E mau hōro’a hau a’e i te faufa’a

I teie pō, tē paraparau ato’a nei au ma te ’oa’oa ’e te māere i te aura’a mo’a o te Noera. ’Aita e ’ohipa o te tua’ā’ai o te ao nei tei ha’amaita’i rahi a’e i te ta’ata maori rā te fānaura’a ’e te misiōni a Iesu nō Nazareta ’a piti tauatini ti’ahapa matahiti i teienei. Nā te ao ato’a nei, e tai’ohia te mau matahiti mai terā ’ohipa temeio mau.

Tē fa’ahanahanahia nei te fānaura’a o tō tātou Fatu ma te rāve’a rau ’ati a’e i te ao nei, e au ra ē, e peu tumu nō Noera tei ’itehia i te mau vāhi ato’a.

E ha’amata teie peu tumu ma te fa’ati’ara’a a Mataio nō nā ta’ata pa’ari tei haere mai nā te pae Hiti’a o te rā e ha’amori ia Iesu. I te haerera’a mai rātou, ’ua ’āfa’i mai rātou i te mau hōro’a tao’a rahi. I teie mahana, e tuha’a rahi roa te peu nō te hōro’ara’a i te tao’a hōro’a nō te ’ōro’a Noera.

Tā’u ha’amana’ora’a mātāmua nō te hōro’a nō Noera, ’o te hō’ē ïa pupuhi ha’uti ’o tē pupuhi i te pa’a rā’au tei tā’amuhia, ’e te hō’ē ato’a mo’orā ma te tāviri. E ’oa’oara’a rahi ïa nō te hō’ē tama maha matahiti. E tī’opa’opa te mo’orā ma te fa’a’ohu noa i ni’a i te tahua, ’e ’aita e horora’a i mua i tā’u pupuhi ’ia fa’atano vau nā te ātea e 15 tenetimetera. ’Aita rā i maoro, ’ua fati te ha’uti, ’e mai te mau ’ohipa mātēria ato’a, e mo’e te ’oa’oa tau poto tā te reira i fa’atupu.

I teie pō, tē hōro’a nei au e toru hōro’a tā tātou tāta’itahi e nehenehe e hōro’a i teie tau Noera, i tō tātou orara’a tā’āto’a, ’o tē ’ore e fa’atupu i te ’oa’oa tau poto, e ’oa’oa mau rā ’e te vai maoro.

’A tahi, te hōro’a nō te ’itera’a pāpū. E hōro’a ta’ata hō’ē mau teie, ’e ’ia hōro’a-hua-hia mai, ma te ha’avare ’ore, e heheu mai te reira i te mau parau hōhonu roa a’e o tō tātou vairua. Hau atu te faufa’a i te ’auro, te tapau libano ’aore rā te mura, ’o te ’itera’a pāpū tāfetafeta ’ore nō Iesu Mesia ’ei Fa’aora ’e ’ei Tāra’ehara iho nō tātou te pū mau o te mau mea ato’a tā tātou e fa’ahanahana i te Noera.

I te ’āpīra’a o tā māua nā tamari’i e ono, ’ua fa’aoti māua Jacqui i te hō’ē pō ē, nō te purera’a pō ’utuāfare, ’aita e ha’api’ira’a, e fa’a’itera’a ’itera’a pāpū rā i te tahi ’e te tahi. I te fa’a’itera’a vau i tō’u ’itera’a pāpū, ’ua parau mai tā māua tamāhine iti ra ’o Chelsea, ma te mata māere : « Pāpā, ’aita vau i fa’aro’o a’enei i tō ’oe ’itera’a pāpū. » ’Ua hitimahuta ri’i vau ’e ’ua māere i tāna pāhonora’a. ’Ia ’ite ’outou ē, i terā tau e peresideni titi vau, ’e ’ua ’ite au ē ’ua fa’aro’o ’o Chelsea iā’u i te fa’a’itera’a i tō’u ’itera’a pāpū i roto i te mau rurura’a e rave rahi a te ’ēkālesia ’e i te fare. I terā rā taime, ’ua fa’aro’o ’oia ’e ’ua putapū ho’i i tō’u ’itera’a pāpū mai te huru ’o te taime mātāmua roa. E ha’api’ira’a tāna i ha’api’i mai e’ita roa e mo’e iā’u : e mea faufa’a rahi te hōro’a nō te ’itera’a pāpū, ’e e mana i roto i te fa’a’ite-pinepine-ra’a i te reira.

Te piti, ’o te hōro’a ïa nō te fa’aorera’a hapa. E mea pāpū e taime ’ua pēpēhia tātou i te mau parau au ’ore ’aore rā te mau ’ohipa a vetahi ’ē. ’E mai te peu e parau tātou i te parau mau, ’ua ha’apēpē ato’a tātou ia vetahi ’ē. Tē ha’api’i nei Iesu Mesia : « E fa’a’ore au, ’o te Fatu, i te hara a te feiā tā’u i hina’aro i te fa’a’ore atu ; ia ’outou rā ’ua tītauhia ïa ’outou ’ia fa’a’ore i te hapa a te mau ta’ata ato’a. » I muri mai ’ua tūra’i roa atu ā ’oia ma te parau ē, ’ia ’ore tātou e fa’a’ore i tā vetahi ’ē hara i ni’a ia tātou, tei ia tātou nei ïa te hara rahi a’e.

’Ia fa’a’ore hua tātou i te ta’ata ma te parau hua atu, e ti’amā tātou i te rā’au ta’ero nō te mana’o ’ino’ino ’e te ha’avāra’a ’e te tāho’o.

E hoa rahi tō’u i Afirita Apatoʻa ’o Sandile Makasi tōna i’oa. Ma tōna parau fa’ati’a, e fa’ati’a atu vau i tōna iho ’ā’amu nō te fa’a’orera’a hapa. I te pitira’a o te matahiti o Sandile, ’ua hāmani-’ino-hia tōna metua tāne, e 28 noa matahiti, ’e ’ua taparahi-pohe-hia e te mūto’i i te tau ha’avī nō te apartheid. I muri roa mai tō Sandile ’itera’a i te tumu mau nō te ha’apohera’ahia tōna metua tāne. E fa’ahiti au i tāna mau parau i teienei :

« I tō’u ’āpīra’a, e mana’o ’ino’ino ’e te tāiroiro tō’u nō te mea tā rātou i rave i ni’a i tō’u metua tāne. E aha pa’i rātou i fa’a’ere ai ia mātou ? ’Ua haruhia tō’u metua tāne ’e tō’u fa’aa’o arata’i, ’e ’ua haruhia te hoa here ’e te aupuru o tō’u metua vahine.

« I te ’itera’a vau i te huru ’ū’ana rātou i te hāmani-’ino-ra’a iāna, ’ua ’ī roa tō’u ’ā’au ’e tō’u mana’o i te riri ’e te tāiroiro ’e te au ’ore i te mau mūto’i ’e i te mau popa’ā ato’a.

« ’Ua tāmau noa terā mau mana’o ē tae noa ai ’ua ’ite au i te ’evanelia a Iesu Mesia i fa’aho’ihia mai. Nā te ’evanelia i tauturu iā’u ’ia māramarama ē e mea tano ’ia fa’a’ore au i te hara rahi a te mau mūto’i, tei ni’a ho’i i te reira tō’u ’oa’oa ’e tō’u haerera’a i mua pae vārua e tupu ai.

« E mea ’ōhie ’ia parau, te ravera’a rā, terā rā ’ua onoono noa vau i roto i te pure, ē i muri mai ’ua tauturu mai te Fatu iā’u ’ia fa’a’ore i te hapa a tō’u mau ’enemi… E tāmāhanahana tei mono i te pēpē ; e here tei mono i te au ’ore ’e te tāiroiro ; e māramarama ’e te hau tei mono i te pōiri i te ’ā’au ’e i te ferurira’a. »

Māuruuru Sandile nō tō ’oe hi’ora’a nō te pūpūra’a i te hōro’a nō te fa’a’orera’a hapa.

Te toru, te hōro’a nō te here huru Mesia. I te mau hōro’a pae vārua ato’a, ’aita e mea rahi a’e i te aroha mau. ’Ua fa’a’ite hua Iesu i tōna here i te ta’ata ’e ’ua ha’api’i mai ’oia ia tātou ’ia here te tahi i te tahi.

’Ia pe’e tātou i te hi’ora’a o te Fa’aora nā roto i te fa’a’itera’a i tō tātou here i te ta’ata, nā roto i te parau ’e te ’ohipa, e nehenehe atu ai rātou e putapū i te here o te Atua nā roto ia tātou.

Ma’a matahiti i ma’iri, ’ua fārerei au i te hō’ē tamāroa nō Washington, e 23 matahiti, e hi’ora’a maita’i ïa nō te reira. E toru ’āva’e te maoro tō te mau misiōnare ha’api’ira’a iāna, ’e ’ua tupu te tauira’a māere i ni’a i tōna hōho’a ’e tōna huru orara’a. I te hō’ē pō, tē paraparau ra ’oia i te mau misiōnare nā ni’a i te niuniu, ’e i te otira’a ’ua parau rāua : « Here māua ia ’oe e Michael. » ’Ua tu’u ’oia i te niuniu ’e feruri atu ra : « E aha. E ’ohipa mātau ’ore teie nō’u. E parau ato’a paha vau mai te reira i te ta’ata. » Fa’aoti ihora ’oia e fa’aitoito i te parau i tōna metua vahine ’ua here ’oia iāna. Ma’a hora ri’i noa rāua te ātea i roto i terā tuha’a fenua. I te pi’ira’a ’ōna iāna ’e i te paraura’a « Here au ia ’oe e Māmā », ’oi’oi roa te reo o te Māmā i te paraura’a : « E aha tō ’oe e ma’i ? E aha, ’ua parau mai te taote ia ’oe e ma’i rahi tō ’oe ? E mau fa’ahou ’oe i te ’āuri ? » Parau a’era ’oia iāna ē ’ua ’itehia mai iāna te ’evanelia ’e ’ua taui roa iāna, ’e i teienei, ’ua fa’aea ’oia i te pūpuhi i te ’ava’ava ’e i te rave i te rā’au ta’ero, ’e tē ’ōpua ra ’oia e bāpetizo.

Iā’u nei, e fa’ahōho’ara’a rahi mau nō te ’ohipa e tupu ’ia putapū ana’e te ta’ata i te here o te Atua nā roto ia vetahi ’ē. E tāmarū te reira i te ’ā’au ’e e fa’atupu i te hia’ai ’ia fa’a’ite i terā hōro’a nō te here ia vetahi ’ē.

I teienei, i teie pō, ’ua ha’amata tātou i te paraparau nō te mau hōro’a tao’a rahi mai te ’auro, te tapau libano ’e te mura. ’Ua hi’o vau ; e nehenehe tā tātou e ho’o i te reira i ni’a ia Amazon. E’ita rā ’outou e ’ite mai i te tahi atu mau hōro’a i paraparauhia i roto i te hō’ē noa atu fare toa. E mau hōro’a ’aita e ho’o, noa atu rā e hōpoi mai te reira i te ’oa’oa vai maoro ’e te mau i to’opiti, te ta’ata fa’ari’i ’e te ta’ata hōro’a.

Nō reira, ’a feruri ai ’outou i te mea tā ’outou e hōro’a i teie Noera, tē tītau manihini nei au ia ’outou ’ia :

1. Fa’a’ite i tō ’outou ’itera’a pāpū i tō ’outou ’utuāfare, ’e ia rātou tā ’outou i here. ’Ia fa’a’ite ’outou i teie hōro’a tao’a rahi, e ha’apūaihia tō ’outou iho ’itera’a pāpū.

2. Fa’a’ore i te hapa a te ta’ata tā ’outou i mana’o ’ua hape i ni’a ia ’outou, ’aore rā ’ua ha’apēpē ia ’outou. ’Ia pūpū ’outou i teie hōro’a, ’outou ato’a tē putapū i te hau ’e te fa’aorara’a māuiui.

3. Tauturu i te ta’ata ’ia putapū i te here o te Atua nā roto ia ’outou. Mai te mea e tano, ’a parau atu ’ua here ’outou ia rātou. ’Ia hi’o ’outou i te ta’ata mai tā te Atua e hi’o ra ia rātou, e tupu tō ’outou here ia rātou i te rahi, ’e e putapū ato’a ’outou i te here o te Atua i roto i tō ’outou orara’a.

’Ei ’ōpanira’a, ’ia ’oa’oa rahi ’outou tāta’itahi i teie tau Noera. Tē hōro’a nei au i tō’u ’itera’a pāpū nō Iesu te Mesia. Tē ora nei ’oia. ’O ’oia tō tātou Fa’aora, tō tātou Tāra’ehara. ’O ’oia tō tātou Pāruru ’e tō tātou Hoa. Tē ha’amori nei au iāna. ’Ua here au iāna. Maoti tāna hōro’a ia tātou tāta’itahi, tei ho’ohia mai i te ho’o e’ita e noa’a ’ia hāro’aro’a roa, e ti’a ia tātou ’ia ineine nō te fa’ari’i i te hōro’a rahi roa a’e o te mau hōro’a—’oia ho’i te ora mure ’ore i mua i te aro o tō tātou Metua here i te ra’i ra.

I te i’oa o Iesu Mesia, ’āmene.