Kememe Kūrijm̧ōj

Ro jeiū im jatū rejitenbōro, jaar jeraam̧m̧an kōn ennaan ko rem̧m̧an jaar ron̄ jān Sister Runia, Elder Palmer, im Elder Cook. Ij en̄jake iien em̧m̧an n̄an kwaļo̧k jet iaan men ko raar kwaļo̧ki.

Kūrijm̧ōj ej juon iien eo eaiboojoj ilo juon iiō. Ilo ad keememej ļotak eo an ad Rilo̧mo̧o̧r, buruwōd em̧weiir kōn ta eo ej make wōt aorōk ilo mour ko ad. Kūrijm̧ōj ej kōm̧m̧an an ļapļo̧k ad kile im kam̧m̧oolol kake apan̄ im en̄taan ko kar kōm̧m̧ani kōn kōj.

I.

Kūrijm̧ōj ej bar kakeememej kōj n̄an jeļā ļōmņak kōn doon. Eļapļo̧k ad kam̧m̧oolol baam̧le ko ad. Jej kōkāāl kōtaan ko ad ippān ro kar m̧ōttad. Jej eļļā ioon jabdewōt kein bōbrae ko rekar kōjenolo̧k kōj ilo iien ko jet ilo juon iiō. Ruwamaijet ro rej iakwe doon ilo ejjeļo̧k āliklik. Jouj im jeļā ņae doon ejino ļapļo̧k ippān armej. Jetōb in Kūrijm̧ōj ej bōktok im kwaļo̧k ta eo em̧m̧antata ilo kōj.

Okmeņāāņ im meram eo an Kūrijm̧ōj ej Meram eo an Kraist. Ilo ad riit ilo jeje ko rekwojarjar rainin, Rilo̧mo̧o̧r ej “meram eo em̧ool eo ej kōmeram aolep armej ro rej itok ilo laļ in.” Aolep ro rej kemeeme ļotak eo an Kraist—aolep ro ewōr ippāer ta eo jej ņa etan “Jetōb in Kūrijm̧ōj”—ewōr ippāer jidik in meram in.

Elōn̄ļo̧k jān juon billion armej ro renaaj kemeeme ļotak eo an Jisōs Kraist ilo Kūrijm̧ōj in. Aolepen laļin rej kōmm̧an āindein. Jekdo̧o̧n men ko an mour in ak Jisōs riNazareth ej armej eo aorōktata ekar mour ioon laļ in. E ej riwaanjon̄ak eo im̧aantata an rikanaan ro im rijeje boem ro ilo elōņļo̧k jān 6,000 iiō ko. E ej ritōl eo im̧aantata ilo men ko rem̧m̧antata in al im pija ilo laļin. E ej rikaki eo em̧m̧antata eo im ej mour indeeo. Eo eļap an aorōktata, E ej Juōn wōt Emake Nejin Anij Jemed Indeeo. E ej Anij eo kajjojo bukwe enaaj bukwelōlō, im kajjojo lo enaaj kwaļo̧k bwe E ej Rikōm̧anman im Ripnmuur eo ad, Rilo̧mo̧o̧r im Anij eo an laļ in.

“Aenōm̧m̧an, m̧ōņōņō im ājmour n̄an aolep armej” ej ennaan eo ilo Kūrijm̧ōj. Ej unin tōl eo ekajoortata an rijeje boem̧ im rikkajan̄jan̄ ro im raar letok aiboojoj in al in Kūrijm̧ōj ko. Em̧m̧an ippām al in Kūrijm̧ōj ko im ainikien ko aer rej kwaļo̧k kadkad in unin tōl in.

Ijuweo leelle, ettoļo̧k ilo meļaaj ko an Judia,

Rilale sheep ro etto rekar ron̄ ainikien lan̄lōn̄:

Aiboojoj n̄an Anij, Aiboojoj n̄an Anij,

Aiboojoj n̄an Anij ilo utiejtata;

Aenōm̧m̧an n̄an laļ, m̧ōņōņō im ājmour n̄an aolep armej;

Aenōm̧m̧an n̄an laļ, m̧ōņōņō im ājmour n̄an aolep armejj!

Naan kein, elōn̄ kōttan aer al kaki ilo makūtkūt ko ilo iien holiday ko, rej kakeememej kōj ke ejjeļo̧k men ekāāl ilo iien kōkaijurjur im al ko an Kūrijm̧ōj. Ennaan in eto an pād im jemeļeļe kake. Kar katakin kake n̄an Adam. Kar katakin kake n̄an ro nejin Israel. Kar katakin kake n̄an ro bwijjin Jemed Liai. Ālijin men, rikanaan ro raar kean̄ kōn m̧ool ko reļļap an Pinmuur eo an Jisōs Kraist. Ālijin men, raar kean̄ kōn kakien eo An ke jej aikuj iakwe im jerbal n̄an E im iakwe im jerbal n̄an doon. Im Eaar bar ba, “Eļan̄n̄e kom̧wij yokwe eō, kom̧ naaj kōjparok kien ko aō.” Kar āliji ium̧win elōn̄ iiō ko, kean̄ kein rej ennaan ko raorōktata n̄an men otemjej ilo indeeo. Rej n̄an kōj, n̄an kōjeram̧m̧an kōj.

Men ko reaorōktata ilo mour in rej ālijin men aer waļo̧k iien otemjej. Jejjab m̧ōk in ron̄ kōn āt eo ekwojarjar etan ad Rilo̧mo̧o̧r. Jejjab m̧ōk in pād ippān ro jej iakwe er. Jejjab m̧ōk in ron̄ naan in “Ij iakwe eok.”

Bwe naan eo ekutkut āiji kōn Kūrijm̧ōj ejjab juon ennaan eo n̄an etale, ak juon ennaan n̄an kōkāāl ilo mour ko ad.

II.

Jān ke jekar dik, kajjojo iaad em̧ōj ad jeļā ke Kūrijm̧ōj ej juon iien n̄an leļo̧k menin leļo̧k ikōtaan baam̧le ko im ro m̧ōttad. Ej juon iien n̄an kwaļo̧k jouj n̄an ro jej iakwe er. Ak jetōbin Kūrijm̧ōj ej iien leļo̧k ilubwiljin men ko an baam̧le ko ad im ro m̧ōttad. Rainin, elōn̄ iaan jodikdik ro nejid ewōr aer kakeememej ko repād ippāer āinwōt doulul im kūlaaj im doulul ko jet rej lotok me an Kabun̄ im rej bōk menin leļo̧k ko n̄an ro im rej aikuj n̄an kakeememej ilo Kūrijm̧ōj, ilo aujpitōl ko im im̧ōn taktō ko an rūtto, ro rej ajimakeke, im jikin ko jet. Ilo bon̄on eo m̧okta jen Kūrijm̧ōj, em̧m̧aan im kōrā ro rem̧m̧an, ro jinen im jemen rejerata, rej bōktok kein ikkure ko im m̧ōn̄ā im tōn̄al kōn māj ko rekabūrōrō, an ro nejier naaj en̄jake lan̄lōn̄ ilo aer keememeji ilo jibbon̄on Kūrijm̧ōj eo. Taujin em̧m̧aan im kōrā ro rōm̧m̧an rej kobaik kijejeto ko aer kōn jitōbin iakwe ilo Kūrijm̧ōj n̄an jipan̄ ro rej kwole, kanuknuk ro ejjeļo̧k pallieer, loļo̧k ro ejjeļo̧k jikier, loļo̧k rinan̄inmej ro im ro rajimakeke, im lelo̧k m̧ōņōņō n̄an ajri ro. Anij en kōjeram̧m̧an pā in jipan̄ kein! Jej aikuj aolep jipan̄ er. Rein ro rej jerbal ilo iakwe im ejjeļo̧k watōk rej rijerbal ro rem̧ool an Irooj in Aeņōm̧m̧an.

III.

Ta meļeļein “aeņōm̧m̧an ioon laļ, m̧ōņōņō im ājmour n̄an aolep armej”? “Yokwe … ri turum̧ āinwōt kwe,” katak eo an Rilo̧mo̧o̧r m̧oktata. Eaar bar katakin im ba “kom̧in iakwe [ro] rikōjdate, jouj n̄an ro kanejnej e [kōj], im jar kōn ro rej ikkure kake [kōj] im matōrtōre [kōj].”

Ilo ad jerbal n̄an kwaļo̧k kōttōpar eo an katak in, Kūrijm̧ōj ej aikuj juon iien jeo̧rļo̧k bōd, juon iien kōmour kinej ko n̄an kalōk jemdo̧o̧n ko me raar jako.

Kout: “Kōn menin, Ij ba n̄an kom̧, bwe kom̧ij aikuj jeorļo̧k an doon bōd; bwe eo ej jab jeorļo̧k an eo jein im jatin bōd bōd ko an rej liaakeļo̧k im̧aan Irooj; bwe epād ippān jero̧wiwi eo eļapļo̧k.

“N̄a, Irooj, Inaaj jeorļo̧k bōd an ro Inaaj jeorļo̧k aer bōd, ak jān kom̧ emennin aikuj bwe kom̧in jeorļo̧k an aolep armej bōd.”

Kōn menin, Kūrijim̧ōj ej juon iien n̄an ajeļo̧k kōj make itulikin iakwe eo ad make ilo korak ko em̧ōj lukoji kōn iakwe im m̧ōttā. “Aeņōm̧̧m̧an, m̧ōņōņō im ājmour n̄an aolep armej” ejjab juon ennaan wōt n̄an rein n̄an wōn em̧o̧j an wōr ad en̄jake in iakwe im kea kake er, āinwōt ro uwaan Kabun̄ eo ad ak laļ eo ad, ro rej jokwe ilo jukjuk in pād eo ad ak ro ipeļaakid, ak armej ro juon wōt ad m̧anit. Kean̄ eo jān lan̄ kōn jouj ejjeļo̧k jem̧ļo̧kin n̄an aolep armej—n̄an ro m̧ōttad jejjab lukkun epaake er, ro jejaje kajjier, barāinwōt n̄an bar ro ad rikōjdat. Kūrijm̧ōj ej juon iien n̄an kakeememej bwe jej aolep ajri ro nejin juon Jemedwōj Ilan̄, Eaar letok juon wōt Nejin Eaar Keotak bwe jabdewōt emaron̄ jo̧o̧r jān mej. Jemedwōj Ilan̄ eaar bar letok kōjeram̧m̧an ko an lo̧mo̧o̧r im mour indeeo n̄an aolep armej ro ilo juon wōt jon̄o̧k ko: tōmak ilo Irooj, Jisōs Kraist; ukweļo̧k; peptaij; im mour im ļoor kien ko im kain̄i ko an gospel in.

IV.

Jitibōn Kūrijm̧ōj ej rōjan̄ kōj n̄an kōjerbal iien in n̄an eļļā jān jabdewōt apan̄ ko im kōļapļo̧k meļeļe im iakwe ippān armej ro jān m̧anit ko jet, tōmak ko, im laļ ko rej itok jān i. Mekarta n̄e Armej ro Rekwojarjar ilo Raan ko Āliktata rej lōn̄ uwaer, āinwōt kōj ro ilo Utah in, ak ro eiiet uwaer, āinwōt kōj ilo ijjoko jet, jej aikuij tōpar aolep m̧aan im kōrā ro nejin Anij. Jen aikuj eļļo̧ke ļo̧k pein karejar ko ad ilo iakwe n̄an aolep armej otemjej, ro im rej im rejjab jen tōmak in ad. Jej aikuj pokake kien eo Anij eaar kōtļo̧k bwe Moses en leļo̧k n̄an ajri ro nejin Israel:

“Im eļan̄n̄e juon ruwamāejet ej kobawaj ippemi ilo āneo ānemi, kom̧win jab inebata. Ak ruwamāejet eo ej pād im kobawaj ippemi ej n̄an kom̧ āinwōt eo ear ļotak ilubwilijimi, im kwōn yokwe e āinwōt kwe make.”

Jej aikuj katakin ajri ro nejid n̄an jouj im ļōmņak kōn aolep. Ij pād ilo būrom̧ōj jabdewōt iien n̄e ij ron̄ kōn ro jinen im jemān ajri ro rejjab membōr in Armej ro Rekwojarjar ilo jukjukin pād in rej būrom̧ōj kōnke rej tōmak bwe ļaddik im leddik ro nejier em̧ōj aer jako ak ejjeļo̧k ej iakwe er jān ajri ro rej membōr ak jodikdik ro. Ij tōmak kain waanjon̄ak rot in rejeja im rem̧ōjņo̧ļo̧k. Jej aikuj jouj im ļōmņak kōn aolep armej ijoko jabdewōt.

Jej aikuj, aaet, joļo̧k ippān doon eo me jej tōmak ilo errā kake ak kōm̧ōjņoikļo̧k tōmak eo ad im kabun̄jar. Ak kain kajenolo̧k rot in ejjab joļo̧k bōd ko ad jān ļōm̧ņak kōn ro jet. Ak ej ke aikuj bōbrae kōj jān jemjerā ko rellōn̄ ko me kijejeto in oktak ippān doon ilo tudepakpak in jerbal eo kōn ejja aikuj ko wōt me ekitbuuj aolep armej.

Jetōb eo ippān eo im jej aikuij bōk ennaan kōn “aeņōm̧m̧an, m̧ōņōņō meanwōd n̄an armej” ej jetōb eo in wujlepļo̧k kōj make ilo jerbal n̄an ro jet. Ilo an Kūrijm̧ōj keememej ļotak eo An eo im Eaar wūjleptok mour eo An n̄an kōj aolep, kōn menin kōj kajjojo armej ej aikuj kōjerbal Kūrijm̧ōj āinwōt juon iien n̄an kōkm̧anm̧anļo̧k wāween ad jipan̄ ro ipelaakid.

Ilo ad kōm̧m̧ane menin—āinwōt jetōbin leļo̧k eo an Kūrijm̧ōj ej kaobrak kōļmenļo̧kijen ko ad im m̧akūtkūt ko ad—kōj kajjojo jenaaj kōm̧m̧ane ijo koņaad n̄an kōttapar eo indeeo an ainem̧m̧an kōn, “aeņōm̧m̧an ioon laļ, m̧ōņōņō im ājmour n̄an aolep armej.” Ej iien n̄an kōj aolep n̄an kōm̧m̧ane menin, bwe ilo kajojo raan jej juon raan epaakeļo̧k itok eo an Irooj. Āinwōt an Būreejtōn Russell M. Nelson katakin kōj ilo kar Oktoba eo ļo̧k, kout, “Men eo em̧m̧antata ej itok wōt kōnke Irooj ej kōm̧ōkajļo̧k jerbal eo An. Men eo em̧m̧antata ej itok wōt ilo ad lukkuun ukōtļo̧k būruwōd im mour ko ad n̄an Jisōs Kraist.” Jemļo̧kin kout eo.

Inaaj kiiō kout jān “Kraist Eo Emour: Naan in Kam̧ool eo an Rijilōk ro.” Kout, eo ej ba:

“Ilo ad kakeememej ļotak eo an Jisōs Kraist ruo eppepen emootļo̧k, jej kwaļok ad naan in kam̧ool kōn m̧ool eo kōn mour eo An im jejjab maron̄ keidi mour im erreo eo an ejjeļo̧k jem̧ļo̧kin kōn en̄taan in pinmuur eo An eļap. Ejjeļo̧k juon eaar wōr an kajoor in im̧we ioon aolep ro rekar mour im kiiō renaaj mour ioon laļ in.”

Kout eo ej wōnm̧aanļo̧k wōt, “Kemij kam̧ool ilo ejeļo̧k pere bwe mour eo An, eo ej un eo eļap aurōk n̄an bwebwenato an aolep armej, maron̄ kar ijjino ilo Bethlehem ak jem̧ļo̧k ioon Calvary. Jisōs Kraist] eaar Maanje eo an Jemen, Nejin eo emake wōt ilo kanniōk, Rilo̧mo̧o̧ren an laļ. …

“Jej kean̄ ilo naan ko kōn kapene ke priesthood eo An im Kabun̄ eo An rekkar bar jepļaaktok ioon laļ in—‘ekkal ioon pedped eo kōn … rijjilōk ro im rikanaan ro, Jisōs Kraist … ear irooj ejm̧aan eo.’”

Kout eo ej wōnm̧aanļo̧k wōt, “Jej kam̧ool ke E [juon raan] enaaj bar jepļaaktok n̄an laļin. ‘Im aibuojwōj eo an Irooj enaj waļoktok, im aolep armej renaaj loe.’” Jemļo̧kin kout eo. “Enaaj kakien āinwōt Kiin̄ in Kiin̄ ro im irooj āinwōt Irooj in Irooj ro, im aolep bukwe otemjej renaaj bukwelōlō im lo otemjej renaaj kōnono ilo kabun̄jar im̧aan Mejān.

“Kōmij kwaļo̧k am naan in kam̧ool, āinwōt Rijilōk ro An kar kapit er—bwe Jisōs ej Kraist eo Emour, Nejin Anij eban bar mej. E ej Kiin̄ Immanuel eo eļap, eo ej jutak ituanbwijmaron̄ in Jemen rainin.” Ij bar kout, “E ej meram eo, mour eo, im kōjatdikdik eo an laļ in. Iaļ eo An ej iaļ eo me ej tōl n̄an m̧ōņōņō ilo mour in im mour indeeo ilo laļ eo ej itok. Kam̧m̧oolol n̄an Anij kōn mennin letok eo jejjab maron̄ keidi n̄ane kōn Eo Nejin Anij Ekwojarjar.”

Ilo etan Jisōs Kraist, amen.