Kev Npaj Ntsib tus Cawm Seej

Hauv lub caij Christmas no, kuv xav txog cov uas nyob deb ntawm lawv lub tsev, xws li cov tub txib coob uas ua hauj lwm tam sim no.

Thawj zaug uas kuv tsis nyob hauv tsev hauv lub caij Christmas yog thaum kuv yog ib tug tub txib nyob Askiv Teb, lub Kaum Ob Hlis Ntuj xyoo 1960. Kuv ua hauj lwm hauv Swindon, Askiv Teb.

Wb twb qhib Swindon rau cov tub txib ua hauj lwm 90 hnub ua ntej lub sij hawm ntawd. Wb tau xauv ib chav rau Hnub Caiv tej kev sib ntsib. Wb tau koob hmoov vim muaj ob peb tug neeg hloov siab los ntseeg—pib ua ib ceg ntseeg.

Thaum txog Hmo Ua Ntej Christmas kuv tus khub, Txwj Laug Noel Lake, thiab kuv wb txiav txim siab ntsib cov neeg hauv lawv lub tsev hauv cheeb tsam uas wb ua hauj lwm thiab hais ib me ntsis zaj lus txog Christmas thiab foom koob hmoov rau lawv. Yog ib hmo zoo nkauj kawg, thiab lub hli ci ntsa iab dhau cov huab saum ntuj thiaj li ua rau wb xav tias lub ntuj ceeb tsheej nyob ze. Ua ciav wb pom hais tais txhua tus nyob hauv zej zog ntawd twb qhib TV saib ib tug kws tso luag thiab hu nkauj, Harry Secombe. Nws hu zaj nkauj uas sawv daws nyiam hu ua “Foom Koob Hmoov rau lub Tsev No.” Nws tshoov txhua tus lub siab hu nkauj tej lus dawb ceev no, hais tias:

Foom koob hmoov rau cov neeg no.

Ceev lawv cia kom txhob ua txhaum.

Foom hmoov rau peb kom peb yuav

Tsim nyog nrog Koj nyob, peb tus Tswv.

Nws txoj kev hu nkauj ua rau wb los kua muag. Zaj nkauj no, uas los ntawm yuav luag txhua lub tsev, twb nrov mus puag saum ntuj thiab cov huab ua rau nws lub suab rov los roos peb. Txwj Laug Luke thiab kuv wb xav hais tias wb yog peb tus Tswv thiab tus Cawm Seej, Yexus Khetos, ob tug tub txib tiag tiag uas sim pab thiab foom koob hmoov rau peb Leej Txiv Saum Ntuj Ceeb Tsheej cov me nyuam.

Thaum kuv yog ib tug tub txib kuv kawm hais tias nyob hauv lub ntiaj teb no peb txhua tus nyob deb ntawm peb lub tsev—peb lub tsev nyob saum ntuj ceeb tsheej. Txoj kev txais kev nplij siab los ntawm lub tsev ntawd yog dhau los ntawm kev ua hauj lwm rau peb tus Cawm Seej.

Ob peb xyoo no, lub Koom Txoos tau yaum peb kom hais ntau txog txoj kev kaj uas tus Cawm Seej muab rau lub ntiaj teb, qhov tseem ceeb yog thaum lub caij Christmas no. Lub Koom Txoos twb khiav ib txoj hauj lwm hu ua Ci Ntsa Iab rau lub Ntiaj Teb kom txhua tus hloov siab los xav txog tus Cawm Seej. Qhov no koom nrog ib txoj hauj lwm kom pab cov neeg txom nyem thiab muab kev pab zoo li Yexus Khetos muab.

Xyoo tas los lub Koom Txoos tau siv tej daim txiag digital loj loj nyob hauv Times Square hauv lub nroog New York City kom qhib Ci Ntsa Iab rau lub Ntiaj Teb

Mary thiab kuv wb nyob thaum qhib kev ua yeeb yam txog tus Cawm Seej txoj kev yug los rau ntawm tej daim txiag digital loj loj. Yog ib yam uas tshoov wb lub siab heev. Xyoo no los twb rov qab qhib kev ua yeeb yam li ua hauv Times Square rau tib neeg saib hauv ntau lub nroog thoob plaws lub ntiaj teb.

Thaum wb nyob hauv New York City, thaum pib ua txoj hauj lwm Ci Ntsa Iab rau lub Ntiaj Teb, kuv pom hais tias muaj tej tsev muag khoom ntau tso tej yam tseem ceeb rau tib neeg saib hauv cov qhov rais.

Kuv nco qab txog ntawv xov xwm New York Times uas muaj ib zaj hu ua: “Twb Rov Qab Tso tej Yam rau Neeg Saib hauv Qhov Rais rau lub Caij So Hauj Lwm.” Cov Neeg Yuav Khoom Rov Los Thiab.” Zaj xov xwm no hais txog kab lig kev cai uas kho yam ub yam no hauv chaw muag khoom loj tej lub qhov rais hauv txoj kev Fifth Avenue nyob hauv New York City. Yam li kuv nco txog zaj ntawd thiab thaum kuv mus xyuas, tsis tau muaj ib lub qhov rais uas lawv tso tej yam txog Christmas los yog muaj tus Me Nyuam Mos Liab Yexus Khetos rau tib neeg saib.

Thaum kuv nyeem zaj no kuv nco txog thaum kuv yog ib tug tub hluas kuv pom tej yam uas lawv tso rau tib neeg saib hauv cov qhov rais ntawm tej tsev muag khoom hauv Salt Lake City uas muaj tus me nyuam mos liab Khetos. Kuv kuj nco qab txog ib zaj los ntawm lub sij hawm ntawd txog ib lub chaw muag khoom nyob hauv Amelikas qhov Nruab Nrab Sab Hnub Poob uas xav qhia txog lub ntsiab ntawm Christmas kom tib neeg xav txog Christmas thiab kom lawv tuaj yuav khoom. Lawv tsa ib daim ntaub ntev ntev uas hais tias, “Yog Yexus Khetos tuaj hmo no, ces nws yuav tuaj xyuas leej twg?” Muaj ob peb qho uas lawv tso rau tib neeg saib nyob ntawm cov qhov rais hauv qab daim ntaub ntawd. Yog kuv nco qab yog lawm ces:

• Qhov thib ib yog ib tug poj laug pw hauv txaj uas ib tug kws tu mob saib xyuas. Zoo li nws muaj mob heev.

• Qhov thib ob yog ib tug niam tsev hluas uas muaj ib tug me nyuam mos liab. Pom nws lub ntsej muag zoo siab kawg.

• Qhov thib peb yog ib tsev neeg thiab cov me nyuam uas quaj. Twb pom meej hais tias tsis muaj txaus noj, es ntshe yuav tsis muaj tej khoom plig Christmas.

• Qhov thib plaub yog ib tsev neeg uas muaj nyiaj heev tev ntawv uas qhwv tej khoom plig ntau.

• Qhov thib tsib yog ib tsev neeg zoo uas txo hwj chim muaj ntau tus me nyuam uas zoo siab hu nkauj ua ke.

Thaum kuv xav txog tsib qho no uas tso rau tib neeg saib thiab tej lus hauv daim ntaub ntev ntev hais tias “Yog Yexus Khetos tuaj hmo no, Nws yuav tuaj xyuas leej twg?”, ua rau kuv xav txog ob qho.

Qhov thib ib, peb paub tias thaum tus Cawm Seej rov los zaum ob, peb tsis paub hnub twg los sis teev twg Nws yuav los.

Qhov thib ob, thaum Yexus Khetos los, ib yam li Thawj Tswj Hwm Russell M. Nelson qhia hauv lub tuam rooj sab laj tas los no, “[Nws] yuav rov qab los rau hauv lub ntiaj teb ua tus Mexiyas uas qhib lub caij milenias.” Kom npaj rau lub sij hawm no Thawj Tswj Hwm Nelson hais kom peb, “Rov qab muab [peb] lub neej fij tseg rau Yexus Khetos.” Yog li ntawd, tsim nyog uas daim chij ntev yuav hais tias, “Yog Yexus Khetos tuaj hmo no, ces leej twg yuav npaj siab ntsib Nws?”

Tom qab kuv xav txog tej yam uas lawv tso rau tib neeg saib hauv cov qhov rais, kuv twb xav tias txhua yam yog hais txog tib neeg sab cev nqaij daim tawv thiab sab nyiaj txiag xwb, tiam sis tsis muaj dab tsi hais txog lawv sab ntsuj plig. Tej qhov rais muaj cov neeg uas laus thiab mob kuj muaj cov neeg uas noj qab nyob zoo thiab cov me nyuam mos liab. Kuj muaj cov neeg nplua nuj thiab cov pluag. Tiam sis lawv hnub nyoog, kev noj qab nyob zoo, thiab kev muaj nyiaj txiag npaum li cas tsis qhia peb txog qhov uas tseem ceeb tshaj plaws, qhov uas lawv sab ntsuj plig zoo li cas.

Nyob hauv phau Lus Qhuab Qhia thiab Kev Khi Lus peb nyeem txog tej yam uas yuav tsum ua kom ua kev cai raus dej nyob hauv Yexus Khetos lub Koom Txoos. Tej yam tseem ceeb uas peb yuav tsum ua yog kev txo peb lub hwj chim, muaj “lub siab mob thiab lub siab xav ua zoo,” hloov siab lees txim, thiab “ua hauj lwm rau [Yexus Khetos] kom txog thaum kawg.” Lub hom phiaj yog kom “los ua Yexus Khetos ib tug thwj tim uas rau siab heev” thiab taug txoj kev ua raws li lawv tej kev khi lus zuj zus kom npaj lawv txais tau cov koob hmoov los ntawm Nws txoj Kev Theej Txhoj.

Yexus Khetos yog tus uas coj yam ntxwv txog txhua yam. Nws tshaj tawm hais tias, “Saib seb kuv yog txoj kev kaj; kuv tau ua ib tug yam ntxwv rau nej.” Thaum peb xav txog qhov uas peb sab ntsuj plig zoo li cas, tsim nyog uas peb ntsia ntsoov Nws tus yam ntxwv zoo tag nrho. Tus Cawm Seej tau qhia kev rau peb kom paub nrhiav tau kev zoo siab, kev muaj nqis, thiab kev xyiv fab hauv lub neej no thiab nyob mus ib txhis li. Kev zoo siab thiab kev xyiv fab yog lub ntsiab ntawm Christmas lub hwj huam.

Nyob hauv Yauhas 19:5 peb nyeem hais tias Philaj coj Yexus mus rau cov uas xav muab Nws ntsia saum ntoo khaub lig saib. Nws “ntoo rawv lub kauj hmab pos thiab hnav lub tsho ntev tsam xem. Philaj hais rau lawv hais tias, Nej saib! Tus txiv neej ntawd nyob ntawm no.”

Nyob hauv lub caij Christmas no cia peb saib tus Txiv Neej ntawd, tus uas yog tus Khetos, thiab tej lub txiaj ntsim uas Nws muab rau peb.

Qhov thib ib, cia peb xav txog Nws txoj kev yug los.

Peb paub tias tus me nyuam mos liab tshwj xeeb uas peb ua koob tsheej txog hauv lub caij Christmas no yog Leej Txiv tib leeg Tub. Nws tau txais Nws Leej Txiv lub hwj chim ntawm txoj sia nyob mus ib txhis—lub hwj chim kom muaj txoj sia. Thiab Nws tau txais Nws niam ntawm lub ntiaj teb no lub hwj chim txawj tuag. Vajtswv twb xaiv Nws txij puag thaum chiv keeb los rau Nws ntiag tug hauj lwm dawb ceev no.

Mathais 1:23 hais tias, “Ib tug nkauj xwb yuav xeeb tub thiab yuav yug ib tug me tub thiab sawv daws yuav hu nws lub npe hais tias Emanu-ees. Lub npe no txhais hais tias, Vajtswv nrog peb nyob.”

Qhov thib ob, xav txog Nws lub neej zoo tag nrho uas tsis tau muaj kev txhaum thiab Nws tus yam ntxwv. Txawm yog Nws raug mob, raug txom nyem, thiab txhua yam kev ntxias, Nws twb ua Nws ntiag tug hauj lwm tiav lawm. Nws yog tus uas coj yam ntxwv rau peb xyaum thiab qhia txoj kev rau peb taug. Nws siv Nws lub neej kom tas rau cov neeg pluag, cov neeg txom nyem, cov neeg mob, cov neeg nyuaj siab, thiab ua kom muaj raws li Vajtswv txoj hau kev uas kav ntev mus ib txhis li vim Nws tib leeg xwb muaj hwj chim ua li ntawd.

Qhov thib peb, xav txog Nws txoj kev tuag, txoj Kev Sawv Rov Los, thiab txoj Kev Theej Txhoj.

Hais txog txoj Kev Theej Txhoj, phau Qhia Kuv txoj Moo Zoo hais tias: “Tus Cawm Seej txoj Kev Theej Txhoj yog qhov uas Nws raug txom nyem hauv lub Vaj Khexemanes, Nws txoj kev raug txom nyem thiab kev tuag saum tus ntoo khaub lig, thiab Nws txoj Kev Sawv Rov Los. Nws twb raug txom nyem loj tshaj qhov to taub—ua rau Nws los ntshav ntawm txhua lub qhov hws.”

Nyob hauv phau Lus Qhuab Qhia thiab Kev Khi Lus 76:41 peb nyeem: “Hais tias nws los rau hauv lub ntiaj teb, tus uas yog Yexus, los mus raug muab ntsia rau saum ntoo khaub lig theej neeg ntiaj teb, thiab los ris neeg ntiaj teb tej kev txhaum, thiab los ua rau neeg ntiaj teb hloov ua neeg dawb huv, thiab los ntxuav lawv tawm ntawm tag nrho tej kev ua tsis ncaj ncees.”

Txoj Kev Theej Txhoj yog lub sij hawm thiab lub txiaj ntsim tseem ceeb tshaj plaws uas ib txwm muaj los rau noob neej. Txhua leej txhua tus twb tau ua txhaum, thiab tsuas yog los ntawm Yexus Khetos txoj Kev Theej Txhoj xwb peb thiaj tau kev siab hlub thiab yuav nrog Vajtswv nyob.

Qhov thib plaub, npaj rau Nws txoj Kev Los Zaum Ob.

Nyob hauv Phau Qub , Yauj qhia hais tias: Thaum kawg nws yuav [los sawv nres nroos hauv lub ntiaj teb].” Ib yam li Thawj Tswj Hwm Russell M. Nelson tau qhia tias: “[Yexus Khetos] yuav coj kav Nws lub Koom Txoos nyob ntawm Yeluxalees qub thiab Yeluxalees Tshiab.” Tam sim no yog peb lub caij nyoog npaj rau lub sij hawm no. Cov vaj lug kub hais tias: “Npaj nej tus kheej rau hnub tseem ceeb ntawm tus Tswv.”

Kuv tej lus ntuas kawg yog kom nej hlub thiab ua hauj lwm rau tus Tswv. Thaum peb xav txog peb sab ntsuj plig thiab peb txoj kev npaj ntsib tus Cawm Seej peb yuav tsum xub “Hlub tus Tswv uas yog [peb] tus Vajtswv kom kawg siab kawg ntsws, kawg plab kawg plawv thiab kawg [peb] lub dag lub zog.” Thiab lus txib thib ob, “Hlub [peb] tej kwv tij zej zog ib yam li [peb] hlub [peb] tus kheej.”

Peb txoj kev hlub Vajtswv thiab peb cov kwv tij zej zog yeej yog kev sim siab loj tshaj plaws ntawm peb sab ntsuj plig. Yog peb hlub Vajtswv, peb yuav coj raws li Nws cov lus txib. Thiab yog peb hlub peb cov kwv tij zej zog, ces peb yuav sawv cev rau tus Cawm Seej txhais tes pab lawv.

Nyob hauv phau Lus Qhuab Qhia thiab Kev Khi Lus, tus Cawm Seej hais tias: “Muaj tseeb tiag, kuv yuav qhib cov neeg lub siab, thiab … kuv yuav tsa ib pawg ntseeg los ntawm koj txhais tes.”

Qhov tseem ceeb uas peb ua tau kom qhia tus Cawm Seej tias peb ris Nws txiaj hauv lub caij Christmas no yog qhov uas peb ua Nws cov tub qhe—los yog, sawv cev rau Nws txhais tes nyob hauv lub ntiaj teb no.

Hauv lub caij zoo no, thaum peb ua koob tsheej txog peb tus Tswv thiab tus Cawm Seej, Yexus Khetos, txoj kev yug los, kuv ua tim khawv rau nej tias Nws muaj txoj sia nyob. Nws yog peb tus Yam Ntxwv, tus uas Tuaj Peb Tog thov Leej Txiv, thiab Nws tau ua txhua yam Nws yuav tsum ua kom peb rov qab mus rau Leej Txiv thiab Leej Tub lub xub ntiag. Peb yuav muaj tswv yim yog peb coj raws li Yexus Khetos thiab txais Nws tej lub txiaj ntsim.

Thov kom nej yuav muaj ib lub caij Christmas zoo kawg nkaus thaum nej tsom ntsoov rau Yexus Khetos.

Los ntawm Yexus Khetos lub npe, amees.