Ol Presen We Oli Gat Hae Valiu

Tedei long naet, mi toktok tu wetem glad mo sapraes abaot hamas Krismes i tabu mo i impoten. I nogat wan taem long histri blong wol we i bin gat bigfala paoa we i bitim taem we Jisas blong Nasaret i bon i kam long wol mo misin blong Hem, ova tu taosen yia i pas. Truaot long wol tedei, oli skelem taem folem taem ia we i fulap long merikel.

Taem we Lod blong yumi i bon i kam long wol, oli selebretem long plante defren wei raon long wol, be i gat wan Krismes kastom we i semmak long evri ples.

Kastom ia i bin stat wetem stori long Matiu, abaot ol waes man long Is we oli kam blong wosipim Jisas. Taem oli kam, oli bin tekem ol naesfala presen. Tedei, kastom ia blong stap givimaot ol presen i wan bigfala pat blong ol Krismes selebresen.

Fas memori blong mi abaot wan Krismes presen i wan naesfala pleiplei masket we i sutum aot wan lid we i hang long wan string, mo wan pleiplei dakdak we i save muvmuv. Hemia i wan bigfala glad blong wan boe we i gat fo yia. Dakdak ia i save wokbaot raon long floa, be i tru, hem i no save stanap longtaem from mi stap glad tumas blong sutum wetem masket blong mi, 15 sentimeta, longwe long hem. Be i no longtaem pleiplei ia i brokbrok, mo from hem i materiol samting, hapines we hem i bin givim i blong sot taem nomo mo kwiktaem mi fogetem.

Tunaet, mi talem tri presen we wanwan long yumi i save givimaot long Krismes sisen ia, mo truaot long ol laef blong yumi, we bae i no givim hapines blong sot taem nomo, be bae i givim tru glad we i no save finis.

Faswan, hem i presen blong testemoni. Hemia i wan presen blong yuwan mo taem yumi givimaot fri, wetem trutok, bae i talemaot ol filing we i dip insaed long sol blong yumi. I gat moa valiu i bitim gol, insens, o mir.Klin testemoni blong yumi abaot Jisas Kraes olsem Sevya mo Ridima blong yumiwan, i stap long medel blong Krismes selebresen.

Taem ol sikis pikinini blong mitufala oli yang, wan naet mi mo Jacqui i bin disaed se long famli haos naet, bae mifala i nogat wan lesen be bae mifala i serem ol testemoni nomo wetem ol narawan. Afta we mi bin serem testemoni blong mi, dia gel blong mitufala Chelsea, we i gat samples 16 yia long taem ia, i talem wetem ol ae we oli bigwan, “!Papa mi neva harem testemoni blong yu!” Mi bin sek smol mo mi sapraes long ansa blong hem. Long taem ia, mi bin wan stek presiden mo mi save se Chelsea i bin harem mi serem testemoni plante taem long plante miting blong jos mo long hom. Be long taem ia, hem i harem mo i filim testemoni blong mi olsem we i blong fastaem. Hem i bin tijim mi wan lesen we bae mi neva fogetem: presen blong testemoni i gat hae valiu mo i gat paoa long hem taem yumi stap serem oltaem.

Sekenwan i presen ia blong fogiv. I tru, long wanwan taem, yumi bin filim nogud from ol toktok, mo ol aksen blong ol narawan we i no kaen. Mo sapos yumi stap ones, yumi tu yumi bin mekem ol narawan oli bin harem nogud. Jisas Kraes i tijim se: “Mi, Lod, bambae mi fogivim huia we bambae mi fogivim; be yufala, mi talem se yufala i mas fogivim evri man” Afta hem i tekem wan step moa blong talem se, taem yumi fel blong fogivim narawan from ol sin we oli mekem agensem yumi, bigfala sin i blong yumi.

Taem yumi wantem mo yumi ones blong fogivim ol narawan, yumi kam fri aot long posen blong harem nogud, fasin blong jaj, o fasin blong fasin blong stap givimbak.

Mi gat wan gudfren long Saot Afrika, nem blong hem Sandile Makasi. Wetem raet we mi kasem long hem, bae mi serem stori blong hemwan abaot fogivnes. Taem Sandile i gat kolosap tu yia, ol polis oli bin tritim nogud mo kilim ded papa blong hem we i gat 28 yia nomo, from seperesen bitwin ol waet mo blak man. Afta nao, Sandile i faenemaot ol ditel mo pikja blong ded blong papa blong hem. Naoia bae mi kwotem ol toktok blong hem:

“Long mi yang olsem wan boe, mi bin filim nogud tumas mo gat fulap kros from wanem we oli bin mekem long papa blong mi. ?From wanem oli tekemaot hem long mifala? Oli bin stilim hem, olsem wan papa mo wan tija blong mi, mo oli stilim hem olsem wan kompanion we i kea wetem bigfala lav long mama blong mi.

“Taem mi faenemaot nogud fasin blong wei we oli tritim nogud hem, hat mo maen blong mi i fulap wetem bigfala kros, mo mi wantem stap givimbak long ol polis mo waet pipol.

“Mi gohed blong kipim ol filing ia kasem taem mi faenem gospel ia blong Jisas Kraes we i bin kambak. Gospel i bin helpem mi blong andastanem se mi mas fogivim ol polis ofisa from ol kraem blong olgeta, mo se glad mo progres blong mi long saed blong spirit, i dipen long hem ia.

“Hemia i isi blong talem bitim blong mekem, be mi gohed strong wetem plante prea, mo afta sam taem, Lod i helpem mi blong fogivim ol enemi blong mi Mi bin filim kamfot, be i no blong harem nogud; mi bin gat lav, be i no blong gat fasin blong stap givimbak mo kroskros; mi bin gat laet mo pis, be i no blong gat tudak long hat mo maen blong mi.”

Tangkyu Sandile long eksampol blong yu blong stap givimaot presen ia blong fogivnes.

Nambatri, presen ia blong gat lav olsem hemia blong Kraes. Long evri presen long saed blong spirit, i no gat wan i moa bitim bigfala lav blong Kraes. Jisas i soemaot klia lav blong Hem long ol nara man mo Hem i bin tijim yumi blong lavem wanwan long yumi.

Taem yumi folem eksampol blong Sevya blong stap soemaot lav blong yumi long ol nara man tru toktok mo aksen, mo afta bae oli save eksperiensem lav blong God tru long yumi.

Sam yia i pas, mi bin mitim wan yang man we i gat 23 yia we i stap long Washington, we i wan gudfala eksampol blong hemia. Ol misinari oli bin stap tijim hem blong tri manis, mo hem bin eksperiensem wan bigfala jenis long fes mo long laefstael blong hem. Wan naet hem i bin stap toktok wetem ol misinari long fon, mo taem oli stap finis, oli se “Lavem yu, Michael.” Hem i putum daon fon mo hem i stap tingting hemwan se, “!Waow!. Hemia i wan samting mi no stap talem oltaem. Mi save talem olsem tu long ol narawan.” Hem i bin disaed blong gat strong paoa long tingting blong talem long mama blong hem se hem i lavem hem. Mama blong hem i stap long wan nara pat blong stet, sam aoa longwe long hem. Taem hem i kolem mo talem long hem “Mi lavem yu, Mama,” kwiktaem hem i ansa “?Wanem i rong long yu? ?Yu bin go pas long dokta mo kasem nius we i nogud? ?Bae yu stap gobak long prisen?” Afta, hem i talem long mama blong hem abaot gospel we hem i faenem mo olsem wanem i bin jenisim hem, mo naoia hem i stopem smok mo yusum ol drag mo hem i mekem plan blong kasem baptaes.

Mi ting se hemia i wan nambawan eksampol blong wanem bae i hapen taem ol pipol oli filim lav blong God tru ol narawan. Hem i mekem ol hat oli sofsof mo afta, i krietem wan filing blong wantem serem presen ia blong lav wetem ol narawan.

Tunaet, yumi bin stat taem yumi tokabaot ol naesfala presen taem yumi stap tokabaot ol gol, ol insens mo mir. Mi bin jekem se yu save pem ol presen ia tu long Amazon. Be bae yu neva faenem ol nara presen we yumi bin tokabaot ia long eni stoa. Oli ol presen we oli nogat praes, be yet oli tekem i kam tru glad we i no save finis long tugeta, man we i kasem mo man we i givimaot.

So taem yu stap tingbaot wanem bae yu givim long Krismes ia, mi invaetem yu blong:

1. Serem testemoni blong yu wetem famli mo olgeta we yu lavem. Taem yu serem naesfala presen ia, testemoni blong yuwan bae i kam strong moa.

2. Fogivim wan we yu filim se i bin mekem nogud long yu o i mekem yu harem nogud. Blong stap givim presen ia, yu tu bae yu filim pis mo hiling.

3. Helpem ol narawan oli filim lav blong God tru long yu. Sapos i posibol, talem long olgeta se, yu lavem olgeta. Taem yu luk ol narawan olsem we God i luk olgeta, lav blong yu long olgeta bae i gro, mo bae yu tu, yu filim lav blong God long laef blong yu.

Blong endem, mi wisim wanwan long yufala wan Krismes sisen we i fulap long bigfala glad. Mi talem witnes blong mi abaot Jisas we i Kraes. Hem i stap laef. Hem i Sevya mo Ridima blong yumi. Hem i Loya mo Fren blong yumi. Mi wosipim Hem. Mi lavem Hem. Tru long presen blong Hem long wanwan long yumi, i pem long wan praes we i hae, yumi kwalifae blong kasem bigfala presen aot long evri presen—laef we i no save finis long ples we Papa blong yumi long Heven, we i gat bigfala lav.

Long nem blong Jisas Kraes, amen.