Tej lub Txiaj Ntsim uas Muaj Nqis Tshaj

Hmo no, kuv kuj zoo siab kawg hais lus rau nej txog lub caij Christmas uas tseem ceeb thiab dawb ceev heev. Tsis tau muaj ib yam dab tsi hauv lub ntiaj teb zaj keeb kwm uas tseem ceeb tshaj Yexus ntawm Naxales txoj kev yug los thiab txoj hauj lwm qhuab qhia uas pib ob txhiab xyoo tas los. Nyob hauv lub ntiaj teb no, peb ntsuas caij nyoog raws li qhov txuj ci tseem ceeb no.

Tib neeg nyob thoob plaws lub ntiaj teb ua koob tsheej txog tus Tswv txoj kev yug los, tiam sis muaj ib txoj kab lig kev cai uas txhua leej txhua tus ua.

Nyaj txoj kab lig kev cai no tau pib los ntawm zaj lus hauv phau Mathais txog cov txiv neej muaj tswv yim uas tuaj pe hawm Yexus. Lawv nqa tej khoom plig uas muaj nqis heev tuaj. Hnub no, txoj kab lig kev cai muab khoom plig yeej yog ib feem ntawm txhua tus txoj kev ua koob tsheej txog lub caij Christmas.

Thawj qho khoom plig thaum Christmas uas kuv nco qab yog ib lub me nyuam rab phom yas uas muaj txoj hlua khi ib lub uas ntsaws hauv lub hau phom, thiab ib qho khoom ua si os uas dhia tau. Yeej ua rau ib tug uas muaj plaub xyoos xwb zoo siab kawg nkaus li. Tus os mus dhia ncig ua ib lub voj voog es ntshe nws khiav tsis dim vim kuv tsom kuv rab phom tua tus os ze li rau chib xwb. Tiam sis tsis ntev tom qab ntawd khoom ua si ntawd raug piam tag, ib yam li txhua yam khoom, kev zoo siab los ntawm yam khoom ntawd los twb nyob ntev li ib me pliag xwb ces tsis nco qab lawm.

Hmo no, kuv xav hais txog peb qhov khoom plig uas peb txhua tus muab tau rau lwm tus hauv lub caij Christmas no, thiab tas peb lub neej, uas ua rau peb muaj kev xyiv fab tseeb uas kav ntev.

Khoom plig thib ib yog lub txiaj ntsim hais lus tim khawv. Nov yog ib lub txiaj ntsim uas los ntawm yus tus kheej thiab thaum yus ua siab dawb muab qhov no, ces yus yeej qhib siab qhia yus lub siab xav rau lwm tus. Qhov uas muaj nqis tshaj tej kub thiab tej tshuaj tsw qab yog qhov uas peb ua tim khawv tias Yexus Khetos yog peb tus Cawm Seej thiab tus Txhiv Dim thiab Nws yeej yog tus tseem ceeb tshaj plaws ntawm peb txoj kev ua koob tsheej txog lub caij Christmas.

Thaum wb rau tus me nyuam tseem yau, Jacqui thiab kuv txiav txim siab tias thaum muaj tsev neeg hmo ua ke, yuav tsis qhia ib zaj lus, tiam sis peb sawv daws yuav hais lus tim khawv. Tom qab kuv hais kuv zaj lus tim khawv, wb tus ntxhais Chelsea, uas nyaj muaj 16 xyoo thaum ntawd, ntsia kuv hais tias, “Txiv kuv tsis tau hnov koj hais koj zaj lus tim khawv dua!” Ua rau kuv xav tsis thoob kiag txog nws tej lus. Thaum ntawd kuv yog ceg txheem ntseeg tus thawj tswj hwm thiab kuv paub tias Chelsea twb hnov kuv hais lus tim khawv ntau zaus nyob hauv lub tsev koom txoos thiab hauv tsev. Tiam sis thaum lub sij hawm ntawd, nws twb hnov kuv zaj lus tim khawv thiab hnov hauv nws nruab siab zoo li yog thawj zaug xwb. Nws tau qhia kuv ib yam uas kuv yeej nco ntsoov: lub txiaj ntsim hais lus tim khawv yeej muaj nqis thiab qhov uas yus hais ntau ua rau yus muaj hwj chim.

Khoom plig thib ob yog lub txiaj ntsim zam txim. Nyaj peb txhua tus twb raug kev nyuaj siab vim lwm tus hais lus tsis zoo los sis ua tej yam phem rau peb. Thiab yog peb ua siab ncaj, ces peb paub tias peb twb ua rau lwm tus tu siab thiab. Yexus Khetos qhia hais tias, “Kuv, tus Tswv, yuav zam txim rau tus uas kuv pom zoo zam txim, tiam sis nej yuav tsum zam txim rau txhua tus neeg.” Ces Nws hais ntxiv hais tias thaum peb tsis zam txim rau lwm tus tej kev txhaum uas lawv ua rau peb, ces peb muaj kev txhaum loj dua.

Thaum peb ua siab dawb zam txim pub rau lwm tus, ces peb dim taus kev muaj lub siab iab, kev txiav txim, los sis kev ua pauj.

Kuv muaj ib tug phooj ywg zoo nyob hauv South Africa hu ua Sandile Makasi. Nws tso cai rau kuv hais nws zaj lus txog kev zam txim. Thaum Sandile tseem tsis tau muaj ob xyoos, nws txiv, uas muaj 28 xyoo xwb, mas cov tub ceev xwm tsim txom nws thiab muab nws tua tuag hauv lub caij uas tseem fwv muab neeg sib cais. Tom qab ntawd Sandile kawm txog tej xwm txheej uas nws txiv raug thaum nws raug tua tuag. Tam sim no kuv hais nws tej lus:

“Thaum kuv yog ib tug me nyuam tub kuv tu siab thiab chim siab heev vim lawv ua lim hiam rau kuv txiv. Vim li cas lawv tau muab nws tua tuag? Kuv tsis tau muaj kuv txiv thiab tus uas qhia kuv lawm, thiab kuv niam tsis muaj nws tus khub uas hlub nws.

“Thaum kuv kawm tias lawv ua lim hiam npaum li cas thaum lawv tsim txom nws, ua rau kuv lub siab lub ntsws chim heev, kuv npau taws thiab ntxub cov tub ceev xwm thiab cov neeg dawb.

“Kuv tseem xav zoo li no mus txog thaum kuv nrhiav tau Yexus Khetos txoj moo zoo uas tau muab txum tim rov qab los. Txoj moo zoo no tau pab kuv to taub tias kuv yuav tsum zam txim rau cov tub ceev xwm rau lawv tej kev txhaum cai, thiab kuv txoj kev xyiv fab thiab kev vam meej ntawm sab ntsuj plig yeej nyob ntawm qhov uas kuv ua tau li no.

“Kev ua li no nyuaj dua li kuv hais, tiam sis kuv siv zog thov Vajtswv, thiab thaum sij hawm dhau mus tus Tswv tau pab kuv zam txim pub rau kuv cov yeeb ncuab …. Kuv tsis muaj lub siab mob, kuv siab tus; tsis muaj kev ntxub ntxaug, kuv muaj kev hlub xwb; tsis muaj kev tsaus ntuj hauv kuv lub siab lub ntsws, kuv tsuas muaj txoj kev kaj thiab kev kaj siab lug.”

Ua tsaug Sandile vim koj coj yam ntxwv txog kev muab lub txiaj ntsim kev zam txim rau lwm tus.

Qhov thib peb, lub txiaj ntsim uas yog txoj kev hlub zoo li Yexus Khetos. Ntawm tag nrho tej txiaj ntsim ntawm sab ntsuj plig, tsis muaj ib lub zoo tshaj kev siab hlub. Yexus twb qhib siab hais tias Nws hlub lwm tus thiab Nws qhia peb kom ib leeg hlub ib leeg.

Thaum peb coj raws li tus Cawm Seej tus yam ntxwv thaum peb qhia lwm tus peb hlub lawv los ntawm tej lus uas peb hais thiab tej yam peb ua, lawv yuav paub txog Vajtswv txoj kev hlub dhau los ntawm peb.

Ob peb xyoos tas los, kuv ntsib ib tug tub hluas uas muaj 23 xyoos nyob hauv Washington uas coj yam ntxwv zoo txog qhov no. Cov tub txib twb qhia nws rau peb lub hlis, thiab qhov ci hauv nws lub ntsej muag thiab nws txoj kev ua neej twb hloov ntau heev. Muaj ib hmo nws nrog ob tug tub txib tham xov tooj, thiab ua ntej nkawd khwb xov tooj, nkawd hais tias, “Wb hlub koj, Michael.” Nws muab tus xov tooj tso cia thiab xav tias, “Ua cas. Kuv tsis swm qhov ntawd. Ntshe kuv tsis kam hais li ntawd rau lwm tus.” Nws txiav txim siab nws yuav tsum muaj cuab kav qhia nws niam tias nws hlub nws niam. Nws nyob deb li ob peb teev hauv lwm qhov chaw ntawm lub xeev. Thaum nws hu tuaj thiab hais tias, “Kuv hlub koj, Niam,” ces nws niam teb kiag hais tias “Koj vwm los? Koj puas tau mus rau tus kws kho mob thiab hnov lus xov phem? Koj puas rov qab raug kaw?” Ces nws qhia nws niam txog qhov uas nws nrhiav tau txoj moo zoo lawm thiab ua rau nws hloov siab, thiab nws twb muab kev haus luam yeeb thiab kev siv tshuaj phem tso tseg thiab nws yuav ua kev cai raus dej.

Kuv xav tias zaj no yog ib zaj lus piv txwv zoo kawg txog qhov uas tib neeg xav li cas thaum lwm tus ua kom lawv paub txog Vajtswv txoj kev hlub. Ua rau lawv lub siab mos muag ces ua rau lawv xav muab lub txiaj ntsim kev hlub rau lwm tus.

Nim no, hmo no, peb twb hais txog tej khoom plig uas muaj nqis xws li tej kub, tej tshuaj tsw qab, thiab tshuaj tsw qab myrrh. Kuv twb sim seb es yus yuav tau tej khoom no nyob hauv Amazon. Tiam sis lwm lub txiaj ntsim uas kuv hais txog hmo no los tsis muaj hauv ib lub tsev yuav khoom. Yeej yog tej lub txiaj ntsim uas muaj nqis tshaj plaws, thiab tej no yuav ua rau tus uas txais thiab tus uas muab tej no muaj kev xyiv fab tseeb uas kav mus ib txhis.

Yog li ntawd thaum nej xav seb nej yuav muab tej khoom plig twg hauv lub caij Christmas no, kuv caw nej:

1. Hais lus tim khawv rau nej tsev neeg thiab cov uas nej hlub. Thaum nej muab lub txiaj ntsim uas muaj nqis no, nej zaj lus tim khawv yuav muaj zog zuj zus tuaj.

2. Cia li zam txim rau ib tug uas nej xav tias ua txhaum rau nej los sis ua rau nej raug mob. Thaum nej muab lub txiaj ntsim no, nej yuav nyob kaj siab lug thiab txais kev kho mob.

3. Cia li pab lwm tus paub txog Vajtswv txoj kev hlub. Yog tias tsim nyog hais, cia li qhia lawv tias nej hlub lawv. Thaum nej saib lwm tus zoo li Vajtswv saib lawv, ces nej txoj kev hlub yuav loj zuj zus, thiab nej kuj yuav muaj Vajtswv txoj kev hlub hauv nej lub neej.

Kuv cia siab nej txhua tus yuav muaj ib lub caij Christmas uas muaj kev xyiv fab heev. Kuv ua tim khawv txog Yexus uas los ntawm Naxales Nws muaj txoj sia nyob. Nws yog peb tus Cawm Seej, peb tus Txhiv Dim. Nws yog peb tus phooj ywg zoo tshaj plaws. Kuv qhuas Nws. Kuv hlub nws. Vim Nws muab Nws lub txiaj ntsim rau peb txhua tus, lub txiaj ntsim uas twb them tus nqi loj kawg nkaus kom yuav tau, peb thiaj li yuav tsim nyog txais tau lub txiaj ntsim tseem ceeb tshaj plaws li—txoj sia nyob mus ib txhis nrog Leej Txiv Saum Ntuj Ceeb Tsheej uas hlub peb.

Los ntawm Yexus Khetos lub npe, amees.