Na i vakavakarau meda sotava na iVakabula

Taciqu kei na ganequ nida yacova mai na gauna ni Siganisucu, au vakanananu ira era tu tani mai vale, oka kina na iwiliwili vakaitamera ni daukaulotu era veiqaravi tu oqo.

Na imatai ni noqu Kirisimasi tani mai vale oya ena noqu kaulotu voli mai Igiladi, ena Tiseba ni 1960. Au veiqaravi tiko kina mai Swindon, e Igiladi.

Keitou dolavi Swindon kina me baleta na cakacaka ni kaulotu rauta ni 90 na siga. Keimami redetaka e dua na rumu me baleta na soqoni ena Sigatabu. Keimami kalougata nira tiko e lewe vica era saumaki mai—na itekitekivu ni dua na tabana.

Ena yakavi ni Kirisimasi, keirau nanuma kei noqu itokani, o Elder Noel Luke, me keirau lai vakabula vei ira na tamata ena nodra veivale ena vanua keirau veiqaravi tiko kina ka solia e dua na itukutuku lekaleka ni Siganisucu kei na veivakalougatataki. Totoka na bogi oya, a cila curuma na o ni lomalagi na serau ni vula e kauta mai e dua na vakanananu vakalomalagi. Vakasauri na neirau qai kila nira sarava tiko na lewenivanua taucoko ena nodra retioyaloyalo e dua na dauvakalasalasa ka daulagasere, o Harry Secombe. A lagata tiko na sere talei “Vakalougatataka na Vale Oqo.” Veilauti nona lagata na veiqaqana bibi, au cavuta:

Vakalougatataki ira na tamata era tiko kina.

Maroroi ira mera savasava, galala mai na ivalavala ca.

Vakalougatataki keimami me rawa ni keimami

Tiko kei kemuni na neimami Turaga.

E turu na wainimatai keirau ena nona lagasere. Na sere, e voqa mai voleka ni veivale kecega, e voqa cake ka cariba lesu mai ena vei o. Keirau vakila kei Elder Luke na vakanananu veivakadrukai oqo ni keirau nona mata dina na neirau Turaga ka iVakabula, ko Jisu Karisito, ka tovolea me qaravi ira ka vakalougatataki ira na luvena na Tamada Vakalomalagi.

Niu dua na daukaulotu e yaco meu kila ni noda mai bula e vuravura oqo eda tu tani kece kina mai vale—noda vale mai lomalagi. Na ivakarau meda vakila kina na logavinaka ni vale oya sai koya na noda veiqaravi vua na noda iVakabula.

Ena veiyabaki sa sivi, e vakayaloqaqataki keda na Lotu me vakabibitaki na rarama e vakarautaka vei keda kece na kai vuravura, vakauasivi ena gauna ni Siganisucu. E tiko e dua na sasaga vakasakiti ni Lotu me Vakararamataka na Vuravaura me vagoleya na vakasama ni tamata kecega vua na iVakabula. Oqo e salavata kei na dua na sasaga me ia na solika vei ira era leqa tu ka vakarautaki na veiqaravi Vakarisito.

Ena yabaki sa oti e tekivutaka kina na Lotu na sasaga me Vakararamataka na Vuravura ena kena vakayagataki na veipapa lelevu vakalivaliva era vakavolivolita tu na Times Square e New York City.

Keirau tiko kei Meri ena gauna e vakaraitaki mai kina na ivakatakarakara veilauti ni nona sucu na iVakabula ena papa vakalivaliva vakaiyanaqa oya. E dua na gauna titobu vakayalo. Ena yabaki oqo sa vakatotomuri na gauna oya mai Times Square ena vuqa na veikoro lelevu e vuravura raraba.

Niu tiko voli mai New York City, ena gauna oya ni Vakararamataka na Vuravura , au raica na kena vakaraitaki na sasaga ena katubaleka ni veisitoa lelevu.

Au nanuma na italanoa ni New York Times ni dua na Sigatabu e robota e dua na tabanipepa, kena ulutaga: “Lesumai na Katubaleka ni Vakacagicagi. Vakakina O Ira na Dauvolivoli.” E tukuni ena italanoa e dua na ivalavala tudei ka vakaraitaki kina ena katubaleka ni veisitoa lelevu ena Fifth Avenue in New York City na katubaleka era ukutaki tu Na kena voleka duadua au rawa ni vakasamataka mai na italanoa kei na noqu se qai veisiko walega oqo, ni sega ni dua vei ira na katubaleka oqori e vakaraitaki kina na Siganisucu se Gonelailai ko Karisito.

Niu wilika na italanoa, au nanuma na gauna au se gone kinna ni na iyaloyalo ni katubaleka ni Siganisucu ena veisitoa lelevu e Salt Lake City e vakaraitaka na gonelailai o Karisito. Au nanuma lesu talega e dua na itukutuku mai na gauna oya baleta e dua na vanua ni volivoli ena Midwest ka vinakata me vakabibitaka na ulutaga ni Siganisucu me tara kina na yalo ni Siganisucu ka dreti ira mai na dauvolivoli. Era vakaduria e dua na drotini levu ka vola kina, “Kevaka e lako mai ena bogi nikua na Karisito, ena lako vei cei?” E vica vata na iyaloyalo era vakaraitaki ena katubaleka ni sitoa ena ruku ni drotini. Kevaka e donu na noqu nanuma baleta na iyaloyalo oqori.

• E dua e baleta e dua na buinigone ena imocemoce ka qaravi koya tiko e dua na nasi. E rairai tauvimate bibi sara o koya.

• Na kena ikarua e baleta e dua na tinanigone gone kei na dua na gone sucu vou. E serau mai matana na reki.

• Na ikatolu ni iyaloyalo e baleta e dua na matavuvale ka ra tagi tu na kena gone. E matata ni sega ni veirauti na kakana, ka na lailai walega, kevaka e dua, na iloloma ni Siganisucu.

• Na ikava ni iyaloyalo e vakaraitaka e dua na matavuvale vutuniyau era cereka tiko na nodra iloloma, e levu sara.

• Na ikalima ni iyaloyalo e dua na matavuvale talei, yalomalua levu na kena gone era lagalagasere ena reki.

Niu vakasamataka na lima na iyaloyalo kei na itaba “Kevaka e lako mai ena bogi nikua na Karisito, ena lako vei cei?”, rua na vakasama e votu mai.

Matai, Eda kila ni ena nona ikarua ni lako mai na iVakabula, eda na sega ni kila na tikinisiga kei na kena auwa.

iKarua, ni lako mai o Jisu Karisito, me vaka e vakavulica o Peresitedi Russell M. Nelson ena koniferedi raraba se qai oti, “[O Koya] ena lako mai ki vuravura me vaka ni Mesaia ni Mileniumi.” Meda vakarau tu, e vaksuqeti keda o Peresitedi Nelson, “Meda solia tale na [noda] bula vei Jisu Karisito.” Vakakina, e ganita kevaka ena tukuna, “Kevaka e lako mai ena bogi nikua na Karisito, o cei sa vakarau tu me veitata vata Kaya?”

Niu railesuva na iyaloyalo eso e katubaleka, au qai raica ni veika kece era tukuna e baleta na ituvaki vakayago kei na ituvaki vakailavo ni tamata, e sega ni dua na ka e baleta na kedra ituvaki vakayalo. Na iyaloyalo e katubaleka e vakatakarakarataka na tamata era sa qase ka tauvimate vakakina o ira era se bulabula ka qai sucu vou. Era tu talega na vutuniyau kei na dravudravua. Ia na yabaki, na bulabula, kei na ituvaki vakailavo e sega ni tukuna vei keda se cava e bibi dina, na ituvaki ni yalodra.

Eda wilika ena Vunau kei na Veiyalayalati baleti na veika e gadrevi meda papitaiso kina Lotu i Karisito. Na veika e gadrevi kina e yavutaki ena noda yalomalumalumu, na “yalo raramusumusu ka bibivoro,” veivutuni, ka “qaravi [Jisu Karisito] me yacova na ivakataotioti.” Nodra sasaga me yaco mera “tisaipeli yalodina i Jisu Karisito” ka lako ena salatu ni veiyalayalati ka vakarautaki keda kina veivakalougatataki ni Nona Veisorovaki.

Na Karisito e ivakaraitaki ni veika kecega. E tukuna na iVakabula, “Raica koi Au na rarama; Au sa biuta vei kemudou e dua na ivakarau mo dou muria.” Nida raica na ituvaki ni yaloda, ena vinaka vei keda meda raica na Nona ivakaraitaki uasivi sara. Sa vakaraitaka vei keda na iVakabula na sala meda kunea kina na bulamarau, vakaibalebale, kei na reki ena bula oqo kei na tawamudu. Na marau kei na reki na ivakaraitaki ni yalo ni Siganisucu.

Ena Joni 19:5 eda wilika ni kauti Jisu o Pailato vei ira era vinakata mera vakoti Koya ena kauveilatai. “Sa vakaisala tu ena isala wa vakavotona, ka vakaisulu ena isulu lokaloka. A qai kaya vei ira o Pailato, Raica na Luve ni Tamata!”

Ena gauna ni Siganisucu oqo meda bau raica vakalailai mada na Luve ni Tamata, o koya na Karisito, kei na iloloma sa vakarautaka tu.

Taumada, meda vakasamataka na cakacaka mana ni Nona sucu mai.

Eda kila ni gonelailai vakamareqeti eda marautaka ena gauna ni Siganisucu oqo sai Koya na Luvena e duabau ga na Tamada. E rawata na kaukauwa ni bula tawamudu mai vei Tamana—na kaukauwa ni bula. E rawata mai vei Tinana vakayago na kaukauwa me rawa ni mate. A digitaki mai na ivakatekivu me baleta na Nona itavi tabu.

Maciu 1:23 eda wilika kina, “Raica, ena kunekune e dua na goneyalewa, ka na vakasucuma e dua na gonetagane, ena vakatokai na yacana ko Imanueli, na kena ibalebale na Kalou sa tiko vata kei keda.”

iKarua, vakananuma na Nona bula uasivi ka sega kina na ivalavala ca kei na Nona ivakaraitaki. E dina ni sotava o Koya na mosi, na rarawa, kei na mataqali veitemaki kecega, a rawata vakavinaka na Nona ilesilesi. O Koya na noda ivakaraitaki sa mai virikotora na sala meda muria. Sa solia na Nona bula ena vukudra na dravudravua, na vakaleqai, na tauvimate, kei na kune rarawa, kei na vakacavari vakavinaka ni ituvatuva tawamudu o Koya duadua ga sa vakadonui kina.

iKatolu, vakasamataka na Nona mate, Tucaketale, kei na Veisorovaki.

Ena vuku ni Veisorovaki, na Vunautaka na Noqu Kosipeli e totoka ka rawarawa na ka e tukuna: “Na Nona Veisorovaki na iVakabula e okati kina na Nona vakararawataki mai Kecisemani, Nona vakararawataki kei na mate ena kauveilatai, kei na Nona Tucaketale. E sega ni vakasamataki rawa na nona vakararawataki—na kena levu a tiri kina na dra mai na qara kecega ni yagona .”

Ena Vunau kei na Veiyalayalati 76:41 eda wilika kina: “A lako mai ki vuravura ko koya, io ko Jisu, me mai vakoti kina kauveilatai ena vukudra na kai vuravura, raica sa colata na nodra ivalavala ca na kai vuravura, a sa mai vakavouia na vuravura, ka vakasavasavataka mai na veika dukadukali kecega.”

Na Veisorovaki i Jisu Karisito na ka cecere duadua ka iloloma levu e qai bau yaco ena itukutuku ni kawatamata. Eda valavala ca taucoko, ia ena vuku duadua ga ni Veisorovaki i Jisu Karisito eda na rawata kina na loloma veivueti ka bula vata na Kalou.

iKava, vakarautaki keda kina Nona iKarua ni Lesu Mai.

Ena Veiyalayalati Makawa, e vakatavulica o Jope “Ena tu o Koya ena veisiga e muri e vuravura.” Me vaka e vakavuvulitaka vakavinaka Peresitedi Russell M. Nelson, “na [Karisito] ena liutaka na Nona Lotu ruarua mai na Jerusalemi makawa kei na Jerusalemi Vou.” Oqo na gauna meda vakarautaki keda kina kina gauna oya. E kaya na ivolanikalou “Dou vakarautaki kemudou kina siga sa levu oya ni Turaga.”

Na iotioti ni noqu ivakasala meda lomana ka qarava na Turaga. Nida vakasamataka na keda ituvaki vakayalo kei na noda vakavakarau meda veitata kei na noda iVakabula sa dodonu me taumada me da, “lomana na Turaga, na noda Kalou, ena lomada taucoko, kei na yaloda taucoko, kei na noda nanuma kecega.” Kena ikarua oya, “mo lomana na kai nomu me vaka ko lomani iko.”

Na noda lomana na Kalou kei ira na wekada sai koya na vakatovolei cecere duadua ni ituvaki ni yaloda. Nida lomana na Kalou, eda na segata meda rokova tiko na nona ivunau. Kevaka eda lomana na kai noda, eda na qaravi ira me vaka nida ligana na Turaga.

Ena Vunau kei na Veiyalayalati, e vakayagataka na Turaga na veimalanivosa oqo: “Io, au na dolava na yalodra na tamata, kau na tauyavutaka e dua na lotu mai na ligamu.”

Na sala taumada meda vakaraitaka kina noda vakavinavinaka vua na iVakabula ena gauna ni Siganisucu sai koya me da Nona italai—me, yaco, me da Ligana e vuravura.

Ena gauna totoka oqo, nida marautaka na nona sucu na noda Turaga ka noda iVakabula, ko Jisu Karisito, au vakadinadinataka vei kemuni ni bula tiko ko Koya. O Koya na noda ivakaraitaki, na noda Dautataro vei Tamana, sa rawata kina ko Koya na ka kece e gadrevi meda lesu kina kina Nodrau iserau na Tamana kei na Luvena. Eda na yalomatua meda muri Jisu Karisito ka ciqoma na iloloma sa vakarautaka tu ko Koya.

Me nomuni na lagilagi ni Siganisucu na kena itakele o Jisu Karisito.

Ena yacai Jisu Karisito, emeni.