Katauraoiko ni Kaitibo ma te Tia Kamaiu

Ngkai ti a rinnakoa te namwakaina ni kakiritimati aio, e mena au iango i aoia naake a raroanako ma mwengaia, n raonaki ma mitinare ake a beku n aia mition.

Au moan kiritimati ae i raroanako iai ma mwengau bon inanon Ritembwa 1960, ngke i beku bwa te mitinare i Engiran. I bon mwakuri i Swindon, Engiran.

Ti bon katabwena te mwakuri i aon Swindon 90 te bong mai imwaina. Ti bon tangoa te ruu teuana ibukin ara tabo n taromauri n te Tabati. Ti kakabwaiaki bwa a bon reke naba ara aomata aika rairaki—ao ni kateaki te mwaanga.

Imwain te Kiritimati, ngai ma toau, ae Elder Noel Luke ti baireia bwa ti na kamauriia aomata i aan bataia n te tabo are ti mwakuri iai ao ni katukui rongorongo n te Kirimati aika kimototo ao ara kakabwaia nakoia. Bon te tairiki ae rang tamaroa, e ranea karawa n otan namwakaina ao n uota kakukurei. Rimwii ao ti kunea bwa kain rarikira ni kabane a bon mataku n tamnein te tia kamanga ao te anene, ae Harry Secombe i aon te terewition. E anenea te kuna ae rang tikiraoi “Kakabwaia Te Mwenga Aei” E bon mwanewei, taeka aika tabu ao n riinga te nano:

Kakabwaiaia aomata ikai.

Kateimatoa itiakiia ao kainaomataia man te bure.

Kakabwaiaira bwa ti aonga ni

Kororaoi, O te Uea bwa tina tau imatam.

A bwaro ranin matara n ana mwanewe. E tang te kuna aei, man mwenga aika kakaokoro, n roko tangina n te nang ao n ruo rikaaki. I karekea te namakin ma toau ae Elder Luke bwa bon ngaira ni koaua taan tei ibukin ara Uea ao ara Tia Kamaiu, ae Iesu Kristo, ti kabanea ara kona ni beku ao ni kakabwaiaia natin Tamara are i Karawa.

Ngke I mitinare ao I karekea te atatai bwa ti bon raroanako ma mwengara ni koaua ngkai ti maeka i aon te aba—mwengara i karawa. Arora ni karekea te namakin n rau n te mwenga anne bon man ara anganano nakon ara Tia Kamaiu.

Tabeua te ririki n nako, e kaungaira te Ekaretia bwa ti na kaota te ota are e a tia ni katauraoia te Tia Kamaiu ibukin te aonaba, riki n tain te Kiritimati. E rang tamaroa ana waaki te Ekaretia ae Light the World (Kaota te Aba) bwa e a tia ni kaineta aia iango aomata nakon te Tia Kamaiu. E raonaki aio ma te mwakuri n anganano nakoia kainano ao karaoan ana mwakuri Kristo.

Te ririki ae nako ao e a tia te Ekaretia ni karaoa te Light the World (Kaota te Aba) ao ni kabonganaki irouia aika mwaiti i aon bwaai aika maiu man te iti n te Times Square New York City.

I mena ikekei ma kainabau ae Mary ngke e kaotaki tamnein bungiakin te Tia Kamaiu i aon te tikuriin ae bubura. Bon te taneiai n tamnei ae nano. N te ririki aio e a karaoaki n taabo aika mwaiti ni kabuta te aonaba are karaoaki n te Times Square.

Ngke ti mena i New York City. n tain te bukamaru Light the World (Kaota te Aba) I nooria bwa iai tamnei aika rang tamaroa i aon wintoon titooa.

I uringa teuana te beeba ni kaongora n te Tabati n te New York Times ae atunaki n: “Katamaroan Moan Titooa. Ibukia Taan Bobwai.” Te beeba ni kaongora aio e kaota te waaki ma ngkoa i aon Fifth Avenue i New York City n aroia ni katamaroa aia winto n aia titooa. Man te beeba ni kaongora aio ao kawaran te kaawa aio irou, I nooria bwa akea tamnein rongorongon te kiritimati ke te Kristo te Teei i aon wintoo aikai.

Ngke I wareka te beeba ni kaongora, I uringnga ngke I uarereke ao kaotaki tamnei ni kiritimati i aon wintoon titooa ae bannan Kristo te Teei i Salt Lake City. I uringnga naba n te tai anne ao bon iai te titooa ae bubura ae tei i nuuka mai maeao are katekea te botoniango ibukin te Kiritimati bwa e aonga ni katika nanoia taan boobwai ao n anganiia naba te namakin ni Kiritimati. E bon rang bubura te baana are a kateia ao e koreaki i aona ae kangai, “Ngkana e roko Kristo n te tairiki aei, antai ae E na kawaria?” A rang mwaiti tamnei iaan te baana aei ake a kaotaki n wintoon te titooa. Ngkana e eti au ururing:

• Teuana bon tamnein te unaine ni mena iaon ana kainiwene ae tararuaaki iroun te neeti. E bon rang taraa n aoraki.

• Te kauoua bon tamnein te kairake n tina ma natina ae e a tibwa bungiaki. E otara ni moana bwa e kimwareirei.

• Te kateniua bon tamnein te utu ma natiia aika tangitang. E otara bwa e aki tau kanaia, are ana kanna, ao akea, aia bwaintangira n te Kiritimati.

• Te kaua bon tamneia utu aika kaubwai ni kauki aia bwaintangira aika mwaiti.

• E rang kakateke te kanimaua n tamnei, e kaota bannan te utu ae mangori n ikotaki ma natia aika mwaiti n anene ma te kimwareirei.

Man tamnei aika nimaua aikai ao n raonaki ma te baana “Ngkana e roko Kristo n te tairiki aei, antai ae E na kawaria?”, uoua iango aika roko n au iango.

Te moan, ti bon aki kona n ata te aoa ma te bong, are na manga oki iai te Tia Kamaiu.

Te Kauoua, e reirei Beretitenti Russell M Nelson n te maungatabu ae nako bwa, ngkana e roko Iesu Kristo, “[E] na oki bwa te Mesia n te ngaa n ririki.” E kaumakiko Beretitenti Nelson, “Bwa ko na katabua [maium] nakon Iesu Kristo.” Ma e ngae n anne, e na riai ni koreaki ae kangai i aon te baana, “Ngkana e roko Kristo n tairiki aei, antai ae e tauraoi ni kamauria?”

N au taratara i aon tamnei ake n te winto, I kunea bwa a kaeti nakon te maiu n rabwata ao irekerekeia aomata ma te mwane, ma bon akea taekan te maiu n tamnei. Winto aikai a kaota tamnein te rao ae e a kara ao n aoraki ao ni kaota naba te marurung ma tamnein te ngoro. Iai naba bannan te kaubwai ao te kainano. Te ririki, te marurung, ao te mwane bon akea maneia, ma e kakawaki riki bwain te tamnei.

N Reirei ao Berita aika Tabu ti wareka taekan te tau ibukin te bwabetitoaki n ana Ekaretia Kristo. Ti na bon karinanoira, ao n roko ma “te nano ae uruaki ma n raraoma,” rairannano, ao n “toro iroun [Iesu Kristo] ni karokoa te toki.” Te kouru bwa a na riki “bwa ana reirei Iesu Kristo” ao ni kekeiaki i aon kawain te berita ae tabu are uoti kakabwaia nakoira man Ana Mwakuri ni Kamaiu.

Kristo bon te banna ni katooto ni bwaai nako. E taku, “Nooria Ngai te oota; I a tia ni katea te banna ni katooto ibukimi.” Ngkana tararua raoi maiura n tamnei, ti na kona ni kororaoi n ai arona. E kaota te kawai nakoira te Tia Kamaiu bwa ti na kunea te kukurei, nanona, ao te kimwareirei n te maiu aei ao are akea tokina. Namakin n te Kiritimati bon kukurei ao te kimwareirei.

N Ioane 19:5 ti wareka taekan Birato ngke uota Iesu nako mataia naake a tangiria bwa e na Tauraki. E bon “bauna te bau are kateketeke, ma ni kunnikaia te kunikai are uraura. Ao e taku Birato nakoia, Noora te Aomata!”

N tain te Kiritimati aei ti a bane n noora te aomata, are bon te Kristo, ao ana bwaintangira are katauraoia ibukira.

Te moan, ti na iangoa mimitongin bungiakina.

Ti ataia bwa te teei are ti karaoa te bukamaru ibukina n te Kiritimati bon ana riki temanna te Tama. E mena irouna mwaakan Tamana ibukin te maiu are akea tokina—te mwaaka ni maiu. Ao E karekea te mate ma iroun tinana i aon te aba. E a kaman rineaki mai moana bwa e na karaoa te tibwanga ae tabu.

Mataio 1:23 e kangai taekana, “Noria, ane e na kariki te kibono, ao e na bungia te nati te mane, ao a na aranna bwa Emanuera, ae ai aron ae, te Atua iroura.”

Te kauoua, iangoa kororaoiroina ma maiuna n itiaki ao Ana banna ni katooto. E ngae ngke rinanon te kainnano ni maraki, ma te karawawataaki, ao te kaririaki n aekaia nako, ma E tokanikai ao ni kakoroa nanon ana mition. Bon ngaia ara banna ni kakairi ao ti riai n toua mwiin kawaina. E kabanea maiuna n akoia kainnano, karawawataaki, aoraki, ao aika a rotaki, ao e tokanikai n tibwangana ibukin kabobongan te babaire ni kamaiu are bon ti ngaia ae tau ni karaoia.

Te kateniua, iangoa Matena, Mangautina, ao Ana Mwakuri ni Kamaiu.

Ni kaeti ma te Mwakuri ni Kamaiu, Tataekina au Euangkerio e koreaki ae kangai: “E raonaki Ana Mwakuri ni Kamaiu te Tia Kamaiu ma Korakaina n te Onaroka i Ketetemwane, Korakaina ao matena n te kaibangaki, ao Mangautina. E korakai n ae moan te korakora—ni korakora n te aro are E wanako raraana man bwangabwangan kunna.”

N Reirei ao Berita aika Tabu 76:41 ti warekia bwa: “Bwa e roko nakon te aonaba, ae Iesu, bwa e na tauraki ibukin te aonaba, ao ni uoti buren te aonaba, ao ni katabua te aonaba, ao ni kaitiakia man taian buakaka ni kabane.”

Ana Mwakuri ni Kamaiu Iesu Kristo bon te tai ae kakannato ao bon te bwaintangira ae akea kabotauana n rongorongon te aonaba. Ngaira ni kabane ti a tia ni kairua, ao bon tii rinanon Ana Mwakuri ni Kamaiu Iesu Kristo are ti kona iai ni karekea ana nanoanga ao ni maeka ma te Atua.

Te Kaua, katauraoi i mwain te Kauaoki.

E reirei Iobi, n te O Tetemanti bwa “E na tei rake rimwi i aon te aba.” E reirei Beretitenti Nelson ni koauan aei: “E na tautaeka [Kristo] i Ierutarem are ngkoa ao n te Ierutarem ae Boou.” Aio bon ara tai ni katauraoira imwain te tai aei. E taekinaki n koroboki aika tabu: “Katauraoingkami ibukin ana bong ae kakannato te Uea.”

Au kabanea ni kakao nakoimi bwa kam na tangira ao ni beku iroun te Uea. Ngkai ti iangoa maiun tamneira ao ni katauraoira bwa ti na kaitibo ma te Tia Kamaiu, ti riai moa n “tangira Iehova ae Atuam n nanom ni kabane, ao n tamneim ni kabanea, ao ni wanawanam ni kabanea.” Ao te kauoua, “Tangira raom n ai aron tangiram i bon iroum.”

Ara tangira ibukin te Atua ao raora n aomata bon teuana kataakin maiun tamneira. Ngkana ti tangira te Atua, ti na kawakin Ana tua. Ngkana ti tangiria raora, ao ti riai ni beku ibukia ao n riki bain te Tia Kamaiu n ibuobuoki.

E kabonganai taeka aikai te Tia Kamaiu, n Reirei ao Berita aika Tabu: “Eng, N na kauka nanoia aomata, ao…N na katea te ekaretia mani baim.”

Arora ni kaota ara kakaitau nakon te Tia Kamaiu n te Kiritimati aei bon te riki bwa Ana toro—n, riki, bwa Ana tabonibai i aon te aba.

N te tai ae tamaroa aei, ngkai ti bukamarua bungiakin ara Uea ao ara Tia Kamaiu, Iesu Kristo, I kakoaua nakoim bwa E maiu. Bon ngaia ara banna ni kakairi, ara tia ibuobuoki ma te Tama, ao e kabobongai bwaai ni kabane ibukira bwa ti na okiria ma te Tama. Rineia bwa ko na iriira Iesu Kristo ao ni butimwaai karea ake E katauraoi ibukim.

Kabotoa maium i aon Iesu Kristo n te Kiritimati aei.

N aran Iesu Kristo, amen.