Kraist Nin̄nin̄ eo Eļotaktok n̄an Kom̧

Ewi jon̄an ad jeraam̧m̧an n̄an en̄jake al kein reaiboojoj? Kom̧m̧ool tata n̄an choir in, rikōjan̄jan̄ rein, im ritōl al rein. Ijjab maron̄ lo kom̧ likin wo̧jke kein, ak ijeļā kom̧ ej pād jōne.

“Nin̄n̄in Ekwojarjar, Nin̄n̄in Ettā” ej juon iaan al in Kūrijm̧ōj ko rem̧m̧an tata ippa.

Bwijin sip ko raar kiki, Seperd ro raar lale

Lale m̧ae joraantak in juon raan kāāl;

Rej lo enjeļ ro aer aiboojoj, kar ron̄ bwebwenato eo

Naan ko an juon gospel em̧ool.

Āindein lan̄lōn̄, anjo jān būrom̧ōj,

Ainikien nebar, juon raan ekāāl,

Kraist Nin̄nin̄ eo Eļotaktok n̄an Kom̧.

Kraist Nin̄nin̄ eo Eļotaktok n̄an Kom̧!

Āinwōt juon leddik ej dik wōt, ro jinō im jema rekar letok juon etan kōm̧m̧an kōjak eo ej “Tammy Lamb,” kōn menin jabdewōt iien jeje ko rekwojarjar rekar kōnono kake juon seperd im laam̧ ko nejin, aolep iien ij kajoor en̄jake bwe rej kōnono n̄an n̄a.

Eļaptata eaar m̧ool in bwebwenato in Kūrijm̧ōj eo im enjeļ ro rej waļokļo̧k n̄an seperd ro, ilo aer lale bwijin sip ko aer, ļaam̧ ko aer, ilo bon̄. Elōn̄ iien ikkōn lōmņak aō pād ijo im ta eo enaaj kar āinwōt n̄an loļo̧k nin̄nin̄ eo ilo menjer. Em̧m̧an wōt ippa pija kein aolep iiō ilo aō ļōmņake ļotak eo An.

Bar juon pija elukkun em̧m̧an ippa ej itok jān juon bwebwenato kar kwaļok jān Elder John R. Lasater.

Elōn̄ iiō ko remootļo̧k, Elder Lasater ekar loļo̧k juon laļ jidikdik ilo Africa āinwōt juon uwaan douluul in rijerbal ro an kien.

Juon raan, ke rekar ito-tak ilo āne jem̧aden eo ilo juon waan kāām limousine kilmeej, ear waļok juon jorāān. Wa eo ekar pād ie ekar pād ilōn̄ tata in ioon to̧l eo, im eaar kile bwe wa eo im̧aan ekar wōtlo̧k jān iaļ eo. Ekar ba, “pija in ta eo eaar waļok im̧aam ekar pād wōt ippa ium̧win iiō kein rellōn̄.”

Juon seperd eo erūtto, ilo juon nuknuk aetok im ejopālpāl in iien ko an Rilo̧mo̧o̧r eo, ekar jutak turin limousine eo im kenono n̄an em̧m̧aan eo ej ettōr. Epaake ijo juon bwijin sip edik emaron̄ 15 sip.

Wa eo im̧antata eaar dibōj im kakinejnej juon iaan sip ko, rittōr eo an Elder Lasatar ekar kōmeļeļe. Im kōnke ekar wa eo waan king eo, seperd eo ekar maron̄ bōk aorōkin tarin 100 allen wōnāān lamb jidikdik eo n̄e en kar lukkuun rūtto. Ak ium̧win ejja kakien eo wōt, laam̧ eo enaaj mej im kaniekin en kar ajeej n̄an armej ro.

Innām rittōr eo eaar ba, “Bōtaab kwonaaj lale, seperd eo erūtto eban bōk jāān eo; rejjab kajoor kōm̧m̧ane.” Ke rekar kajjitōk etke, rittōr eo eaar ba, “Ej kōnke iakwe eo an seperd eo n̄an kajjojo iaan sheep ko an.”

Rekar lale ilo an seperd eo m̧al laļļo̧k, ilo an kotake laam̧ eo ilo pā ko pein, im likiti ļaam̧ ko ilo nuknuk eo an. Ekar jab bōjrak an eoeo ļaam̧ eo, ilo an ālji im bar ālji ejja naan eo, im ke Elder Lasater ekkar kajjitōk meļeļein naan eo, kar jiron̄e, “Oh, seperd eo ej ba etan. Aolep sip ko an ewōr etaer, kōnke e ej aer seperd, im aolep seperd ro rem̧m̧an rejeļā kajjojo sip ko aer kōn etaer.”

Ilo Aiseia kar kallim̧ur kōj, “Enaaj atbọkwōji lamb ko kōn pein, im jiburlepi, im Enaaj tōl ro im ewor nejier.”

Eļan̄n̄e jenaaj keememej jabdewōt ak en̄jake jabdewōt ilo iien Kūrijm̧ōj in, ej aikuij bwe kōj jej An. Keememej bwe Kraist eaar jiron̄ Piter, “Naajdikaō lamb…aōsip”?

“Bwe rainin e ļotak n̄an kom̧ilo jikin kweilo̧k an Devid Rilo̧mo̧o̧r, E Kraist Irooj.”

“Bwe n̄an kōj e ļotak juon ajri, n̄an kōj juon ļaddik em̧ōj letok.”

Ekar ļotak n̄an kotak kōj kajjojo. Im eļan̄n̄e ej n̄an jabdewōt, E em̧ool ej n̄an kom̧. Kraist Nin̄nin̄ eo Eļotaktok n̄an Kom̧.

Ak Aiseia ekar bar kakkōl, “Kōj otemjej āinwōt sip ko jaar jebwābwe.” Bōlen kajjojo iaad wōj jekar pād ilo juon jōkjōk ijo jekar en̄jake āinwōt juon laam̧ eo ejebwābwe ak em̧ool juon sip eo ejebwābwe. Bon̄in in, ij wūjļepļo̧k bwe jej aolep ļaam ko rej kinejnej ilo aer aikuiji Serperd eo Em̧m̧an, eo enaaj jibur tok kōj wōj ilo pā ko pein An iakwe. Kōnke n̄an wabanban ej meļeļein ewōr ipped men ko rejorāān ilo juon wāween, bwe rej aikuij kōmour.

Im ijjab jeļā n̄e ej wōr juon iien ilo wiik eo aō ij en̄jake aō aikuij juon Ripinmuur eļapļo̧k jān ilo Jabōt ilo iien kwojkwoj eo. Ij itok n̄an kabun̄ im kōļmeņļo̧kijen kōn naan ko im kōkkaļļe ko an ilo iien in “juon iien kōkāāl ilo mour in jetōb.” Ak jet iien ej jiktok iien būrom̧ōj, kōļmenļo̧kijen kake wiik eo ej jem̧ļo̧k, ij kile ejja errein bōd ko wōt, ejja m̧ōjņo̧ eo wōt ikar kōļmenļo̧kijen kaki Jabōteo ļo̧k. Im ij lukkuun en̄jake aō ettā ak jepeepļo̧k.

Kwojeļā ke en̄jake rōt in?

Rainin ij karuwaineneik tok eok n̄an kajjieon̄ juon men ekāāl. Ilo minit ko relukuun kwojarjar ilo aolepen wiik eo am̧, n̄e kwoj en̄jake jepeepļo̧k, ļōmņak ilo An kūr eok kōn etam̧, im kwon ilo̧k n̄an Ippān. Lo am̧ Rilo̧mo̧o̧r ilo kōļmenļo̧kijeņ eo am̧, kōn romaak in turin Mājen im Pā ko pein rej peļļok im eļļo̧k waj n̄an eok, im ba “Ijeļā konaaj kar en̄jake āinwōt in! En̄iin ej unin Aō kar itok n̄an laļ in im kar en̄taan kōn ta eo ikar kōm̧m̧ane.” An jipan̄, An jouj eppelļo̧k n̄an eok kiiō, ejjab ilo jem̧ļo̧kin iaļ eo kwoj en̄jake āinwōt n̄e aolep men im jejjot n̄an eok. Kōnke wōn ej en̄jake āinwōt in? Ejjeļo̧k juon eo ijeļā kake.

Keememej, jej etal n̄an m̧ōn jar, n̄an kwojkwoj in Kejota eo an Irooj, n̄an bōk kemour, ak bareinwōt n̄an en̄jake erreo.

Iiō ko ļo̧k, ke iaar jerbal ilo Būraimere, iaar kwaļo̧k juon bwebwenato kōn juon eo ej kab m̧ōj an peptaij. Iaar kwaļo̧k bwe in m̧ōttad emaron̄ juon eo ej make wōt membōr eo erreeo ilo Kabun̄ in. Innām ilo jea ko m̧aantata, ļaddik eo ekar lukkuun mōkaj in kajutak pein im juon ļaddik erūtto ļo̧k ear ba, “Jon̄an aō bar erreo wōt e kōnke ej kab m̧ōj aō peptaij im bōk kwojkwoj eo.” Ikar uwaak ilo āliklik, “Aaet, men eo ij ba ņe—ta eo ej ba.”

Ro m̧ōtta, jej ke lukkun emmemej im bōk katak in me elukkuun kabwilōn̄lōn̄? Eļan̄n̄e jej kōm̧m̧ane jerbal in n̄an kōjparok bujen ko ad ippān Anij—oktakļo̧k, riboot, im ukweļo̧k—jemaron̄ in erreeo kajjojo raan. Im kōn kain̄i eo an kwojkwoj eo, jemaron̄ en̄jake ad erreeo āinwōt raan eo jekar peptaij.

N̄an n̄a, ej wāween eo Jabōt en erom̧ juon raan in kakkije. Ejjab kakkije wōt ilo ānbwin, ak kakkije jān ajļo̧k im mijak, jān jab wānōk ko aō im m̧ōjņo̧ ko aō. Aaet ilo juon wōt raan!

Juon iaan bwebwenato ko rejelet an juon en̄jake ilo aolep jeje ko rekwojarjar ej letok n̄an kōj juon loļo̧kjen in kakkije in. Ilo Bok in Mormon, ke Rilo̧mo̧o̧r ear jerkakpeje ekar lo ļo̧k “sip ko jet An” ilo America kan, im ālkin en̄jake aikuj ko aer ilo aer jab kajjitōk, E ej kūr tok aolep ro im rej jorrāān ilo ānbwin—ro ri-akkā, ro ri-pilo, ro rijjaron̄ron̄, ak ro “rej mōjņo̧ ilo jabdewōt wāween ko ”—n̄an wōnm̧aanļo̧k.

Ij ļōmņake ļo̧k an ro jutak ilo ļain im ej alikkar an wōr jorāān ilo ānbwinnier im rej aikuij bōk kōmour. Ak bareinwōt ilo meja ilo kōļmenļo̧kijen e aō, ij loe ro āinwōt n̄a im ro jet im ij iakwe er ilo ļain eo ro im rej mōjņo̧ ilo wāween ko im rejjab alikkar n̄an mājen armej. Eaar kajjitōk n̄an ro im rej mōjņo̧ ilo jabdewōt wāween, “im eaar kōmour er otemjej.”

Jeļā bwe ilo waajon̄ak in, ekar jab kwaļo̧k ke Ekar kōmour er. Em̧m̧an ippa ļōmņak in bwe ewōr juon oktak ikōtaan bōk kōmour im lukkun mour. Ilo ad lukkuun mour ekkā ad bar ro̧o̧l n̄an juon wāween kōmourur, eo ej juon men jekōņaan, ejimwe ke? Ak bōk kōmour eoktak. Bōk kōmour ej kobaik kinej eo m̧okta, kōm̧m̧an ad oktak ilo wāween eo juon.

Em̧ool Rilo̧mo̧o̧r an laļ in, āinwōt juon armej eo em̧ōj an jerkakpeje, ekar pād wōt kinej ko ilo Pein, neen, im katin—kam̧ool bwe E ejāmin meļo̧kļo̧k kōj im bwe kōn depetpet ko An jenaaj bōk kōmour. Im bōlen, ilo raan eo ke Rilo̧mo̧o̧r ekar kōmour er, E ekar bareinwōt jibur er, ilo an atbakwoj tok er kajjojo ilo iakwe.

Bon̄in in, bōlen kwoj en̄jake am̧ rub bōro im kwojjab jeļā n̄e kwonaaj en̄jake An kemour. Ak em̧ool ke menin? Kajjojo Jabōt ilo iien kwojkwoj eo, E ej kotake eok jān iaļ eo ebūn̄aln̄al im door eok ilo kopā eo An, im jibur eok ilo pā ko Pein.

Ilo bon̄in Kūrijm̧ōj eo ekwojarjar, juon enjeļ ekar jeere nuuj ko rem̧m̧an, naan ko rem̧m̧an, naan in lan̄lōn̄ eļap. “E eo ekar utiejtata ekar erom̧ eo ettā tata—Seperd an Lan̄ eo ekar erom̧ Ļaam̧ eo.” “Kiin̄ an kiin̄ ro ekar āindein babu lo ettā ilo menjer. Ilo aolep ad mālijon̄, ear ļotaktok bwe en erom̧ jerad.” Ij tōmak enjeļ eo eaar ba, “Eo jeram̧, eo jeram̧ em̧m̧antata ej kab itok. Im eļan̄n̄e kwar jeļā jon̄an An kar lale eok, ewi jon̄an am kar kalimjōk E ilo iien eo kwar mour Ippān kar m̧okta, eļan̄n̄e kwar meļeļe ta eo E ej pojak in kar katok kake n̄an kwe im jon̄an eo E enaaj kanooj ālkin An naaj maron̄ in kōm̧m̧ane n̄an jipan̄ eok jepļaakļo̧k n̄an kapijuknen eo, kwonaaj m̧ōkaj im karuwaineneik E ilo menjer eo.

Ij kwaļo̧k aō naan in kam̧ool bwe Nin̄nin̄ eo ilo menjer, Juon eo jej kabun̄jar n̄an e im bōlen barāinwōt lukkuun jab maron̄ ļōmņake ļo̧k ekōjkan n̄e jen kar jibwe, ekar itok n̄an kōm̧m̧ane menin n̄an kōj.

Aaet, Kraist Nin̄nin̄ eo Eļotaktok n̄an Kom̧!

Ilo etan Jisōs Kraist, amen.