A Sucu na Karisito na Gonelailai ena Vukumu

Eda sa kalougata dina na vakarogoca na sereivakatagi totoka? Vinaka vakalevu vei ira na matasere, lawalawa dauvakatagi, kei na ira na veiliutaki ena sere. Au sega ni raici iko rawa ena daku ni vunikau, ia, au kila ni ko sa tiko kina.

“Infant Holy, Infant Lowly” sa dua na noqu sere taleitaki.

Moce no na qelenisipi, veimaroroi na ivakatawa

Yadravaki ki na mataka vou;

Raica na lagilagi, rogoca na italanoa

iTukutuku ni kosipeli dina.

Ia na reki, galala mai na rarawa,

Veivakacaucautaki, kidavaka na mataka,

A sucu na Karisito na Gonelailai ena vukumu.

A sucu na Karisito na gonelailai ena vukumu!

Niu se goneyalewa lailai, a dau noqu yacabuli mai vei rau noqu itubutubu oya na “Tammy Lamb,” okoya gona ni dau tukuni ena ivolanikalou me baleta na ivakatawanisipi kei na nona lami, au dau vakila tu ga nira vosa tiko vei au.

E dina sara oqo ena italanoa ni Siganisucu ni rairai na agilosi vei ira na ivakatawanisipi, era yadrava tiko na nodra qelenisipi, nodra lami, ena bogi. Au raitayaloyalotaki au ka vakasamataka se na toro vakacava kina na gonelailai ena vale ni manumanu. Au se taleitaka tikoga na iyaloyalo oqo ena veiyabaki niu vakasamataka na Nona sucu.

E dua tale na iyaloyalo taleitaki e lako mai na italanoa a tukuna o Elder John R. Lasater.

Ena vuqa na yabaki sa oti, a sikova o Elder Lasater e dua na vanua e Aferika ka tiki ni dua na ilakolako ni matanitu.

Dua na siga, nira lako voli ena vanua dravuisiga ena dua na ilakolako ni motoka loaloa, a mani yaco e dua na vakacalaka. A cabeta yani na delana na motoka a vodoka tiko o koya ka raica ni sa gole tani tu mai na gaunisala na motoka ka liu tiko. A kaya o koya, “Na ka au sotava oya e dau tu ga kei au ena veiyabaki kece oqo.”

E dua na ivakatawanisipi qase, ena icurucuru balavu ni gauna ni iVakabula, a tucake volekata tu na motoka ka vosa tiko vua na draiva. Era tu voleka tu e dua na qelenisipi lailai e rauta ni 15 na sipi.

A vakamacalataka na draiva nei Elder Lasater, ni coqa ka vakamavoataka e dua na sipi na motoka oya. Ka baleta ni nona motoka na tui, ena rawa kina me saumiavua na ivakatawanisipi vaka 100 na isau ni lami lailai oya ni sa qase cake. Ia ena lawa vata ga oya, ena vakamatei na lami ka wasei na lewena vei ira na tamata.

A qai kaya na draiva, “Ia mo sarava mada, ena sega ni taura na ilavo na ivakatawanisipi qase; era dau sega vakadua ni cakava vakakina.” Ni tarogi na vuna, a tomana o koya, “Ena vuku ni nona lomani ira yadua na nona sipi.”

Erau sarava ni dolele sobu na ivakatawanisipi qase, roqota na lami mavoa e ligana, ka vakotori koya ena ilobi ni nona icurucuru. A vakamasia toka ga na lami o koya, ka cavuta veitaravi tiko e dua na vosa vata ga, ia ni taroga yani o Elder Lasater na ibalebale ni vosa oya, a qai tukuni vua, “Oi, e cavuta tiko o koya na yacana. Era vakayacani kece tu na nona sipi, nio koya na nodra ivakatawa, ka ra dau kilai ira yadua na nodra sipi na ivakatawa vinaka ena yacadra.”

Ena Aisea e yalataki kina, “Ena keveti ira na luve ni sipi ena ligana, ka kauti ira voli ena lomaserena.”

Kevaka meda nanuma e dua na ka se vakila e dua na ka ena gauna ni Siganisucu oqo, e dodonu me baleta nida sa Nona. Nanuma na gauna a kaya kina na Karisito vei Pita, “Vakani ira nanoqu lami …noqusipi”?

“Ni sa sucu vei kemudouena siga oqo ena koro i Tevita, na iVakabula, ko koya na Karisito na Turaga.”

“Ni sa sucu mai e dua na gone me noda, sa soli mai vei keda e dua na gonetagane.”

A sucu mai o Koya me laveti keda yadua. Ka kevaka e sa nona o Koya e dua ga, ia sa nomu dina sara o Koya. A sucu na Karisito na gonelailai ena vukumu.

Ia e veivakasalataki talega o Aisea, “Koi keda kece eda sa sese ga me vaka na sipi.” De dua eda sa tiko yadua ena dua na vanua eda vakila kina nida vaka e dua na lami lakosese se dua sara mada ga na sipi sa yali. Ena bogi nikua, au tusanaka nida sa lami mavoa kece eda gadreva tu na iVakatawa Vinaka, ka na roqoti keda ena liga ni Nona loloma. Baleta ni da bula vakayago sa tu kina vei keda na veika eda vakila nira sa kavoro tu, ka gadrevi me vakavinakataki.

Au sega ni kila ke tiko e dua na gauna ena loma ni macawa au vakila ni gadrevi vakalevu cake kina e dua na Dauveivueti mai na Sigatabu ena gauna ni sakaramede. Au kauta mai kina na yaloqu sa raramusumusu ka vakananuma na vosa kei na ivakatakilakila ena “gauna ni vakavoui vakayalo oqo.” Ia ena so na gauna e dau yaco mai na veivakayalolailaitaki, niu vakasamataka na macawa sa oti, au qai kila ni oqo na ivalavala ca, na malumalumu vata ga au vakasamataka tiko ena Sigatabusa oti. Au qai vakila dina niu sa bibivoro se vakamalumalumutaki.

O kila beka na gauna oqo?

Nikua au sureti iko mo tovolea e dua na ka vou. Ena vei miniti tabu duadua oqori ena nomu macawa taucoko, ke o vakila tiko ni o sa kavoro, raitayaloyalotaki Koya ni kacivi iko tiko ena yacamu, ka lako Vua. Raica nomu iVakabula ena mata ni yalomu, ni Ligana ka dolele yani vei iko, ka kaya, “Au sa kila ni ko na vakila vakaoqo! Oqori na vuna au a lako mai kina ki vuravura ka vakararawataki ena veika au a cakava.” Na Nona veivuke, Nona loloma soliwale sa vakarautaki tu vei iko ena gauna sara ga oqo, ka sega ena mua ni gaunisala ni o vakila ni sa tu vata vakavinaka sara vei iko na veika eso. Baleta o cei beka e dau vakila oya? E sega ni dua sara au kila.

Nanuma tiko, eda lako ki lotu, kina sakaramede ni iVakayakavi ni Turaga, meda vakabulai, ia meda vakila talega ni da sa savasava.

Vica na yabaki sa oti, niu se veiqaravi vei ira na Lalai, au talanoataka tiko edua na italanoa baleta edua se qai papitaiso vou ga. Au tukuna nio koya e dua vei ira na yalosavasava ka lewenilotu savasava ena Lotu. Ia mai na iyatu e liu, a dodo cake e dua na liga ka kaya mai e dua na gonetagane qase, “Au sa savasava talega me vakataki koya niu se qai taura oti ga na sakaramede.” Au sauma ena yalomadua, “Io, oqori na ka au a vakaibalebaletaka—na ka a kaya o koya.”

Kemuni na noqu itokani, eda dau nanuma beka ka ciqoma na ivunau totoka oqo? Kevaka eda sa cakava tiko na cakacaka meda maroroya na noda veiyalayalati kei na Kalou—lesu tiko ga mai, ripotetaka, ka veivutunitaka—e rawa nida vakasavasavataki e veisiga. Ena cakacaka vakalotu ni sakaramede, eda rawa ni vakila nida sa savasava me vaka ga na siga eda papitaiso kina.

Vei au, sa ikoya na sala sa yaco kina na Siga ni Vakacecegu me dua na siga ni vakacegu. Sega walega ni vakacegu vakayago, ia na vakacegu mai na noqu cala kei na rere, mai na noqu tawayaga kei na noqu malumalumu. Ke lailai me dua mada ga na siga!

E dua na itukutuku malumu duadua ena ivolanikalou taucoko e solia vei keda e dua na ivakaraitaki ni vakacegu oqo. Ena iVola i Momani, ni sa sikovi ira tiko na Nona “so tani tale na sipi” e Amerika na iVakabula sa tucaketale, ni oti na nona vakila na nodra gagadre ka sega mada ga nira bau kerea, sa sureti ira kece o Koya era sa ramusu tu vakayago—na lokiloki, na mataboko, na didivara, se na “veimataqali mate kecega”—mera lako mai ki liu.

Au raitayaloyalotaki ira era yatuni cake ena matata ni nodra gagadre vakayago mera vakabulai. Ia ena mata ni yaloqu talega, au raici ira na tamata me vakataki au kei ira tale eso au taleitaka ena iyatu era vakararawataki tu ena sala ka na sega beka ni laurai votu kina mata ni tamata. A sureti ira o Koya era vakararawataki tu ena dua ga na ivakarau, “a sa vakabulai ira kecega ko koya.”

Raica mada na sala, ena ivakaraitaki oqo, e sega ni tukuni kina ni a walia na mate vei ira o Koya. Au taleitaka na vakasama oqo ni tiko na kedrau duidui na veivakabulai kei na wali ni mate. Na noda vakabulai edau vakasukai keda kina dua na ituvaki bulabula sara, sai koya na veika eda dau gadreva, e donu beka? Ia na veivakabulai e duatani. Na veivakabulai e vukica na mavoa makawa oya, ka cakava meda duitani ena yasana kadua.

Na iVakabula sara mada ga ni vuravura, ni sa tucaketale, a maroroya tu ga na mavoa ena Ligana, yavana, kei na yasana—a ivakadinadina ni na sega vakadua ni guilecavi keda o Koya ka nida sa vakabulai ena we ni kena kuita. De rairai, ena siga oya ni a vakabulai ira kina na iVakabula, a tauri ira talega o Koya, ka mokoti ira yadua ena loloma.

Ena bogi nikua, o vakila beka nio sa kavoro ka sega ni vakadeitaka nio na sotava na Nona veivakabulai. Ia e dina beka oya? Ena vei Sigatabu ena gauna ni sakaramede, sa laveti iko cake tiko o Koya mai na gaunisala kuvunisoso, ka vakotori iko ena ilobi ni Nona icurucuru, ka roqoti iko ena Ligana veimaroroi.

Ena bogi tabu ni Siganisucu oya, a wasea kina e dua na agilosi na itukutuku vinaka ni reki vakalevu sara. “O koya sa cecere duadua sa lesi Koya me lailai duadua—na iVakatawa Vakalomalagi ka yaco me Lami.” “Sa davo koto vakaoqo na Tui ni tui ena vale ni manumanu lailai. Ena noda veivakatovolei kece sara, a sucu me noda itokani.” Au vakabauta ni a kaya tiko na agilosi, “Na nomu itokani, nomu itokani vinaka duadua ka iVakabula e se qai yaco ga mai. Ka kevaka o kila na nona dau wanonovi iko vakavoleka, na levu ni nomu dau rai Vua ena nomu a bula vata kei Koya e liu, kevaka o kila na veika ena vakacabori Koya kina ena vukumu kei na levu ni ka ena cakava ni oti na Nona tu vakarau me vukei iko mo lesu tale ki vale, o na vakusakusa mo kidavaki Koya ena vale ni manumanu.”

Na noqu ivakadinadina ni Gonelailai ena vale ni manumanu, o Koya eda qarava ka dodonumeda raitayaloyalotaka se na vakacava nida roqota, ni a lako mai me mai cakava vei keda.

Io, a sucu na Karisito na gonelailai ena vukumu!

Ena yacai Jisu Karisito, emeni.