Tus Me Nyuam Yexus Khetos Nws Yug Los Theej Nej lub Txhoj

Peb tau koob hmoov zoo mloog cov nkauj zoo nkauj kawg nkaus li yom? Ua tsaug ntau rau pawg hu nkauj no, pawg qoj nkauj, thiab cov uas coj nkauj. Kuv tsis pom nej vim cov ntoo no thaiv nej, tiam sis kuv paub nej nyob ntawd.

“Me Nyuam Dawb Huv, Me Nyuam Los Pw” yog ib zaj nkauj Christmas uas kuv nyiam heev.

Cov yaj dab ntub, Cov neeg nyob tu

Mus txog rov muaj lub hnub tshiab;

Pom lub yeeb koob, ua tib zoo mloog

Txoj moo zoo uas muaj tseeb tiag.

Zoo siab hu nkauj, tsis seev yees ntxiv.

Ua Vajtswv tsaug, pom lub hnub ci,

Tus Me Nyuam Yexus Khetos,

Nws yug los theej nej lub txhoj!

Thaum kuv yog ib tug me nyuam ntxhais, kuv niam thiab txiv hu kuv ua “Tus Me Yaj Tammy,” yog li ntawd thaum phau vaj lug kub piav txog tus neeg yug yaj thiab nws cov me nyuam yaj, kuv ib txwm xav tias yog hais txog kuv xwb.

Qhov no yeej tseeb thaum hais txog zaj dab neeg Christmas thiab cov tim tswv uas tshwm sim rau cov neeg yug yaj, zov lawv cov yaj, thaum tsaus ntuj. Kuv xav seb yuav zoo li cas yog kuv nyob ntawd thiab kuv mus cuag tus me nyuam nyob hauv ib lub dab nyuj. Kuv tseem nyiam xav txog tej duab no txhua xyoo thaum kuv xav txog Nws txoj kev yug los.

Lwm daim duab uas kuv nyiam heev los ntawm ib zaj dab neeg uas Txwj Laug John R. Lasater qhia.

Ntau xyoo tas los, Txwj Laug Lasater mus xyuas ib lub teb chaws nyob Afikas Teb thaum nws nyob ntawm ib pawg neeg sawv cev rau tsoom fwv.

Muaj ib hnub, thaum lawv caij hauv tsheb dub ntev ntev limousine hla tiaj av qhuav, ib lub tsheb raug xwm txheej. Thaum lub tsheb nws nyob haud txog mus pem lub ncov roob nws pom tias thawj lub tsheb twb nres ntawm ntug kev. Nws hais tias, “Qhov uas kuv pom yog ib qhov uas kuv nco ntsoov txij thaum ntawd los.”

Ib tug neeg yug yaj, hnav cev thav ntxwv ntev ib yam li thaum tus Cawm Seej muaj sia nyob, sawv ze lub tsheb limousine thiab nrog tus neeg tsav tsheb sib tham. Muaj ib pab yaj nyob ze uas muaj kwv yees li 15 tus yaj.

Tus neeg tsav Txwj Laug Lasater lub tsheb piav tias, lub tsheb uas nyob ua ntej tau tsoo ib tug yaj ua rau tus yaj raug mob. Thiab vim yog tus huab tais lub tsheb, tus neeg yug yaj muaj cai txais nqi uas yog 100 npaug tus nqi muag tus me nyuam yaj thaum nws loj hlob tag lawm. Tiam sis tib txoj kev cai ntawd hais tias, yuav muab tus me nyuam tua tuag thiab muab cov nqaij faib rau cov neeg.

Ces tus neeg tsav tsheb hais tias, “Tiam sis cia li saib, tus neeg yug yaj yuav tsis txais nyiaj; lawv yeej ib txwm tsis txais.” Thaum nug vim li cas, nws hais ntxiv tias, “Vim nws hlub txhua tus ntawm nws cov yaj.”

Lawv saib tus neeg yug yaj ncav tes mus puag tus me nyuam yaj uas raug mob hauv nws txhais tes. thiab muab nws thav ntxwv ntev qhwv tus me nyuam yaj. Nws maj mam plhws tus me nyuam yaj, thiab pheej rov qab hais ib lo lus, es thaum Txwj Laug Lasater nug lub ntsiab ntawm lo lus ntawd, lawv qhia nws tias, “Auj, nws hais tus me nyuam yaj lub npe. Tag nrho nws cov yaj muaj ib lub npe, rau qhov nws yog lawv tus neeg yug yaj, thiab cov neeg yug yaj zoo paub txhua tus yaj lub npe.”

Yaxayas tau cog lus rau peb tias, “Nws yuav sau zog tej me nyuam yaj los puag rau ntawm nws ob txhais npab, nws yuav muab lawv puag hlo rau hauv nws lub xub ntiag.”

Yog peb yuav nco qab ib yam dab tsi hauv lub caij Christmas no, tsim nyog peb nco ntsoov tias peb yog Nws li. Nej puas nco qab thaum Yexus Khetos hais rau Petus, “Yugkuv cov me nyuam yaj …kuvpab yaj”?

“Hnub no nejtus Cawm Seej twb yug los rau hauv Daviv lub nroog lawm, nws yog Khetos uas yog tus Tswv.”

“Vim ib tug me nyuam yuav yug los rau peb, yuav muab ib tug me tub rau peb.”

Nws yug los kom txhawb nqa peb txhua tus. Thiab yog Nws yog leej twg li, Nws yeej yog nej li. Tus me nyuam Khetos tau yug los rau nej.

Tiam sis Yaxayas yeej ceeb toom tias, “Peb txhua tus zoo li tej yaj uas yuam kev lawm.” Tej zaum peb txhua tus tau muaj sij hawm thaum peb xav tias peb zoo li ib tug yaj loj leeb los sis ib tug yaj uas ploj lawm. Hmo no, kuv hais tias peb txhua tus yeej yog cov yaj uas raug mob thiab xav tau tus Tswv Yug Yaj, uas yuav puag peb hauv Nws lub xub ntiag ntawm Nws txoj kev hlub. Rau qhov txoj kev txawj tuag txhais tias peb muaj ntau yam uas puas, uas xav tau kev kho.

Thiab kuv tsis paub seb puas muaj ib lub sij hawm ntawm txhua lub lim tiam uas kuv xav tau tus Txhiv Dim ntau tshaj hnub Sunday thaum noj lub cim nco txog. Kuv coj kuv lub siab mob tuaj thiab xav txog tej lus thiab tej lub cim thaum “lub sij hawm … kom ua rau sab ntsuj plig rov qab muaj zog.” Tiam sis tej lub sij hawm kuv poob siab nthav thaum uas kuv xav txog lub lim tiam dhau los, es kuv pom tias yeej yog tib co kev txhaum, tib co kev qaug zog uas kuv xav txog hnub Sunday dhau los. Thiab ua rau kuv tu siab kawg.

Nej puas muaj tej lub sij hawm zoo li no?

Hnub no kuv caw kom nej sim ua ib yam tshiab. Thaum txog lub sij hawm dawb ceev tshaj plaws ntawm lub lim tiam no, yog tias nej tu siab kawg li, cia li xav txog qhov uas Nws hu nej lub npe, thiab mus cuag Nws. Saib nej tus Cawm Seej hauv koj lub siab, nrog Nws lub ntsej muag ci thiab Nws txhais caj npab qhib rau nej, hais tias, “Kuv twb paub tias nej yuav xav li no! Yog vim li ntawd kuv thiaj los rau hauv ntiaj teb thiab raug kev txom nyem.” Nej txais tau Nws txoj kev pab thiab Nws txoj kev tshav ntuj tam sim no, tsis tas tos mus txog thaum kawg thaum nej xav tias nej twb tau ua zoo tag nrho lawm. Rau qhov leej twg xav li ntawd? Tsis muaj leej twg uas kuv paub.

Nco ntsoov tias, peb mus rau lub koom txoos, mus txais lub cim nco txog ntawm tus Tswv Rooj Mov, kom txais kev kho, thiab kom huv si.

Ntau xyoo tas los, thaum kuv ua hauj lwm hauv lub Koom Haum Me Nyuam Yaus, kuv hais ib zaj dab neeg txog ib tug uas nyuam qhuav ua kev cai raus dej. Kuv hais tias nyaj tus phooj ywg no yog ib tug mej zeej ntawm lub Koom Txoos uas huv tshaj. Ces nyob ntawm kab pem hauv ntej, ib tug me nyuam tub hlob tsa tes thiab hais tias, “Kuv yeej huv npaum li nws rau qhov kuv tau ua kev cai raus dej thiab kuv nyuam qhuav noj lub cim nco txog.” Kuv txaj muag teb hais tias, “Yog li kuv hais—ib yam li nws hais.”

Kuv cov phooj ywg, peb puas nco ntsoov thiab to taub cov lus qhuab qhia no? Yog tias peb siv zog ua raws li peb tej kev khi lus thiab txhua hmo thaum peb thov Vajtswv—peb qhia tias peb tau ua li cas thiab hloov siab lees txim—ces yuav ntxuav peb kom dawb huv txhua hnub. Thiab dhau los ntawm txoj kab ke txais lub cim nco txog, ces yuav ntxuav peb huv zoo npaum li hnub uas peb ua kev cai raus dej.

Rau kuv mas, Hnub Caiv tau hloov los ua ib hnub so. Tsis yog so rau kuv sab cev nqaij daim tawv xwb, tiam sis so ntawm kev muaj txim thiab kev ntshai, ntawm kuv tej kev tsis txaus thiab kuv tej kev qaug zog. Txawm yog rau ib hnub xwb!

Ib zaj dab neeg hauv cov vaj lug kub uas ua rau peb muaj lub siab muag heev qhia peb tias txoj kev so no zoo li cas. Nyob hauv Phau Ntawv Maumoos, thaum tus Cawm Seej uas sawv rov los mus xyuas “lwm cov yaj” nyob teb chaws Amelikas, thiab tom qab Nws hnov lawv tej kev xav tau, Nws caw txhua tus uas raug mob ntawm sab cev nqaij daim tawv—cov uas tuag ceg, dig muag, lag ntseg, los sis cov uas “raug txom nyem ib yam dab tsi”—los cuag Nws.

Kuv xav tias cov uas mus cuag Nws uas xav tau kev pab ntawm sab cev nqaij daim tawv yeej pom tseeb. Tiam sis hauv kuv lub siab, kuv kuj pom tib neeg zoo li kuv tus kheej thiab lwm tus uas kuv hlub tos kom ntsib tus Cawm Seej cov uas raug kev txom nyem uas pom tsis tau. Nws hais kom cov uas raug txom nyem ib yam dab tsi los “thiab Nws kho tau lawv txhua tus zoo.”

Cia li saib tias, zaum no nqe vaj lug kub tsis hais tias Nws kho kom lawv tsis muaj mob dab tsi li. Kuv nyiam lub tswv yim no uas hais tias kev kho kom zoo thiab kev kho kom tsis muaj mob dab tsi li yeej sib txawv. Kev kho kom tsis muaj mob dab tsi txhais tias peb zoo li qub lawm, es peb txhua tus xav tau qhov no, puas yog? Tiam sis kev kho kom zoo yeej txawv. Kev kho tseem muaj qhov txhab qub, tiam sis ua rau peb txawv ntawm yav tas los.

Twb yog tus Cawm Seej ntawm lub ntiaj teb, uas sawv rov los, tseem muaj tej qhov txhab hauv Nws txhais tes, Nws txhais ko taw, thiab sab tav—ua pov thawj tias Nws yuav nco ntsoov peb thiab hais tias Nws tej tawv nqaij siav yog kho kom peb zoo. Thiab tej zaum, thaum hnub uas tus Cawm Seej kho lawv, Nws puag lawv thiab, coj txhua tus hauv Nws lub xub ntiag.

Hmo no, tej zaum nej xav tias nej raug puas tas lawm thiab tsis paub nej puas yuav txais Nws txoj kev kho. Tiam sis qhov ntawd puas muaj tseeb? Txhua hnub Sunday thaum lub sij hawm txais lub cim nco txog, Nws tsa nej tawm ntawm txoj kev muaj plua tshuav, muab nej qhwv rau hauv Nws thaj ntxwv ntev, thiab puag nej hauv Nws lub xub ntiag.

Thaum hmo Christmas dawb ceev ntawd, ib tug tim tswv tshaj tawm txoj moo zoo uas yog kev xyiv fab kawg nkaus. “Nws uas yog tus zoo tshaj los uas tus tsawg kawg nkaus—tus Tswv Yug Yaj Saum Ntuj Ceeb Tsheej uas tau los ua tus Me Nyuam Yaj.” “Tus Vaj Ntxwv ntawm txhua tus vaj ntxwv pw hauv ib lub dab nyuj. Nws tau yug los ua peb tus phooj ywg thaum peb raug txhua yam kev txom nyem.” Kuv ntseeg tias tus tim tswv hais tias, “Nej tus phooj ywg, nej tus phooj ywg zoo tshaj plaws tau los lawm. Thiab yog tias nej tau paub tias Nws saib xyuas nej zoo npaum li cas, nej tau saib Nws ntau npaum li cas thaum nej nrog Nws nyob ua ntej, yog nej twb to taub txhua yam uas Nws yuav txi rau nej thiab txhua yam uas Nws kam ua kom pab nej rov los tsev, ces nej yeej yuav maj mus ntsib Nws tim lub dab nyuj.”

Kuv ua tim khawv tias me nyuam mos liab nyob hauv lub dab nyuj, tus uas peb pe hawm thiab peb xav seb yuav zoo li cas yog tias peb puag Nws, Nws twb los ua li ntawd rau peb.

Aws, tus me nyuam Khetos tau yug los rau nej!

Los ntawm Yexus Khetos lub npe, amees.