Pojak n̄an Ioon Rilo̧mo̧o̧r

Ilo ad deļo̧n̄etok Kūrijm̧ōj in, ļōmņak ko aō rekar iookļo̧k ro remaron̄ ettoļo̧k jān m̧oko m̧weer, ekoba mijinede ro rellōn̄ ro rej jerbal kiiō.

Kūrijm̧ōj eo jinointata ilo aō ettoļo̧k jān m̧weeo im̧ō ej ilo iien eo ikar juon mijenede ilo England, Tijem̧ba in 1960 eo. Ikar jerbal ilo Swindon, England.

Kōm kar kōppelļo̧k Swindon n̄an jerbal in mijenede emaron̄ 90 raan m̧oktaļo̧k. Kōm kar kōjerbal im kōļļāiki juon ruum̧ n̄an kweilo̧k ko an Jabōt. Kōm kar jeraam̧m̧an kōn membōr ro rekāāl—jino kōn juon branch.

Ilo bon̄in eo m̧okta jān Kūrijim̧ōj kom̧ro kam̧pānien eo aō, Elder Noel Luke, kar kāālet n̄an loļo̧k armej ilo m̧oko m̧weer ilo eria eo kom̧ro ekar jerbal ie im kwaļo̧k jidik katak im kōjeram̧m̧an in Kūrijim̧ōj. Ekar juon bon̄in eo eaiboojoj, im ekōdo̧do̧ lan̄ im allōn̄ ej romaak ejaake juon en̄jake em̧m̧an. Ejjab to kōm ekar kile bwe aolep ro ilo jukjuk in ped eo rekar alooje ilo tv ko nejier juon rikōm̧m̧an kōjak im rial, Harry Secombe. Ekar al kōn al eo aorōk “Bless This House.” Ekar kōketak ilo an ba naan kein rekwojarjar, kout;

Kōjeraam̧m̧an armej rein ijin.

Dāpij aer erreo im anjo̧ jān jerawiwi.

Kōjeraam̧m̧an kōm aolep bwe kōm en maron̄

Ekkar, O Irooj n̄an jokwe Ippōm̧.

An kwaļo̧k naan kein ekar boktok drenin kemjaaļaļ ilo kem. Al eo, ej diwōjtok jān enan̄in aolep em̧, ekar eban̄ijn̄ij lōn̄ļo̧k im laļtak jān kōdo ko. Kom̧ro Elder Luke ekar en̄jaake bwe kom̧ro ekar ilo m̧ool rikwaļo̧k ro an Irooj im Rilo̧mo̧o̧r, Jisōs Kraist, ro rej kajjeon̄ jerbal im kōjeram̧m̧an ajri ro nejin Jemedwōj Ilan̄.

Āinwōt juon mijinede ikar kiiō meļeļe bwe mour ilo laļ in jej aolep ettoļo̧k jān m̧weo im̧ōd—m̧weo im̧ōd ilo lan̄. Iaļ eo n̄an en̄jaake okmeenen in m̧weo im̧ōd ilo lan̄ ej ilo ad jerbal n̄an Rilo̧mo̧o̧r.

Ilo jet iiō ko remootļo̧k, Kabun̄ in ekar rojan̄ kōj n̄an kwaļo̧k meram eo me Rilo̧mo̧o̧r ej letok n̄an aolepen laļ in, eļaptata ilo iien Kūrijim̧ōj in. Kabun̄ in ewōr juon an kijejeto eļap in Kōmeram Laļ n̄an kajeer ļōmņak ko an aolep armej n̄an Rilo̧mo̧o̧r. Menin ej itok ippān tok juon kijejeto eo n̄an leļo̧k n̄an ro rej ped ilo aikuj im kōm̧m̧ani jerbal ko an Kraist.

Iiō eo ļo̧k Kabun̄ in ekar jinoe juon kijejeto in Kōmeram Laļ ilo an kōjerbal screen kileplep ko rej jepooļe Times Square ilo New York City.

Kom̧ro Mary ekar ped ijo ke pijaan ļotak eo an Rilo̧mo̧o̧r ekar waļo̧k ilo screen kileplep ko. Ekar juon en̄jake em̧wilaļ ilo jetōb. Ilo iiō in, en̄jaake eo ilo Times Square em̧ōj an ajeeded ilo elōn̄ jikin ko ipeļaakin laļin.

Ke ikar ped ilo New York City, ilo iien Kōmeram Laļ eo, ikar kile kijejeto eo n̄an kwaļo̧ki pija ko ilo wūņto ko an m̧ōn wia ko.

Ij kememejļo̧k juon māākjiin an Jabōt ilo New York Times im ekar obrak juon peij kōn taitōl eo: “Holiday Windows Return. Shoppers Do Too.” Māākjin eo ekar kwaļo̧k juon iminene eo ijo wūņto ko reļļap em̧ōj jin̄āiki im kainōknōk an m̧ōn wia ko ilo iaļ eo Fifth Aveneue ilo New York City. Jon̄an wōt aō maron̄ jeļā jān māākjiin eo im aō kar etal, ejjeļo̧k iaan wūņto ko rekar kwaļo̧k kōn Kūrijm̧ōj ak Kraist Nin̄nin̄ eo.

Ilo aō riiti māākjiin eo, ikar kemeemej ke ikar dik im kainōknōk in wūņto in Kūrijim̧ōj ko ilo m̧ōn wia ko ilo Salt Lake City rekar kwaļo̧k kōn Kraist Nin̄nin̄ eo. Ikar barānwōt kemeemej juon bwebwenato jān iien eo kōn juon shopping mall ilo Midwest im ekar kōņaan kwaļo̧k unin tōl eo an Kūrijim̧ōj n̄an jim̧ōr ejaake juon en̄jake in Kūrijim̧ōj im kan̄ōl tok riwia ro. Rekar likūt juon pija ekilep eo ewōr naan kein ie, “N̄e Kraist enkar itok bon̄in, wōn eo E enkar jibadōktok?” Elōn̄ bar pija ko kar kwaļo̧ki ilo wūņto ko an m̧ōn wia eo tulaļ in wōt sign eo. Eļan̄n̄e ejim̧weļo̧k aō keememejļo̧k pija ko:

• Juon ekar kōn juon leļļap ilo bed eo kineen im juon nurse ej lale. Ekar waļo̧k an lukkuun nan̄inmej.

• Eo tok kein karuo ekar kōn juon kōrā ippān nin̄nin̄ eo nejin ej kab ļotak. Lan̄lōn̄ ekar waļo̧k ilo turin mejen.

• Pija eo kein kajilu ekar kwaļo̧k kōn juon baam̧le ippen ajri ro nejier rej jan̄. Ekar alikkar bwe ekar jab bwe kijier m̧ōn̄ā, im bwe ekar iiet, ak ejjeļo̧k, aer menin leļo̧k ko m̧weier ilo Kūrijim̧ōj.

• Pija eo kein keemen ekar kwaļo̧k juon baam̧le alikkar aer m̧weie rej rūbrūb menin leļo̧k ko aer ko rellōn̄.

• Pija eo kein kōļalem ekar pijaan juon baam̧le eo em̧m̧an ak rettā im ewōr ippāer elōn̄ ajri ro rej al im m̧ōņōņō ippān doon.

Ilo aō lukkuun ļōmņak kake pija kein ļalem im pija kileplep eo “N̄e Kraist en kar itok bon̄in, wōn eo E en kar jibadōktok?”,ruo ļōmņak ko rekar itok n̄an kōļmenļo̧kijeņ eo aō.

Juon, jejeļā bwe n̄e Rilo̧mo̧o̧r eo enaaj bar itok kein karuo, jeban jeļā raan eo ak awa eo.

Ruo, n̄e Jisōs Kraist enaaj itok, āinwōt an Būreejtōn Russell M. Nelson kar kwaļo̧k ilo kweilo̧k eo eļap kiiō, “[E] enaaj jepļaaktok n̄an laļin āinwōt millennial Messaia eo.” N̄an ad pojak, Būreejtōn Nelson ekar kipel kōj n̄an “n̄an wūjlepļo̧k [ad] mour n̄an Jisōs Kraist.” Ilo jim̧we, pija eo ekilep enkar ekkarļo̧k an ba, “N̄e Kraist en kar itok bon̄niin, wōn eo en kar pojak in karuwaineneik E?”

Ilo aō kar etale pija ko ilo wūņto ko, ikar kile bwe aolep men ko rej ba n̄an kōj rej kōn jekjek in mour ko an armej ilo ānbwin im jāān, ak ejjeļo̧k kōn jekjek in mour ko aer ilo jetōb. Pija ko ilo wūņto ko rekar kwaļo̧k kōn kajjojo armej ro rekar bwijwōļā im nan̄inmej im barāinwōt ro rekar ājimourur im rej kab ļotak. Ekar barāinwōt waļo̧k ro rem̧weie im ro rejeram̧ōl. Bōtaab jon̄o̧k ko ilo iiō, ājmour, im jāān rejjab kwaļo̧k n̄an kōj ta eo elukkuun aorōktata, eo ej jekjek eo ilo mour in jetōb ko aer.

Ilo Katak im Bujen ko jej riit kōn ro rej pojak n̄an peptaij ilo Kabun̄ eo an Kraist. Un eo aorōk ej pedped wōt ilo aer kōttāiki kōj make, wōr ippāer “bōro erūb im juon jetōb ettā,” ukweļok, im “jerbal n̄an [Jisōs Kraist] n̄an indeeo.” Kōttōpar eo aer ej n̄an erom̧ “juon rikaļoor eo ej wūjlepļo̧k an n̄an Jisōs Kraist” im eddōkļo̧k ilo iaļan bujen eo im ej kepooj kōj n̄an kōjeram̧m̧an ko an Pinmuur eo An.

Kraist ej waanjon̄o̧k eo ilo aolep men ko. E ekar kwaļo̧k, “Lo N̄a meram eo; Iaar kwaļo̧k jon̄ok eo n̄an kom̧.” Ilo ad lale jekjek ko an mour in jetōb ko ad, jenaaj em̧m̧anļo̧k ilo ad kalimjek waanjon̄o̧k eo An em̧m̧an. Rilo̧mo̧o̧r ekar kwaļo̧k iaļ eo n̄an ad kappukot m̧ōņōņō, un eo, im lan̄lōn̄ ilo mour in im mour indeeo. Mōņōņō im lan̄lōn̄ rej kwaļo̧k jetōbin Kūrijim̧ōj.

Ilo Jon 19:5 jekkar riiti bwe Pailat ekar boktok Jisōs n̄an im̧aan mejen ro rekar kōņaan dōbwāāl E. E ekar “pālōk pāllin kālōklōk eo, im kōṇak nuknuk eo e būrōrō. Im Pailat e ba ñan er, Lo, Armej eo!”

Ilo iien Kūrijim̧ōj in jen lukkuun lo Armej eo, eo ej Kraist, im menin letok ko em̧ōj An letok.

Kein kajuon, jen ļōmņak kōn ļotak eo An ekabwilōn̄lōn̄.

Jejeļā bwe n̄innin̄ in aorōk im jej kemeeme ilo Kūrijim̧ōj in ekar eo Nejin Jemen emake wōt. Ekar bōk kajoor in mour indeeo jān Jemen—kajoor eo n̄an mour. Im Ekar bōk jān eo Jinen ilo mour in kajoor eo n̄an mej. Kar kālet E jān jinoin n̄an mijen eo An ekwojarjar.

Matu 1:23 ej ba, “Lo, virgin enaaj bōrọro, im enaaj keotak nejin ṃaan, im renaaj ṇa etan Immanuel, ukōtōn naan in, Anij ipped wōj.”

Kein karuo, kejokļo̧kijeņ kōn mour eo An ewāppen im wānōk im waanjon̄o̧k eo An. Men̄e E ekar en̄taan kōn metak, kaen̄tanaan, im kapo ko in aolep men, E ekar kadedeļo̧k mijen eo An. E ej ad waanjon̄o̧k im kar kwaļo̧k iaļ eo bwe jen maron̄ ļoore. Ekar wūjlepļo̧k mour eo An n̄an ro rejeram̧ōl, ro riaikuj, im ro rinan̄inmej, im ro raar metak, im tōprakin karōk eo indeeo eo E wōt ekar maron̄ kōm̧m̧ane.

Kein kajilu, ļōmņak kōn mej eo An, Jerkakpeje, im Pinmuur.

Ilo kautiej n̄an Pinmuur eo, Kwaļo̧k Gospel eo Aō aiboojoj im alikkar ilo an ba: “Pinmuur eo an Rilo̧mo̧o̧r ekitbuuj en̄taan eo An ilo Gethsemane, en̄taan eo An im mej eo ioon debwāāl, im Jerkakpeje eo An. E ekar en̄taan eļap jān maron̄ meļeļe kake—lukkuun in ļap jon̄an E ekar to̧o̧r bōtōktōk jān aolep ron̄ in ānbwinin.”

Ilo Katak im Bujen Ko 76:41 jej riiti: “Bwe E eaar itok ilo laļ in, em̧ool Jisōs, n̄an kar debwāāl n̄an laļ in, im n̄an ineeki jero̧wiwi ko an laļ in, im n̄an kokwōjarjare laļ in, im n̄an karreoik e jān aolep jab weeppā.”

Pinmuur eo an Jisōs Kraist ej iien eo eļaptata im menin letok eo im ekar waļo̧k ilo bwebwenato ko an armej. Aolep iaad jekar jerawiwi, im ej wōt kōn Pinmuur eo an Jisōs Kraist im jemaron̄ bōk tūriam̧o kake im mour ippān Anij.

Kein kemen, pojak n̄an Itok eo An Kein Karuo.

Ilo Kallim̧ur Mokta, Job ekar kwaļo̧k: “E enaaj jutak ilo raan ko āliktata ioon laļ in.” Āinwōt an Būreejtōn Russell M. Nelson kar aiboojoj an katakin, “[Kraist] enaaj tōl Kabun̄ eo An jim̧or ilo Jerusalem eo m̧okta im Jerusalem eo ekāāl.” Kiiō ej iien eo n̄an ad kepopo n̄an iien in eļap. Jeje ko rekwojarjar rej ba: “Kōpooj kom̧ n̄an raan eo eļap an Irooj.”

Naan in kapilōk eo aō āliktata ej n̄an iakwe im jerbal n̄an Irooj. Ilo ad ļōmņak kōn jekjek in mour ko ad ilo jetōb im ad pojak n̄an karuwaineneik Rilo̧mo̧o̧r, jej aikuj m̧oktata, “Yokwe Irooj am̧ Anij kōn aolepen būruom̧ im kōn aolepen am̧, im kōn am̧ ļōmņak otemjej.” Im eo kein karuo, “Yokwe ro ri turum im āinwōt kwe.”

Iakwe eo ad n̄an Anij im ro ritūrid ej mālijjon̄ eo eļaptata an jetōb ko ad. Eļan̄n̄e jej iakwe Anij, jenaaj kōjparok kien ko An. Eļan̄n̄e jej iakwe ro ritūriid, jenaaj jerbal n̄an er im erom̧ pā ko raorōk pein Rilo̧mo̧o̧r.

Ilo Katak im Bujen Ko, Rilo̧mo̧o̧r ej kōjerbal naan kein: “Aaet, Inaaj kōpeļļo̧k būruōn armej ro, im … Inaaj kajutak jarlepju in rijar jān peim.”

Jekjek eo ilo pedped in katak eo jemaron̄ kwaļo̧k ad kam̧oolol n̄an Rilo̧mo̧o̧r ilo Kūrijim̧ōj in ej n̄an erom̧ rijerbal eo An—n̄an, ilo m̧ool, erom̧ pā ko Pein ilo laļ in.

Ilo iien in aiboojoj, jej kemeeme raan in ļotak eo an ad Irooj im Rilo̧mo̧or, Jisōs Kraist, ij kam̧ool n̄an eok bwe E emour. E ej ad Waanjon̄ak, ad Rijojomar ippān Jemen, im E ekar kadedeļo̧k aolep men ko remenin aikuj n̄an ad jepļaak n̄an ippān Jemed im Nejin. Jenaaj māletlet n̄an ļoor Jisōs Kraist im bōk menin letok ko im E em̧ōj an letok.

Kōm̧m̧an bwe kwon bōk juon Kūrijm̧ōj eo eaiboojoj n̄an mije wōt Jisōs Kraist.

Ilo etan Jisōs Kraist, amen.