Bwaintangira ae Akea Boona

N te tairiki aei, I marooro naba ma te kimwareirei ao kamimiin kakaawakin te Kiritimati ae tabu. Akea te bwai ae e a tia n riki n rongorongon te aonaaba ae korakora riki mwiina nakon bungian ao ana mition Iesu te I-Natareta ae raka i aon uoua te ngaa te ririki n nako. I nanon boong aikai, e baireaki te tai man te kakai n te bwai ae riki aei.

E bukamaruaki bungian ara Uea n aanga aika a mwaiti ni katobibia te aonaaba, ma e taraa n taabangaki teuana te katei ni bukamaruan te Kiritimati.

Te katei aei e moanaki n Mataio ma rongorongoia taan rabakau mwaane mai Mainiku ake a roko bwa a na taromauria Iesu. N rokoia, a uoti bwain tangira aika a kakaawaki. N boong aikai, te katei n anga bwain tangira bon ngaia boton te bukamaru n te Kiritimati.

Au moan ururing n te bwaintangira ni Ka-Kiritimati bon te kati n takakaro ma kanoana ae bae nakon te kao, ao te take ae mimitaki. E rang kakukurei aio nakon te ataei ae aua ana ririki. E na minomino n katobibi i aon te timanti te take ao n aki reke ana tai ngke I maaireia onoua te inti raroana. Ma e waekoa n uruaki te bwain takakaro, ao ma bwaai ni kabane aika bwain te aonaaba, e kai toki kakukureina ao ni waekoa n mwanuokinaki.

N te tairiki aei, I uoti rakei teniua bwaintangira are ti kona n anga ngaira n tatabemaniira n tain te Kiritimati, ao ni kabanea maiura, are e na aki ti uota te kukurei ae totoki taina, ma e na uota te kimwareirei ae akea tokina.

Te moan bon te bwaintangira ae te kakoaua. Aio bon te bwaintangira ae nako mairoun temanna ao ngkana e anga te aba n akea boona, n akean te bure, e kaota te kukurei ae nano i nanora. Ni kakaawaki riki nakon te koora, te ribano, ke te mura, te kakoaua ae itiaki iroun Iesu Kristo bwa ara Tia Kamaiu ao te Tia Kabooi Maiura bon te bwai ae kakaawaki riki i aon bwaai ni kabane ake ti kauringnga n te Kiritimati.

Ngke a uarereke natira ake onoman, ti baaireia ngai ma Jacqui n teuana te tairiki ibukin ara kain n utu n te tairiki, bwa ai tiaki te angareirei, ma ti na tibwai ara kakoaua aika a bebete i bon iroura. I mwiin tibwaakin au kakoaua, natira te aine ae Chelsea, tao 16 ana ririki ni maiu n te tai arei, e taku ma matana aika e kawarebwei, “Tamau I tuai man ongongo am kakoaua mai mwaaina!” I tei n tiaoki, ao ni miimi n ana kaeka. Ko noria, n te tai anne ngai bon te beretitenti n te titeiki ao I ataia bwa e a tia n ongongo au kakoaua Chelsea ngkana I kaotia n taai aika a mwaiti n boobotakin te aro ao n te mwenga. Ma n te tai anne, e kaai n ongo ao n namakina au kakoaua ae ai aron ae ai bon tibwa te moan tai. E anganai te reirei ae I aki kona ni mwaninga: e kakaawaki riki te bwaintangira ae te kakoaua ao iai te mwaaka n tibwaakina n taainako.

Te kauoua bon te bwaintangira ae te kabwarabure. E koaua bwa ngaira ni kabane iai taai ae ti rootaki iai man taeka aika aki tamaroa ke aia mwakuri tabeman. Ao ngkana ti kokoaua, ti kona naba ni karawawataia tabeman. E reirei Iesu Kristo “Ngai, te Uea, N na kabwara ana bure are I taku bwa N na kabwara, ma ngkami kam riai ni kabwarai aia bure aomata ni kabane.” Ao i mwiina e kamatoa n taku riki bwa ngkana ti kabwaka ni kabwarai aia bure aomata ake a bure nakoira, e na tiku te bure ae korakora riki.

Ngkana ti kabwarai aia bure aomata ma te nano ae itiaki, ti na inaomata man maon te boitin, motikitaeka, ke te kabomwi.

Iai raoraou ae I tatangiria i Aberika Maiaki ae arana Sandile Makasi. N ana kariaia, ao I tibwa te karaki ni kabwarabure ae onoti aei nakoira. Ngke e tuai koro uoua ana ririki Sandile, tamana, ae ai tibwa 28 ana ririki ni maiu, e kammarakaki ao n tiringaki irouia bureitiman n tain te itabararaa ibukin te reeti. E reiakinna i mwiina Sandile bwaninin rongrongon tiringakin tamana. N na taekina ngkai ana taeka:

“I nanon moan rikirakeu bwa te ataeinimwaane ae I uarereke I namakina te mwengabuaka ao te riribai ibukin te bwai are a karaoia nakon tamau. A kanga n uotianako mairoura? E anaaki mairou tamau ao au tia ibuobuoki, ao e bua mairoun tinau te rao ae tatangira ao n akoi.

“Ngke I kunea aron aia iowawa n aron kammarakana, e kauekea i nanou ao n au iango te un ae rikirake, te riribai, ao te kakaaitara nakoia bureitiman ao nakoia aomata ake a mainaina kuniia.

“I reitinako ma matoan namakin akanne ni karokoa I kunea ana euangkerio Iesu Kristo are e a tia ni kaokaki. E buokai te euangkerio n mataata bwa I riai ni kabwarai aia bure buretiman ibukin aia mwakuri ni mwakuri n tiritiri, ao n ataia bwa rikiraken kimwareireiu ao tamneiu e katan iaon anne.

“E bebete riki taekinana nakon karaoana, ma I waakinako ma te tataro ae bati, ao i nanon taina e buokai te uea ni kabwarai aia bure au kairiribai …. Ngke N na riai ni maraki, I namakina te rau; ngke N na riai ni kakaaitara ao n riribai, I karekea te tangira, ngke N na karekea te rootongitong i nanou ao n au iango, I karekea te oota ao te rau.”

Ko rabwa Sandile ibukin am katooto n anga te bwanintangira ni kabwarabure.

“Te katenua, te bwaintangira n tangira Kristo. Man bwaai n tangira n tamnei ni kabane, akea riki ae korakora nakon te tangira ae kororaoi. E kaota Ana tangira ni koaua Iesu nakoia aomata ao n reireiniira bwa ti na itangitangiri i marenara.

Ngkana ti iriira ana katooto te Tia Kamaiu man kaotan ara tangira ibukiia n te taeka ao n te mwakuri, a kona ngkanne n rinanon ana tangira te Atua mai iroura.

Tabeua te ririki n nako, I kaitibo ma te ataeinimwaane ae 23 ana ririki ae maeka i Washington are bon te banna ni katooto i aon aei. E a tia n reireiaki irouia mitinare i nanon teniua namwakaina, ao e a tia n rinanon te bitaki ae tamaroa n aroarona ao ni maiuna. N te tairiki teuana e marooro ma mitinare i aon te tareboon, ao ngke a nang katuka te tareboon, a taku “Ti tangiriko, Michael.” E katuka te tareboon ao e iango irouna,“Wow. Anne te bwai ae I aki taneiai iai. I kona n taekina naba anne nakoia tabeman.” E iangoia bwa e na ninikoria n tuanga tinana bwa e tangiria. E maeka n te raroa ae tabeua te aoa n iteran aia aono are te iterana. Ngke e tareboniia ao n tuangnga “I tangiriko, Tinau,” ana kaeka tinana ae waekoa n taekinna bon “Tera ae riki iroum? Ko nakon te taokita ao n iai te rongorongo ae e aki raoiroi? Ko na manga okira te karabuuti?” Ngaia, are e a tuanga taekan kuneakin te euangkerio ao arona ni bita maiuna, ao ngkai e a katoka te moko ao kabonganaan te bwai ni kamanging ae te turaki ao n iangoa te bwabetito.

I taku bwa aio te kamataata ae rangi n tamaroa ae na riki ngkana a namakina ana tangira te Atua aomata rinanoia tabeman. E kamaraui nano ao i mwiina e karekea te kaantaninga n te nano n tibwaa te bwaintangira ae te tangira ma tabeman.

N te tairiki aei, ti moana ara marooro i aon taekan bwaintangira aika a kakaawaki man atongakin te koora, ribano, ao te mura. I nooria; bwa kam kona n kabooi bwai tangira akanne man Amazon. Ma kam aki konaa ni kunei bwaintangira ae ti marooroakinna n taian titoa. Bon bwaintangira ae akea booia, ma a na uota te kimwareirei ni koaua ae akea tokina nakon te tia karekea ao te tia anga.

Ngaia are, ngkai ko iangoaia bwa era ae ko na aanga n te Kiritimati aei, I kaoko bwa kona:

1. Tibwaa am kakoaua ma am utu ao naake ko tangiriia. Ngkana ko tibwaua te bwaintangira ae kakaawaki aei, e na matoatoa oin am kakoaua.

2. Kabwara ana bure temanna ae ko namakinna bwa e a tia n bure ke ni kammarakiko. Ngkai I anganiko te bwantangira aei, ko na namakina naba ngkoe te rau ao te kamaiuaki.

3. Buokiia tabeman bwa a na namakina ana tangira te Atua mairoum. Ngkana e riai, tuangiia bwa ko tangiriia. Ngkana ko nooria tabeman n aron ana nonoori te Atua nakoia, e na rikirake am tangira ibukiia, ao ko na namakina naba ngkoe ana tangira te Atua i nanon maium.

Ni kainana, I katekeraoi ngkami n tatabemaniingkami n te Kiritimaei aei te kimwareirei ae korakora. I kaota au kakoaua iroun Iesu te Kristo. E maiu. Bon ara Tia Kamaiu, te Tia Kabooira. Bon ara Tia Tei nakon te Tama ao Raoraora. I mataaiakinna. I Tangiria. Man Ana bwaintangira nakoira n tatabemaniira, ae kabooaki n boona ae kangaanga baaireana, ti kona n tau ni karekea te bwaintangira ae moan te kakaawaki nakon bwaai ni kabane—te maiu ae akea tokina i matan Tamara are i Karawa ae tatangira.

N aran Iesu Kristo, amen.