Txhua Tus uas Ua Kom Muaj Kev Thaj Yeeb Tau Koob Hmoov

Ib zaug ntxiv, Thawj Pawg Thawj Tswj Hwm tau caw peb los koom ua ke ua koob tsheej txog lub caij Christmas. Txawm peb nyias muaj nyias tej kab lig kev cai nyob hauv nyias teb chaws, peb ua Vajtswv tsaug thiab peb tau koob hmoov vim peb koom siab koom ntsws teev tiam peb tus Cawm Seej Yexus Khetos thiab ua koob tsheej txog Nws txoj kev yug los ob txhiab xyoos tas los.

Qhov uas peb nyiam ua nyob hauv tsev neeg Bassett, ib yam li nej feem coob, yog kev ua yeeb yam txog Yexus txoj kev yug los. Peb nyeem tej zaj lus hauv phau Yaxayas, Lukas, Mathais, Nifais, thiab Maumoos, hu tej zaj nkauj Christmas thiab ua yeeb yam txog Maivliag, Yauxej, thiab tus me nyuam Yexus, es ua rau peb txais kev tshoov siab—tiam sis tsis yog txhua zaus.

Piv txwv hais tias, muaj ib zaug thaum Hmo Ua Ntej Christmas, peb cov me nyuam yaus uas ua yeeb yam txog ib pab yaj tau pib quaj nthe. Ua rau cov neeg yug yaj thiab cov tim tswv thiab tus me nyuam mos liab uas muab ntaub qhwv sawv daws quaj ib yam thiab. Xyoo tom qab ntawd, peb tsis tau muaj ib pab yaj. Tsis tau muaj leej twg xav ua cov yaj vim ntshai tsam yog cov yaj uas ua rau txhua tus quaj nrov nrov. Ib xyoo ntxiv, cov neeg yug yaj tej pas nrig yog cov ntaj ci ci, thiab ib xyoo tsis muaj leej twg xav ua cov Neeg Txawj Ntse los yog ib tug tim tswv, vim lawv xav hnav ris tsho ua ib tug dinosaur thiab tus ntse dolphin li tau hnav thaum lub caij Halloween. Lub sij hawm kuv nco ntsoov tshaj plaws yog thaum tus me nyuam mos liab tau poob los ntawm nws lub dab nyuj uas tau muab tsa siab lawm, ntshe nws yuav tsoo pob zeb hauv ntug cub. Kuv tau txais nws ib me pliag ua ntej, tsis tas hais tias yog kuv ua yuam kev ua ntej nws thiaj li tau poob li ntawd.

Hmo muaj hmoov zoo los? Txhua yam nyob kaj siab lug los? Ntshe peb txoj kev ua yeeb yam yuav hu ua “Kev Kub Ntxhov hauv lub Dab Nyuj.” Kuv yuav tsum lees hais tias, thaum txog lub caij Christmas, ua rau kuv pheej xav seb puas tsim nyog tsim ib txoj kab lig kev cai tshiab uas yeej yuav pab peb muaj kev thaj yeeb?

Kev thaj yeeb nyab xeeb—yog qhov uas peb txhua tus xav tau, tsis yog hauv lub caij Christmas xwb, peb xav tau tas mus li. Tiam sis nyob hauv lub ntiaj teb no, ntshe nyuaj rau peb nrhiav tau kev thaj yeeb nyab xeeb li ntawd. Thaum kuv kawm hauv phau Lus Qhuab Qhia thiab Kev Khi Lus xyoo no, kuv nco qab txog ib txoj kev tshwm sim uas piav txog peb hnub nyoog kawg no:

“Thiab nyob rau hnub ntawd … tag nrho ntiaj teb yuav ntxhov hnyo, thiab tib neeg lub siab yuav poob tag.”¹

Nyob hauv lub ntiaj teb uas ntxhov hnyo, peb yuav nrhiav kev thaj yeeb nyob qhov twg?

Thawj Tswj Hwm Russell M. Nelson tau hais tias:

“Yexus Khetos txoj moo zoo yeej yog qhov uas peb xav tau nyob hauv lub ntiaj teb uas ntxhov hnyo, sib cav sib ceg, thiab qaug zog no.

“Vajtswv cov me nyuam txhua leej txhua tus yeej tsim nyog muaj cib fim mloog thiab lees txais Yexus Khetos zaj xov uas txhiv lawv dim. Tsis muaj lwm zaj lus uas tseem ceeb tshaj rau peb txoj kev zoo siab—tam sim no thiab tas mus li.”²

Txoj kev muab txoj moo zoo txum tim rov qab los yeej yog zaj lus txog lub caij Christmas. Lub hnub qub uas tau ci ci kom coj cov neeg yug yaj rau tus me nyuam mos liab hauv lub dab nyuj yeej zoo li duab tshav ntuj uas nqis zuj zus mus txog Joseph—ob qhov kaj no tau muaj ua ntej tau tshaj tawm txog Yexus Khetos rau neeg ntiaj teb.

Yaxayas zaj lus rau neeg ntiaj teb yeej yog li no, “Vim ib tug me nyuam yuav yug los rau peb, yuav muab ib tug me tub rau peb; tej kev tswj hwm yuav nyob rau saum nws lub xub pwg; thiab nws lub npe yuav raug hu ua, tus Hwj Sawv Zoo, tus uas Taw kev, Vajtswv Tus uas Muaj Hwj Chim loj, Leej Txiv tus uas Kav Ib Txhis, tus Tub Vaj Ntxwv ntawm txoj kev Thaj Yeeb Nyab Xeeb.”³

Txwj Laug Quentin L. Cook qhia tias, “Ib lub npe ntawm tus Tswv thiab tus Cawm Seej, Yexus Khetos, yog ‘tus Tub Vaj Ntxwv ntawm Kev Thaj Yeeb’ [Yaxayas 9:6]. … Thaum kawg Nws lub nceeg vaj yuav muaj kev kaj siab lug thiab kev hlub.”⁴

Thaum peb nyeem cov lus nyob hauv phau Lukas xyoo no, kuv cia siab tias nej yuav xav txog cov lus “pab tim tswv ceeb tsheej coob coob [uas] hu nkauj qhuas Vajtswv” thaum lawv hais tias, “Thov kom Vajtswv tus uas nyob saum ntuj tau koob meej, thiab thov kom tib neeg tau zoo nyob kaj siab lug.”⁵ Kuv tau xav txog cov lus no thiab tej zaum tsim nyog uas peb xav tias qhov no hais tias “tam sim no muaj kev kaj siab lug hauv lub ntiaj teb lawm.” “Muaj kev thaj yeeb lawm!” tej zaum lawv hais li ntawd. Vim hmo ntawd nyob hauv qhov chaw yug tsiaj ntawd, “tus Vaj Ntxwv ntawm Kev Thaj Yeeb” twb tau los rau hauv lub ntiaj teb lawm.

Hnub Christmas ntawd yog thawj hnub uas cov tim tswv tau tshaj tawm tias kev thaj yeeb tau los lawm. Yav dhau los Yakhauj tau hais tias, “Peb [tau] paub txog Khetos, thiab peb tau muaj kev cia siab rau nws lub yeeb koob ntau pua xyoo ua ntej nws los; thiab tsis yog peb tus kheej xwb uas tau muaj kev cia siab rau nws lub yeeb koob, tiam sis tag nrho cov yaj saub dawb huv uas nyob ua ntej peb thiab.”⁶

Yaxayas tau hais txog peb lub caij nyoog thaum nws sau tias, “Tus uas txhais ko taw zoo nkauj kawg nyob rau saum tej roob yog tus uas coj tej moo zoo los; uas tshaj tawm kev thaj yeeb.”⁷

Yog li ntawd, cov neeg zoo nkauj zoo nraug uas tshaj tawm kev thaj yeeb yog leej twg? Tus Cawm Seej hais rau Nws cov thwj tim nyob hauv Kalilais thiab thaj av Huaj Vam hais tias “txhua tus uas ua kom muaj kev thaj yeeb tau koob hmoov, vim yuav hu lawv ua Vajtswv cov me nyuam.”⁸

Tsis tas li ntawd, Vaj Ntxwv Npeyamis qhia tias, “Thiab nim no, vim yog kev khi lus uas nej tau khi ces yuav muab nej hu ua Khetos cov me nyuam, nws cov tub, thiab nws cov ntxhais; vim saib seb, hnub no nws los ua nej leej txiv ntawm sab ntsuj plig; vim nej hais tias nej lub siab tau hloov los ntawm kev ntseeg nws lub npe; yog li ntawd, nej thiaj yug los ntawm nws thiab tau peem tsheej los ua nws cov tub thiab nws cov ntxhais.”⁹

Peb yog Yexus Khetos cov me nyuam khi lus, txhua tus yog Nws cov me nyuam. Cia li nco ntsoov tias, Nws tau hais tias cov uas ua kom muaj kev thaj yeeb los yuav hu lawv ua Vajtswv cov me nyuam. Yog li ntawd, peb—Vajtswv cov me nyuam—yeej yog cov uas ua kom muaj kev thaj yeeb. Nov yog peb tes hauj lwm khi lus. Peb yuav pab neeg ntiaj teb uas raug teeb meem thaum peb sim ua kom muaj kev thaj yeeb—nyob hauv tsev, hauv peb pawg ntseeg, peb zej zog, nyob thoob plaws lub ntiaj teb, los ntawm peb txoj kev ua siab zoo, peb tej hauj lwm zoo, thiab los ntawm peb tej lus—tim ntsej tim muag thiab nyob hauv koospistawj thiab. Thov kom peb yuav rau siab “tshaj tawm kev thaj yeeb” thaum peb ua tim khawv txog Nws, los ntawm tej yam peb hais thiab peb ua.

Los ntawm phau Lukas peb nyeem hais tias:

“Thaum cov tim tswv ncaim lawv rov qab mus rau saum ntuj ceeb tsheej lawm, cov yug yaj txawm sib tham hais tias, Peb cia li mus rau hauv lub nroog Npelehees thiab mus saib tej uas tus Tswv qhia rau peb lawm.

“Lawv ceev nrooj mus rau hauv lub nroog, lawv pom Malis thiab Yauxej, thiab pom tus me nyuam pw hauv ib lub dab zaub.

“Thaum cov yug yaj pom tus me nyuam lawm, lawv qhia zaj uas tus tim tswv ceeb tsheej qhia rau lawv hais txog tus me nyuam ntawd rau Maivliag thiab Yauxej mloog.”¹⁰

Ib yam li ntawd thov kom “peb cia li mus” thiab “qhia zaj … txog tus me nyuam ntawd” uas yog ib zaj txog kev thaj yeeb. Zaj no cov yog zaj uas peb cov tub txib qhia cov uas peb hlub thiab cov phoj ywg; nov yog zaj uas cov tub txib pab yuav hais thaum lawv ua hauj lwm pab lwm tus zoo li tus Cawm Seej. Nov yog zaj uas peb tshaj tawm thaum peb hlub, qhia, thiab caw lwm tus los txais kev cia siab thiab kev kaj siab lug los ntawm Yexus Khetos txoj moo zoo.

Yog li ntawd hais txog tsev neeg Bassett txoj kev ua yeeb yam uas ua rau peb ntxhov siab txhua lub caij Christmas—vim li cas peb yuav ua raws li kab lig kev cai no kom cov me nyuam thiab cov me nyuam xeeb ntxwv ua yeeb yam txog hmo zoo nkauj tshaj, thaum cov tim tswv tau los hais txog txoj moo zoo uas ua rau tib neeg muaj kev zoo siab tshaj.

Cov lus teb yeej yooj yim thiab ua rau peb zoo siab kawg: “Peb hais txog Khetos, peb xyiv fab rau Khetos, peb qhia txog Khetos, peb qhia tej yuav muaj los yav tom ntej txog Khetos, thiab peb sau raws li peb tej lus qhia tej yuav muaj los yav tom ntej, xwv kom peb cov me nyuam yuav paub cia siab rau lub hauv paus twg kom txais kev zam txim rau lawv tej kev txhaum.”¹¹

Peb yeej pom tias txhua yam hauv lub ntiaj teb ntxhov hnyo thiab tib neeg poob siab nthab. Tiam sis, txawm yog muaj teeb meem li no, peb raug kev tawm tsam, thiab thaum muaj kev ntxhov hnyo, thov kom peb tshaj tawm txog kev thaj yeeb, lub caij no thiab txhua lub sij hawm, thaum peb npaj txhua tus neeg lub siab rau lub sij hawm uas tus Vaj Ntxwv ntawm Kev Thaj Yeeb yuav los, tus uas yog tus Tswv, tus Cawm Seej, thiab tus Txhiv Dim, Yexus Khetos. Rov qab hais Thawj Tswj Hwm Nelson tej lus hais tias, “Vajtswv cov me nyuam txhua leej txhua tus yeej tsim nyog muaj cib fim mloog thiab lees txais Yexus Khetos zaj xov uas txhiv lawv dim.”

Thov kom peb yuav tshaj tawm txog kev thaj yeeb thaum peb ua koob tsheej txog peb tus Cawm Seej txoj kev yug los, lub neej, thiab ntiag tug hauj lwm hauv lub caij Christmas no thiab tas mus li, kuv thov kom muaj li no los ntawm Yexus Khetos lub npe, amees.