Menin Letok Ko Ejjeļo̧k Wōņaer

Joten in, ij barāinwōt kōnono kōn lan̄lōn̄ im bwilōn̄ kōn kwojarjar eļap an Kūrijm̧ōj. Ejjeļo̧k iien ilo bwebwenato an laļ me ekar ļapļo̧k an kar jelet jān ļotak im mijen eo an Jisōs RiNazareth eo ium̧win ruo taujin iiō ko remootļo̧k. Ilo aolepān laļ eo ekāāl, iien make ej kakōļļeik pedped ioon iien in ekabwilōn̄lōn̄.

Ļotak eo an ad Irooj ej keemem e ilo elōn̄ wāween ko rooktak ipeļaakin laļ in, bōtaab ewor juon iminene in Kūrijm̧ōj ej āinwōt juon wōt peļaakin laļ in.

Imminene in ekar āinwōt ijjino kōn bwebwenato eo ilo Matu kōn rikanpil ro jān Ireear raar itok n̄an kabun̄-jar n̄an Jisōs. Ke raar itok, raar bōkļo̧k menin leļo̧k ko raorōk. Rainin, iminene eo an leļo̧k menin leļo̧k ko ej juon m̧ōttan keemem ko an Kūrijm̧ōj reļļap.

Emem̧ļo̧kjeņ eo aō m̧oktata an juon menin leļo̧k ilo Kūijm̧ōj ekar juon kein ikkure bu aiboojoj me ekar pu kōn juon bo̧o̧r ej loklok ilo juon to, im juon dak-ej waļo̧k. Menin ekar kanooj kōlo̧udin̄idn̄ n̄an juon emen iiō-dettan. Dak eo emaron̄ kar etetal elāle ilo juon doulul ioon būļoor eo im lukkuun kar jab maron̄ mour ke ikar lukkuun m̧ōņōņō jitōn̄ļo̧k pop gun eo aō jān jiljino inij ettoļo̧k. Bōtaab kein ikkure eo ejjab etto ekar rup, im āinwōt aolep men ko, m̧ōņōņō eo ekar letok ekar jidik wōt iien im m̧ōkaj meļo̧kļo̧ke.

Joteinin, ij kwaļo̧k jilu menin leļo̧k ko kōj kajjojo emaron̄ leļo̧k ilo Kūrijm̧ōj in, im ilo aolepān mour ko ad, eo ejjamin bōktok m̧ōņōņō eļap jidik wōt iien, ak ijello̧kin enaaj bōktok m̧ool im lan̄lōn̄ ejeļo̧k jemļo̧kin.

Eo m̧oktata ej menin leļo̧k an naan in kam̧ool. Menin ej juon menin leļo̧k an juon make im n̄e leļo̧k ilo ejjeļo̧k wōņāān, ejjeļo̧k etao, ej kwaļo̧k m̧wilaļ tata in en̄jake ko an jetōb eo ad. Eļapļo̧k an aorōk jān kooļ, ijur, ak mōr, naan in kam̧ool erreo kōn Jisōs Kraist āinwōt ad Rilo̧mo̧o̧r im Ripinmuur ej lukkuun dilepen aolep ta eo jej keemem e ilo Kūrijm̧ōj.

Ke ajri ro nejim jiljino raar iddik, Jacqui im n̄a kar peeke juon bon̄ bwe n̄an nokon in jota an baam̧le, ijello̧kin juon katak, kōm naaj kar baj kwalo̧k naan in kam̧ool ko ippān doon. Ālkin aō kar kwaļo̧k naan in kam̧ool eo aō, leddik eo nejim ejouj Chelsea, bōlen 16 iiō dettan kar ilo iien eo, ekar ba ilo an kabūrōrō, “Baba ijjan̄in kar ron̄ naan in kam̧ool eo am̧ m̧okta.” Ikar jidik bulōn̄, im ikar ilibōk kōn uwaak eo an. Kojeļā, ke ikar juon stake būreejtōn im jeļā bwe Chelsea ekar ron̄ aō kwaļo̧k naan in kam̧ool elōn̄ iien ko ilo elōn̄ jekjek ko ilo m̧ōn jar eo im ilo m̧weo. Bōtaab ilo iien eo, leddik in ekar jim̧or ron̄ im en̄jake naan in kam̧ool eo aō āinwōt n̄e ekar kein kajuon. Liin ekar katakin eō juon katak ijjan̄in de meļo̧kļo̧ke: menin leļo̧k eo an naan in kam̧ool eaorōk im ewōr kajoor ilo ad emakijkij kwaļo̧ke.

Eo kein kajuro ej menin leļo̧k an jeorļo̧k bōd. Em̧ool aolepādwōj ilo juon iien kar metak ilo en̄jake kōn naan ko relej ak kōm̧m̧an ko an ro jet. Im eļan̄n̄e jej m̧ool, kōj jaar bar kōmetak ro jet. Jisōs Kraist ej katakin bwe “N̄a, Irooj, Inaaj jeorļo̧k bōd an ro Inaaj jeorļo̧k aer bōd, ak jān kom̧ emennin aikuj bwe kom̧in jeorļo̧k an aolep armej bōd.” Innām Ekar kakijn̄en̄eikļo̧k an kean̄ im ba bwe n̄e jej likjab n̄an jeorļo̧k an ro jet bōd ņae kōj, jerawiwi eo eļapļo̧k ej ad.

Ilo ad anemkwoj im m̧ool ilo jeorļo̧k an ro jet bōd, jej erom anemkwoj jān baijjin in meo, ekajet, ak kaje.

Ewōr juon m̧ōtta eo aorōk ilo South Africa etan Sandile Makasi. Kōn mālim, ij kwaļo̧k bwebwenato en an make kōn jeorļo̧k bōd. Ke Sandile ekar laļ in ruo iiō dettan, eo jemān, kar 28 wōt iiō rūttoon, kar kaen̄taane im kameje jān bwilijmāāṇ ilo juon tōre in apartheid regime eo. Tokālik Sandile ekar jeļā kōn tipdikin meļeļe ko rejjab kaṃōṇōṇō kōn kūṃṃūḷọk in mej eo an jemān. Ij kiiō kouti naan ko an make:

“Ilo jino in iiō ko aō im̧aan āinwōt juon ļaddik ikar en̄jake illu im dike kōnke kōn ta eo rekar kōm̧m̧ane n̄an jema. Etke remaron̄ kar tōn bōk e jān kōm? Kar bōke jān eō juon baba im rikatakin, im kar bōk jān jinō juon m̧ōttān eo em̧m̧an im ej kea.

“Ke ikar jeļā kōn jekjek nana eo me raar kaen̄taan e, menin ekar kōobrak būruō im aō ļōmņak kōn eļap illu, dike, im lāj ņae bwilij opija ro im armej mouj ro.

“Ikar wōnm̧aanļo̧k wōt in dāpij en̄jake kein m̧ae iien eo ikar lo gospel eo kar kōjepļaaktok an Jisōs Kraist. Gospel eo ekar jipan̄ eō meļeļe bwe ij aikuj jeorļo̧k an bwilij opija ro bōd kōn jorrāān ko aer, im bwe lan̄lōn̄ eo aō im eddōk ilo jetōb eo raar pedped ioon.

“Menin ekar pidodo ba jān kōm̧m̧ane, bōtaab ikar waanmaanļo̧k kōn eļap jar, im ilo iien ko Irooj ekar jipan̄ eō jeorļo̧k an rikejdāt ro aō bōd …. Ijello̧kin metak, ikar en̄jake kaenōm̧m̧an; ijello̧kin lāj im dike, ekar wōr aō iakwe; ijello̧kin marok ilo būruō im ļōmņak, ikar bōk meram im aenōm̧m̧an.”

Kom̧m̧ool Sandile kōn waanjon̄o̧k eo am̧ kōn menin leļo̧k eo an jeorļo̧k bōd.

Kein kajilu, menin leļo̧k eo an iakwe āinwōt an Kraist. Iaan aolep menin leļo̧k ko ilo jetōb, ejjeļo̧k eļapļo̧k jān iakwe-em̧ool. Jisōs ej kwaļo̧k An iakwe n̄an ro jet im kar katakin kōj n̄an iakwe doon.

Ilo ad ļoor waanjon̄o̧k eo an Rilo̧mo̧o̧r kōn kwaļo̧k ad iakwe n̄an ro jet ilo ta jej ba im kōm̧m̧ane, er remaron̄ en̄jake iakwe eo an Anij ilo kōj.

Jejjo iiō ko remootļo̧k, ikar ioon juon likao 23 iiō dettan ekar jokwe ilo Washington eo ekar juon waanjon̄o̧k em̧m̧an kōn menin. Mijenede ṃōṃaan ro raar katakin e ium̧win jilu allōn̄ ko, im ekar en̄jake juon oktak ekabwilōn̄lōn̄ ilo paotokin im wāween mour. Juon bon̄ ekar kōnono ippān mijenede ro ilo talboon, im ke ekar m̧ōj aer kōnono, raar ba “[Kōmij] iakwe eok, Michael.” Ekar door laļļo̧k talboon eo im ļōmņak ippān make, “Wow. Ej juon men ij jaminene in ron̄. Em̧ool imaron̄ ba menin n̄an ro jet.” Ekar kāālet n̄an bōk peran eo n̄an jiron̄ jinen bwe ej iakwe e. Liin ekar mour jejjo awa ko jān e ilo bar juon m̧ōttan state. Ke ekar kūrļo̧k liin im jiron̄ e “Ij iakwe eok, M̧am̧a,” uwaak eo an liin em̧ōkaj ekar “Ta in kwojake? Kwar ke etal n̄an loļo̧k taktō im bōk ennaan ko rejjab em̧m̧an? Kwoj bar ro̧o̧lļo̧k n̄an kalbuuj ke?” Kōn menin, ekar jiron̄ liin kōn an lo gospel eo im ekōjkan an kar ukōt e, im bwe kiiō em̧ōj an joļo̧k an kōbaatat im kōjerbal uno ko rekkajoor im kar ļōmņak in peptaij.

Ij ļōmņak menin ej juon pija eļap kōn ta eo ej waļo̧k n̄e armej ej en̄jake iakwe eo an Anij kōn ro jet. Ej kōmeraikļo̧k bōro ko innām ejake juon ikdeelel n̄an kwaļo̧k menin leļo̧k jab in an iakwe ippān ro jet.

Kiiō, jotein, jaar ijjino kōn menin letok ko raorōk kōn kōnono kōn kooļ, ijur, im mōr. Ikar lale; em̧ool kwomaron̄ wiaik menin leļo̧k ko ilo Amazon. Bōtaab kwojjamin naaj lo menin leļo̧k ko jet jaar kōnono kaki ilo jabdewōt m̧ōn wia. Rej menin leļo̧k ko ejjeļo̧k wōņaer, im renaaj bōktok lan̄lōn̄ eo aitok kitien im em̧ool n̄an jim̧or ritōllo̧ke eo im rileļo̧k eo.

Kiiō, ilo am̧ lōmņak kōn ta eo kwonaaj leļo̧k ilo Kūrijm̧ōj, ij karuwainene eok n̄an:

1. Kwaļo̧k naan in kam̧ool eo ami ippān baam̧ļe eo im ro kom̧ij iakwe er. Ilo ami kwaļo̧k menin leļo̧k in aorōk, naan in kam̧ool eo ami enaaj kajoorļo̧k.

2. Jeorļo̧k bōd an juon eo kom̧ij en̄jake ekar bōd ak kōmetak kom̧. Ilo leļo̧k menin leļo̧k in, kom̧ naaj barāinwōt en̄jake aenōm̧m̧an im kemour.

3. Jipan̄ ro jet en̄jake iakwe eo an Anij ilo kom̧. Eļan̄n̄e ekkar, jiron̄e er kwoj iakwe er. Ilo ami lo ro jet āinwōt an Anij lo er, ami iakwe n̄an er enaaj eddōkļo̧k, im kom̧ naaj barāinwōt en̄jake iakwe eo an Anij ilo mour eo ami.

N̄an kiļōk, ij kōņaan lewaj juon tōre in iien Kūrijm̧ōj eobrak kōn lan̄lōn̄ eļap. Ij kwaļo̧k aō kam̧ool kōn Jisōs eo ej Kraist Ej mour. E ej ad Rilo̧mo̧o̧r, ad Ripinmuur. E ej ad Rijipan̄ im M̧ōttad. Ij kautiej E. Ij iakwe E. Kōnke kōn menin leļo̧k eo An n̄an kōj kajjojo, kōļļāik wōņāān eo eļap an ļap, jemaron̄ karbōb n̄an bōk menin leļo̧k eļap tata an aolep—em̧ool mour indeeo ilo im̧aan mejān Jemād eo ej iakwe ilo Lan̄.

Ilo etan Jisōs Kraist, amen.