ກຸມມານນ້ອຍພຣະຄຣິດໄດ້ກຳເນີດມາເພື່ອທ່ານ
ລາຍການໃຫ້ຄຳດົນໃຈຂອງຝ່າຍປະທານສູງສຸດ ເນື່ອງໃນໂອກາດເທດສະການບຸນຄຣິດສະມາດ ປີ 2024
ວັນອາທິດ, ວັນທີ 8 ເດືອນທັນວາ, 2024
ໂຊກດີແທ້ໆທີ່ເຮົາໄດ້ຍິນເພງທີ່ມ່ວນອອນຊອນ? ຂໍຂອບໃຈກຸ່ມນັກຮ້ອງ, ວົງມະໂຫຣີ, ແລະ ຜູ້ນຳເພງຫລາຍໆ. ຂ້າພະເຈົ້າບໍ່ສາມາດຫລຽວເຫັນພວກທ່ານຢູ່ຫລັງຕົ້ນໄມ້ເຫລົ່ານີ້, ແຕ່ຂ້າພະເຈົ້າຮູ້ວ່າພວກທ່ານຢູ່ທີ່ນັ້ນ.
“Infant Holy, Infant Lowly” ເປັນເພງຄຣິດສະມາດເພງໜຶ່ງທີ່ຂ້າພະເຈົ້າມັກຫລາຍ.
ຝູງແກະກຳລັງນອນຫລັບ, ຜູ້ລ້ຽງແກະກຳລັງດູແລ
ເຝົ້າຍາມຈົນເຖິງຮຸ່ງເຊົ້າ;
ໄດ້ເຫັນຄວາມຮຸ່ງໂລດ, ໄດ້ຍິນເລື່ອງລາວ
ຂ່າວພຣະກິດຕິຄຸນເປັນຄວາມຈິງ.
ດ້ວຍເຫດນີ້ຈຶ່ງປິຕິຍິນດີ, ປາດສະຈາກຄວາມໂສກເສົ້າ,
ເປັ່ງສຽງສັນລະເສີນ, ທັກທາຍມື້ອື່ນ,
ກຸມມານນ້ອຍພຣະຄຣິດໄດ້ກຳເນີດມາເພື່ອທ່ານ.
ກຸມມານນ້ອຍພຣະຄຣິດໄດ້ກຳເນີດມາເພື່ອທ່ານ!
ຕອນຍັງນ້ອຍ, ພໍ່ແມ່ຂອງຂ້າພະເຈົ້າໄດ້ໃສ່ຊື່ຫລິ້ນໃຫ້ຂ້າພະເຈົ້າວ່າ “ແກະນ້ອຍແທມມີ,” ສະນັ້ນເມື່ອພຣະຄຳພີເວົ້າເຖິງຜູ້ລ້ຽງແກະ ແລະ ລູກແກະຂອງເຂົາເຈົ້າ, ຂ້າພະເຈົ້າມັກຈະຮູ້ສຶກວ່າ ເຂົາເຈົ້າກຳລັງເວົ້າກັບຂ້າພະເຈົ້າ.
ເລື່ອງນີ້ເປັນຄວາມຈິງໂດຍສະເພາະແມ່ນເລື່ອງລາວຂອງວັນຄຣິດສະມາດ ແລະ ທູດສະຫວັນໄດ້ມາປະກົດຕົວຕໍ່ຜູ້ລ້ຽງແກະ, ທີ່ກຳລັງເຝົ້າດູແລຝູງແກະ, ລູກແກະຂອງເຂົາເຈົ້າ, ໃນຕອນກາງຄືນ. ຂ້າພະເຈົ້າຍັງນຶກພາບຕົວເອງຢູ່ບ່ອນນັ້ນ ແລະ ຈິນຕະນາການວ່າ ການເຂົ້າໃກ້ກຸມມານນ້ອຍໃນຮາງຫຍ້າຈະເປັນແນວໃດ. ຂ້າພະເຈົ້າຍັງມັກພາບເຫລົ່ານີ້ທຸກປີ ໃນຂະນະທີ່ຂ້າພະເຈົ້າໄຕ່ຕອງເຖິງການກຳເນີດຂອງພຣະອົງ.
ຮູບພາບທີ່ມັກອີກອັນໜຶ່ງແມ່ນມາຈາກເລື່ອງໜຶ່ງທີ່ບອກເລົ່າໂດຍແອວເດີ ຈອນ ອາ ລາຊາເຕີ.
ເມື່ອຫລາຍປີກ່ອນ, ແອວເດີ ລາຊາເຕີ ໄດ້ໄປຢ້ຽມຢາມປະເທດໜຶ່ງໃນອາຟຣິກາ ໃນຖານະຄະນະຜູ້ແທນລັດຖະບານຢ່າງເປັນທາງການ.
ມື້ໜຶ່ງ, ຂະນະທີ່ພວກເພິ່ນກຳລັງເດີນທາງໃນທະເລຊາຍ ດ້ວຍຂະບວນລົດ ລີມູຊີນສີດຳ, ອຸປະຕິເຫດໄດ້ເກີດຂຶ້ນ. ລົດຄົນທີ່ເພິ່ນຂີ່ໄປນັ້ນໄດ້ຂຶ້ນເຖິງເນີນພູ, ແລະ ເພິ່ນໄດ້ສັງເກດເຫັນວ່າ ລົດຄັນໜ້າໄດ້ຂັບອອກນອກຖະໜົນ. ເພິ່ນໄດ້ເວົ້າວ່າ, “ພາບເບື້ອງໜ້າຂອງພວກເຮົາ ຍັງຄົງຢູ່ໃນຄວາມຊົງຈຳຂອງຂ້າພະເຈົ້າມາເປັນເວລາຫລາຍປີ.”
ຜູ້ລ້ຽງແກະທີ່ແກ່ຊະລາ, ທີ່ສວມຊຸດຄຸມຍາວສະໄໝຂອງພຣະຜູ້ຊ່ວຍໃຫ້ລອດ, ກຳລັງຢືນຢູ່ໃກ້ລົດ ແລະ ເວົ້າກັບຄົນຂັບລົດ. ໃກ້ໆກັນມີແກະຝູງນ້ອຍໆປະມານ 15 ໂຕ.
ລົດຄັນນຳໜ້າໄດ້ຊົນ ແລະ ເຮັດໃຫ້ແກະໂຕໜຶ່ງໄດ້ຮັບບາດເຈັບ, ຄົນຂັບລົດຂອງແອວເດີ ລາຊາເຕີ ໄດ້ອະທິບາຍ. ແລະ ເນື່ອງຈາກວ່າມັນເປັນຍານພາຫະນະຂອງກະສັດ, ບັດນີ້ ຜູ້ລ້ຽງແກະຈຶ່ງມີສິດໄດ້ຮັບເງິນ 100 ເທົ່າຂອງມູນຄ່າຂອງລູກແກະນ້ອຍ ເມື່ອເຕີບໃຫຍ່ເຕັມທີ່. ແຕ່ພາຍໃຕ້ກົດໝາຍດຽວກັນນັ້ນ, ລູກແກະຈະຖືກຂ້າ ແລະ ຊີ້ນຈະຖືກແບ່ງປັນໃຫ້ກັບປະຊາຊົນ.
ແລ້ວຄົນຂັບລົດໄດ້ເວົ້າວ່າ, “ແຕ່ເບິ່ງແມ, ຜູ້ລ້ຽງແກະທີ່ແກ່ຊະລາ ຈະບໍ່ຍອມຮັບເອົາເງິນ; ເຂົາເຈົ້າບໍ່ເຄີຍເຮັດ.” ເມື່ອຖາມວ່າເປັນຫຍັງ, ລາວໄດ້ຕອບວ່າ, “ເປັນເພາະວ່າລາວຮັກແກະແຕ່ລະໂຕຂອງລາວ.”
ພວກເພິ່ນໄດ້ຄອຍເຝົ້າເບິ່ງ ຂະນະທີ່ຜູ້ລ້ຽງແກະທີ່ແກ່ຊະລາກົ້ມລົງ, ຫອບເອົາແກະທີ່ຖືກບາດເຈັບໄວ້ໃນອ້ອມແຂນຂອງລາວ, ແລະ ວາງມັນໄວ້ໃນພົກເສື້ອຄຸມຂອງລາວ. ລາວລູບລູກແກະຊ້ຳໆ ໂດຍເວົ້າຄຳດຽວກັນຊ້ຳແລ້ວຊ້ຳອີກ, ແລະ ເມື່ອແອວເດີ ລາຊາເຕີ ໄດ້ຖາມເຖິງຄວາມໝາຍຂອງຄຳນັ້ນ, ລາວໄດ້ບອກວ່າ, “ໂອ, ລາວເອີ້ນຊື່ຂອງມັນ. ແກະທຸກໂຕຂອງລາວມີຊື່, ເພາະລາວເປັນຜູ້ລ້ຽງຂອງພວກມັນ, ແລະ ຜູ້ລ້ຽງແກະທີ່ດີຈະຮູ້ຈັກແກະແຕ່ລະໂຕຂອງເຂົາເຈົ້າຕາມຊື່.”
ໃນເອຊາຢາ ເຮົາຖືກສັນຍາວ່າ, “ພຣະອົງຈະເຕົ້າໂຮມລູກແກະທຸກໂຕໄວ້, ແລະ ອູ້ມເຂົາໄວ້ຢູ່ໃນອ້ອມກອດຂອງພຣະອົງ.”
ຖ້າຫາກເຮົາຈື່ຈຳສິ່ງໃດ ຫລື ຮູ້ສຶກເຖິງສິ່ງໃດໃນຊ່ວງເທດສະການບຸນຄຣິດສະມາດນີ້, ຄວນເປັນວ່າເຮົາເປັນຂອງພຣະອົງ. ທ່ານຈື່ຈຳຕອນທີ່ພຣະຄຣິດໄດ້ບອກເປໂຕໄດ້ບໍທີ່ວ່າ, “ຈົ່ງລ້ຽງແກະໜຸ່ມຂອງເຮົາ ເດີ …ແກະຂອງເຮົາ”?
“ເພາະວ່າໃນວັນນີ້ [ພຣະຜູ້ຊ່ວຍໃຫ້ລອດ] ອົງໜຶ່ງ ຄືພຣະຄຣິດ ໄດ້ມາບັງເກີດຢູ່ໃນເມືອງຂອງດາວິດ ສຳລັບ ເຈົ້າທັງຫລາຍ.”
“ມີເດັກນ້ອຍຜູ້ໜຶ່ງໄດ້ເກີດມາໃຫ້ ພວກເຮົາ, ມີລູກຊາຍຜູ້ໜຶ່ງຖືກມອບໝາຍໃຫ້ ພວກເຮົາ.”
ພຣະອົງໄດ້ກຳເນີດມາເພື່ອຍົກເຮົາແຕ່ລະຄົນຂຶ້ນເປັນສ່ວນຕົວ. ແລະ ຖ້າຫາກວ່າພຣະອົງເປັນຂອງຜູ້ໃດ, ພຣະອົງກໍເປັນຂອງທ່ານຢ່າງແນ່ນອນ. ກຸມມານນ້ອຍພຣະຄຣິດໄດ້ກຳເນີດມາເພື່ອທ່ານ.
ແຕ່ເອຊາຢາກໍຍັງເຕືອນອີກວ່າ, “ພວກເຮົາທຸກຄົນເປັນດັ່ງແກະທີ່ໄດ້ຫລົງເສຍໄປ.” ບາງທີເຮົາແຕ່ລະຄົນອາດເຄີຍຢູ່ໃນບ່ອນທີ່ເຮົາຮູ້ສຶກຄືກັບວ່າເປັນລູກແກະທີ່ຫລົງທາງ ຫລື ແກະທີ່ເສຍໄປ. ຄ່ຳຄືນນີ້, ຂ້າພະເຈົ້າຂໍຍອມຮັບວ່າ ເຮົາທຸກຄົນເປັນລູກແກະທີ່ໄດ້ຮັບບາດເຈັບ ທີ່ຕ້ອງການຜູ້ລ້ຽງແກະທີ່ດີ, ຜູ້ຈະໂອບອູ້ມເອົາເຮົາໄວ້ໃນອ້ອມແຂນແຫ່ງຄວາມຮັກຂອງພຣະອົງ. ເພາະການເປັນມະຕະໝາຍຄວາມວ່າເຮົາມີບາງສິ່ງບາງຢ່າງທີ່ຮູ້ສຶກແຕກຫັກ, ທີ່ຕ້ອງການການສ້ອມແປງ.
ແລະ ຂ້າພະເຈົ້າບໍ່ຮູ້ວ່າ ມີຊ່ວງເວລາໃດໃນອາທິດຂອງຂ້າພະເຈົ້າ ທີ່ຂ້າພະເຈົ້າຮູ້ສຶກເຖິງຄວາມຕ້ອງການພຣະຜູ້ໄຖ່ ຫລາຍໄປກວ່າວັນອາທິດລະຫວ່າງພິທີສິນລະລຶກ. ຂ້າພະເຈົ້ານຳຫົວໃຈທີ່ຊອກຊ້ຳຂອງຂ້າພະເຈົ້າມາ ແລະ ສະທ້ອນຄິດເຖິງຖ້ອຍຄຳ ແລະ ສັນຍາລັກໃນຊ່ວງ “ເວລາຂອງການຟື້ນຟູທາງວິນຍານ” ນີ້. ແຕ່ບາງຄັ້ງກໍມີຊ່ວງເວລາທີ່ໂສກເສົ້າ, ເມື່ອຄິດກ່ຽວກັບອາທິດທີ່ຜ່ານມາ, ຂ້າພະເຈົ້າຮັບຮູ້ວ່າສິ່ງເຫລົ່ານີ້ແມ່ນບາບດຽວກັນ, ຄວາມອ່ອນແອດຽວກັນ ທີ່ຂ້າພະເຈົ້າໄດ້ຄິດກ່ຽວກັບ ເມື່ອວັນອາທິດ ກ່ອນ. ແລະ ຂ້າພະເຈົ້າຮູ້ສຶກສຳນຶກຜິດ ຫລື ເສຍໃຈ.
ທ່ານຮູ້ຈັກຊ່ວງເວລານີ້ຫລືບໍ່?
ມື້ນີ້ຂ້າພະເຈົ້າຂໍເຊື້ອເຊີນທ່ານໃຫ້ລອງສິ່ງໃໝ່ໆ. ໃນນາທີທີ່ສັກສິດທີ່ສຸດຂອງອາທິດນີ້ຂອງທ່ານ, ຖ້າທ່ານຮູ້ສຶກເສຍໃຈ, ໃຫ້ນຶກພາບວ່າ ພຣະອົງກຳລັງເອີ້ນຫາທ່ານຕາມຊື່, ແລະ ໃຫ້ໄປຫາພຣະອົງ. ລອງນຶກເຖິງພຣະຜູ້ຊ່ວຍໃຫ້ລອດໃນດວງຕາແຫ່ງຄວາມຄິດຂອງທ່ານ, ດ້ວຍແຂນທີ່ຍື່ນອອກມາ ພ້ອມທັງພຣະພັກທີ່ສົດໃສ ກ່າວວ່າ, “ເຮົາຮູ້ວ່າເຈົ້າຈະຮູ້ສຶກແບບນີ້! ນັ້ນແມ່ນເຫດຜົນທີ່ເຮົາມາສູ່ໂລກ ແລະ ທົນທຸກທໍລະມານກັບສິ່ງທີ່ເຮົາໄດ້ເຮັດ.” ຄວາມຊ່ວຍເຫລືອຂອງພຣະອົງ, ແລະ ພຣະຄຸນຂອງພຣະອົງທີ່ມີໃຫ້ທ່ານໃນຂະນະນີ້, ບໍ່ແມ່ນຕອນທີ່ທ່ານຮູ້ສຶກວ່າ ທຸກຢ່າງຮຽບຮ້ອຍດີແລ້ວ. ບໍ່ມີໃຜຮູ້ສຶກແບບນັ້ນ? ບໍ່ມີໃຜທີ່ຂ້າພະເຈົ້າຮູ້ຈັກ.
ຈົ່ງຈື່ຈຳໄວ້ວ່າ, ເຮົາໄປໂບດ, ຮັບສິນລະລຶກໃນເຂົ້າແລງຂອງພຣະຜູ້ເປັນເຈົ້າ, ເພື່ອຈະໄດ້ຮັບການປິ່ນປົວ, ແຕ່ຍັງຮູ້ສຶກສະອາດນຳອີກ.
ເມື່ອຫລາຍປີກ່ອນ, ຕອນຂ້າພະເຈົ້າໄດ້ຮັບໃຊ້ຢູ່ໃນຊັ້ນປະຖົມໄວ, ຂ້າພະເຈົ້າໄດ້ເລົ່າເລື່ອງໜຶ່ງກ່ຽວກັບບາງຄົນທີ່ຫາກໍຮັບບັບຕິສະມາ. ຂ້າພະເຈົ້າໄດ້ຊີ້ບອກວ່າ ເພື່ອນຄົນນັ້ນອາດເປັນສະມາຊິກທີ່ບໍລິສຸດ ແລະ ສະອາດທີ່ສຸດຂອງສາດສະໜາຈັກ. ແລ້ວຢູ່ແຖວທາງໜ້າ ມີຄົນຍົກມືຂຶ້ນ ແລະ ເດັກຊາຍທີ່ໃຫຍ່ກວ່າກໍປະກາດວ່າ, “ຂ້ານ້ອຍກໍສາມາດສະອາດເທົ່າກັບລາວ ເພາະຂ້ານ້ອຍໄດ້ຮັບບັບຕິສະມາ ແລະ ຮັບສິນລະລຶກ.” ຂ້າພະເຈົ້າໄດ້ຕອບຢ່າງເຂີນໆວ່າ, “ແມ່ນແລ້ວ, ນັ້ນຄືສິ່ງທີ່ຂ້ອຍໝາຍເຖິງ—ສິ່ງທີ່ລາວເວົ້າ.”
ເພື່ອນທີ່ຮັກແພງຂອງຂ້າພະເຈົ້າ, ເຮົາຈື່ຈຳ ແລະ ຮັບຄຳສອນທີ່ໜ້າປະທັບໃຈທີ່ສຸດນີ້ໄດ້ແທ້ບໍ? ຖ້າຫາກເຮົາໄດ້ໃຊ້ຄວາມພະຍາຍາມທີ່ຈະຮັກສາພັນທະສັນຍາຂອງເຮົາກັບພຣະເຈົ້າ—ສືບຕໍ່ກັບໄປ, ລາຍງານ, ແລະ ກັບໃຈ—ແລ້ວເຮົາກໍສາມາດຖືກຊຳລະໃຫ້ສະອາດໃນແຕ່ລະວັນ. ແລະ ຜ່ານທາງພິທີສິນລະລຶກ, ເຮົາສາມາດຮູ້ສຶກສະອາດຄືກັບມື້ທີ່ເຮົາໄດ້ຮັບບັບຕິສະມາ.
ສຳລັບຂ້າພະເຈົ້າແລ້ວ, ມັນເປັນວິທີທີ່ວັນຊະບາໂຕໄດ້ກາຍເປັນມື້ພັກຜ່ອນ. ບໍ່ແມ່ນແຕ່ການພັກຜ່ອນທາງກາຍເທົ່ານັ້ນ, ແຕ່ຍັງເປັນການພັກຜ່ອນຈາກຄວາມຮູ້ສຶກຜິດ ແລະ ຄວາມຢ້ານກົວ, ຈາກຄວາມບໍ່ພຽບພ້ອມ ແລະ ຄວາມອ່ອນແອຂອງຂ້າພະເຈົ້ານຳອີກ. ຢ່າງໜ້ອຍພຽງແຕ່ໜຶ່ງມື້!
ເລື່ອງລາວເລື່ອງໜຶ່ງໃນພຣະຄຳພີທັງໝົດເຮັດໃຫ້ເຮົາເຫັນແວັບໜຶ່ງຂອງການພັກຜ່ອນນີ້. ໃນພຣະຄຳພີມໍມອນ, ຂະນະທີ່ພຣະຜູ້ຊ່ວຍໃຫ້ລອດທີ່ໄດ້ຟື້ນຄືນພຣະຊົນແລ້ວກຳລັງຢ້ຽມຢາມ “ແກະອື່ນອີກ” ຂອງພຣະອົງ ໃນອາເມຣິກາ, ແລະ ຫລັງຈາກທີ່ຮູ້ສຶກເຖິງຄວາມຕ້ອງການຂອງພວກເຂົາ ໂດຍທີ່ພວກເຂົາບໍ່ໄດ້ຮ້ອງຂໍ, ພຣະອົງໄດ້ເຊື້ອເຊີນທຸກຄົນທີ່ເຈັບປວດທາງຮ່າງກາຍ—ຄົນງ່ອຍ, ຄົນຕາບາດ, ຄົນຫູໜວກ, ຫລື ຄົນທີ່ “ເປັນທຸກໃດໆ”—ໃຫ້ເຂົ້າມາ.
ຂ້າພະເຈົ້າຈິນຕະນາການເຖິງຄົນທີ່ເຂົ້າແຖວລໍຮັບການປິ່ນປົວ ຊຶ່ງເຫັນໄດ້ຢ່າງຊັດເຈນວ່າມີຄວາມຕ້ອງການທາງຮ່າງກາຍ. ແຕ່ໃນດວງຕາແຫ່ງຄວາມຄິດຂອງຂ້າພະເຈົ້າ, ຂ້າພະເຈົ້າເຫັນຄົນເຊັ່ນຕົວຂ້າພະເຈົ້າເອງ ແລະ ຄົນອື່ນໆທີ່ຂ້າພະເຈົ້າຮັກຢູ່ໃນແຖວ ຜູ້ທີ່ທຸກທໍລະມານ ໃນລັກສະນະທີ່ມະນຸດອາດເບິ່ງບໍ່ເຫັນ. ພຣະອົງໄດ້ຖາມເຖິງຄົນທີ່ທຸກທໍລະມານໃນລັກສະນະ ໃດ ກໍຕາມ, “ແລະ ພຣະອົງໄດ້ປິ່ນປົວພວກເຂົາທຸກຄົນ.”
ໃຫ້ສັງເກດວ່າ ໃນກໍລະນີນີ້, ພຣະຄຳພີບໍ່ໄດ້ບອກວ່າພຣະອົງປິ່ນປົວພວກເຂົາ. ຂ້າພະເຈົ້າມັກຄວາມຄິດທີ່ວ່າ ການປິ່ນປົວ ແລະ ການບຳບັດມີຄວາມແຕກຕ່າງກັນ. ການບຳບັດມັກຈະນຳເຮົາກັບຄືນສູ່ສະພາບສຸຂະພາບທີ່ຜ່ານມາ, ຊຶ່ງເປັນສິ່ງທີ່ເຮົາໄຝ່ຝັນ, ແມ່ນບໍ? ແຕ່ການປິ່ນປົວແມ່ນແຕກຕ່າງ. ການປິ່ນປົວຈະລວມບາດແຜເກົ່າ, ເຮັດໃຫ້ເຮົາແຕກຕ່າງຈາກດ້ານໜຶ່ງ.
ແມ່ນແຕ່ພຣະຜູ້ຊ່ວຍໃຫ້ລອດຂອງໂລກ, ໃນຖານະທີ່ເປັນຄືນມາຈາກການສິ້ນພຣະຊົນ, ກໍຍັງເກັບບາດແຜໄວ້ໃນພຣະຫັດ, ພຣະບາດ, ແລະ ຂ້າງຂອງພຣະອົງ—ເປັນຫລັກຖານວ່າ ພຣະອົງຈະບໍ່ມີວັນລືມເຮົາໄດ້ ແລະ ດ້ວຍບາດແຜຂອງພຣະອົງ ເຮົາຈຶ່ງໄດ້ຮັບການປິ່ນປົວ. ແລະ ບາງທີ, ໃນມື້ນັ້ນເມື່ອພຣະຜູ້ຊ່ວຍໃຫ້ລອດໄດ້ປິ່ນປົວພວກເຂົາ, ພຣະອົງກໍຈະອູ້ມພວກເຂົານຳອີກ, ໂອບກອດພວກເຂົາແຕ່ລະຄົນດ້ວຍຄວາມຮັກ.
ຄ່ຳຄືນນີ້, ທ່ານອາດຮູ້ສຶກເຈັບປວດ ແລະ ບໍ່ແນ່ໃຈວ່າ ທ່ານຈະໄດ້ຮັບການປິ່ນປົວຈາກພຣະອົງຫລືບໍ່. ແຕ່ນັ້ນເປັນຄວາມຈິງຫລືບໍ່? ທຸກວັນອາທິດໃນລະຫວ່າງສິນລະລຶກ, ພຣະອົງຈະຍົກທ່ານຂຶ້ນຈາກຖະໜົນທີ່ເຕັມໄປດ້ວຍຝຸ່ນ ແລະ ວາງທ່ານໄວ້ໃນພົກເສື້ອຄຸມຂອງພຣະອົງ, ແລະ ໂອບອູ້ມທ່ານໄວ້ໃນອ້ອມແຂນອັນກວ້າງຂວາງຂອງພຣະອົງ.
ໃນຄືນຄຣິດສະມາດທີ່ສັກສິດນັ້ນ, ທູດສະຫວັນອົງໜຶ່ງໄດ້ແບ່ງປັນຂ່າວດີ, ຂ່າວປະເສີດຂອງຄວາມດີແຫ່ງຄວາມຊື່ນຊົມອັນຍິ່ງໃຫຍ່. “ຜູ້ທີ່ຍິ່ງໃຫຍ່ທີ່ສຸດກັບເຮັດໃຫ້ຕົນເອງເປັນຜູ້ນ້ອຍທີ່ສຸດ—ພຣະຜູ້ລ້ຽງແກະເທິງສະຫວັນຊຶ່ງກາຍເປັນລູກແກະ.” “ພຣະມະຫາກະສັດເໜືອກະສັດທັງປວງຊົງບັນທົມໃນຮາງຫຍ້າທີ່ຕ່ຳຕ້ອຍ. ໃນການທົດລອງທັງໝົດຂອງເຮົາ, ໄດ້ກຳເນີດມາເພື່ອເປັນເພື່ອນເຮົາ.” ຂ້າພະເຈົ້າເຊື່ອວ່າທູດສະຫວັນອົງນັ້ນໄດ້ກ່າວວ່າ, “ເພື່ອນຂອງທ່ານ, ເພື່ອນທີ່ດີທີ່ສຸດຂອງທ່ານຫາກໍມາຮອດ. ແລະ ຖ້າຫາກທ່ານຮູ້ວ່າ ພຣະອົງໄດ້ເຝົ້າດູແລທ່ານຢ່າງໃກ້ຊິດພຽງໃດ, ທ່ານໄດ້ຫວັງເພິ່ງພຣະອົງຫລາຍພຽງໃດ ຕອນທ່ານໄດ້ອາໄສຢູ່ກັບພຣະອົງເມື່ອກ່ອນ, ຖ້າຫາກທ່ານໄດ້ເຂົ້າໃຈວ່າພຣະອົງຈະເສຍສະລະຫຍັງແດ່ເພື່ອທ່ານ ແລະ ພຣະອົງຈະເຕັມພຣະໄທຊ່ວຍທ່ານກັບບ້ານຫລາຍພຽງໃດ, ທ່ານຈະຟ້າວໄປຕ້ອນຮັບພຣະອົງທີ່ຮາງຫຍ້າ.”
ຂ້າພະເຈົ້າເປັນພະຍານວ່າ ກຸມມານນ້ອຍໃນຮາງຫຍ້າ, ຜູ້ທີ່ເຮົານະມັດສະການ ແລະ ບາງທີອາດກ້າຈິນຕະນາການວ່າ ຈະເປັນແນວໃດຖ້າໄດ້ໂອບອູ້ມ, ໄດ້ມາເຮັດສິ່ງນັ້ນເພື່ອເຮົາ.
ແມ່ນແລ້ວ, ກຸມມານນ້ອຍພຣະຄຣິດໄດ້ກຳເນີດມາເພື່ອທ່ານ!
ໃນພຣະນາມຂອງພຣະເຢຊູຄຣິດ, ອາແມນ.