Stap Redi blong Luk Sevya

Taem yumi kam tru long Krismes sisen ia, ol tingting blong mi oli tanem i go long olgeta we maet oli stap longwe long hom, we i tekem tu, bigfala namba blong ol misinari we naoia, oli stap givim seves.

Fas Krismes blong mi longwe long hom, i taem we mi bin stap wan misinari long Inglan, long Disemba blong 1960. Mi bin stap givim seves long Swindon, Inglan.

Long 90 dei we i pas, mi mo kompanion blong mi, i bin openem Swindon blong misinari wok. Mitufala i bin stap rentem wan rum blong ol miting blong Sandei. Mitufala i kasem blesing ia blong gat sam konvet—long ol taem we branj i stat.

Long dei bifo Krismes, kompanion blong mi, Elda Noel Luke, mitufala i disaed blong talem halo long ol pipol insaed long ol hom blong olgeta, long eria we mitufala i stap wok long hem mo livim wan sot Krismes mesej mo wan blesing. Hem i wan naesfala naet, mo i gat wan mun we i stap saen long skae we i fulumap klaod, we i stap krietem wan filing olsem heven. Kwiktaem, mitufala i luksave evriwan we oli neba, oli onem Televisen blong olgeta i go Harry Secombe, wan fani man mo wan singga. Hem i singsing long naesfala singsing ia, “Blesem Haos Ia.” Hem i talem ol tabu toktok we i tajem mo meltem ol hat, kwot:

Blesem ol pipol raon long ples ia.

Kipim olgeta i klin mo fri, aot long sin.

Blesem mifala evriwan se, bae mifala i save stap

Strong, O Lod, blong stap wetem Yu.

From hemia, i putum ol wota long ae blong mifala. Singsing ia i kamaot kolosap long evri hom, saon blong hem i go antap mo spring i kambak aot long ol klaod. Elda Luke mo mi, i fulap long filing ia se, i tru tumas we mitufala i ol wokman blong Lod mo Sevya blong yumi, Jisas Kraes, we mitufala i stap traem blong givim seves mo blesem ol pikinini blong Papa blong yumi long Heven.

Olsem wan misinari, mi kam blong andastanem se, blong stap laef long wol ia, yumi evriwan i stap longwe long hom—we i hom blong yumi long heven. Wei blong filim kamfot blong hom ia, hem i, tru long seves we i go long Sevya.

Long ol yia we i jes pas, Jos i leftemap tingting blong yumi blong tokbaot plante laet we Sevya i givim long ful wol, speseli long taem blong Krismes sisen ia. Jos i gat wan gudfala efot tumas blong Saenem Wol blong tanem tingting blong evriwan i go long Sevya. Hemia i kam wetem wan efot blong givim samting mo seves olsem hemia blong Kraes, long olgeta we oli stap long nid.

Las yia, Jos i statem efot ia blong Saenem Wol blong stap yusum wan bigfala dijitol so, we i stap raonem Times Square long Niu Yok Siti.

Mary mo mi i bin stap long taem we oli soem wan bigfala dijitol pikja blong taem we Sevya i bon, mo i tajem hat blong mitufala. Hem i wan dip eksperiens long saed blong spirit. Long yia ia, eksperiens ia blong Times Square, oli bin stap mekem kopi blong hem i go long plante siti raon long wol.

Kasem taem blong Saenem Wol long Niu Yok Siti, mi bin luksave hadwok ia blong stap putum ol impoten presentesen ia long ol windo blong ol stoa dipatmen.

Mi tingbaot edisen blong Sandei blong New York Times we i gat wan ful pej taetol we i talem: “Ol Windo blong Holidei, Oli Kambak. Olgeta we Oli Soping long ol Stoa Tu, Oli Kambak.” Atikol ia i bin tokbaot wan fasin blong bifo we oli stap dekoretem gud ol windo blong ol stoa long Nambafaef Aveniu long Niu Yok Siti. Hamas we mi save luk mo talemaot abaot atikol ia mo visit blong mi we i pas i no longtaem, i no gat wan long ol windo ia we i haelaetem ol pikja blong Krismes o Pikinini Ia, Kraes.

Taem mi ridim atikol, mi tingbaot taem mi yangfala, ol pikja we oli soem long ol Krismes windo insaed long ol dipatmen stoa long Sol Lek Siti, oli putum pikja blong Pikinini Ia, Kraes. Mi tingbaot tu wan stori long taem ia abaot wan soping mol long Midwes we i wantem blong tokbaot bigwan stamba toktok blong Krismes blong i krietem tugeta, Krismes filing mo pulum tingting blong ol man blong mekem soping. Oli hangem wan bigfala bana we i rid olsem, “?Sapos Kraes i kam long naet ia, long huia olgeta nao bae Hem i kam long olgeta?” I gat sam nara pikja we oli soem long ol windo blong stoa andanit long saen ia. Sapos mi tingbaot stret sam pikja ia:

• Wan hem i wan nes we i stap givhan long wan olfala woman long bed. I soem se hem i sik tumas.

• Seken wan, i wan yangfala mama wetem wan niu bon bebi. Fes blong hem i saen wetem glad.

• Long nambatri pat, i soem wan famli wetem ol pikinini we oli stap krae. Hem i klia se i no gat inaf blong kakae, mo bae i gat sam nomo, sapos i gat ol presen blong Krismes.

• Nambafo pikja i soem i klia gud wan famli we oli rij mo oli stap karemaot ol presen pepa long plante presen.

• Nambafaef i wan pat i we i naes tumas, wan hambol famli wetem plante pikinini we oli stap singsing tugeta wetem bigfala glad.

Taem mi lukluk long faef pikja mo bana ia, “?Sapos Kraes i kam long naet ia, long huia olgeta nao bae Hem i kam long olgeta?”, tu tingting i kam long maen blong mi.

Faswan, yumi save se taem we Sevya i kam blong seken taem, bae yumi no save dei o aoa ia.

Nambatu, taem we Jisas Kraes i kam, olsem we Presiden Russell M. Nelson i bin tijim long konfrens we i jes pas, “[Hem] i stap kam, Jisas Kraes bae i kambak long wol olsem Mesaea blong wan taosen yia.” Blong stap redi, Presiden Nelson i askem strong long yumi “Blong dediketem laef blong yumi bakegen i go long Jisas Kraes.” Folem hemia, maet bana ia i save talem moa olsem, “?Sapos Kraes i kam long naet ia, huia olgeta nao oli redi blong welkamem Hem?”

Taem mi luklukbak long ol pat blong pikja long windo, mi luksave se evri samting we oli talem long yumi oli abaot ol situesen long saed blong bodi mo faenens blong ol pipol, be i no gat wan samting abaot situesen blong olgeta long saed blong spirit. Ol pikja we oli soem long windo i presentem wanwan man o woman we oli olfala mo sik, olsem olgeta we oli helti mo ol niubon. I gat tu, olgeta we oli rij mo pua. Be yia, helt mo situesen blong faenens i no talem long yumi wanem we i moa impoten, we hem i situesen blong spirit blong olgeta.

Insaed long Doktrin mo Ol Kavenan, yumi rid abaot ol kwaliti we wan i mas gat blong baptaes i kam insaed long Jos blong Kraes. Fas prinsipol i blong putum tingting blong yumi i stap daon, mo gat “wan hat we i fulap wetem sore mo wan spirit we i wantem blong sakem sin,” stap sakem sin, mo “givim seves long [Jisas Kraes] kasem en.” Gol blong olgeta i blong kam “wan fetful disaepol blong Jisas Kraes” mo progres folem rod blong kavenan we i mekem rere yumi blong kasem ol blesing blong Atonmen blong Hem.

Kraes, Hem i eksampol blong evri samting. Hem i talemaot: “Luk Mi Mi laet; Mi bin mekem wan eksampol blong yufala.” Taem yumi lukluk long situesen blong spirit blong yumi, bae yumi save mekem gud tumas blong lukluk long eksampol blong Hem we i stret gud evriwan. Sevya i bin soem long yumi rod ia blong faenem hapines, stret mining, mo glad long laef ia mo taem we i no save finis. Hapines mo glad, i talem mining blong Krismes spirit.

Long Jon 19:5 yumi ridim se, Paelat i givim Jisas i go long olgeta we oli wantem blong krusifaem Hem. Hem “i stap werem ol nil blong pin tri olsem hat blong king mo wan pepol kot. Mo Paelat i talem long olgeta, Yufala i luk! !Hemia Nao Man Ya!”

Long Krismes sisen ia, long sot taem ia, letem yumi luk Man Ia, we Hem i Kraes mo ol presen we Hem i bin givim.

Faswan, letem yumi tingting long merikel taem we Hem i bon.

Yumi save se, naesfala pikinini ia we yumi selebretem long Krismes sisen ia, Hem stret Pikinini ia nomo blong Papa. Hem i kasem paoa blong laef we i no save finis long Papa blong Hem—paoa blong laef. Mo Hem i kasem paoa blong ded long mama blong Hem long wol ia. Oli bin jusum Hem long stat blong mekem tabu misin blong Hem.

Matiu 1:23 i rid olsem, “Bambae wan yang gel we i no save man yet, bambae hem i bonem wan pikinini boe, mo bambae oli putum nem blong hem se Emanuel, nem ya Emanuel i min se “God i stap wetem yumi.”

Nambatu, tingting hevi long laef blong Hem we i stret gud mo no gat sin mo eksampol blong Hem. Nomata se Hem i harem nogud long ol soa blong bodi, fulap hadtaem mo temtesen blong evri kaen, Hem i gat sakses long misin blong Hem. Hem i eksampol ia mo soemaot rod we yumi mas folem. Hem i stap fetful long ol pua, olgeta we oli gat nid, ol sikman, mo olgeta we oli harem nogud, mo komplitim gud plan ia blong laef we i no save finis, from Hem nomo i kwalifae from.

Nambatri, tingting hevi long ded ,laef bakegen long ded mo Atonmen blong Hem

Wanem we i tokbaot tu Atonmen, Prijim Gospel blong Mi we i tokbaot gud i simpol olsem se: “Atonmen blong Sevya i tekem tu, safaring blong Hem long Garen blong Getsemane mo safaring blong Hem mo ded blong Hem long kros, mo hem i bin en wetem Taem we Hem i bin Laef Bakegen long Ded. Hem i safa i bitim wanem we yumi save tingting long hem—i bigwan tumas we i mekem se blad blong Hem i ronaot long evri hol blong skin.”

Insaed long Doktrin mo Ol Kavenan 76:41 yumi ridim: “Se hem i bin kam long wol, hem we i Jisas, blong oli nilim hem long kros from wol ia, mo blong hem i tekem ol sin blong wol, mo blong hem i mekem wol ia i kam tabu, mo blong hem i klinim wol ia long evri fasin we i no stret mo i no gud.”

Atonmen blong Jisas Kraes hem i bigfala samting we i hapen we i neva hapen long histri blong man. Evriwan long yumi i mekem sin, mo hem i tru long Atonmen blong Jisas Kraes nomo i mekem se yumi save kasem sore mo laef wetem God.

Nambafo, mekem yumi rere from Seken Kaming blong Hem.

Insaed long OlTesteman, Job i tijim “Mo biaen, hem bambae i kam.” Olsem we Presiden Russell M. Nelson i bin tijim gud se, “[Kraes] bae i gavman blong tugeta olfala Jerusalem mo Niu Jerusalem mo wok blong Jos blong Hem.” Naoia hem i taem blong yumi blong rere blong taem ia. Ol skripja oli talem: “Yufala i mas mekem yufala i rere from bigfala dei ia blong Lod.”

Las kaonsel blong mi i blong lavem mo wok blong Lod. Taem yumi stap tingting long situesen blong yumi long saed blong spirit mo taem yumi rere blong welkamem Sevya, faswan, yumi mas, “Lavem Hae God ya we i God blong yumi long olgeta hat blong yumi, mo long olgeta laef blong yumi, mo long olgeta tingting blong yumi.” Mo nambatu i blong “Lavem neba blong yu olsem yuwan bakegen.”

Lav blong yumi long God mo long ol narafala man, i had pat ia nao blong faenemaot situesen blong spirit blong yumi. Sapos yumi lavem God, bae yumi kipim ol komanmen blong Hem. Mo sapos yumi lavem ol narawan, bae yumi wok blong olgeta mo stap ol han blong Sevya long olgeta.

Long Doktrin mo Ol Kavenan: “Yes, bambae mi openem hat blong ol pipol, mo bambae mi stanemap wan jos tru long han blong yu.”

Prinsipol wei we yumi save soem tangkyu blong yumi i go long Sevya long Krismes sisen ia i blong stap wokman blong Hem—blong, wok olsem, ol han blong Hem long wol ia.

Long naesfala taem ia, taem yumi selebretem taem we Lod mo Sevya blong yumi i bon, Jisas Kraes, mi testifae long yufala se, Hem i stap laef. Hem i Gudfala Eksampol blong yumi, Loya blong yumi long Papa, mo hem i mekem i hapen evri impoten samting blong yumi save gobak long ples blong Papa mo Pikinini. Hem i waes tingting blong yumi folem Jisas Kraes mo kasem ol presen we Hem i bin givim.

Letem Krismes blong yufala i fulap long glori, we Jisas Kraes i stap long medel.

Long nem blong Jisas Kraes, amen.