Umi Jopói Ijojaha’ỹva

Ko pyharépe, añe’ẽ avei vy’apavẽ ha ñeimo’ã’ỹ reheve pe Navida signifikádo marangatúgui. Ndaipóri evénto ko múndo historia-pe oguerekova’ekue peteĩ impacto tuichavéva oguerekóvagui pe Jesús Nazaret-gua reñói ha misiõ ojapo dos mil ary. Ko múndo moderno tuichakue javeve, pe tiempo jepe voi oñemedi ko evento milagroso guive.

Pe Ñandejára reñói ojeguerovy’a heta forma iñambuévape ko múndo jerére, ha katu oĩ peteĩ Navida tradisiõ ha´etéva universal.

Ko tradisiõ oiméne oñepyrũraka´e pe ñemombe’u oĩva Mateo-pe reheve umi Mago oriente-gui ourõ guare otupãitũ hag̃ua Jesús-pe. Og̃uahẽvo, ogueru hikuái umi jopói ijojaha’ỹva. Ko árape, pe tradisiõ oñeme’ẽ jopoikuéra ha’e peteĩ párte tuichavéva jepe ohóvo umi Navida celebrasiõme.

Che mandu’a ñepyrũ peteĩ Navida pegua jopóigui ha’ékuri peteĩ rifle iporãitéva opoíva peteĩ corcho isãva, ha peteĩ ype’i mecánico oñeme’ẽvape cuerda. Kóva ha’ékuri vy’apavẽ añete peteĩ mitãme g̃uarã orekóva cuatro áño. Pe ype’i okacha ohóvo peteĩ korápe yvýpe ha ndaikatumo’ãi voi okañy che kyre’ỹme aapuntágui chupe che mboka pop reheve quince centimetro guivénte. Ha katu pya’e upe juguete ojeka, ha oikoháicha opa mba’e material-va reheve, pe vy’a oguerúva sapy’a ajánte ha pya’e oiko chugui tesarái.

Ko pyharépe, asuherise mbohapy jopói opavave ñande ikatúva ñame’ẽ ko Navida épokape, ha ñande rekove pukukue, nome’ẽmo’ãiva vy’a sapy’aguánte, ha katu oguerúta vy’apavẽ añete ha hi’aréva.

Peteĩhame ha’e pe testimonio rehegua jopói. Kóva ha’e peteĩ jopói personal ha oñeme’ẽvo sãsome, mbotavy’ỹre, ohechauka umi ñane ánga remiandu ipypukuvéva. Hepyvéva oro, incienso ha mirra-gui, pe testimonio potĩ Jesucristo ha’eha ñande Salvador ha Redentor personal ha’e upe apytere opaite mba’e Navidápe jaguerovy’ávagui.

Ore séi mitãnguéra michĩrõ guare, Jacqui ha che rodesidi peteĩ pyhare ore Noche de Hogar Familiar-rã, roguereko rangue peteĩ mbo’epy, sensillamente rokompartitaha ore testimonio oñondive. Akomparti rire che testimonio, ore rajy juky Chelsea, orekóva oiméne 16 áño upérõ, he’i tesa pe’a reheve, “Papá, che araka’eve nahenduiva’ekue ne testimonio ko’ág̃a mboyve!”. Añemondyi’imi, ha añesorprende imbohováire. Upérõ che ha’ékuri peteĩ estakagua presidente ha aikuaa Chelsea cherendu hague akompartívo che testimonio heta ára heta tupao reuniõháme ha ógape. Ha katu upe momento-pe, ha’e ohendu ha oñandu che testimonio peteĩha jave ramoguáicha. Ha’e chembo’ékuri peteĩ mbo’epy araka’eve ndacheresaráiva: pe testimonio rehegua jopói hepyete ha oĩ pu’aka oñekomparti py’ỹi jave.

Mokõiha ha’e pe ñeperdona rehegua jopói. Añetehápe opavave ñande ñañehunganeraka’e umi ambuekuéra ñe’ẽ térã mba’e’apo vai rupi. Ha ñandereko añetéta ramo, ñande avei ñahunga ambuekuérape. Jesucristo ombo’e, “Che, Ñandejára, aperdonáta che aperdonasévape, ha katu peẽme ojejerure peperdona hag̃ua opa yvypórape”. Ha upéi Ha’e ogueraha mombyryve ha he’i jafallávo ñaperdona hag̃ua ambuekuérape iñangaipakuéra, ñanderehe opyta angaipa tuichavéva.

Ñaperdonávo ambuekuérape sãsóme ha añetehápe, ñañemosãso pe py’aro, jehusga, térã revánchagui.

Che aguereko peteĩ che angirũ ahayhuetéva Sudáfrica-pe hérava Sandile Makasi. Ipermiso reheve, akomparti hembiasa personal ñeperdona rehegua. Sandile orekórõ guare mokõi áño potaite, itúva, orekóva 28 áñonte, ojetortura ha ojejuka policia rupive pe régimen apartheid aja. Areve, Sandile oikuaa umi detalle gráfico itúva jejuka vai rehegua. Ko’ág̃a amombe’u umi iñe’ẽ tee:

“Umi che ary peteĩha aja peteĩ mitã’ícha añandu py’aro ha jehayhu’ỹ upe ojapova’ekuére hikuái che túvare. Mba’éichapiko ikatu oipe´a hikuái chupe orehegui? Ojeipe’a chehegui che ru ha che mentor, ha che sýgui ojeipe’a peteĩ irũ oporohayhu ha oporoñangarekokuaáva.

“Aikuaávo mba’éichapa otortura vaipaite chupe hikuái, kóva omongaru che korasõ ha che akã peteĩ pochy, jehayhu’ỹ ha py’aro vaiete reheve umi oficial de policía ha tapicha morotĩ kóntrape.

“Aguereko memekuri umi temiandu ajuhu peve Jesucristo evanhélio restaurádo. Pe evanhélio chepytyvõ antende hag̃ua aperdonava’erãha umi oficial de policía-pe hembiapovaíre, ha che vy’a ha jekakua espiritual odependeha upévagui.

“Upéva ndahasyieteve oje’e ijejapógui, ha katu añeha’ã meme heta ñembo’e reheve, ha ára ohasávo Ñandejára chepytyvõ aperdona hag̃ua umi che enemigo-pe …. Py’arasy rangue añandu moangapyhy; py’aro ha jehayhu’ỹ rangue aguereko mborayhu; pytũ rangue che korasõ ha che akãme, aguereko tesape ha py’aguapy.”

Aguyjevete ndéve Sandile ne ehémplo rehe reme’ẽ haguére pe ñeperdona jopói.

Mbohapyha, pe Cristo-ichagua mborayhu rehegua jopói. Opa umi don espiritual apytépe, ni peteĩ tuichave pe karidágui. Jesús ohechauka sãsóme Imborayhu tapichakuérare ha Ha’e ñanembo’e jajoayhu hag̃ua ojojupe.

Jasegívo pe Salvador ehémplo jahechaukávo mborayhu tapichakuérare umi ñane ñe’ẽ ha mba’e’apo rupive, ha’ekuéra ikatu oñandu pe Tupã mborayhu ñande rupive.

Ojapo ndahetái ary, aikuaákuri peteĩ mitãkaria’y orekóva 23 áño oikóva Washington-pe ha ha’éva peteĩ ehémplo guasu kóvagui. Umi misionero ombo’ékuri chupe mbohapy mese aja, ha ha’e ohechauka peteĩ ñemoambue tuichaitereíva hóva ha oikolájape. Peteĩ pyhare oñe’ẽ hína misionero-kuérandi teléfono-pe ha ombopahakuévo, ha’ekuéra he’i chupe “Rohayhu Michael.” Ha’e oheja pe teléfono ha opensa: “Ndee. Upéva ha’e peteĩ mba’e che ndajepokuaáivare. Che ha’ekuaa jepe upéva ambuekuérape.” Ha’e odesidi oñembopy’aguasutaha ha he’i isýpe ohayhuha chupe. Isy oiko ndahetái aravo mombyry chugui, ambue párte pe estado-pe. Ohenói vove chupe ha he’i chupe “Rohayhu che sy”, ha’e ombohovái pya’e: “Mba’epiko ojehu ndéve? Rehopikora’e doctor-pe ha ome’ẽ ndéve noticia vai? Reho jeýtapiko ka’irãime?” Upérõ, ha’e omombe’u chupe mba’éichapa ojuhúkuri pe evanhélio ha mba’éichapa omoabue chupe, ha ko’ág̃a ndopitavéima ha ndoiporuvéimaha droga-kuéra ha oplaneaha oñemongaraívo.

Arovia kóva ha’e peteĩ ñemoha’anga porã mba’épa oiko tapichakuéra oñandúrõ Tupã mborayhu ambuekuéra rupive. Upéva omohu’ũ ikorasõnguéra ha upéi okompartise hikuái upe mborayhu don ambuekuéra ndive.

Ko’áĝa, ko pyharépe, ñañepyrũkuri ñañe’ẽvo umi jopói ijojaha’ỹvare ja’évo oro, incienso ha mirra. Ama’ẽkuri ha ahecha ikatuha rejogua umi jopói Amazon-pe. Ha katu araka’eve ndapejuhumo’ãi umi ambue jopói ñañe’ẽva’ekuégui ni peteĩ tienda-pe. Umíva ha’e jopói ijojaha’ỹva, ha oguerúva peteĩ vy’apavẽ añete ha hi’aréva umi ohupytýva ha umi ome’ẽvape.

Upévare, pepensávo mba’épa peme’ẽta ko Navida-pe, poinvita:

1. Pekomparti pene testimonio pene familia ha umi pehayhúva ndive. Pekompartívo upe don ijojaha’ỹva, pene testimonioite oñemombaretéta.

2. Peperdona peteĩ mávape peñandúva ojapovai térã penehungava’ekue. Peme’ẽvo ko jopói, peẽ avei peñandúta py’aguapy ha ñemonguera.

3. Peipytyvõ tapichakuérape oñandu hag̃ua Tupã mborayhu peẽ rupive. Oĩ porãrõ, peje pehayhuha chupechuéra. Pehechávo ambuekuérape Tupã ohechaháicha chupekuéra, pene mborayhu hesekuéra okakuaáta ha peẽ peñandúta avei Tupã mborayhu pende rekovépe.

Ambopahávo, adesea peteĩteĩ peẽme peteĩ Navida époka henyhẽva tuicha vy’apavẽgui. Ame’ẽ che testimonio Jesús pe Cristo-gui. Ha’e oikove. Ha’e ñande Salvador, ñande Redentor. Ha’e ñande Avogádo ha Angirũ. Aadora Chupe. Ahayhu Chupe. Idon rupive opavave ñandéve g̃uarã, ojejoguáva peteĩ mba’erepy ijojaha’ỹvare, ñande jahupytykuaa pe don tuichavéva opavavégui—jepe pe tekove opave’ỹvañande Ru Yvagagua oporohayhúva rendápe.

Jesucristo rérape, amén.