Ñañembosako’ívo jajotopa haĝua pe Salvador ndive

Jaikévo Navida temporada-pe, umi temiandu che akãmegua ojere umi ikatúva rehe oĩ mombyry hógagui, ijapytepekuéra umi hetaite misionero ko’ág̃a oservíva hína.

Che Navida ypykue mombyry che rógagui ha’éva’ekue misionero ramo Inglaterra-pe, diciembre 1960-pe. Che aservíkuri hína Swindon-pe, Inglaterra.

Roipe’ákuri Swindon misionero rembiaporã 90 día rupi upe mboyve. Roalkilákuri hína peteĩ koty rojapo hag̃ua umi reuniõ Domingo-kue. Rojehovasákuri roguerekóvo konvérso mbovymi—peteĩ rama oñepyrũvape.

Navida Vispera-pe che compañero, Elder Noel Luke, ha che rodesidi romomaiteívo umi tapicha hógape upe área roservihápe ha roheja peteĩ Navida mensáhe mbykymi ha jehovasa. Ha’ékuri peteĩ pyhare iporãitereíva, ha pe yvága henyhẽva araigui oguerekóva peteĩ jasy omimbipáva omoheñóiva peteĩ temiandu yvagagua. Upechaháinte rohechakuaa opavave barrio-pe oikóva oguerekoha itelevisor sintonisádo peteĩ kómico ha puraheihára ojehayhuetéva ndive, Harry Secombe. Opurahéi pe purahéi iporãitéva “Ehovasa Ko Óga.” Ha’e he´i umi ñe’ẽ marangatu oporomopirĩmba hag̃uáicha, amombe´uta:

Ehovasa umi tapicha oĩva ko’a hyepýpe.

Eñongatu chupekuéra ipotĩmbyre ha angaipa’ỹre.

Orerovasa opavavépe ikatu hag̃uáicha roiko

Hekoitépe, O Ñandejára roiko hag̃uáicha Nendive.

Pe iñinterpretasiõ orembohesaypa. Pe purahéi, oúva haimete opa ógagui, hyapu ha opopo umi arai guive. Elder Luke ha che roguereko ko temiandu orepy’ajopýva ore ha’eha añetehápe Ñandejára ha Salvador, Jesucristo, remimbou roñeha’ãva roservi ha rohovasa ore Ru Yvagagua ra’ykuérape.

Misionero ramo ag̃uahẽ antende pe jaikóvo ko yvy ape ári opavave ñaimeha mombyry ñande rógagui—ñande róga yvagagua. Upe mba’eichapa ikatu ñañandu upe ógape moangapyhy ha’e pe servicio rupive ñande Salvador-pe.

Umi ary pahápe, Tupao ñanemokyre’ỹ ñamomba’eguasu hag̃ua pe tesape Salvador ome’ẽva opa múndo-pe g̃uarã, ko´yteve ko Navida temporada aja. Tupao ojapo peteĩ Ehesape ko Múndo ñeha’ã hechapyrãva ombojere hag̃ua opavave akãmegua temiandu Salvador gotyo. Kóvape omoirũ upe ñeha’ã oñeme’ẽvo umi oikotevẽvape g̃uarã ha toñeme’ẽ peteĩ servicio Cristiano.

Ary ohasava’ekuépe Tupao oñepyrũkuri Ehesape ko Múndo ñeha’ã oiporúvo umi pantalla digital tuichaitereíva ojeréva Times Square rehe, Nueva York-pe.

Mary ha che roimékuri upépe pe Salvador nacimiento oporomopirĩmbáva oñemoha’anga ramo guare umi karteléra digital tuichaitévape. Ha’ékuri peteĩ experiénsia espiritual ipypukúva. Ko arýpe Times Square-pe guare experiénsia ojejapo jeyjeyve heta távape ko múndo pukukue.

Aime aja Táva Nueva York-pe, Ehesape ko Múndo evento aja, ahechakuaa upe ñeha’ã ojeguereko hag̃ua umi pantalla tuichate mba’éva umi tienda guasu ovetãme.

Chemandu’a peteĩ edición dominical New York Times ogueruva’ekue oguerekóva peteĩ artíkulo páhina renyhẽ ojeheróva: “Umi Navida Ovetã Ou Jeýva. Umi Omba’ejoguáva Ojapo Avei.” Pe artíkulo omombeʼu peteĩ tradisiõ oĩháme umi ovetã pantalla iporãitereíva ombojeguáva umi tienda guasu ovetã oĩva Quinta avenida-pe, Táva Nueva York-pe. Ikatukuaaha peve adetermina pe artíkulo ha che visita nda’aréi ajapova’ekuégui, ni peteĩva umi ovetã ndohechaukái Navida rehegua esena térã pe Cristo Mitã´imi rehegua.

Amoñe’ẽ aja pe artíkulo, chemandu’a che mitãrõ guare umi Navida rehegua ovetã pantalla rehe umi tienda guasu Táva Salt Lake pegua ojehechaukahápe pe Cristo mitã´imi. Avei chemandu’a peteĩ ñemombe’upýre upe épokape guare peteĩ centro comercial Medio Oeste pegua omomba’eséva pe tema Navida rehegua omoheñói hag̃ua peteĩ Navida remiandu ha ogueru umi omba’ejoguávape. Omoĩ hikuái peteĩ kartel tuichaite he’íva: “Cristo oúramo ko pyharépe, mávapepa oúta?” Oĩkuri heta esena ojehechaukáva umi tienda ovetãme pe letrero guýpe. Chemandu’a porãramo umi esena rehe:

• Peteĩva ha’ékuri peteĩ kuñakarai ijedámavagui oĩva tupápe oñatendéva hese peteĩ enfermera. Haʼetéva ku hasyvaieteha.

• Pe mokõiháva katu ha’ékuri peteĩ sy imitãvagui peteĩ mitã onase ramóva reheve. Pe vy’apavẽ ojajáiva hova rehe.

• Peteĩ esena mbohapyháva katu ohechaukákuri peteĩ família peteĩ mitã hasẽva ndive. Hesakã porãiterei ndaiporiha hetami oje’umiva’erã, ha oĩtaha sa’imi umi regalo Navida pegua, oime ramo ra’e oĩ.

• Peteĩ esena irundyháva katu ohechaukákuri peteĩ familia ojekuaáva ipirapire hetaha oipire’óva hetaite regalo.

• Pe quinta esena katu ha’ékuri peteĩ familia horyetereíva, ha katu noñemomba’eguasúiva heta mitã rehe vy’apavẽme opurahéiva oñondive.

Ahecha aja umi cinco pantalla ha pe kartél “Cristo oúramo ko pyharépe, mávapepa oúta?”, ou che akãme mokõi temiandu.

Peteĩháme, jaikuaa pe Salvador ou vove mokõiha jey, ndajaikuaamo’ãiha pe ára térã pe aravo.

Mokõiháme, Jesucristo ou vove, ombo’e haguéicha Presidente Russell M. Nelson conferencia general nda’aréi oikova’ekuépe, “[Ha’e] ou jeýta ko yvy ári pe Mesías Milenario ramo” Ñañembosako’i hag̃ua, Presidente Nelson ñanemokyre’ỹ “Jadedika jey hag̃ua [ñande] rekove Jesucristo-pe” Upéicha ramo, pe kartél he’íva’erãmo’ã ra’e hekoitépe: “Cristo oúramo ko pyharépe, mávapa oñembosako’íma omog̃uehẽ hag̃ua Chupe?”

Ama´ẽ jeývo umi esena ovetã rehe, ahechakuaa opa mba’e oje’éva ñandéve ha’eha umi tapicha condición física ha financiera rehegua, ha katu mba’evete umi i-condición espiritual rehegua. Umi ovetã pantalla-pe ojehechauka umi tapicha ijedámava ha hasýva ha avei hesãiva ha onase ramóva. Oĩ avei umi ipirapire hetáva ha imboriahúva. Ha katu pe eda, tesãi ha estado financiero nomombe’úi ñandéve mba’épa añetehápe iñimportante, ha’éva umi ijespíritu condición.

Doctrina ha Konveniokuérape ñamoñe’ẽ umi mba’e oñeikotevẽvare oñemongarai hag̃ua Cristo Tupaópe. Umi criterio oñemopyenda tenonderãite ñañemomirĩva’erãha, jaguerekóvo peteĩ “korasõ mirĩ ha espíritu oñembyasýva”, oñeñearrepenti ha “oservi [Jesucristo-pe] ipahaite peve”. Pe objetivo ha’e oñeg̃uahẽ ojeiko “peteĩ Jesucristo discípulo devoto” ramoha ojeprogresa pe konvénio raperãme ñanembosako’íva umi Ijexpiasiõ jehovasarã.

Cristo ha’e pe ehémplo opa mba’épe. Ha’e odeklara: “Péina ápe che haʼe tesape; che ameʼẽvaʼekue peẽme techapyrã.” Ñamañávo ñande espíritu condición rehe, iporãva’erã ñama’ẽmi ramo Iñehémplo perfecto rehe. Pe Salvador ohechaukákuri ñandéve tape vy’a jajuhu hag̃ua, upe mba’épa he’iséva, ha vy’apavẽ ko tekovépe ha ára ijapyra’ỹvape. Upe vy’a ha vy’apavẽ odefini pe Navida espíritu.

Juan 19:5-pe ñamoñe’ẽ Pilato oguerahahague Jesús-pe umi omongurususeva’ekue Chupe renonderãme. Haʼe “oguerahákuri hína pe koróna ñuatĩguigua, ha pe ao pytãũ. Ha Pilato heʼi chupekuéra, Péina pe Kuimbaʼe!”

Ko Navida temporada-pe ñama´ẽ mbykymi pe Kuimba’e rehe, ha’éva pe Cristo, ha umi don Ha’e ome’ẽva’ekue rehe.

Peteĩháme, ñakonsiderami I-nacimiento milagroso.

Jaikuaa ko mitãraʼymi porãite jagueromanduʼáva ko Navida temporada-pe ha’eha pe Túva Ra’y peteĩmi oikóvagui tesarai. Oereda pe tekove opave’ỹva pu’aka Itúvagui—pe pu’aka ojeikove hag̃ua. Ha Oereda Isy mortal-gui pe pu’aka oñemano hag̃ua. Ojeiporavókuri iñepyrũmby guive Imisiõ sagrado-rã.

Mateo 1:23 omoñe’ẽ: “Péina ápe, peteĩ vírgen hyeguasu, ha imembýta peteĩ mitãkuimba’e, ha oñehenóita upe héra Emanuel, oñemyesakãvo he’iséva, Tupã ñanendive.”

Mokõiháme, pejepy’amongeta Hekove perfecto ha iñangaipa’ỹva rehe ha Iñehémplo rehe. Ha’e ohasa’asy ramo jepe, umi mba’e’asy, jehasa’asy ha jepy’ara’ã opaichagua, Ha’e omohu’ã porãite imisiõ. Ha’e ñande ehémplo ha omoĩ pe tape jasegiva’erãha. Ha’e odedikákuri hekove umi imboriahúva, oikotevẽva, hasýva ha ohasa’asývape g̃uarã, ha omohu’ã porãite hag̃ua pe plan ijapyra’ỹva Ha’e añoite ikatupyrýgui upéva ojejapo hag̃ua.

Mbohapyhápe, pejepy’amongeta Iñemano, Ijeikovejey ha Expiasiõ rehe.

Pe expiasiõ rehe oñeñe’ẽvo, Epredika Che Evanhélio omoñe’ẽ porãite asy ha ndahasyiete: “Pe Salvador Expiasiõme oike Ijehasa’asy Getsemaní-pe, Ijehasa’asy ha iñemano kurusúre ha Ijeikovejey. “Ha’e ohasa’asy ikatu´ỹva oñentende—tuichaitereígui Ha’e hyguy opa ipirekua rupi.”

Doctrina ha Konveniokuéra 76:41-pe ñamoñe’ẽ: “Ouhague múndope, jepe Jesús, ojehupi hag̃ua kurusúre múndore, ha ogueraha hag̃ua múndo angaipakuéra, ha osantifika hag̃ua upe múndo, ha omopotĩ hag̃ua opa tekojojaʼỹgui.”

Jesucristo Expiasiõ ha’e pe evénto ha don tuichavéva oikova’ekue yvypóra rembiasakuépe. Opavave ñande ñaneangaipa, ha Jesucristo Expiasiõ rupive añoite ikatúta jahupyty poriahuvereko ha jaiko Tupã ndive.

Irundyhápe, peñembosako’i Ijeju Mokõiháme g̃uarã.

Antiguo Testamento-pe, Job ombo’e: “Ha’e oñembo’ýta ára pahápe ko yvy ape ári”. Presidente Russell M. Nelson ombo’e porãiterei haguéicha: “[Cristo] oisãmbyhýta Itupao asunto-kuéra mokõive henda guive, Jerusalén yma guare guive ha Jerusalén Pyahu guive” Ko’ág̃a ha’e ñane momento ñañembosako’i hag̃ua ko eventorã. Escritura-kuéra he’i: “Peñembosako’i Ñandejára ára guasúpe g̃uarã”.

Che konsého paha ha’e tapehayhu ha tapeservi Ñandejárape. Ñama’ẽvo ñane condición espiritual ha ñane ñembosako’i rehe ñamog̃uahẽ hag̃ua Salvador-pe tenonderãite, “jahayhuva’erã Ñandejára, ne Tupãme, opa ne korasõ reheve, ha opa ne ánga reheve, ha opa ne akãmegua reheve.” Ha mokõiháme, “Ehayhu nde rapichápe rejehayhuháicha nde.”

Ñane mborayhu Ñandejára ha ñande rapicha rehe ha’e pe prueba paha mba’e condición-pepa oĩ ñande espíritu. Jahayhúramo Tupãme, ñañongatúta hembiapoukapykuéra. Ha jahayhúramo ñande rapichakuérape, jaservíta chupekuéra ha esencialmente ñande ha’éta Salvador po.

Doctrina ha Konveniokuérape, Salvador oipuru ko’ã ñe’ẽ: “Héẽ, che amohuʼũta pe tavayguakuéra korasõ, ha…che amopuʼãta pe tupao nde po rupive.”

Pe manera principal ikatúva rupive jahechauka ñande aguyjeme’ẽ Salvador-pe ko Navida temporada-pe ha’e jaiko I-siervo ramo—ha, añetehápe, taha’e upe Ipo ko’ápe ko yvy ape ári.

Ko époka porãitépe, jagueromandu’ávo Ñandejára ha Salvador, Jesucristo nacimiento, atestifika peẽme Ha’e oikoveha. Ha’e ñane Ehémplo, ñande Avógado Túva renondépe, ha okumpli opa mba’e oñeikotevẽva rehe jaha jey hag̃ua Túva ha Ta’ýra renonderãme. Iñaranduva’erã ñandéve jasegi Jesucristo-pe ha jahupyty umi don Ha’e ome’ẽva’ekue.

Tapeguereko peteĩ Navida gloriosa oñesentráva Jesucristo rehe.

Jesucristo rérape, amén.