Regalonan Balioso

Awe nochi, mi tambe ta papia ku goso i asombro tokante e nifikashon sagrado di Pasku. Ningun evento den historia di e mundu tabatin un impakto mas grandi ku e nasementu i mishon di Hesus di Nazarèt mas ku dos mil aña pasá. Rònt den e mundu moderno, tempu mes ta wòrdu midí for di e evento milagroso aki.

E nasementu di nos Señor ta wòrdu selebrá den diferente manera rònt mundu, pero un tradishon di Pasku ta parse di ta universal.

E tradishon aki a kuminsá probablemente ku e relato den Mateo di hòmbernan sabí for di Ost biniendo pa adorá Jesus. Ora nan a yega, nan a trese regalonan presioso. Awe, e tradishon di duna regalonan ta un parti kada bes mas grandi di selebrashonnan di Pasku.

Mi promé rekuerdo di un regalo di Pasku tabata un rifel di hunga kual tabata tira un kòrki mará na un hilu, i un patu mekániko di kuèrdè. Esaki tabata felisidat kompletu pa un mucha di kuater aña. E patu tabata kana den un rònchi riba flur i realmente no tabatin un chèns pasobra mi tabata dirigí mi skopèt for di un distansia di diesinku sèntimeter. Pero e kò’i hunga a kibra pronto, i meskos ku tur kos material, e felisidat ku el a duna tabata temporal i lubidá masha lihé.

Awe nochi, mi ta sugerí tres regalo ku kada un di nos por duna e temporada di Pasku aki, i durante nos bida, kual lo no trese felisidat temporal, pero na su lugá lo trese goso berdadero i duradero.

E promé ta e regalo di testimonio. Esaki ta un regalo asina personal i ora e ta duná libremente, sin engaño, e ta revelá e ekspreshonnan mas profundo di nos alma. Mas presioso ku oro, sensia, òf mira, testimonio puru di Hesu Kristu komo nos Salbador i Redentor personal ta e sentro berdadero di tur loke nos ta selebrá ku Pasku.

Tempu nos seis yunan tabata yòn, Jacqui i ami a disidí un anochi ku pa nos nochi di hogar, na lugá di tin un lès, simplemente nos lo kompartí testimonionan ku otro. Despues ku mi a kompartí mi testimonio, nos dushi yu muhé Chelsea, probablemente di 16 aña e tempu ei, a bisa ku wowonan hanchu habrí, “Tata, nunka promé mi no a skucha bo testimonio.” Mi tabata un tiki sorprendé, i a keda pensa riba su kontesta. Bo sa, e tempu ei mi tabata un presidente di estaka i mi sa ku Chelsea a skucha mi duna testimonio hopi biaha den diferente esenario di iglesia i na kas. Pero na e momentu ei, el a i skucha i sinti mi testimonio manera ku tabata e promé biaha. El a siña mi un lès ku mi no a lubidá nunka: e regalo di testimonio ta presioso i tin poder den kompartié frekuente.

Di dos ta e regalo di pordon. Sigur nos tur, na algun momentu, a wòrdu heridá pa palabranan desagradabel òf akshonnan di otronan. I si nos ta honesto, nos tambe a kousa doló na otronan. Jesus ta siña,ku “Ami, Señor, lo pordoná esun ku lo mi pordoná , pero di bosnan ta rekerí pa pordoná tur hende.” Despues E ta bai un paso mas leu i ta bisa ku ora nos faya pa pordoná otronan nan pikánan kontra nos, e piká di mas grandi [lo] ta di nos.

Ora nos pordoná libremente i honestamente, nos ta bira liber di venenu di amargura, husgamentu, òf vengansa.

Mi tin un amigu stimá na Suráfrika yamá Sandile Makasi. Ku permiso, mi ta kompartí su historia masha personal di pordon. Tempu Sandile tabatin kasi dos aña, su tata, di solamente 28 aña di edat, a wòrdu torturá i matá pa polis durante régimen brutal di apartheid. Despues, Sandile a haña sa e detayenan spesífiko di e asesinato chokante di su tata. Awor mi ta sita su mes palabranan:

“Durante mi promé añanan komo mucha mi a sinti amargura i odio pa motibu di loke nan a hasi ku mi tata. Kon nan por a kité for di nos? Mi a wòrdu hòrtá di un tata i mentor, i mi mama ha wòrdu òrtá di un kompañero amoroso i kuidadoso.

“Ora mi a sa di e manera violento den kual nan a tortur’é, esaki a alimentá mi kurason i mente ku un rabia, odio i hostilidat inmenso kontra e ofisialnan di polis i hendenan blanku.

“Mi a sigui kultivá e sentimentunan aki te ora mi a haña e evangelio restorá di JesuCristo. E evangelio a yuda mi komprondé ku mi mester pordoná e ofisialnan di polis pa nan krimennan, i ku mi goso i progreso spiritual tabata dependé di dje.

“Esaki tabata mas fásil bisá ku hasí, pero mi a persistí ku hopi orashon, i despues di tempu Señor a yuda mi pordoná mi enemigunan …. Enbes di doló, mi a sinti konsuelo; enbes di hostilidat i odio, mi tabatin amor; enbes di skuridat den mi kurason i mente, mi tabatin lus i pas.”

Danki Sandile pa bo ehèmpel di duna e regalo di pordon.

Di tres, e regalo di amor manera di Kristu. Di tur regalonan spiritual, niun no ta mas grandi ku karidat. Jesus a ekspresá abiertamente Su amor pa otronan5 i El a siña nos pa stima un na otro.

Ora nos sigui e Salbador Su ehèmpel dor di ekspresá nos amor pa otronan den palabra i akshon, nan por eksperensiá e amor di Dios mediante nos.

Algun aña pasá, mi a topa un hòmber yòn di 23 aña bibá na Washington ku tabata un ehèmpel grandi di esaki. E mishoneronan a siñ’é pa tres luna, i el a eksperensiá un kambio asombroso den su kara i estilo di bida. Un anochi e tabata papiando ku e mishoneronan na telefòn, i ora nan a sera, nan a bisa Stima bo, Michael.” El a pone e telefòn abou i a pensa den su mes, “Wow. Esei ta algu ku mi no ta kustumbrá kune. Mi por a asta bisa esei na otronan.” El a disidí pa reuní e kurashi pa bisa su mama ku e ta stimé. E tabata biba algun ora leu den un otro parti di suidat. Ora el a yamé i bisé “Mi ta stima bo, Mama,” su kontesta inmediato tabata “Kiko falta bo? Bo a bai dòkter i haña mal notisia? Bo ta bai prisòn atrobe?” Asina ta, [ku] el a bis’é tokante haña e evangelio i kon el a kambié, i ku awor el a stòp di huma i usa droga i a plania pa wòrdu batisá.

Mi ta pensa esaki ta un ilustrashon tremendo di loke ta sosedé ora hende sinti Dios su amor mediante otronan. E ta suavisá kurasonnan i despues ta krea un deseo pa kompartí e don di amor ku otronan.

Awpr, awe nochi, nos a kuminsá papia tokante regalonan presioso dor di menshoná oro, sensia, i mira. Mi a chèk; bo por asta kumpra e regalonan aki riba Amazon. Pero nunka lo bo no haña e otro regalonan di kual nos a papia den ningun tienda. Nan ta regalonan balioso, i nan lo trese goso duradero i berdadero na tantu esun ku ta risibí i esun ku ta duna.

Asina ta, ku ora o pensa tokante kiko lo bo duna e Pasku aki, mi ta invitá boso pa:

1. Kompartí bo testimonio ku famia i esnan ku bo stima. Ora bo ta kompartí e regalo presioso aki, bo propio testimonio lo wòrdu fortalesé.

2. Pordoná un persona ku bo ta sinti a hasi malu ku bo òf a hasi bo doló Dunando e regalo aki, abo tambe lo sinti pas i sanashon.

3. Yuda otronan sinti e amor di Dios mediante abo. Si ta apropiá, bisa nan bo ta stima nan. Ora bo ta mira otronan manera Dios ta mira nan, bo amor pa nan lo krese, i abo tambe lo sinti e amor di Dios den bo bida.

Al final, mi ta deseá kada un di boso un temporada di Pasku yen di gran goso. Mi ta duna mi testimonio di Jesus e Cristo. E ta bibu. E ta nos Salbador, nos Redentor. E ta nos Abogado i Amigu. Mi ta ador’é. Mi ta stim’E. Pa motibu di Su don na kada un di nos, kumprá na un preis infinito, nos por kualifiká pa risibí e regalo di mas grandi di tur—kual ya bida eterno den presensia di nos Tata amoroso den Shelu.

Den e nòmber di Hesu Kristu, amèn.