalata atili atu ia te Ia i laa taitasi. Ona oo ai lea, e pei foi o le Au Makoi, e mafai ona tatou fiafia ma le olioli tele, faapauu ifo i lalo e ifo atu a o tatou ofo atua a tatou meaalofa o le lotofaafetai ma le alofa.

Tatou faatopetope atu la i le Po o le Kerisimasi i le 2010, a o ou faasoa atu ia te outou le ala na aveesea ai e le malamalama ma le alofa o le Atua le pogisa mo a’u ma lo’u aiga i na po paia e lua.

Sa ou i ai i se falemai e silia ma le 2,000 maila mai le fale i le vaaiga o lo’u toalua, o Bruce, o le sa tauivi mo lona ola ina ua mavae se taotoga na faamanuiaina. Sa fai ifo lona soifua maloloina, ma sa le mafai e le vaega o fomai o loo vaaia o ia ona iloa pe aisea. Ina ua uma ona tuufaatasia i le anapogi ma le tatalo faatasi ma aiga i le isi itu o le atunuu, sa ou alu i se fale mautotogi e fai sina moe. I le tuneva o le po, sa faalogoina e se tausi soifua sa savali i tafatafa ane o le faitotoa o Bruce—o tale tasi. Sa ia te ia le manatu e oka se suesuega mo se gasegase o le mānāva e le masani ai. O le suega na faamautuina ai lona mafaufau, ma i totonu o itula o le amataina o togafitiga, na amata ai ona faafoisia lona malosi. Sa ma iloa o le Malamalama o Keriso sa i ai i luga o lena tausisoifua, ma faaali atu ia te ia le ala o le a toefuatai ai le soifua maloloina o Bruce. O le pogisa na matou oo i ai na suia i le malamalama ma le faamoemoe.

Ono tausaga mulimuli ane i se isi Po o le Vaeluga o le Kerisimasi i le 2016, sa toe i ai foi Bruce i le falemai, lea na faalavelaveina ai lona toe manuia mai i ni gasegase tuga se lua, e se isi faiifo matuia o le soifua maloloina. I totonu o le 48 itula na mafai ai e fomai ona iloa le mafuaaga. Sa latou faasoa mai ia i ma’ua se fuafuaga e ono fesoasoani ia te ia e foia ai lenei gasegase lona tolu. Ina ua uma ona faalogologo i a latou fuafuaga, sa talosagaina ma le faaaloalo i latou e Bruce e o ese mai le potu ina ia mafai ona ma talanoa. Sa ia ta’u mai ia te au sa musumusu manino atu le Agaga ia te ia e leai se mea e mafai ona faia e fomai e faasaoina ai lona ola. Sa ia tautala ma le toafilemu, sa faatumulia i le Agaga. E lua aso mulimuli ane, ae maliu filemu o ia i le fale a o vagaia e lo matou aiga.

E ui ina eseese taunuuga o Po o Kerisimasi taitasi, ae e paia na po taitasi ia i matou. Pe na maligi loimata, lagona le faanoanoa loloto, faatasi ai ma le maliu ma le tuuatoatasi? Ioe. Ma pe na matou lagonaina le malamalama o le alofa o le Atua? Ioe. I le mea na pei o le gaga ifo o le la i o matou olaga, na Ia tuuina mai ia i matou le sulu ma le malamalama.

A o tatou tausisia lo tatou taulai atu ia Iesu Keriso, o le a Ia faamalamalama lo tatou ala i le faamoemoe ma le faamalologa. E pei o le aafiaga o e talitonu i Saraemila, ona o le manumalo o le Faaola i le agasala ma le oti, o le a leai se pogisa tumau pe a oo mai o tatou po.

Ou te fiafia i le faauigaga loloto o nei upu i le viiga "Le Taulaga Itiiti e o Peteleema": "I ou alatele pogisa e susulu atu ai le Malamalama e faavavau. O faamoemoega ma popolega o tausaga uma ua faataunuu ia te oe i le po nei."

Uso e ma tuagane, o le Alii o lo tatou malamalama e faavavau! Ou te tuuina atu la’u molimau na afio mai Iesu Keriso i le lalolagi e aumaia le olioli ma le faamoemoe a o Ia faamalamalamaina lo tatou ala i le aiga. Ou te alofa ia te Ia. Ou te tapuai atu ia te Ia. “E faafetaia le Atua mo le meaalofa e le mafaatusalia o Lona Alo paia” I le suafa o Iesu Keriso, amene.