Kristo te Merimeri E Bungiaki Ibukim

Ai kakabwaiara ngaira n ongo te anene ae rangi n tamaroa? A rarabwa kaain te kuaea aei, te oketura, ao taan orotai. I aki kona n nori ngkami mai bukin kaai aikai, ma I ataia kam bon mena ikanne.

“Te Teei ae Tabu, Te Teei ae Mangori” bon te kuna ni Kiritimati ae I tatangiria.

Nanai n tibu a matu, ana kakawakin te Tia Kawakin tiibu

Tararua ni karokoa te ingabong ae boou;

Noora te mimitong, ongo te karaki

Rongorongon te euangkerio ae koaua.

A kimwareirei, kainaomataaki man te raraoma,

Bwana n nebo, ni butimwaea te ingabong,

Kristo te merimeri e bungiaki ibukim.

Kristo te merimeri e bungiaki ibukim.!

Ngke I uarereke, au karo a aranai bwa “Tammy Lamb,” ngaia are ngkana boki aika a tabu a taekina te tia kawakin tiibu ma ana tibu te teei, I namakinna n tainako bwa a taetae nakoiu.

Aio e bon rang koaua n karakinan te Kiritimati ao anera a kaoti nakoia taan kawakin tibu, ake a tararuaia aia nanai, aia tibu, n te tairiki. I katamneia bwa I mena ikekei ao I iangoia bwa aekakira aron kawaran te merimeri inanon nen kanaia maan. I teimatoa n tatangiri banna akanne ni katoa ririki ngkai I iangoa Bungiakina.

Te banna riki teuana are I tatangiria e roko man te karaki are e karakinna Unimwaane John R. Lasater.

N ririki aika a nako, Unimwaane Lasater e kawara te aba ae Aberika n tei ibukin te tautaeka.

N te bong teuana, ngke ti mwananga n te rereua inanon te karawan n te rimotiin ae roro, e riki te kabuanibwai. Te kaa are e toka iai e a roko i taubukin te maunga ao e nooria bwa te kaa are i moa e katikaki nako man te kawai. E taku, “Te tamnei are i matara e tiku inanou inanon ririki aika a bati.”

Te unimwaane ae te tia kawakin tibu, n te kunnikai ae mwarairai n ana bong te tia Kamaiu, e tei irarikin te rimotiin n taetae nakon te turaiwa. N uakaan iai te nanai n tibu aika e kaniia 15 tiibu.

Te kaa are e rimoa e moana temanna te tiibu ao e ikoaki, e kabwarabwara ana turaiwa Unimwaane Lasater. Ao ibukina bwa ana kaa te uea, te tia kawakin tiibu e na reke irouna 100 te tai boon te tiibu ae uarereke ngkana e a ikawai. Ma iaan naba te tua anne, te tiibu te teei e na tiringaki ao irikona e na tibwatibwaaki imarenaia aomata.

Imwiina e taku te turaiwa, “Ma ti taraia, te tia kawakin tibu ae e kara e aki kona ni butimwaea te mwane, a bon aki kona.” Ngkana a titirakinaki bwa bukin tera, e reitia, “Bon ibukina ana tangira ibukiia ana tiibu n tatabemaniia nako.”

A mataku ngke te tia kawakin tiibu e baraaki, n tabeka ana tiibu are e ikoaki i nanoaan baina, ao ni katoka iaon ninirana. E reitinako ni toroba ana tiibu te teei, ni kaokioka ana taeka ae ti teuana, ao ngke e titiraki Unimwaane Lasater bwa tera nanon te taeka, e tuangaki, “O, e atoatonga arana. Ni kabane ana tiibu iai araia, bwa ngaia aia tia kawakin tiibu, ao te tia kawakin tiibu ae raoiroi e atai araia ana tiibu ni kabane.”

N Itaia ti tuangaki n te berita, “E na botiia tiibu aika ataei ni baina, ao e na uotiia ni bwabwakoia inanon banibanna”

Ngkana ti uringa te bwai teuana ke n namakinna n te Kiritimati aei, e riai bwa bon ngaira Ana bwai. Uringnga ngke Kristo e tuanga Betero, “Kamwarakeiaau tiibu te teei …autiibu”?

“Bwa ibukime bungiaki n te bong aei n ana kaawa Tawita te Tia Kamaiu, are bon Kristo te Uea.”

“Bwa e na bungiaki te teei, nako ira te nati te mwaane.”

E bungiaki bwa e na tabekiira rake n arora. Ao ngkana ana bwai temanna, Bon ngaia am bwai ni koaua. Kristo te merimeri e bungiaki ibukim.

Ma e kauring naba Itaia, “Ngaira ni kabane n ai aroia tiibu ti a tia n tionako.” Tao ngaira n tatabemaniira ti a tia n namakina ae aron te tibu te teei ae tionako ke bon te tiibu ae bua. N te tairiki aei, I taekinna bwa ngaira ni kabane bon tiibu aika a ikoaki aika a kainnanoa te tia Kawakin tiibu ae Raoiroi, are e na mwanokaira ni bain Ana tangira. Ibukina bwa te maiu ae mamate ti namakina te kairua ke te uruaki n aro tabeua ao ti tangiria bwa tina kamarurungaki ke ni buokaki.

Ao I aki ataia ngkana iai n te wiiki are I namakina kainnanoan iai au Tia Kabomwi ae raka riki inanon tain te toa n te Tabati. I uota nanou ae uruaki ao ni kauring taekan te kanikina n “tain manga kabouan te maiu n tamnei aei.” Ma n tabetai e roko te nanokawaki ngkana, I iangoi wiiki aika a nako, I ataia bwa bon buure naba ake mai imwaina, kabwaka naba ake I iangoi n te Tabatiae nako. Ao I namakina te korakai ni koaua.

Ko ataa te tai aei?

N te bong aei I kaoiko bwa kona kataa ae boou. Inanon taai aika a rang n tabu n te wiiki ae bwanin, ngkana ko namakina te korakai, iangoia bwa E weteiko n aram, ao ko nakoina. Noora am Tia Kamaiu n am iango, ao baina aika a tangaina ma moana ae takiakia nakoim, ni kangai “I ataia ae kona namakin aei! Anne bukina I roko iaon te aba ao ni korakai n aron are I karaoia.” Ana ibuobuoki, Ana nanoanga e tatauraoi ibukim n te tai aei, tiaki n tokin te kawai ngkana ko namakinna bwa a nakoraoi bwaai ni kabane. Ibukina bwa are e namakina ae aron anne? Akea ae I ataia.

Uringnga, ti nako n taromauri, nakon te toa n ana Katairiki te Uea, bwa tina kamarurungaki, ma n namakina naba te kaitiakaki.

N ririki aika a nako, ngke I beku n te Moanrinan, I taekina karakinan te aomata ae ea tibwa tia ni bwabetitoaki. I kaotia bwa te rao aei tao temanna te kabanea ni kororaoi ao ni itiaki ae kaain te Ekaretia. Ngkanne n te rinan mai moa, e tei te bai ao e taekinna te ataeinimwane, “I kona naba ngai ni itiaki n aron teuanne ibukina bwa Ia tia ni bwabetitoaki ao ni kana te toa.” I obwanako ni kaeka, “Eng, anne te bwai ae I nanonna—are e taekinna.”

Raou, ti uringnga raoi ao ti karekea te reirei ae moan te tamaroa aei? Ngkana ti a tia ni karaoi mwakuri ni kawakini ara berita ma te Atua—n reitinako n oki, ribootini, ao n rairannano, ti kona ni kaitiakaki ni katoa bong. Ao rinanon otenanti n te toa, ti kona n namakinna ae ti itiaki n aron te bong are ti bwabetitoaki iai.

Irou, anne aron te Tabati n riki bwa te bong ni motirawa. Tiaki ti te motirawa n rabwata, ma te motirawa man te kairua ao te maaku, man arou n aki tau ao kabwakau. E rang kakaawaki anne ti teuana te bong!

Teuana te rongorongo ae rang nano man booki aika a tabu e anganiira nooran te motirawa aei. N ana Boki Moomon, ngke te Tia Kamaiu ae mangauti e kawariia Ana “tiibu ake tabeman” i Amerika, ao imwiin ataakin kainnanoia e ngae ngke aki bubuti, E kaoia ni kabane ake a uruaki n te maiu n rabwata —mauku, mataki, bonotaninga, ao naake a “karawawataaki n aekaia nako”—bwa a na keerake.

I iangoia naake a kateirain ake a kan kamarurungaki n aorakin rabwataia. Ma n au iango, I nooria aomata n ai arou ao tabeman ake I tangiriia n te rain ake a rootaki n aro aika aki nooraki n te mata. E tuatua ibukiia naake a rootaki n aekaia nako, “ao e bon kamarurungiia n tatabemaniia.”

Nora aron, te tai aei, e aki taekinna bwa E kamarurungiia. I tangira te iango aei bwa iai te kaokoro imarenan te kamarurungaki ao te kamaoaki. Te kamarurungaki e kaokii arora nakon are mai imwaina n tein marurungira, are ti bon tangiria, tiaki ngaia? Ma kamaoakira e kaokoro. Te kamaoaki e irekereke ma te maneka ni kawai, ni karekea te bitaki n te itera are teuana.

Riki te Tia Kamaiua te aonaaba, ngkai te aomata ae mangauti, e kamaoi manekan Baina, waena, ao rarikina—bwaai ni kakoaua bwa E aki mwaninga taekara bwa man Kataereana ti a kamarurungaki. Ao tao, n te bong are e kamarurungiia iai te Tia Kamaiu, E tauiia naba, n inga ma ngaiia n tatabemaniia ma te tangira.

N te tairiki aei, tao kam na namakina te uruaki ao n aki koaua raoi n Ana kamarurung. Ma e koaua anne? Ni katoa Tabati n tain te toa, E tabeki ngkami man te kawai ae bubu, ao ni katokai ngkami iaon kunnikaina, ao ni bwabwakoi ngkami ni baina.

N tairikin te Kiritimati ae mimitong, te anera e taekina te rongorongo ae tamaroa, n rongorongo te kimwareirei ae korakora. “Ngaia are te kabanea ni korakora e kamangoria—Te Tia Kawakin Tiibu mai Karawa e riki bwa te tiibu te teei.” “Aia Uea uea e wene ni nen kanaia maan ae mangori. Ni kataakira ni kabane, e bungiaki bwa e na riki bwa raora.” I kakoaua bwa anera a kangai, “Raom, raraom e a roko. Ao ngkana ko ataia bwa kaanra ngaia n tarataraiko, mwaitira taraakina iroum ngke ko maiu ma ngaia mai imwaina, ngke ko ataia bwa Ngaia are e na anganano ibukim ao mwaitira ana anganano ae E na karaoia ni buokiko bwa kona okira mweengam, kona inimaki ni Butimwaia ni nnen kanaia maan.”

I kaota au koaua bwa te Merimeri ni nnen kanaia maan, teuare ti taromauriia ao tao n iangoia bwa n iangoia bwa aekakira tauakina, e roko ni karaoa are bon anne ibukira.

Eng, Kristo te merimeri e bungiaki ibukim!

N aran Iesu Kristo, amen.