Fa’ahanahana i te noera !

E au mau taea’e ’e mau tuahine here, ’ua ha’amaita’i-rahi-hia tātou e te mau parau poro’i nehenehe ’o tā tātou i fa’aro’o nā roto mai i te tuahine Runia, Elder Palmer ’e Elder Cook. Tē fāna’o nei au ’ia ha’api’i atu i te tahi mau mea ’o tā rātou i fa’ata’a a’ena mai.

Noera, e pu’e tau hanahana ïa o te matahiti. ’A ha’amana’o ai tātou i te fānaura’a o tō tātou Fa’aora, e au maita’i tō tātou ’ā’au i te mea faufa’a roa a’e i roto i tō tātou orara’a. Nā roto ia noera e hau atu ā tō tātou hāro’aro’ara’a ’e te māuruuru nō te mau tusia tei ravehia nō tātou.

I.

Tē fa’aha’amana’o mai nei noera ia tātou i te tahi ’e te tahi. E rahi atu ā tō tātou here i tō tātou ’utuāfare. E fa’a’āpī tātou i te mau tā’amura’a ’e te mau hoa tāhito. E nāni’a a’e tātou i te mau tāmatara’a ’o tē fa’ata’a ’ē nei ia tātou i te tahi atu mau tau o te matahiti. E aroha haere te mau ta’ata ’ē’e mā te taiā ’ore. E ho’i fa’ahou mai te huru maita’i ’e te muriaroha. E hō mai te vārua o noera i te mea maita’i roa a’e i roto ia tātou.

Te māhanahana ’e te māramarama o noera ’o te Māramarama ïa o te Mesia. ’Ia tai’o tātou i te mau pāpa’ira’a mo’a nō teie ’anotau, ’o te Fa’aora ïa « te māramarama mau ’o tē ha’amāramarama nei i te mau ta’ata ato’a ’o tē tae mai i roto i te ao nei ». ’O rātou ato’a e fa’ahanahana nei i te fānaura’a o te Mesia—rātou ato’a tē vai ra ia rātou te mea tā tātou e pi’i nei te « Vārua o Noera »—tei ia rātou ra te hō’ē tuha’a o taua māramarama ra.

Hau i te hō’ē miriā ta’ata ’o tē fa’ahanahana nei i te fānaura’a o Iesu Mesia i teie pu’e tau noera. E ti’a i te ao ato’a nei ’ia nā reira ato’a. ’Ia au i te reo tahuti nei, ’o Iesu nō Nazareta te ta’ata faufa’a rahi roa ’o tei ora a’e nei. ’O ’oia te tumu parau rahi a te mau peropheta ’e a te mau rohipehe, i te roara’a hau atu i te ono tauatini matahiti. ’O ’oia te tumu parau nō te mau pehe rahi roa a’e ’e te anoihi o te ao nei. ’O ’oia te ’orometua rahi roa a’e ’o tei ora a’e nei. Hau atu i te faufa’a roa, ’o ’oia te Tamaiti Fānau Tahi a te Metua mure ’ore. ’O ’oia te Atua e pi’o ai te mau turi ato’a ’e e fā’i ai te mau arero ato’a ē, ’o ’oia tō tātou Rahu nui ’e te Tāra’ehara, te Fa’aora ’e te Atua o teie ao.

« ’Ei hau, ’ia ’ite-au-hia mai tō teie nei ao » ’o te poro’i ïa o noera. ’O te tumu parau rahi fa’ateitei ïa a te mau rohipehe ’e a te mau fa’ata’i ’upa’upa ’o tei hōro’a mai ia tātou i te pehe hanahana o noera. Mea au nā tātou te mau hīmene o noera ’o te fa’atāvevo i teie tumu parau.

I te ātea i Iudea ra,

Tē hīmene ra te merahi ra

Te Atua, te Atua

Te Atua i ni’a roa

Ha’amaita’i ’iāna ra, ’ei hau tō te fenua ;

Ha’amaita’i ’iāna ra, ’ei hau tō te fenua !

Nā teie mau parau, tei hīmenehia e rave rahi taime i roto i tā tātou mau ’ohipara’a i te tau fa’afa’aeara’a, e fa’aha’amana’o ia tātou ē ’aita e mea ’āpī i roto i te fa’ahanahanara’a ’e te mau hīmene o noera. E parau poro’i tahito ’e te mātauhia teie. ’Ua porohia te reira ia Adamu. ’Ua porohia te reira i te mau tamari’i nō ’Īserā’ela. ’Ua porohia te reira i te huā’ai o te metua Lehi. E rave rahi taime, ’ua fa’a’ite te mau peropheta i te mau parau mau tumu o te Tāra’ehara a Iesu Mesia. E rave rahi taime ’ua fa’a’ite rātou i tāna fa’auera’a ē, e ti’a ia tātou ’ia here ’e ’ia tāvini ’iana ’e ’ia here ’e ’ia tāvini i te tahi ’e te tahi. ’E ’ua nā ’ō fa’ahou ’oia, « ’ua hina’aro ’outou iā’u ra, e ha’apa’o i tā’u mau parau ». Fa’ahiti-tāmau-hia i te roara’a o te tau, ’ua riro teie mau fa’a’itera’a ’ei parau poro’i faufa’a roa a’e o te tau a muri atu. ’Ua hōro’ahia mai te reira nō tātou, ’ei maita’i nō tātou.

E fa’ahiti-tāmau-hia te mau ’ohipa faufa’a roa a’e o te orara’a. E’ita roa tātou e fiu ’ia fa’aro’o i te i’oa mo’a o tō tātou Fa’aora. E’ita roa tātou e fiu i te auhoara’a o te feiā tei herehia e tātou. E’ita roa tātou e fiu ’ia fa’aro’o, « ua here au ia oe ».

E nō reira te parau poro’i i fa’ahiti-tāmau-hia o noera e ’ere ïa i te hō’ē parau poro’i e hi’opo’a-fa’ahou-hia, e parau poro’i rā ’ia fa’a’āpīhia i roto i tō tātou orara’a.

II.

Mai tō tātou tamari’ira’a mai ā, ’ua ’ite tātou tāta’itahi ē te noera ’o te tau ïa nō te taui te mau hōro’a i rotopū i te mau ’utuāfare ’e te mau hoa. E tau teie nō te au maita’i i te feiā ihoā ra tei herehia e tātou. E ti’a rā i te vārua hōro’a o noera ’ia parare i’ō atu i tō tātou mau ’utuāfare ’e te mau hoa. I teie mahana, e rave rahi feiā ’āpī e ora nei i te mau ’itera’a fa’ahiahia, ’ia haere ana’e te mau pupu, te mau piha ’e te tahi atu mau pupu o te ’Ēkālesia e fārerei ’e e pūpū i te mau hōro’a i te feiā ’o tei hina’aro ’ia herehia ’e ’ia aupuruhia rātou nō te noera, i roto i te mau fare ma’i ’e te mau fare ruhiruhiā, i tei ma’ihia i te fare ’e rau noa atu te vāhi. E rave rahi taime i te mau ’āru’i noera, te mau tāne ’e mau vahine ’ā’au maita’i, ’o tei fa’aro’o i te huru fifi o te mau metua veve ’e tei roto i te ’oto, e ti’a atu ma te mau hauti, te mā’a ’e te mau mōmona nā te mau tamari’i mata ’oa’oa ’e tē tīa’i pāpū ’ia putapū i te ’oa’oa, ’ua ha’amana’ohia rātou i te po’ipo’i nō noera. Tē ’āmui nei te mau tauatini tāne ’e vahine fa’ahiahia i tā rātou tauto’ora’a i roto i te mau ’ohipa hāmani maita’i nō noera, nō te fa’a’amu i tei po’ia, e fa’a’ahu i tei verevere te ’ahu, e ha’apārahi i tei ’ōvere, e fārerei i tei ma’ihia ’e tei ’aramōinahia ’e e fa’a’oa’oa i te mau tamari’i. ’Ia ha’amaita’i mai te Atua i teie mau rima tauturu ! E ti’a ia tātou pā’āto’a e turu ia rātou. ’O rātou e tāvini nei ma te here ’e te tai’o ’ore, e mau tāvini mau rātou nō te Ari’i o te Hau.

III.

E aha te aura’a « ’Ei hau, ’ia ’ite-au-hia mai tō teie nei ao » ? « E aroha atu ’oe i tō ta’ata tupu mai tō aroha ia ’oe iho », ’ua ha’api’i nā mua te Fa’aora. ’Ua ha’api’i ato’a ’oia ē e ti’a ia tātou ’ia « aroha atu i tō [tātou] mau ’enemi, e fa’aora atu i tei tuhi mai, e hāmani maita’i atu i te feiā i riri mai ia [tātou], ’e e pure ho’i i te feiā i parau ’ino mai ’e tei hāmani ’ino mai ia [tātou] ».

’A ha’a ai tātou nō te fā tei fa’ahitihia i roto i taua mau ha’api’ira’a ra, e ti’a ia noera ’ia riro ’ei hō’ē tau nō te fa’a’orera’a hapa, hō’ē tau nō te fa’aora i te mau pēpē tahito ’e nō te fa’aho’i fa’ahou mai i te mau aura’a ’o tei fifi na.

Fa’ahitira’a : « Nō reira, tē parau atu nei au ia ’outou ē, e mea ti’a roa ia ’outou ’ia fa’a’ore ’outou te tahi i tā te tahi ra hapa ; nō te mea ’o ’oia ’o tei ’ore i fa’a’ore i te hapa a tōna ra taea’e ’ua vai fa’ahapahia ’oia i mua i te Fatu ; nō te mea tei roto noa iāna te hara rahi a’e.

« E fa’a’ore au, ’o te Fatu, i te hara a rātou tā’u i hina’aro i te fa’a’ore atu, ia ’outou rā ’ua tītauhia atu ra ’outou ’ia fa’a’ore i te hapa a te ta’ata ato’a ».

Nō reira, noera, ’o te hō’ē ïa tau nō te fa’atoro atu ia tātou i’ō atu i te mau tā’amura’a matauhia o te here ’e te auhoara’a. « ’Ei hau, ’ia ’ite-au-hia mai tō teie nei ao » e ’ere noa i te hō’ē parau poro’i nō te feiā ’o tā tātou i here a’ena ’e i auhoa, mai te mau ta’ata nō tā tātou ’Ēkālesia ’aore rā o te fenua, te mau ta’ata nō tō tātou ’oire a’ore rā vāhi nohora’a, ’aore rā tō tātou nūna’a. ’Ua poro te mau nu’u o te ra’i i te ’ite-au-hia i te mau ta’ata ato’a—i te mau hoa mai tera noa, i te mau ta’ata ’ē’e, tae noa atu i te mau ’enemi. Noera ’o te hō’ē ïa tau ’ia ha’amana’o tātou ē, e mau tamari’i tātou pā’āto’a nā te hō’ē Metua i te ao ra, tei hōro’a mai i tāna Tamaiti Fanau Tahi ’ia ti’a i te tā’āto’ara’a ’ia fa’aorahia i te pohe. ’Ua pūpū ato’a mai tō tātou Metua i te ao ra i te mau ha’amaita’ira’a nō te fa’aorara’a ’e te fa’ateiteira’a i te mau ta’ata ato’a mā te hō’ē ā mau tītaura’a : te fa’aro’o i te Fatu ia Iesu Mesia, te tātarahapa, te bāpetizora’a ’e ’e te ha’apa’ora’a i te mau ture ’e te mau ’ōro’a o te ’evanelia.

IV.

Tē fa’aitoito nei te vārua o noera ia tātou ’ia fa’a’ohipa i teie pu’e tau nō te patu i te mau aura’a noa atu te mau ha’atāfifira’a ’e ’ia fa’ananea i te hāro’aro’ara’a ’e te here ’e te mau ta’ata nō te mau huru taura ato’a, mau ha’apa’ora’a ’e mau fenua. ’Ia riro te feiā mo’a i te mau mahana hope’a nei ’ei ’āfati’a hau, mai ia Utaha te huru, ’aore rā ’ei pae iti, mai te mau vāhi ato’a te huru, e ti’a ia tātou e toro i te rima i te mau tamāroa ’e te mau tamāhine ato’a a te Atua. E ti’a ia tātou ’ia toro i te rima hina’aro mau o te auhoara’a i te mau ta’ata ato’a, i te feiā nō tā tātou ha’apa’ora’a ’e e ’ere nō tā tātou ha’apa’ora’a. E ti’a ia tātou ’ia pe’e i te fa’auera’a ’o tā te Atua i hōro’a ia Mose nō te mau tamari’i o ’Īserā’ela :

« ’E ’ia purutia mai te ta’ata ’ē iō ’outou, i tō ’outou na fenua, ’eiaha ’outou e hāmani ’ino iāna. ’Ia riro rā te ta’ata ’ē e parahi iō ’outou na mai te ta’ata tupu ato’a ia ’outou, e aroha ho’i ’outou iāna mai te aroha ia ’outou ihora ».

E ti’a ia tātou ’ia ha’api’i i tā tātou mau tamari’i ’ia riro ’ei ta’ata ’ā’au maita’i ’e te aumihi i ni’a i te mau ta’ata ato’a. Tē ’oto nei au ’ia fa’aro’o i te mau metua e ’ere i te feiā mo’a i te mau mahana hope’a nei nō teie ’āmuira’a, ’o tē ha’ape’ape’a nei nō te mea tē ti’aturi nei rātou ē, ’ua ha’apaehia ’aore rā ’ua pāto’ihia tā rātou mau tamāroa ’e mau tamāhine e tā tātou mau tamari’i ’aore rā feiā ’apī nō te ’Ēkālesia. Tē ti’aturi nei au ē e mea varavara teie huru peu ’e e iti atu te reira. E ti’a ’ia riro tātou ’ei nūna’a auhoa roa a’e ’e te aumihi roa a’e i te mau nūna’a ato’a o te ao nei.

E ti’a ia tātou, ’oia mau, e ’ape i te huru tā’atira’a ’o tē ha’afifi i tō tātou huru, ’aore rā ’o tē ha’aparuparu i tō tātou fa’aro’o ’e tā tātou ha’amorira’a. ’Eiaha rā teie huru ’apera’a ’ia fa’aiti i tō tātou tau’ara’a ia vetahi ’ē. ’Eiaha ato’a te reira e ’ōpani ia tātou i teie mau tā’atira’a e rave rahi ’o tē hina’aro nei i te mau tauto’ora’a ’āmui, i reira te mau ta’ata e fa’a’ite ai i te hō’ē ā ha’ape’ape’ara’a ’e te hō’ē ā tītaura’a.

Te vārua e ti’a ia tātou e ’apo mai i te parau poro’i o te « hau, ’ia ’ite-au-hia mai tō teie nei ao » ’o te vārua ïa o te hōro’a ia tātou iho i roto i te tāvinira’a ia vetahi ’ē. Mai ia noera e fa’ahanahana nei i te fānaura’a o te Ta’ata tei pūpū i tōna ora nō tātou pā’āto’a, e ti’a ia tātou tāta’itahi e fa’a’ohipa ia noera mai te hō’ē tau nō te ha’amaita’i i te mau rāve’a ’a hōro’a ai tātou i tō tātou mau ta’ata tupu.

’A nā reira ai tātou—’a puru ai te vārua o te hōro’a o noera i tō tātou mau mana’o ’e mau ha’ara’a—e hōpoi atu tātou tāta’itahi i tā tātou iho tuha’a i te fā mure ’ore o te « hau i te fenua nei, ’ia ’ite-au-hia mai tō teie nei ao ». Teie te taime nō tātou pā’āto’a ’ia nā reira, nō te mea i te mahana tāta’itahi e ha’afātata atu tātou i te hō’ē mahana i te ho’ira’a mai o te Fatu. Mai tā te peresideni Russell M. Nelson i ha’api’i ia tātou i te ’āmuira’a rahi nō ’Ātopa i ma’iri a’e nei, tē fa’ahiti nei « e tae mai te mea maita’i roa a’e, nō te mea tē ha’avitiviti nei te Fatu i tāna ’ohipa. E tae mai te mea maita’i roa a’e, ’ia fāriu hope roa ana’e tātou i tō tātou ’ā’au ’e tō tātou orara’a ia Iesu Mesia ra ». Hope te fa’ahitira’a.

E fa’ahiti au i teienei « Te Mesia ora : Te ’itera’a pāpū o te mau ’āpōsetolo ». Tē parau nei, e fa’ahiti au :

« ’A fa’ahanahana ai tātou i te fānaura’a o Iesu Mesia a piti miliniuma i teie nei, tē pūpū atu nei mātou i tō mātou ’itera’a pāpū nō ni’a i te huru mau o tōna orara’a fāito ’ore ’e te mā ’e te mana mure ’ore o tāna tusia tāra’ehara rahi. ’Aita atu e mana tei ha’aputapū hōhonu i ni’a i te mau ta’ata ato’a ’o tei ora a’e na ’e ’o tē ora nei ā i ni’a i te fenua ».

Tē nā ’ō fa’ahou ra te fa’ahitira’a, « tē ha’apāpū maita’i nei mātou ē tōna ora, ’o te tumu ho’i o te ’ā’amu o te ta’ata nei, ’aita ïa i ha’amata i Betelehema ’e ’aita ato’a i hope i Kalavari. ’O ’oia te Fānau Tahi a te Metua i te ao ra, te Tamaiti Hō’ē roa i roto i te tino, te Fa’aora o tō te ao nei. …

« Tē fa’a’ite nei mātou nā roto i te mau parau u’ana ’oia ho’i, ’ua fa’aho’ihia mai tōna autahu’ara’a ’e tāna ’Ēkālesia i ni’a i te fenua nei—‘patuhia i ni’a iho i… te mau ’āpōsetolo ’e te mau peropheta, ’e o Iesu Mesia iho te tihi rahi’ ».

Tē nā ’ō fa’ahou nei, « tē fa’a’ite pāpū nei mātou ē e ho’i mai ’oia i te hō’ē mahana i ni’a i te fenua nei. ‘’E fa’a’itehia mai te hanahana o Iehova, e ’ite pā’āto’a te ta’ata i te reira’ ». Hope te fa’ahitira’a. « E fa’atere ’oia ’ei Ari’i nō te mau Ari’i ’e e parahi mai ’ei Fatu nō te mau Fatu, ’e e pi’o ho’i te mau turi o te mau ta’ata ato’a i raro ’e e fa’i ho’i te mau vaha ato’a i roto i te ha’amorira’a i mua iāna.

« Tē fa’a’ite pāpū nei mātou, ’ei mau ’āpōsetolo nāna i fa’atoro’a-mau-hia ē—’o Iesu te Mesia Ora, te Tamaiti Tahuti ’Ore a te Atua. ’O ’oia te Ari’i rahi ’o Emanuela ’o tē ti’a i teie mahana i te pae ’atau o tōna ra Metua ». E fa’ahiti fa’ahou vau, « ’o ’oia te māramarama, te ora ’e te ti’aturira’a o tō te ao nei. Tōna haere’a ’o te ’ē’a ïa ’o tē arata’i atu i te ’oa’oa i roto i teie orara’a ’e i te ora mure ’ore i roto i te ao e haere mai nei. Ia haʼamāuruuruhia te Atua nō te hōro’a fāito ʼore o tāna Tamaiti hanahana ».

I te i’oa o Iesu Mesia, ’āmene.