Ua Koob Tsheej txog Christmas

Kuv cov kwv tij thiab cov muam, peb tau koob hmoov zoo kawg los ntawm Muam Runia, Txwj Laug Palmer, thiab Txwj Laug Cook tej zaj lus. Kuv zoo siab uas kuv muaj cib fim qhia nej txog tej yam uas lawv twb piav txog lawm.

Christmas yog ib lub caij zoo kawg. Thaum peb nco txog peb tus Cawm Seej txoj kev yug los, peb lub siab tsom ntsoov rau tej yam uas tseem ceeb tshaj plaws hauv peb lub neej. Christmas ua rau peb nco qab ntsoov thiab ua Vajtswv tsaug ntxiv rau tej kev txi uas lwm tus ua kom pab peb.

I.

Christmas ua rau peb ib leeg xav txog ib leeg. Peb nco peb tsev neeg txiaj ntsim. Peb rov qab nrog cov phooj ywg qub tham. Peb hla tej ciaj ciam uas ua rau peb nyob sib cais lwm lub sij hawm hauv ib xyoo. Cov neeg uas tsis sib paub tsis txaj muag hais nyob zoo. Tib neeg rov qab ua siab dawb siab zoo rau lwm tus. Christmas lub hwj huam ua rau peb xav ua zoo.

Txoj kev kaj ntawm Christmas yog Yexus Khetos txoj Kev Kaj. Ib yam li peb nyeem hauv cov vaj lug kub, tus Cawm Seej yog “txoj kev kaj tseeb uas ci rau txhua tus neeg uas los rau hauv lub ntiaj teb.” Txhua tus uas ua koob tsheej txog Khetos txoj kev yug los—txhua tus uas muaj “lub Hwj Huam ntawm Christmas”—muaj ib feem ntawm txoj kev kaj ntawd.

Hauv lub caij Christmas no, muaj ib txhiab plhom tus neeg uas yuav ua koob tsheej txog Yexus Khetos txoj kev yug los. Tsim nyog uas tag nrho lub ntiaj teb yuav ua li no. Ntawm tag nrho cov neeg uas ib txwm nyob hauv lub ntiaj teb no, Yexus uas los ntawm Naxalaes yog tib tug neeg uas tseem ceeb tshaj plaws. Nws yog tus uas cov yaj saub thiab cov kws sau paj lus sau ntawv txog txij li 6,000 xyoos tas los txog hnub no. Nws yog tus uas cov neeg kos duab thiab cov kws sau nkauj zoo tshaj plaws sau txog. Nws yog tus xib hwb zoo tshaj plaws uas ib txwm nyob hauv lub ntiaj teb. Qhov tseem ceeb tshaj plaws, Nws yog Vajtswv tus uas yog Leej Txiv Nyob Mus Ib Txhis Tib Leeg Tub. Nws yog tus Vajtswv uas txhua lub hauv caug yuav tsum tau txhos thiab txhua tus nplaig yuav tau lees tias Nws yog tus uas tsim peb thiab peb tus Txhiv Dim, tus Cawm Seej thiab tus Vajtswv ntawm lub ntiaj teb no.

Zaj lus ntawm Christmas yog “Thov kom cov neeg uas nyob hauv ntiaj teb txhua tus uas ua haum Vajtswv siab tau zoo nyob kaj siab lug.” Yog lub ntsiab ntawm tej zaj paj lug thiab cov kws sau nkauj tau sau txog thaum lawv tsim cov nkauj zoo mloog ntawm lub caij Christmas. Peb nyiam tej zaj nkauj uas hais txog lub ntsiab no.

Cov neeg yug yaj hauv Yudais lub teb chaws,

Lawv tau hnov lub suab nkauj uas zoo mloog kawg:

Qhuas txog Vajtswv, Qhuas txog Vajtswv,

Qhuas txog peb Leej Txiv uas nyob saum ntuj;

Neeg tau zoo nyob kaj siab lug;

Neeg tau zoo nyob kaj siab lug!

Tej lus no, uas tib neeg coob hu ntau zaus thaum ua si hauv lub caij no, ua rau peb nco qab tias tsis muaj dab tsi tshiab nyob hauv Christmas tej kev ua koob tsheej thiab tej zaj nkauj no. Tej lus no qub heev thiab txhua tus paub lawm. Twb tshaj tawm tej lus no rau Adas. Twb tau qhia zaj no rau cov neeg Ixayees. Twb tau qhia zaj no rau Lihais cov xeeb ntxwv. Cov yaj saub tau qhia tej lus tseeb txog Yexus Khetos txoj Kev Theej Txhoj ntau zaus. Lawv tau hais txog Nws tej lus txib ntau zaus kom peb yuav tsum hlub Nws thiab ua hauj lwm rau Nws thiab ib leeg pab thiab hlub ib leeg. Thiab Nws hais tias, “Yog nej hlub kuv tiag, nej yeej yuav mloog kuv lus.” Vim tau ua li no hauv txhua lub caij nyoog, tej lus tshaj tawm yeej yog zaj lus tseem ceeb tshaj plaws nyob mus ib txhis li. Tej no los Nws hais kom pab peb.

Tej yam tseem ceeb tshaj hauv lub neej no yog tej yam yus ua ntau zaus. Peb yeej tsis nkees hnov peb tus Cawm Seej lub npe dawb ceev. Peb yeej tsis nkees nrog nraim cov uas peb hlub. Peb yeej tsis nkees mloog tej lus hais tias “Kuv hlub koj.”

Yog li ntawd, zaj lus ntawm Christmas uas pheej hais los tsis yog ib zaj lus uas yuav tsum hloov, tiam sis yog ib zaj lus uas peb yuav tsum rov qab siv hauv peb lub neej.

II.

Txij thaum peb yog me nyuam yaus los, peb txhua tus paub tias lub caij Christmas yog ib lub caij rau peb muab khoom plig rau peb tsev neeg thiab cov phooj ywg. Yog ib lub sij hawm ua siab dawb siab zoo rau cov neeg uas peb hlub. Tiam sis tsim nyog uas lub hwj huam ntawm Christmas yuav ncav cuag neeg coob tshaj peb tsev neeg thiab cov phooj ywg xwb. Niaj hnub no, peb cov tub hluas ntxhais hluas feem coob nrog lawv tej pawg hauv lub Koom Txoos mus xyuas thiab muab khoom plig rau cov uas xav kom lwm tus nco txog lawv hauv lub caij Christmas, nyob hauv tsev kho mob thiab tsev laus, cov uas tawm tsis taus tsev, thiab lwm tus. Thaum txog Hmo Ua Ntej Christmas, cov txiv neej thiab cov poj niam zoo tau kawm txog cov niam tsev txiv tsev uas tu siab heev, es lawv thiaj li nqa cov khoom ua si thiab zaub mov thiab khoom qab zib tuaj kom cov me nyuam yuav muaj kev zoo siab vim muaj leej twg nco lawv thaum Christmas sawv ntxov. Cov neeg coob koom siab ua hauj lwm rau tej chaw pab neeg txom nyem kom pub mov rau cov neeg tshaib plab, muab ris tsho rau cov uas hnav khaub hlab, muab tsev rau cov uas tsis muaj, mus xyuas cov neeg mob thiab cov uas tsis muaj leej twg nco txog lawv, thiab ua kom cov me nyuam zoo siab. Thov Vajtswv foom koob hmoov rau cov neeg uas pab lwm tus li no! Peb sawv daws yuav tsum txhawb nqa lawv. Cov uas muaj lub siab dawb siab zoo pab lwm tus yeej yog tus Tub Vaj Ntxwv ntawm Kev Thaj Yeeb cov tub qhe tiag.

III.

Lub ntsiab ntawm “neeg tau zoo nyob kaj siab lug” yog dab tsi? Tus Cawm Seej qhia hais tias, “Hlub [nej] tej kwv tij zej zog ib yam li [nej] hlub [nej] lub cev.” Nws kuj qhia tias peb yuav tsum “hlub [peb] cov yeeb ncuab, foom koob hmoov rau cov uas foom tsis zoo rau [peb], ua zoo rau cov uas ntxub [peb], thiab thov Vajtswv rau cov uas txhob txwm siv [peb] thiab tsim txom [peb].”

Thaum peb ua raws li lub hom phiaj ntawm tej lus qhia ntawd, Christmas yog ib lub caij rau peb zam txim pub rau lwm tus, ib lub sij hawm rau peb kho kev tu siab thiab rov qab sib raug zoo.

“Yog li ntawd, kuv hais rau nej tias, nej ib leeg yuav tsum zam txim rau ib leeg; vim tus uas tsis zam txim rau nws tus kwv tij tej kev txhaum yuav raug txim nyob ntawm tus Tswv xub ntiag; vim tus ntawd yog tus uas muaj kev txhaum loj dua.

“Kuv, tus uas yog tus Tswv, yuav zam txim rau tus uas kuv pom zoo zam txim rau, tiam sis nej yuav tsum zam txim rau txhua tus neeg.”

Yog li ntawd, Christmas yog ib lub caij rau peb ncav tes pab cov neeg uas tsis yog cov uas peb ib txwm hlub thiab peb cov phooj ywg. “Thov kom cov neeg txhua tus uas ua haum Vajtswv siab tau zoo nyob kaj siab lug” tsis yog ib zaj lus rau cov uas peb hlub lawm, xws li peb haiv neeg ntseeg hauv lub Koom Txoos los sis cov pej xeem ntawm peb lub teb chaws, cov nyob hauv peb zej zog, los sis cov uas yog peb haiv neeg xwb. Cov tim tswv twb tshaj tawm kom txhua tus tau zoo nyob kaj siab lug—hais txog cov phooj ywg, cov neeg uas peb tsis paub, thiab cov yeeb ncuab huv tib si. Christmas yog ib lub caij nco ntsoov tias peb txhua tus yog Leej Txiv Saum Ntuj Ceeb Tsheej cov me nyuam, tus uas txib Nws Tib Leeg Tub los kom txhiv txhua tus dim kev tuag. Peb Leej Txiv Saum Ntuj Ceeb Tsheej kuj muab kev cawm seej thiab kev tsa nto rau noob neej txhua tus yog tias lawv ua tej yam no: ntseeg tus Tswv, Yexus Khetos; hloov siab lees txim; ua kev cai raus dej; thiab ua raws li tej kev cai thiab cov kab ke ntawm txoj moo zoo.

IV.

Lub Hwj Huam ntawm Christmas txhawb nqa peb kom peb siv lub caij no hla tej ciaj ciam kom txhawb nqa kev to taub thiab kev hlub nrog tib neeg ntawm txhua haiv neeg thiab txhua lub teb chaws. Txawm yog Tsoom Haiv Neeg Ntseeg hauv Hnub Nyoog Kawg yog feem coob, ib yam li nyob hauv Utah, los sis yog feem tsawg, xws li nyob lwm qhov chaw los, peb yuav tsum ncav tes pab Vajtswv cov tub thiab cov ntxhais tag nrho. Peb yuav tsum muaj siab xav ua phooj ywg nrog txhua tus neeg tiag, cov uas ntseeg ntuj li peb thiab cov uas tsis ntseeg li peb. Peb yuav tsum ua raws li txoj lus txib uas Vajtswv hais kom tus yaj saub Mauxes qhia rau tsev neeg Ixayees.

“Tsis txhob saib tsis taus cov neeg txawv teb chaws uas nrog nej nyob hauv nej lub teb chaws. Ua zoo rau lawv ib yam li nej ua zoo rau nej cov Ixayees, thiab hlub lawv ib yam li nej hlub nej lub cev.”

Peb yuav tsum qhia peb cov me nyuam kom lawv ua siab zoo rau txhua tus. Kuv tu siab thaum kuv hnov txog cov niam tsev txiv tsev uas tsis yog Haiv Neeg Ntseeg hauv Hnub Nyoog Kawg hauv peb zej zog no uas tu siab vim lawv ntseeg tias cov ntseeg cov me nyuam los sis cov tub hluas ntxhais hluas tau tsis xav nrog lawv cov tub thiab cov ntxhais. Kuv vam hais tias tsis tshua muaj sij hawm zoo li no zuj zus. Tsim nyog uas peb yog cov zoo siab thiab cov uas muaj lub siab dawb siab zoo tshaj sawv daws.

Peb yeej yuav tsum tsis txhob koom nrog leej twg los sis ua tej yam uas ua rau peb tso peb txoj kev ntseeg tseg los yog ua rau peb tsis rau siab teev ntuj. Tiam sis kev ua li ntawd yeej tsis ua rau peb muaj cai tsis xav txog lwm tus. Thiab yuav tsum tsis txhob ua rau peb tsis xav koom tes pab ua tej hauj lwm uas txhua tus neeg yeej muaj siab xav txog.

Peb yuav tsum muaj lub siab txais zaj lus hais tias “thov kom cov neeg txhua tus uas ua haum Vajtswv siab tau zoo nyob kaj siab lug” los ntawm peb txoj kev muaj siab xav pab lwm tus. Ib yam li Christmas yog kev ua koob tsheej txog tus uas muab Nws txoj sia rau peb txhua tus, yog li ntawd, peb txhua tus yuav tsum siv sij hawm hauv lub caij Christmas kom ua zoo zuj zus pab peb cov kwv tij zej zog.

Thaum peb ua li no—thaum lub hwj huam ntawm Christmas nkag hauv peb lub siab thiab tej yam uas peb ua—los peb yuav pab ua lub hom phiaj uas kav mus ib txhis li kom “cov neeg uas nyob hauv ntiaj teb txhua tus uas ua haum Vajtswv siab tau zoo nyob kaj siab lug.” Twb txog lub sij hawm rau peb txhua tus ua li no, vim txhua hnub yog ib hnub ze dua rau tus Tswv txoj kev los zaum ob. Ib yam li Thawj Tswj Hwm Russell M. Nelson tau qhia peb hauv lub rooj sab laj thaum lub Kaum Hli Ntuj hais tias, “Tej yam zoo tshaj tseem yuav los vim tus Tswv khiav Nws txoj hauj lwm nrawm nroos. Tej yam zoo tshaj tseem yuav los thaum peb hloov siab thiab hloov peb lub neej kom ua raws li Yexus Khetos.” Nws hais tas li ntawd.

Tam sim no kuv hais tej lus los ntawm “Tus Khetos uas Muaj txoj Sia Nyob: Cov Thwj Tim tej Lus Tim Khawv.” Zaj no hais tias:

“Thaum peb nco txog Yexus Khetos txoj kev yug los hauv ntiaj teb uas tau muaj ob txhiab xyoos tas los lawm, peb hais peb tej lus tim khawv txog Nws lub neej uas zoo tshaj plaws thiab txog Nws txoj kev theej txhoj uas muaj hwj chim tsis txawj kawg. Tsis tau muaj leej twg uas tau pab cov neeg uas nyob hauv ntiaj teb no npaum li Nws tau pab.”

Hais ntxiv hais tias, “Peb ua tim khawv tias Nws lub neej, uas tseem ceeb rau kev suav xyoo hauv ntiaj teb, tsis tau pib hauv lub nroog Npelehees los sis tsis tau kaw saum lub roob Khaulakhauthas. Nws yog Leej Txiv Thawj Tug Yug, Vajtswv Tib Leeg Tub, thiab lub ntiaj teb tus Cawm Seej. …

“Peb muaj lub siab mos siab muag tshaj tawm hais tias Nws lub pov thawj hwj thiab Nws lub Koom Txoos muaj rov qab los nyob hauv ntiaj teb no lawm—‘los ua rau saum tej ncej …uas yog cov thwj tim thiab cov yaj saub, Yexus Khetos … yog tus ncej tas.’

Hais ntxiv hais tias, “Peb ua tim khawv tias yuav muaj ib hnub twg uas Nws yuav rov qab los nyob hauv ntiaj teb. ‘Thaum ntawd tus Tswv yuav muab nws lub hwj chim ci ntsa iab nthuav qhia rau neeg ntiaj teb txhua tus pom.’” Hais tas li ntawd. “Nws yog tus Vaj Ntxwv uas kav tag nrho tej vaj ntxwv thiab tus Tswv uas kav tag nrho tej tswv, thiab txhua lub hauv caug yuav tsum tau txhos thiab txhua tus nplaig yuav tau pe hawm tab meeg Nws.

“Peb ua Nws cov Thwj Tim uas Nws tau tsa li kev cai hais lus tim khawv—hais tias Yexus yog tus Khetos uas muaj txoj sia nyob, Vajtswv Leej Tub uas tsis txawj tuag. Nws yog tus Vaj Ntxwv Emanu-es zoo, uas niaj hnub sawv ntawm Nws Leej Txiv sab tes xis.” Zaj lus hais ntxiv tias, “Nws yog txoj kev kaj, yog txoj sia, thiab kev cia siab rau lub ntiaj teb. Nws txoj kev yeej yog txoj kev uas coj peb mus rau txoj kev zoo siab hauv lub neej no thiab rau txoj sia nyob mus ib txhis hauv lub neej tom ntej no. Peb ua Vajtswv tsaug rau Nws lub txiaj ntsim zoo tshaj plaws uas yog Nws Leej Tub.”

Los ntawm Yexus Khetos lub npe, amees.