Marautaki ni Siganisucu

Kemuni na taciqu kei na ganequ, eda sa vakalougatataki mai na veitukutuku totoka eda sa mai rogoca mai vei Sister Runia, Elder Palmer, kei Elder Cook. Au doka vakalevu niu rawa ni veivakavulici ena so na ka sa vakamacalataki oti.

Sa gauna taletaki ena veiyabaki na Siganisucu. Nida vakananuma na sucu ni noda iVakabula, e vagolei na yaloda kina veika e bibi duadua ena noda bula. Na Siganisucu e vakavuna meda kila ka vakavinavinakataka vakalevu cake na solibula e vakayacori ena vukuda.

I.

Na Siganisucu e vakananumi keda meda veinanumi vakaikeda. Eda marautaki ira vakalevu cake na noda matavuvale. Eda vakavouia na veitaratara kei ira na itokani makawa. Eda ulabaleta na ivakatatao e tawasei keda ena gauna eso ena loma ni yabaki. Era veikidavaki na vulagi ka sega na veicati. E basika tale mai na yalovinaka kei na veikauwaitaki. Na yalo ni Siganisucu e vakavotuya na ka vinaka duadua e tu vei keda.

Na katakata kei na rarama ni Siganisucu e Rarama i Karisito. Me vaka eda wilika ena ivolanikalou ni gauna oqo, na iVakabula, “na rarama dina sa vakararamataka na tamata kecega sa lako mai ki vuravura.” O ira kece ka marautaka na sucu i Karisito—o ira kece e tiko vei ira na ka eda vakatoka na “Yalo ni Siganisucu”—sa nodra e dua na tiki ni rarama oya.

E sivia na bilioni na tamata era na marautaka na sucu i Jisu Karisito ena gauna ni Siganisucu oqo. Sa dodonu me cakava vakakina o vuravura taucoko. Ena vakamacala ni vuravura, o Jisu na kai Nasareci e tamata bibi duadua e bula tu. O Koya e nodra usutu na parofita kei na dauniserekali me sivia na 6,000 na yabaki. O Koya e itukuni ni sereivakatagi kei na cakacakaniliga levu duadua e vuravura. O Koya na qasenivuli levu duadua e bula tu. Ka bibi duadua, O Koya na Luvena Duabau Ga na Kalou na Tamada Tawamudu. O Koya na Kalou ena tekiduru vua na veiduru kecega ka vakatusa na yame kecega ni sai Koya na noda Dauveibuli ka Dauveivueti, na iVakabula ka Kalou ni vuravura oqo.

“Sautu, lomavinaka kivei ira na tamata” esa itukutuku ni Siganisucu. E sa nodra ikau matau na dauniserekali kei na daunivakatagi ka solia tu vei keda na sereivakatagi lagilagi ni Siganisucu. Eda taleitaka na sere ni siganisucu era voqataka na ikau oqo.

Buca Mai Jiuta, sa yawa tu,

Na ivakatawa ra rogoca:

Me sa Dokai, Noda Kalou,

Noda Kalou sa cecere;

Me da veilomani tu;

Me da veilomani tu!

Na veivosa oqo, lagati wasoma ena veigauna ni noda vakacagicagi, e vakananumi keda ni sega na ka vou ena marautaki kei na sere eso ni Siganisucu. E itukutuku makawa ka matata. E vunautaki vei Atama. E vunautaki vei ira na luvei Isireli. E vunautaki vei ira na kawa i Ta Liai. Ena veigauna kece, era cauraka na parofita na uto dina ni Veisorovaki i Jisu Karisito. Ena veigauna kece, era cauraka na Nona ivakaro ni sa dodonu meda lomani ka qaravi Koya ka veilomani ka veiqaravi vakai keda. Ka, tomana o koya, “Kevaka dou sa lomani au, dou talairawarawa kina noqu vunau.” Talevi tu ena veitabagauna, na ka era cauraki oqo esa itukutuku bibi sara ena veigauna tawamudu. Era sa baleti keda, ka yaga vei keda.

Na veika bibi duadua ni bula sa dau cavuti wasoma. Eda sega ni vakacauoca ni rogoca na yaca tabu ni noda iVakabula. Eda sega ni vakacauoca kina nodra veitokani na daulomani. Eda sega ni vakacauoca ni rogoca “Au lomani iko.”

Sa vaka tu kina na itukutuku cavuti wasoma ni Siganisucu e sega ni tukutuku me railesuvi, ia sa itukutuku me vakavoui ena noda bula.

II.

Ena gauna ni noda gone, eda sa kila yadua tu ni Siganisucu esa gauna ni soli loloma vakamatavuvale ka vakaveitokani. E gauna ni yalovinaka mareqeti kivei ira eda lomana. Ia na Yalo ni solika ni Siganisucu sa dodonu me teteva tu na wirini ni noda matavuvale kei na veitokani. Nikua, e vuqa na noda itabagone sa sotava eso na ka guiguilecavi dredre vakuoramu kei na kalasi kei na ilawalawa tale eso ni Lotu ni sikova ka kau iloloma vei ira ka gadreva tu me nanumi ena Siganisucu, ena valenibula kei na itikotiko ni malumalumu, tauvimate balavu, kei na mataqali tale eso. Ena vuqa na siga ni bera na Siganisucu, nira kila na turaga kei na marama vinaka na ka era sotava tu na itubutubu dravudravua, sa kauta mai na ka ni vakatatalo kei na kakana kei na loli mera vakamarautaki kina na gone mata-levu, vakanuinui nira nanumi tu ena mataka ni Siganisucu. Era duavata e udolu na turaga kei na marama levu ena nodra sasaga ena Siganisucu mera vakacegui na viakana, vakaisulutaki na vakaisulu madra, vakavaletaki na tawavakavale, sikovi na tauvimate kei na guilecavi, ka vakamarautaki ira na gone. Me vakalougatataki ira na liga ni veivukei oqo na Kalou! Sa dodonu meda tokoni ira taucoko. O ira ka veiqaravi ena yalololoma ka tawakocokoco sa italai dina ni Tui ni Sautu.

III.

Na cava na ibalebale ni “sautu e vuravura, lomavinaka kivei ira na tamata”? “Lomana … na wekamu me vaka ko sa lomani iko,” a vakavulica taumada na iVakabula. A vakavulica talega ni dodonu meda, “lomani ira na [noda] meca, vosavinakataki ira sa rukaki [keda], cakavinaka vei ira sa cati [keda], ka masulaki ira sa vakalialiai [keda], ka vakacacani [keda].”

Nida cakacakataka na takete e vakamacalataki ena ivakavuvuli oya, na Siganisucu sa dodonu me gauna ni veivosoti, na gauna me vakamavotaki kina na mavoa makawa eso ka vakabulabulataki na veimaliwai sa luluqa tu.

“O koya, au sa kaya kina vei kemudou, ni sa dodonu mo dou veivosoti vakataki kemudou; ni na tu me cudruvi mai vua na Turaga ko koya sa sega ni vosota na nona caka cala na wekana, ni sa tu ga vei koya na ivalavala ca e levu cake.

“Koi Au na Turaga, au na vosoti ira ga au via vosota, ia koi kemudou sa gadrevi mo dou vosota na tamata kecega.”

Io, na Siganisucu sa gauna meda tadolavi keda kina kina keda isema matau ni loloma kei na veitokani. “Sautu, lomavinaka kivei ira na tamata” e sega ni tukutuku ga baleti ira eda sa yalololoma ka yalovinaka tu kina, vakataki ira na lewe ni vanua ni noda Lotu se matanitu, vakaitikotiko ena noda tauni se itikotiko raraba, se da matatamata vata. Era cauraka na kai lomalagi na lomavinaka ki na tamata taucoko —vei ira na itokani vagauna, ira na vulagi, kei ira na meca. Na Siganisucu esa gauna ni noda vakananuma ni da sa luvena taucoko na Tamada mai Lomalagi, ka sa solia na Luvena E Duabau Ga meda vakabulai taucoko tu mai na mate. Na Tamada mai Lomalagi e solia na veivakalougatataki ni veivakabulai kei na bula vakacerecerei kina tamata taucoko ena ivakarau vataga: vakabauta na Turaga, Jisu Karisito; veivutuni, papitaiso, kei na muri ni lawa kei na cakacaka tabu vakalotu ni kosipeli.

IV.

Na Yalo ni Siganisucu e vakauqeti keda ni vakayagataka na gauna oqo meda kalawaca na itatao eso ka kakavaka na yalomatua kei na veilomani vei ira na duikaikai, matavakabauta, kei na matatamata eso. Era lewe levu na Yalododonu Edaidai, me vakai ira e Utah, se ra lewe lailai, nida tiko ena veivanua, e dodonu meda gole yani vei ira taucoko na luvena tagane kei na yalewa na Kalou. E dodonu meda dodoka na liga ni veitokani kina tamata taucoko, vei ira eda vakabauta vata se sega. E dodonu meda muria na ivakaro a solia na Kalou vei Mosese na parofita me solia vei ira na luvei Isireli:

“Ia kevaka sa tiko vulagi kei iko ena nomudou vanua e dua na kaitani, mo dou kakua ni vakararawataki koya. Na kai tani sa tiko vulagi kei kemudou ena tautauvata vei kemudou kei na dua na kai nomudou, ia mo lomani koya me vaka ko sa lomani iko.”

Sa dodonu meda vakavulici ira na luveda mera dau yalololoma ka veikauwaitaki kina tamata kecega. Au dau rarawa niu rogoca e dua na itubutubu sega ni ni Yalo Dodoni Edaidai me rarawataka ni vakadinata na nodra dau vakatanitaki se vakuwai na luvedra tagane se yalewa mai vei ira na gone se itabagone. Au nuitaka ni na sega ni yaco ka vakamalumalumutaki na veika vakaoqo. E dodonu meda dauveitokani ka dauveikauwaitaki vinaka sara kina tamata kecega ena veivanua.

E dodonu vakakina, meda levea na mataqali ilawalawa e vakaseva na noda ivalavala se vakamamadataka na noda vakabauta kei na sokalou. Ia na tawase vakaoqo e sega ni vakuwai keda mai na noda kauwaitaki ira na tani. Se me sogoti vei keda na veilawalawa eso ka tiko kina na cakacaka vata, ena buturara ni ka eda taleitaka vata e okata na tamata kecega.

Na yalo e dodonu meda ciqoma kina na itukutuku ni “sautu, lomavinaka kivei ira na tamata” esa yalo ni noda soli keda kina nodra qaravi na tani. Me vaka ga ni marautaki ena Siganisucu na sucu i Koya ka solia na Nona bula ena vukuda taucoko, sa dodonu meda vakayagataka na Siganisucu me vakavinakataki kina na ivakarau ni noda solika vei ira na tamata.

Nida kitaka vakakina—ni curuma tu na noda vakasama kei na noda itovo na Yalo ni solika ni Siganisucu—eda cau yadua tiko kina lalawa tawamudu ni “sautu e vuravura, lomavinaka kivei ira na tamata.” E kena gauna meda kitaka taucoko vakakina, ni veisiga yadua eda sa volekata tiko kina na lesu mai ni Turaga ena dua na siga. Me vaka a vakatavulica o Peresitedi Russell M. Nelson ena Koniferedi ni Okotova sa oti, “E se bera na kena e uasivi duadua baleta ni sa kusara tiko na Turaga na Nona cakacaka. Se bera tiko mai na kena e uasivi duadua nida vagoleya taucoko na yaloda kei na noda vakasama vei Jisu Karisito. Tini na cavuvosa.

“Se Bula Tiko Na Karisito: Na Nodra iVakadinadina na iApositolo.” E tukuni kina:

“Nida vakananuma na sucu i Jisu Karisito ena rua na udolu na yabaki sa oti, eda wasea na neimami vakadinadina ena dina taucoko ni Nona bula tawavakatauvatani kei na savasava tawayalani ni Nona veisorovaki levu. E sega tale ni dua e cecere cake na nona veivakayarayarataki vei ira taucoko ka a bula tu kei ira ena mai bula e vuravura.

“Keimami vakadinadinataka tu ni Nona bula, e usutu ni tukutuku kilai kina tamata taucoko, a sega ni tekivu e Peceliema se vakacavari e Kalivari. O Koya na Ulumatua i Tamada, na Luvena Duabauga vakayago, na Dauveivueti kei vuravura.

“Keimami cauraka ena vosa ni veidokai ni sa vakalesui tale mai i vuravura na Nona matabete kei na Nona Lotu—‘tara tu ena yavu ni … apositolo kei na parofita, o Jisu Karisito vakaikoya na ivakadei ni tutunivale.’”

Tomani tiko na vosa cavuti, “Keimami vakadinadinataka ni na lesu tale mai ki vuravura o Koya. ‘Ena qai vakaraitaki mai na iukuuku i Jiova, ka ra na raica vata na tamata kecega’” iCavacava ni vosa cavuti Sa na Nona na lewa vaka Tui ni Tui ka Turaga ni Turaga, ka na lobi na duru vakayadua ka vosa na yame vakayadua ena sokalou ki Vua.

“Keimami vakadinadinataka, vaka Nona apositolo tabaki tu—ni sa Karisito bula o Jisu, na Luve ni Kalou tawamate rawa. Sa Tui Imanueli levu o Koya, ka duri tu edaidai ena ligaimatau i Tamana. Au cavuta tale, “O Koya na rarama, na vu ni bula, kei na inuinui kei vuravura. Na Nona sala sa salatu e muataki tu kina marau ena bula oqo kei na bula tawamudu ena vuravura sa lako mai. Me vakavinavinakataki tu na Kalou ena isolisoli tawavakatauvatani ni Luvena tabu.”

Ena yacai Jisu Karisito, emeni.