ການກຽມພ້ອມເພື່ອພົບກັບພຣະຜູ້ຊ່ວຍໃຫ້ລອດ
ລາຍການໃຫ້ຄຳດົນໃຈຂອງຝ່າຍປະທານສູງສຸດ ເນື່ອງໃນໂອກາດເທດສະການບຸນຄຣິດສະມາດ ປີ 2024
ວັນອາທິດ, ວັນທີ 8 ເດືອນທັນວາ, 2024
ຂະນະທີ່ເຮົາເຂົ້າສູ່ຊ່ວງເທດສະການບຸນຄຣິດສະມາດ, ຄວາມຄິດຂອງຂ້າພະເຈົ້າກໍໄດ້ຫັນໄປຫາຜູ້ທີ່ອາດຕ້ອງໄດ້ຢູ່ຫ່າງໄກຈາກບ້ານ, ລວມທັງຜູ້ສອນສາດສະໜາຈຳນວນຫລວງຫລາຍທີ່ກຳລັງຮັບໃຊ້ຢູ່ໃນຂະນະນີ້.
ຄຣິດສະມາດຄັ້ງທຳອິດຂອງຂ້າພະເຈົ້າທີ່ຢູ່ຫ່າງໄກຈາກບ້ານ ຄືຕອນທີ່ຂ້າພະເຈົ້າເປັນຜູ້ສອນສາດສະໜາຢູ່ປະເທດອັງກິດ, ໃນເດືອນທັນວາ ປີ 1960. ຂ້າພະເຈົ້າໄດ້ຮັບໃຊ້ຢູ່ເມືອງສະວິນດອນ, ປະເທດອັງກິດ.
ພວກເຮົາໄດ້ເປີດເມືອງສະວິນດອນ ສຳລັບວຽກງານເຜີຍແຜ່ປະມານ 90 ມື້ກ່ອນໜ້ານັ້ນ. ພວກເຮົາໄດ້ເຊົ່າຫ້ອງໜຶ່ງສຳລັບການປະຊຸມໃນວັນອາທິດ. ພວກເຮົາໄດ້ຮັບພອນທີ່ໄດ້ມີຜູ້ປ່ຽນໃຈເຫລື້ອມໃສໃໝ່ສອງສາມຄົນ—ເປັນການເລີ່ມຕົ້ນຂອງສາຂາ.
ໃນຄືນກ່ອນວັນຄຣິດສະມາດ ຄູ່ສອນຂອງຂ້າພະເຈົ້າ, ແອວເດີ ໂນແອວ ລຸກ, ແລະ ຂ້າພະເຈົ້າໄດ້ຕັດສິນໃຈໄປທັກທາຍຜູ້ຄົນຢູ່ໃນບ້ານຂອງເຂົາເຈົ້າ ໃນເຂດນັ້ນ ບ່ອນທີ່ພວກເຮົາກຳລັງຮັບໃຊ້ ແລະ ໄດ້ມອບຂ່າວສານ ແລະ ພອນສັ້ນໆກ່ຽວກັບຄຣິດສະມາດ. ມັນເປັນຄືນທີ່ສວຍງາມ, ແລະ ທ້ອງຟ້າກໍເຕັມໄປດ້ວຍເມກ ທີ່ດວງເດືອນສ່ອງແສງຜ່ານ ເຮັດໃຫ້ເກີດຄວາມຮູ້ສຶກຄືກັບຢູ່ໃນສະຫວັນ. ໃນທັນໃດນັ້ນພວກເຮົາກໍຮູ້ວ່າ ທຸກຄົນໃນຄຸ້ມນັ້ນໄດ້ເປີດໂທລະທັດເບິ່ງການສະແດງຕະຫລົກ ແລະ ນັກຮ້ອງຄົນໜຶ່ງຊື່, ແຮຣີ ຊີຄອມ. ລາວໄດ້ຮ້ອງເພງອັນລ້ຳຄ່າຊື່ວ່າ “Bless This House [ຂໍຈົ່ງອວຍພອນເຮືອນຫລັງນີ້].” ລາວໄດ້ຂັບຮ້ອງຄຳສັກສິດດ້ວຍຄວາມຮູ້ສຶກຊາບຊຶ້ງ, ໂດຍມີຂໍ້ຄວາມດັ່ງນີ້:
ຂໍຈົ່ງອວຍພອນຄົນໃນນີ້.
ຂໍໃຫ້ພວກເຂົາບໍລິສຸດ ແລະ ປາດສະຈາກບາບ.
ຂໍຈົ່ງອວຍພອນພວກຂ້ານ້ອຍທຸກຄົນ ເພື່ອວ່າ ໂອ ພຣະຜູ້ເປັນເຈົ້າ
ການຂັບຮ້ອງຂອງລາວໄດ້ເຮັດໃຫ້ພວກເຮົານ້ຳຕາໄຫລ. ເພງນັ້ນໄດ້ດັງມາຈາກເກືອບທຸກບ້ານ, ດັງກ້ອງ ແລະ ສະທ້ອນກັບມາຈາກເມກ. ແອວເດີ ລຸກ ແລະ ຂ້າພະເຈົ້າໄດ້ມີຄວາມຮູ້ສຶກຖ້ວມລົ້ນວ່າ ພວກເຮົາເປັນທູດຂອງພຣະຜູ້ເປັນເຈົ້າ ແລະ ພຣະຜູ້ຊ່ວຍໃຫ້ລອດ, ພຣະເຢຊູຄຣິດຢ່າງແທ້ຈິງ, ພະຍາຍາມຮັບໃຊ້ ແລະ ອວຍພອນລູກໆຂອງພຣະບິດາເທິງສະຫວັນ.
ໃນຖະນະຜູ້ສອນສາດສະໜາ ຂ້າພະເຈົ້າໄດ້ມາເຂົ້າໃຈວ່າ ການດຳລົງຊີວິດຢູ່ໃນໂລກນີ້ ເຮົາທຸກຄົນຕ້ອງຢູ່ຫ່າງໄກຈາກບ້ານ—ບ້ານສະຫວັນຂອງເຮົາ. ວິທີທີ່ຈະຮູ້ສຶກຄວາມສະບາຍໃຈຂອງບ້ານນັ້ນ ຄືການຮັບໃຊ້ພຣະຜູ້ຊ່ວຍໃຫ້ລອດຂອງເຮົາ.
ໃນຊຸມປີບໍ່ດົນຜ່ານມານີ້, ສາດສະໜາຈັກໄດ້ຊຸກຍູ້ເຮົາໃຫ້ເນັ້ນຄວາມສະຫວ່າງທີ່ພຣະຜູ້ຊ່ວຍໃຫ້ລອດໄດ້ປະທານໃຫ້ທົ່ວໂລກ, ໂດຍສະເພາະໃນຊ່ວງເທດສະການບຸນຄຣິດສະມາດນີ້. ສາດສະໜາຈັກໄດ້ມີໂຄງການ ຄວາມສະຫວ່າງຂອງໂລກ ທີ່ດີເດັ່ນ ເພື່ອຫັນຄວາມຄິດຂອງທຸກຄົນໄປຫາພຣະຜູ້ຊ່ວຍໃຫ້ລອດ. ສິ່ງນີ້ຄຽງຄູ່ໄປກັບໂຄງການທີ່ຈະມອບໃຫ້ແກ່ຄົນຂັດສົນ ແລະ ໃຫ້ການຮັບໃຊ້ແບບພຣະຄຣິດ.
ປີແລ້ວນີ້ສາດສະໜາຈັກໄດ້ເລີ່ມໂຄງການ ຄວາມສະຫວ່າງຂອງໂລກ ນີ້ ໂດຍການໃຊ້ຈໍໂທລະພາບດິຈິຕ້ອນຂະໜາດໃຫຍ່ອ້ອມຮອບ ທາມສະແຄວ ໃນເມືອງນິວຢອກ.
ແມຣີ ກັບ ຂ້າພະເຈົ້າໄດ້ຢູ່ທີ່ນັ້ນ ຕອນທີ່ພາບອັນໜ້າປະທັບໃຈຂອງການກຳເນີດຂອງພຣະຜູ້ຊ່ວຍໃຫ້ລອດຖືກສະແດງຢູ່ໃນປ້າຍໂຄສະນາດິຈິຕ້ອນຂະໜາດຍັກ. ມັນເປັນປະສົບການທາງວິນຍານທີ່ເລິກເຊິ່ງແທ້ໆ. ປີນີ້ປະສົບການທີ່ ທາມສະແຄວ ໄດ້ຖືກກະທຳແບບດຽວກັນຢູ່ໃນຫລາຍເມືອງທົ່ວໂລກ.
ໃນຂະນະທີ່ຢູ່ໃນເມືອງນິວຢອກ, ໃນລະຫວ່າງເຫດການ ຄວາມສະຫວ່າງຂອງໂລກ, ຂ້າພະເຈົ້າໄດ້ສັງເກດເຫັນຄວາມພະຍາຍາມໃນການຈັດສະແດງທີ່ສຳຄັນ ໃນປ່ອງຢ້ຽມຂອງຫ້າງສິນຄ້າ.
ຂ້າພະເຈົ້າຈື່ໄດ້ວ່າ ໜັງສືພິມສະບັບວັນອາທິດຂອງ New York Times ມີບົດຄວາມເຕັມໜຶ່ງໜ້າ ໃສ່ຊື່ວ່າ: “ປ່ອງຢ້ຽມວັນພັກຄຣິດສະມາດກັບມາແລ້ວ. ຜູ້ຊື້ກໍກັບມາເຊັ່ນກັນ.” ບົດຄວາມດັ່ງກ່າວໄດ້ເລົ່າເຖິງປະເພນີທີ່ປ່ອງຢ້ຽມຂອງຫ້າງສິນຄ້າຢູ່ຖະໜົນ ຟິບອະເວນິວ ໃນເມືອງນິວຢອກ ທີ່ປະດັບປະດາຢ່າງຫລູຫລາ. ເທົ່າທີ່ຂ້າພະເຈົ້າສາມາດກຳນົດໄດ້ຈາກບົດຄວາມ ແລະ ການໄປຢ້ຽມຢາມທີ່ຜ່ານມາຂອງຂ້າພະເຈົ້າ, ບໍ່ມີປ່ອງຢ້ຽມບ່ອນໃດທີ່ມີສາກຄຣິດສະມາດ ຫລື ກຸມມານນ້ອຍພຣະຄຣິດ.
ຂະນະທີ່ຂ້າພະເຈົ້າອ່ານບົດຄວາມ, ຂ້າພະເຈົ້າຈື່ປ່ອງຢ້ຽມຄຣິດສະມາດຕອນທີ່ຂ້າພະເຈົ້າຍັງນ້ອຍ ໃນຫ້າງສິນຄ້າໃນເມືອງເຊົາເລັກ ມີການສະແດງພາບກຸມມານນ້ອຍພຣະຄຣິດ. ຂ້າພະເຈົ້າກໍຍັງຈື່ເລື່ອງລາວໃນສະໄໝນັ້ນນຳອີກ ກ່ຽວກັບຫ້າງສິນຄ້າແຫ່ງໜຶ່ງໃນພາກກາງຂອງສະຫະລັດ ທີ່ຕ້ອງການເນັ້ນເຖິງຫົວຂໍ້ວັນຄຣິດສະມາດ ເພື່ອສ້າງຄວາມຮູ້ສຶກວັນຄຣິດສະມາດ ແລະ ດຶງດູດຜູ້ຊື້. ເຂົາເຈົ້າໄດ້ຕິດປ້າຍໃຫຍ່ທີ່ອ່ານວ່າ, “ຖ້າພຣະຄຣິດສະເດັດມາໃນຄືນນີ້, ພຣະອົງຈະມາຫາໃຜ?” ມີສາກການສະແດງຫລາຍຊຸດຢູ່ທີ່ປ່ອງຢ້ຽມຂອງຮ້ານຄ້າ ຢູ່ກ້ອງປ້າຍໃຫຍ່ນັ້ນ. ຖ້າຂ້າພະເຈົ້າຈື່ສາກເຫລົ່ານັ້ນໄດ້ບໍ່ຜິດ:
-
ສາກໜຶ່ງແມ່ນຍິງຊະລາຄົນໜຶ່ງນອນຢູ່ໃນຕຽງ ໂດຍມີນາງພະຍາບານຄອຍດູແລ. ເບິ່ງຄືວ່າລາວປ່ວຍໜັກ.
-
ສາກອັນທີສອງແມ່ນແມ່ໜຸ່ມກັບລູກນ້ອຍເກີດໃໝ່. ໜ້າຕາຂອງລາວເຕັມໄປດ້ວຍຄວາມສຸກ.
-
ສາກອັນທີສາມສະແດງຄອບຄົວທີ່ລູກນ້ອຍກຳລັງຮ້ອງໄຫ້. ເຫັນໄດ້ຢ່າງແຈ່ມແຈ້ງວ່າ ບໍ່ມີອາຫານກິນຢ່າງພຽງພໍ, ແລະ ຂອງຂວັນຄຣິດສະມາດກໍຄົງບໍ່ມີຫລາຍ, ຖ້າມີ.
-
ສາກອັນທີສີ່ເປັນຄອບຄົວທີ່ຮັ່ງມີຢ່າງເຫັນໄດ້ຊັດ ກຳລັງແກະຂອງຂວັນຢ່າງຫລວງຫລາຍ.
-
ສາກອັນທີຫ້າເປັນຄອບຄົວທີ່ໜ້າຮັກ ແລະ ຖ່ອມຕົວ ທີ່ມີລູກຫລາຍຄົນ ກຳລັງຮ້ອງເພງນຳກັນຢ່າງມ່ວນຊື່ນ.
ໃນຂະນະທີ່ຂ້າພະເຈົ້າຄິດໄຕ່ຕອງກ່ຽວກັບຫ້າສາກເຫລົ່ານັ້ນ ແລະ ປ້າຍທີ່ວ່າ “ຖ້າພຣະຄຣິດສະເດັດມາໃນຄືນນີ້, ພຣະອົງຈະມາຫາໃຜ?”, ຄວາມຄິດສອງຢ່າງໄດ້ເຂົ້າມາສູ່ຈິດໃຈຂອງຂ້າພະເຈົ້າ.
ຢ່າງທຳອິດ, ເຮົາຮູ້ວ່າເມື່ອພຣະຜູ້ຊ່ວຍໃຫ້ລອດສະເດັດມາຄັ້ງທີສອງ, ເຮົາຈະບໍ່ຮູ້ວັນ ຫລື ເວລາ.
ຢ່າງທີສອງ, ເມື່ອພຣະເຢຊູຄຣິດສະເດັດມາ, ດັ່ງທີ່ປະທານຣະໂຊ ເອັມ ແນວສັນ ໄດ້ສິດສອນຢູ່ໃນກອງປະຊຸມໃຫຍ່ສາມັນເທື່ອແລ້ວນີ້ວ່າ, “[ພຣະອົງ] ຈະສະເດັດກັບມາຍັງໂລກໃນຖານະພຣະເມຊີອາແຫ່ງພັນປີ.” ເພື່ອກຽມພ້ອມ ປະທານແນວສັນໄດ້ຮຽກຮ້ອງເຮົາວ່າ “ໃຫ້ອຸທິດຊີວິດ [ຂອງເຮົາ] ໃຫ້ກັບພຣະເຢຊູຄຣິດຄືນໃໝ່.” ດັ່ງນັ້ນ, ປ້າຍແຜ່ນນັ້ນອາດຈະຂຽນຖືກຕ້ອງຖ້າມັນກ່າວວ່າ “ຖ້າພຣະຄຣິດສະເດັດມາໃນຄືນນີ້, ຜູ້ໃດຈະກຽມພ້ອມທີ່ຈະຕ້ອນຮັບພຣະອົງ?”
ໃນຂະນະທີ່ຂ້າພະເຈົ້າທົບທວນສາກຢູ່ທີ່ປ່ອງຢ້ຽມ, ຂ້າພະເຈົ້າຮູ້ວ່າທຸກສິ່ງທີ່ສາກເຫລົ່ານັ້ນບອກເຮົາ ແມ່ນກ່ຽວກັບສະພາບທາງຮ່າງກາຍ ແລະ ການເງິນຂອງຜູ້ຄົນ, ແຕ່ບໍ່ມີສິ່ງໃດບອກກ່ຽວກັບສະພາບທາງວິນຍານຂອງພວກເຂົາເລີຍ. ພາບຢູ່ປ່ອງຢ້ຽມສະແດງໃຫ້ເຫັນບຸກຄົນທີ່ເຖົ້າແກ່ ແລະ ປ່ວຍໂຊ, ລວມທັງຜູ້ທີ່ມີສຸຂະພາບດີ ແລະ ຫາກໍເກີດ. ມີທັງຄົນຮັ່ງມີ ແລະ ຄົນຍາກຈົນ. ແຕ່ອາຍຸ, ສຸຂະພາບ, ແລະ ສະຖານະທາງການເງິນບໍ່ໄດ້ບອກເຮົາວ່າ ແມ່ນຫຍັງສຳຄັນແທ້ໆ, ຊຶ່ງກໍຄືສະພາບທາງວິນຍານຂອງພວກເຂົາ.
ໃນຄຳສອນ ແລະ ພັນທະສັນຍາເຮົາອ່ານກ່ຽວກັບຄຸນສົມບັດສຳລັບການບັບຕິສະມາເຂົ້າໃນສາດສະໜາຈັກຂອງພຣະຄຣິດ. ເກນຕົ້ນຕໍແມ່ນຂຶ້ນຢູ່ກັບຄວາມຖ່ອມຕົວຂອງເຮົາເອງ, ໂດຍມີ “ໃຈທີ່ຊອກຊ້ຳ ແລະ ວິນຍານທີ່ສຳນຶກຜິດ,” ການກັບໃຈ, ແລະ “ການຮັບໃຊ້ [ພຣະເຢຊູຄຣິດ] ຈົນເຖິງທີ່ສຸດ.” ຈຸດເປົ້າໝາຍແມ່ນເພື່ອກາຍເປັນ “ສານຸສິດທີ່ອຸທິດຕົນຂອງພຣະເຢຊູຄຣິດ” ແລະ ກ້າວໜ້າໄປຕາມເສັ້ນທາງແຫ່ງພັນທະສັນຍາ ຊຶ່ງຕຽມເຮົາສຳລັບພອນແຫ່ງການຊົດໃຊ້ຂອງພຣະອົງ.
ພຣະຄຣິດເປັນຕົວຢ່າງໃນທຸກສິ່ງ. ພຣະອົງໄດ້ປະກາດວ່າ, “ຈົ່ງເບິ່ງ ເຮົາຄືຄວາມສະຫວ່າງ; ເຮົາໄດ້ເຮັດເປັນຕົວຢ່າງໄວ້ໃຫ້ເຈົ້າແລ້ວ.” ເມື່ອເຮົາເບິ່ງສະພາບຂອງວິນຍານຂອງເຮົາ, ເຮົາຈະເຮັດໄດ້ດີທີ່ຈະເບິ່ງຕົວຢ່າງທີ່ສົມບູນແບບຂອງພຣະອົງ. ພຣະຜູ້ຊ່ວຍໃຫ້ລອດໄດ້ສະແດງໃຫ້ເຮົາເຫັນວິທີທີ່ຈະພົບຄວາມສຸກ, ຄວາມໝາຍ, ແລະ ຄວາມຊື່ນຊົມໃນຊີວິດນີ້ ແລະ ໃນນິລັນດອນ. ຄວາມສຸກ ແລະ ຄວາມຊື່ນຊົມກຳນົດວິນຍານແຫ່ງຄຣິດສະມາດ.
ໃນ ໂຢຮັນ 19:5 ເຮົາອ່ານວ່າ ປີລາດໄດ້ນຳພຣະເຢຊູມາຢູ່ຕໍ່ໜ້າຜູ້ທີ່ຕ້ອງການຄຶງພຣະອົງ. ພຣະອົງໄດ້ “ສວມມຸງກຸດໜາມ, ແລະ ນຸ່ງເສື້ອຄຸມສີມ່ວງ. ແລະ ປີລາດໄດ້ກ່າວກັບພວກເຂົາວ່າ, ເບິ່ງຊາຍຄົນນີ້ແມ!”
ໃນເທດສະການບຸນຄຣິດສະມາດນີ້ ຂໍໃຫ້ເຮົາຈົ່ງເບິ່ງພຣະອົງ, ຜູ້ເປັນພຣະຄຣິດ, ແລະ ເບິ່ງຂອງປະທານທີ່ພຣະອົງໄດ້ມອບໃຫ້ຈັກບຶດໜຶ່ງ.
ທຳອິດ, ໃຫ້ເຮົາພິຈາລະນາການກຳເນີດທີ່ໜ້າອັດສະຈັນຂອງພຣະອົງ.
ເຮົາຮູ້ວ່າທາລົກນ້ອຍທີ່ໜ້າຮັກທີ່ເຮົາສະເຫລີມສະຫລອງໃນຊ່ວງເທດສະການບຸນຄຣິດສະມາດນີ້ ຄືພຣະບຸດອົງດຽວທີ່ຖືກຳເນີດຂອງພຣະບິດາ. ພຣະອົງໄດ້ຮັບອຳນາດແຫ່ງຊີວິດນິລັນດອນຈາກພຣະບິດາຂອງພຣະອົງ—ອຳນາດທີ່ຈະມີຊີວິດ. ແລະ ພຣະອົງໄດ້ຮັບອຳນາດແຫ່ງຄວາມຕາຍຈາກມານດາຂອງພຣະອົງ. ພຣະອົງໄດ້ຖືກເລືອກຕັ້ງແຕ່ຕົ້ນສຳລັບພາລະກິດອັນສັກສິດຂອງພຣະອົງ.
ມັດທາຍ 1:23 ອ່ານວ່າ, “ຍິງພົມມະຈາຣີຜູ້ໜຶ່ງຈະຖືພາ, ແລະ ຈະເກີດລູກຊາຍຄົນໜຶ່ງ, ເຂົາຈະເອີ້ນຊື່ລູກນັ້ນວ່າ ເອມານູເອນ, ໝາຍຄວາມວ່າ, ພຣະເຈົ້າສະຖິດຢູ່ກັບເຮົາທັງຫລາຍ.”
ສອງ, ໄຕ່ຕອງພຣະຊົນຊີບທີ່ສົມບູນແບບ ແລະ ບໍ່ມີບາບ ແລະ ຕົວຢ່າງຂອງພຣະອົງ. ເຖິງແມ່ນວ່າພຣະອົງໄດ້ທົນຕໍ່ຄວາມເຈັບປວດ, ຄວາມທຸກ, ແລະ ການລໍ້ລວງທຸກຢ່າງ, ແຕ່ພຣະອົງໄດ້ບັນລຸພາລະກິດຂອງພຣະອົງຢ່າງສຳເລັດຜົນ. ພຣະອົງເປັນແບບຢ່າງຂອງເຮົາ ແລະ ໄດ້ວາງແນວທາງທີ່ເຮົາຄວນເດີນຕາມ. ພຣະອົງໄດ້ອຸທິດພຣະຊົນຊີບຂອງພຣະອົງໃຫ້ແກ່ຄົນຍາກຈົນ, ຄົນຂັດສົນ, ຄົນເຈັບປ່ວຍ, ແລະ ຄົນທຸກທໍລະມານ, ແລະ ປະສົບຜົນສຳເລັດຂອງແຜນນິລັນດອນ ທີ່ພຣະອົງຜູ້ດຽວທີ່ສາມາດເຮັດໄດ້.
ສາມ, ພິຈາລະນາເຖິງການສິ້ນພຣະຊົນ, ການຟື້ນຄືນພຣະຊົນ, ແລະ ການຊົດໃຊ້ຂອງພຣະອົງ.
ໃນເລື່ອງການຊົດໃຊ້, ປຶ້ມຈົ່ງສັ່ງສອນພຣະກິດຕິຄຸນຂອງເຮົາ ອ່ານໄດ້ຢ່າງສວຍງາມ ແລະ ລຽບງ່າຍວ່າ: “ການຊົດໃຊ້ຂອງພຣະຜູ້ຊ່ວຍໃຫ້ລອດແມ່ນລວມທັງການຮັບທຸກທໍລະມານຂອງພຣະອົງຢູ່ໃນເຄັດເຊມາເນ, ການຮັບທຸກທໍລະມານຂອງພຣະອົງ ແລະ ການສິ້ນພຣະຊົນຢູ່ເທິງໄມ້ກາງແຂນ, ແລະ ການຟື້ນຄືນພຣະຊົນຂອງພຣະອົງ. ພຣະອົງໄດ້ຮັບທຸກທໍລະມານທີ່ເກີນກວ່າຈະເຂົ້າໃຈໄດ້—ເຖິງຂະໜາດທີ່ໂລຫິດຂອງພຣະອົງໄດ້ໄຫລອອກຈາກທຸກຂຸມຂົນ.”
ໃນ ຄຳສອນ ແລະ ພັນທະສັນຍາ 76:41 ເຮົາອ່ານ: “ວ່າພຣະອົງໄດ້ມາສູ່ໂລກ, ແມ່ນແຕ່ພຣະເຢຊູ, ເພື່ອຖືກຄຶງເພື່ອໂລກ, ແລະ ເພື່ອຮັບເອົາບາບຂອງໂລກ, ແລະ ເພື່ອເຮັດໃຫ້ໂລກບໍລິສຸດ, ແລະ ເພື່ອຊຳລະລ້າງມັນຈາກຄວາມບໍ່ຊອບທຳທັງໝົດ.”
ການຊົດໃຊ້ຂອງພຣະເຢຊູຄຣິດເປັນເຫດການ ແລະ ຂອງປະທານທີ່ຍິ່ງໃຫຍ່ທີ່ສຸດ ທີ່ເຄີຍເກີດຂຶ້ນໃນປະຫວັດສາດຂອງມະນຸດຊາດ. ເຮົາທຸກຄົນເຄີຍເຮັດບາບ, ແລະ ຜ່ານທາງການຊົດໃຊ້ຂອງພຣະເຢຊູຄຣິດເທົ່ານັ້ນທີ່ເຮົາຈະສາມາດໄດ້ຮັບຄວາມເມດຕາ ແລະ ຢູ່ກັບພຣະເຈົ້າໄດ້.
ສີ່, ກຽມພ້ອມສຳລັບການສະເດັດມາຄັ້ງທີສອງຂອງພຣະອົງ.
ໃນພຣະຄຳພີເດີມ, ໂຢບໄດ້ສິດສອນວ່າ: “ຂ້ອຍຮູ້ຜູ້ໜຶ່ງຢູ່ໃນສະຫວັນສະຖານ ຜູ້ທີ່ຈະມາໃນທີ່ສຸດ.” ດັ່ງທີ່ປະທານຣະໂຊ ເອັມ ແນວສັນ ໄດ້ສິດສອນຢ່າງສວຍງາມ: “[ພຣະຄຣິດ] ຈະຊີ້ນຳວຽກງານຂອງສາດສະໜາຈັກຂອງພຣະອົງ ຈາກທັງເຢຣູຊາເລັມເກົ່າ ແລະ ເຢຣູຊາເລັມໃໝ່.” ດຽວນີ້ແມ່ນເວລາຂອງເຮົາທີ່ຈະກຽມພ້ອມສຳລັບເຫດການນີ້. ພຣະຄຳພີກ່າວວ່າ: “ຈົ່ງຕຽມຕົວເອງສຳລັບວັນອັນຍິ່ງໃຫຍ່ຂອງພຣະຜູ້ເປັນເຈົ້າ.”
ຄຳແນະນຳສຸດທ້າຍຂອງຂ້າພະເຈົ້າແມ່ນຮັກ ແລະ ຮັບໃຊ້ພຣະຜູ້ເປັນເຈົ້າ. ເມື່ອເຮົາໄຕ່ຕອງເຖິງສະພາບທາງວິນຍານຂອງເຮົາ ແລະ ການກຽມພ້ອມທີ່ຈະຕ້ອນຮັບພຣະຜູ້ຊ່ວຍໃຫ້ລອດ, ກ່ອນອື່ນໝົດເຮົາຄວນ, “ຮັກອົງພຣະຜູ້ເປັນເຈົ້າດ້ວຍສຸດໃຈ, ດ້ວຍສຸດຈິດ, ແລະ ດ້ວຍສຸດຄວາມຄິດຂອງເຈົ້າ.” ແລະ ຂໍ້ທີສອງແມ່ນ, “ຈົ່ງຮັກເພື່ອນບ້ານ ເໝືອນຮັກຕົນເອງ.”
ຄວາມຮັກຂອງເຮົາຕໍ່ພຣະເຈົ້າ ແລະ ເພື່ອນມະນຸດດ້ວຍກັນເປັນການທົດສອບຂັ້ນສູງສຸດຂອງສະພາບທາງວິນຍານຂອງເຮົາ. ຖ້າເຮົາຮັກພຣະເຈົ້າ, ເຮົາຈະຮັກສາພຣະບັນຍັດຂອງພຣະອົງ. ແລະ ຖ້າເຮົາຮັກເພື່ອນມະນຸດດ້ວຍກັນ, ເຮົາຈະຮັບໃຊ້ເຂົາ ແລະ ສຳຄັນແມ່ນການເປັນພຣະຫັດຂອງພຣະຜູ້ຊ່ວຍໃຫ້ລອດ.
ໃນຄຳສອນ ແລະ ພັນທະສັນຍາ, ພຣະຜູ້ຊ່ວຍໃຫ້ລອດໃຊ້ຄຳເຫລົ່ານີ້: “ແທ້ຈິງແລ້ວ, ເຮົາຈະເປີດໃຈຂອງຜູ້ຄົນ, ແລະ … ເຮົາຈະສະຖາປະນາໜ່ວຍຂອງສາດສາດສະໜາຈັກໂດຍມືຂອງເຈົ້າ.”
ວິທີສຳຄັນທີ່ເຮົາສາມາດສະແດງຄວາມກະຕັນຍູຂອງເຮົາຕໍ່ພຣະຜູ້ຊ່ວຍໃຫ້ລອດໃນເທດສະການບຸນຄຣິດສະມາດນີ້ຄື ການເປັນຜູ້ຮັບໃຊ້ຂອງພຣະອົງ—ຕາມຈິງແລ້ວ, ເປັນພຣະຫັດຂອງພຣະອົງຢູ່ເທິງໂລກ.
ໃນເວລາທີ່ສວຍງາມນີ້, ເມື່ອເຮົາສະເຫລີມສະຫລອງການກຳເນີດຂອງພຣະຜູ້ເປັນເຈົ້າ ແລະ ພຣະຜູ້ຊ່ວຍໃຫ້ລອດ, ພຣະເຢຊູຄຣິດ, ຂ້າພະເຈົ້າເປັນພະຍານຕໍ່ທ່ານວ່າ ພຣະອົງຊົງພຣະຊົນຢູ່. ພຣະອົງເປັນແບບຢ່າງຂອງເຮົາ, ເປັນຜູ້ວິງວອນແທນເຮົາກັບພຣະບິດາ, ແລະ ພຣະອົງໄດ້ສຳເລັດທຸກສິ່ງທຸກຢ່າງທີ່ຈຳເປັນສຳລັບເຮົາທີ່ຈະກັບຄືນໄປຫາທີ່ປະທັບຂອງພຣະບິດາ ແລະ ພຣະບຸດ. ເຮົາຈະສະຫລາດທີ່ຈະຕິດຕາມພຣະເຢຊູຄຣິດ ແລະ ຮັບຂອງປະທານທີ່ພຣະອົງໄດ້ມອບໃຫ້.
ຂໍໃຫ້ທ່ານມີວັນຄຣິດສະມາດອັນຮຸ່ງໂລດ ໂດຍມີພຣະເຢຊູຄຣິດເປັນສູນກາງ.
ໃນພຣະນາມຂອງພຣະເຢຊູຄຣິດ, ອາແມນ.