iSolisoli Sega ni Saumi Rawa

Ena bogi nikua, au reki niu mai tukuna na cecere ni kena vakalou na Siganisucu. E sega na soqo ena itukutuku kei vuravura e vakayaco qaqa cake ni vakatauvatani kina sucu kei na ilesilesi i Jisu mai Nasareci ena rua na udolu na yabaki sa oti. Ena gauna taucoko ni vuravura nikua, na gauna vakai koya e vakarautaki mai na soqo mana oqo.

Na sucu ni noda Turaga e marautaki ena vuqa na sala duidui e vuravura taucoko, ia e dua na itovo tudei ni Siganisucu e vaka me tawayalani.

Na itovo oqo a rairai tekivu ena ivola i Maciu baleti iratou na tamata vuku mai Natuicake me ratou mai vakarokoroko vei Jisu. E ratou a yaco mai, vata kei na nodratou ka ni loloma talei. Nikua, na itovo tudei ni soli iloloma sa tiki levu tiko ni kena marautaki na Siganisucu.

Na isevu ni gauna au a raica kina e dua na iloloma ni Siganisucu a dua na dakai ni vakatatalo e vaka wa na kena sicini koko, kei na dua na ga e wirici. Sa qai dua na ka ni marau levu oqo vua e dua na gone yabaki va. Na ga a ova wavoki ena vuloa ka sega ni dro rawa niu maqusataka na vanai koya ena noqu dakai cariba mai na ono na idi vakayawa. Ia na ka ni vakatatalo a ramusu totolo, me vaka ga na veika buli, na marau e solia sa ka wale ga ka guilecavi sara vakatotolo.

Ena bogi nikua, au vakatura tiko e tolu na iloloma meda dui solia yani ena gauna ni Siganisucu oqo, kei na gauna taucoko ni noda bula, ni na sega ni kauta mai na marau ka wale, ia ena kauta mai na reki sa dina ka tawayalani.

Na imatai oya na iloloma ni ivakadinadina. Oqo e nomu iloloma sara ga ni kevaka me soli wale yani, e sega ni ca, ena vakatakila na titobu ni ituvaki ni yaloda. E mareqeti cake mai na koula, na ka boi vinaka, se mura, na ivakadinadina savasava baleti Jisu Karisito ni sa noda dui iVakabula ka Dauveivueti sai koya na usutu cecere ni ka kecega eda marautaka ena Siganisucu.

Ni se ratou lalai na ono na luvei keirau, ena dua na bogi keirau sa lewa sara kei Jacqui ena neitou lotu vakavuvale, me sa kua na lesoni, ka me keitou sa veiwaseitaka na neitou ivakadinadina. Niu sa wasea na noqu ivakadinadina, na luvei keirau yalewa talei o Chelsea, sa rairai yabaki 16 tiko ena gauna o ya, a kaya mai ena matakurabui, “Ta au se bera vakadua ni rogoca nomu ivakadinadina.” Au a kidacala, niu rogoca na ka a tukuna. Niu sa perestedi ni iteki tiko kina ka kila ni sa rogoca o Chelsea niu sa cavuta vakavuqa na noqu ivakadinadina ena veigauna eso ni lotu vakakina e vale. Ia ena gauna o ya, a rogoca ka vakila o koya na noqu ivakadinadina me vaka ga ni se qai cavuti vou. A vakavulica vei au o koya e dua na lesoni au sega vakadua ni guilecava: na iloloma ni ivakadinadina sa ka mareqeti ka kunei kina e dua na kaukauwa ni wasei yani vakawasoma.

Na ikarua oya na iloloma ni veivosoti. E dina vei keda kece sara ena so na gauna e mavoa na yaloda ena nodra vosa se itovo vakatani eso. Ni kevaka eda na dina tiko, oi keda talega eda sa vakamavoataka eso. E vakavulica o Jisu Karisito ni “Koi Au na Turaga, au na vosoti ira ga au via vosota, ia koi kemudou sa gadrevi mo dou vosota na tamata kecega.” Ni oti a qai tosoya ki liu ka kaya ni gauna eda sega ni vosoti ira kina era caka ca vei keda, eda sa qai valavala ca vakalevu cake.

Ni sa lomada ka dinata noda vosoti ira eso, eda sa galala mai na gaga ni yaloca, vakalelewa, se veisausaumi.

E dua tiko na noqu itokani talei mai Sauca Aferika o Sandile Makasi Ena nona veivakadonui, au na wasea na nona veivosoti. Ni se qai vakarau yabaki rua o Sandile, o tamana, se qai yabaki 28 tiko a mokulaki ka vakamatei mai vei ira na ovisa ena gauna ni veivakaduiduitaki. E muri a qai kila o Sandile na matailalai ni nona a vakamatei vakariseuto o tamana. Oqo na veika a kaya:

“Ena veiyabaki taumada niu se cauravou lailai kina au a rarawa ka yaloca ena vuku ni veika era a cakava vei tamaqu. E rawa vakacava mera kauti koya tani mai vei keitou? A butakoci vei au o tamaqu ka noqu daunivakasala, ka vakayalia o tinaqu e dua na itokani lomani ka veikauwaitaki.

“Niu sa mai kila na veika voravora era a vakararawataki koya kina, a buebue na cudru e yaloqu kei na noqu vakasama, kau sa cudruva, ka yalovakatanitaki ira na ovisa kei ira na tamata vulavula.

“Au sa tomana tikoga na katona tu e yaloqu na yaloca oqo me yacova niu sa kunea na kosipeli vakalesuimai i Jisu Karisito. A vukei au na kosipeli meu kila vinaka ni sa dodonu meu vosoti ira na ovisa ena ca era a cakava, ka ni sa vakatau tu kina na noqu reki kei na torocake vakayalo.

“Oqo e rawarawa ni tukuni ka dredre me caka, ia au a saga tikoga ena masumasu, ni toso na gauna a qai vukei au na Turaga meu vosoti ira na kequ meca Sa sega na mavoa, au sa vakila na vakacegu, sa sega na yaloca kei na veicacati, sa tu vei au na loloma; sa sega na butobuto e yaloqu kei na noqu vakasama, sa tu vei au na rarama kei na vakacegu.”

Vinaka vakalevu Sandile na ivakaraitaki ni solia na iloloma ni veivosoti.

iKatolu, na iloloma ni loloma Va-Karisito. Ena iloloma vakayalo kece sara, e sega e dua me cecere cake me vakataka na loloma. A vakaraitaka e matanalevu o Jisu na Nona lomani ira na tamata ka vakavulica vei keda meda dau veilomani vakai keda.

Nida sa vakamuria na ivakaraitaki ni iVakabula ena noda vakaraitaka noda lomani ira na tamata ena vosa kei na cakacaka, era na sotava kina na loloma ni Kalou maivei keda.

Ena vica na yabaki sa oti, au a sotava e dua na cauravou yabaki 23 ka tiko mai Washington a ivakaraitaki cecere ni itovo oqo. Sa tolu na vula na nodrau sa vakavulici koya tiko mai na daukaulotu, ka sa yaco vua e dua na veisau totoka ena kena irairai kei na nona itovo ni bula. Dua na bogi a veivosaki tiko ena talevoni kei rau na daukaulotu, ni cava na veivosaki, rau qai kaya “Keirau lomani iko, Michael.” A biuta era na talevoni ka vakasamataka, “Wow. Oqo e sega niu matau kina. Kau rawa ni kaya oqo vei ira eso.” Sa qai nanuma me vakaukauwataki koya me kaya vei tinana ni lomani koya. E vica ga na auwa nona tiko vakayawa o tinana ena dua tale na tiki ni yasana. Ni gauna sa qiriti tinana kina ka kaya vua “Au lomani iko, Na,” a sauma mai vakatotolo “Na cava e yaco vei iko? O gole beka vei vuniwai ka kaya mai na itukutuku ca? O sa baci vesu tale?” Ia, sa qai kaya vei tinana na nona sa kunea na kosipeli ni sa veisautaki koya, ni sa sega tale ni kana tavako se vakayagataka na waigaga ka sa namaka tiko me sa papitaiso.

Au nanuma ni oqo sa dua na ivakaraitaki talei sara ni gauna era vakila kina na tamata na loloma ni Kalou maivei ira eso. E vakamalumutaka na yalo ka qai bulia e dua na yalo ni gagadre me wasea yani na iloloma me lomani ira na tamata.

Ena bogi nikua, eda a tekivu veivosakitaka na iloloma talei sara o ya na koula, na veika boi vinaka, kei na mura. Au dikeva ka raica ni rawa mo volia na iloloma oqo e na Amazon. Ia o na sega ni raica rawa ena dua tale na sitoa na iloloma tale ka dua eda a tukuna tiko. Era sa iloloma sega ni saumi rawa, ka ra na kauta mai na reki tawayalani ka dina vei rau ruarua a solia kei koya a ciqoma.

Ia nio marautaka tiko na Siganisucu oqo, au sureti iko mo:

1. Wasea na nomu ivakadinadina kina nomu matavuvale kei ira ko lomana. Nio wasea yani na iloloma mareqeti sara oqo, ena vaqaqacotaka sara na nomu ivakadinadina.

2. Mo vosoti koya o nanuma a cakacala se vakamavoataka na yalomu. Ni ko solia na iloloma oqo, ona vakila talega na vakacegu ka vakabulai na yalomu.

3. Mo vukei ira na tamata mera vakila mai vei iko na loloma ni Kalou. Ke sa veiganiti, tukuna vei ira nio lomani ira. Nio raici ira na tamata me vaka sa raici ira na Kalou, ena tubu cake na nomu lomani ira, ona vakila talega na loloma ni Kalou kina nomu bula.

Ia oqo, au nuitaka mo vakasinaiti vakayadua ena reki cecere ena macawa ni Siganisucu oqo. Au vakadinadinataki Jisu na kai Nasareci. E bula tiko o Koya. Sai Koya na noda iVakabula, na noda Dauveivueti. O Koya na noda iVakabula ka Dauveivueti. Au qoroi Koya. Au lomani Koya. Ena vuku ni Nona iloloma kivei keda yadua, sa voli ena isau sega ni vakamacalataki rawa, eda sa rawata kina na iloloma cecere duadua vei ira kece—oya na bula tawamudu meda tiko ena iserau nei Tamada mai Lomalagi dauloloma.

Ena yacai Jisu Karisito, emeni.