Stap Selebretem Krismes

Ol dia brata mo sista blong mi, yumi kasem plante blesing long ol naesfala mesej we yumi bin harem we i kam long Sista Runia, Elda Palmer, mo Elda Cook. Mi filim ona blong save tijim sam long ol samting we oli bin eksplenem finis.

Krismes i wan gudtaem blong yia. Taem yumi selebretem dei we Sevya blong yumi i bin bon long hem, hat blong yumi i luksave wanem i moa impoten long laef blong yumi. Krismes i mekem yumi save moa mo glad moa long ol sakrifaes we i bin hapen blong yumi.

I.

Krismes i rimaenem yumi blong tingting long wanwan long yumi. Yumi talem tangkyu moa long ol famli blong yumi. Yumi toktok bakegen wetem ol olfala fren. Yumi girap aot long ol samting we oli seraotem yumi long ol nara taem blong yia. Ol man we oli savsave olgeta oli no sem blong toktok mo talem halo long olgeta. Fasin blong stap kaen mo tingting hevi i gat mining. Spirit blong Krismes i mekem gud saed blong yumi i kamaot.

Gudfala filing mo laet blong Krismes hem i Laet blong Kraes. Olsem we yumi ridim long ol skripja blong tedei se Sevya i “tru laet we i saenem evri man we i kam long wol ia.” Evriwan we oli selebretem dei we Kraes i bon long hem—evriwan we oli gat wanem we yumi singaotem “Spirit blong Krismes”—i gat wan pis blong laet ia.

Ova long wan bilian pipol bae i selebretem dei we Jisas Kraes i bon long hem truaot long Krismes sisen ia. Ful wol i sud mekem hemia. Iven long wei we wol i talem, Jisas blong Nasaret i wan moa impoten man we i bin laef long wol ia. Hem i prinsipol topik blong ol profet mo ol man we oli bin raetem ol poet blong ova long 6000 yia. Hem i bigfala topik blong miusik mo art blong wol. Hem i nambawan tija we i bin laef long wol ia. Mo i moa impoten, Hem i Wan Pikinini Ia Nomo blong God Papa we I No Save Finis. Hem i God we long Hem evri ni bae oli nildaon mo evri tang bae oli talem se Hem i Krieta mo Ridima blong yumi, Sevya mo God blong wol ia.

“Pis i stap wetem ol man” i mesej blong Krismes. Hem i topik we i gat paoa blong olgeta man blong poet mo miusik we oli givim yumi miusik blong glori blong Krismes. Yumi laekem tumas ol krismes singsing we oli givim saon blong topik ia.

Longwe, longwe long graon blong Judia,

Man blong sipsip oli bin harem singsing ia:

Glori long God, Glori long God,

Glori long God hem i hae tumas;

Pis long wol gud wok blong man;

!Pis long wol, gud wok blong man!

Ol toktok ia, oli singsing long hem plante taem long ol holidei aktiviti blong yumi, i rimaenem yumi se i nogat wan samting i niu long selebresen mo ol singsing blong Krismes. Mesej ia i olfala mo evri man i save. Oli bin prijim long Adam. Oli bin prijim long ol pikinini blong Isrel. Oli bin prijim long ol pikinini laen blong Papa Lihae. Bakegen mo bakegen, ol profet oli talemaot ol impoten trutok blong Atonmen blong Jisas Kraes. Bakegen mo bakegen, oli talemaot komanmen blong Hem se bae yumi mas lavem mo givim seves long Hem mo lavem mo givim seves long wanwan long yumi. Mo Hem i ademap, “Sapos yufala i lavem mi, bae yufala i save obei long ol tok blong mi.” Oli ripitim longtaem i kam, ol samting ia we oli talemaot oli ol mesej we oli moa impoten blong wan taem we i no save finis. Oli blong yumi, blong gud blong yumi.

Ol moa impoten samting long laef hem i ol samting we oli hapen bakegen mo bakegen. Yumi neva taet blong harem tabu nem blong Sevya blong yumi. Yumi neva taet long kampani blong olgeta we yumi lavem. Yumi neva taet blong harem “Mi lavem yu.”

Mekem se mesej blong Krismes we i stap hapen bakegen mo bakegen i no wan mesej blong jenisim bakegen, be wan mesej blong mekem i kam niu bakegen long ol laef blong yumi.

II.

Stat long taem we yumi pikinini, wanwan long yumi i bin save se Krismes i wan taem blong givim ol presen long ol famli mo fren. Hem i wan spesel taem blong fasin blong stap kaen long olgeta we yumi lavem. Be spirit blong Krismes blong stap givim i sapos blong go moa bitim sekol blong famli mo fren blong yumi. Tedei, plante long ol yut blong yumi oli gat ol eksperiens blong tingbaot taem ol kworom mo ol klas mo ol nara Jos grup oli visitim mo karem ol presen i go long olgeta we oli gat nid blong tingbaot olgeta long Krismes, long ol hospital mo ples blong lukaot ol olfala, olgeta ples we oli gat ol man wetem sik long tingting, mo ol nara kaen moa. Long ol Krismes Iv we yumi no save kaontem, ol gud man mo woman, oli stap lanem abaot hadtaem blong ol paren we oli harem nogud mo gat nid, oli kam fored wetem ol giaman pleplei blong ol pikinini mo kakae mo ol swit kakae mekem se oli bin sapraes, ol pikinini we oli gat tras bae oli filim glad se i gat man i tingbaot olgeta long Krismes moning. Taosen blong ol gudfala man mo woman oli joen long efot tugeta long Krismes blong givhan long olgeta we oli hanggri, givim klos long olgeta we oli nidim, mekem gud haos blong olgeta we oli nogat haos, visitim ol man we oli fogetem olgeta mo olgeta we oli sik, mo givim glad long ol pikinini. !God bae i blesem ol han blong help ia! Yumi evriwan i mas sapotem olgeta. Olgeta we oli givim seves wetem lav mo no selfis oli ol tru wokman blong Prins blong Pis.

III.

?Wanem i mining blong “pis long wol gud wok blong man”? Faswan Sevya i bin tijim “Lavem … neba blong yu olsem we yu stap mekem i gud long yuwan,” . Hem i iven tijim se yumi mas “lavem ol enemi blong [yumi], prea from olgeta we oli stap talem rabis toktok long [yumi], mekem i gud long olgeta we oli no laekem [yumi], mo prea from olgeta we oli mekem i nogud long [yumi].”

Taem yumi wok from ol gol we oli talem insaed long ol tijing ia, Krismes i sapos blong wan taem blong fogiv, wan taem blong hilim ol olfala soa mo putumbak ol rilesensip we oli bin go nogud.

Kwot: “Taswe, mi talem long yufala, yufala i mas fofogivim wanwan long yufala; from we hem we i no fogivim brata blong hem long fasin blong hem blong brekem loa, i stanap wetem rong long fored blong Lod; from wetem hem, i gat sin ia we i moa bigwan i stap.

“Mi, Lod, bambae mi fogivim huia we bambae mi fogivim; be yufala, mi talem se yufala i mas fogivim evri man.”

Krismes i wan taem blong yumi go moa bitim wanem we yumi stap mekem long nomol sekol blong lav mo ol frensip blong yumi. “Pis long wol gud wok blong man” i no wan mesej nomo blong olgeta we yumi gat ol filing blong lav mo sore finis long olgeta, olsem olgeta sitisen blong Jos o nesen, olgeta we oli stap laef long homtaon o neba blong yumi, o ol pipol we yumi gat semmak kalja. Ol heven oli talemaot gud wok blong man long evri man—long ol fren blong evri dei, olgeta we yumi no save olgeta, iven i go long ol enemi. Krismes hem i taem blong tingbaot se yumi evriwan i pikinini blong Papa long Heven, we i givim wan Pikinini Boe blong Hem we Hem i lavem tumas blong i pemaot evriwan long ded. Mo tu, Papa blong yumi long Heven i givim yumi ol blesing blong fasin blong sevem man mo kam olsem god long evri man long wol long semmak kondisen: sakem sin, kasem baptaes, mo folem ol loa mo ol odinens blong gospel.

IV.

Spirit blong Krismes i leftemap tingting blong yumi blong mekem sisen ia blong kam antap aot long ol samting we oli stap blokem yumi mo helpem yumi blong gat andastaning mo lav long evri pipol blong evri kala blong skin, biliv, mo ples we yumi kamaot long hem. Nomata se Ol Lata-dei Sent oli fulap, olsem mifala long Yuta, o fulap olsem yumi long evri ples, yumi mas helpem evri pikinini boe mo gel blong God. Yumi mas stap ol tru fren long evriwan, olgeta we oli blong Jos mo long olgeta we oli no blong Jos. Yumi sapos blong folem oda we God i givim long profet Moses blong givim long ol pikinini blong Isrel:

“Yufala i no mas spolem ol narafala man we oli kam long kantri blong yufala. Be strenja we i stap wetem yufala yufala i mas lukaot gud long hem, sem mak olsem we yufala i stap lukaot gud long ol laen blong yufala mo yufala mas lavem hem olsem we yufala i stap lavem yufala.”

Yumi mas tijim ol pikinini blong yumi blong oli stap kaen mo tingbaot evriwan. Mi sori taem mi harem ol papa mo mama we oli no memba, long komuniti ia we oli stap harem nogud from oli bilivim se ol boe mo gel blong olgeta, oli filim se oli no pat taem oli stap wetem ol pikinini o yut blong yumi we oli memba. Mi hop se fasin ia i no bigwan mo bae i finis. Yumi mas kam ol gudfala fren mo mas tingting long ol pipol long evri ples.

Yes, yumi mas stap longwe long ol kam tugeta we bae i mekem yumi kam slak long fet mo relijin blong yumi. Be blong stap longwe long ol samting ia i wan eskius long yumi blong no tingbaot ol narawan. I no mas blokem yumi tu long plante nara samting we ol pipol oli wok tugeta long wan bigfala samting we i stap long intres blong plante man we plante pipol oli pat insaed long hem tu.

Spirit we yumi sapos blong kasem mesej blong “pis, gud wok blong man” i spirit blong givim yumiwan long seves blong ol narawan. Semmak olsem Krismes i selebretem dei we Hem i bin bon, Hem we i givim laef blong Hem from yumi evriwan, mekem se wanwan long yumi i mas yusum Krismes olsem wan taem blong mekem i kam moa gud ol wei we yumi givim samting long ol narafala man.

Taem yumi mekem olsem—taem spirit blong givim blong Krismes i fulumap ol tingting mo ol aksen blong yumi—bae yumi wanwan i mekem ol kontribusen blong yumiwan i go long gol we i blong oltaem blong “pis long wol, gud wok blong man.” Hem i taem blong yumi evriwan i mekem hemia, from evri dei i wan dei kolosap long kambak blong Lod. Olsem Presiden Russell M. Nelson i tijim yumi long las konfrens blong Oktoba, “I gat yet blong kam we i moa gud, from Lod i stap muvum wok blong Hem i go hariap. I gat yet blong kam we i moa gud, taem yumi tanem ol hat mo laef blong yumi i go long Jisas Kraes.” En blong kwot.

Naoia mi kwot aot long “Kraes we I Laef: Testemoni blong Olgeta Aposol.” Hem i talem:

“Long taem we yumi stap tingbaot taem we Jisas Kraes i bon tu taosen yia bifo, mifala i stap givim testemoni blong mifala, long saed blong tru laef blong Hem we i no gat wan samting we i semmak long hem. Wan testemoni long saed blong bigfala sakrifaes blong Hem blong pemaot man mo paoa ia, i stap oltaem nomo.” I no gat nara man yet we i bin laef long wol, i gat paoa ia ova long ol man we oli bin laef long wol ia mo olgeta we bae oli laef yet long wol.”

Kwot i gohed: “Mifala i testifae strong, se laef blong Hem, we i stap long medel blong histri blong evri man, i neva stat long Betlehem mo i neva stop long Kalvari. Hem i Fasbon blong Papa, wan Pikinini Ia Nomo we i bin gat mit mo bun, Ridima blong wol. …

“Mifala i talem strong se prishud blong Hem mo Jos blong Hem i bin kambak long wol—‘mo i stanap antap long fandesen blong …ol aposol mo profet, Jisas Kraes … Hem i jif kona ston.’”

Kwot i gohed: “Mifala i testifae se bae Hem i kambak [samtaem] long wol ia. ‘Hae God bambae i soemaot we paoa blong hem i bigwan tumas, mo olgeta man long wol bambae oli luk bigfala paoa ya blong hem.’” En blong kwot. “Bambae Hem i rul olsem King blong Ol King, mo bae i rul olsem Lod blong Ol Lod, mo evri ni bae oli bodaon, mo evri tang bae oli toktok blong wosipim Hem.

“Mifala i serem testemoni, olsem ol Aposol blong Hem we oli odenem mifala folem stret fasin we Hem i mekem—se Jisas i Kraes we I Laef, Pikinini blong God we i no save ded. Hem i bigfala King Imanuel, we i stanap tedei long raet han blong Papa blong Hem.” Mi kwot bakegen, “Hem i laet, laef, mo hop blong wol. Rod blong Hem i rod we i lidim yumi i go long hapines long laef ia mo laef we i no save finis long wol we bae i kam. Yumi talem tangkyu long God from presen ia we i Hae Pikinini blong Hem, presen ia we i no gat samting moa i semmak long hem.”

Long nem blong Jisas Kraes, amen.