Tej Txiaj Ntsim uas Neeg Tsis Tshua Pom Tau

Thaum kuv yog ib tug ntxhais hluas, qhov kuv nyiam tshaj plaws txog lub caij Christmas yog thaum kuv pog thiab yawg Lundgren tuaj. Txhua xyoo nkawd yuav tsav ib lub tsheb qub ntev heev kom tuaj xyuas peb. Peb hlub nkawd, thiab peb nyiam kuv pog tej ncuav Swedish—nws siv kua mis nyuj qaub uas nws yuav los ntawm ib tug neeg ua liaj teb nyob hauv nws lub zos. Nws tau ua cov ncuav no ob peb teev mus txog thaum peb noj tsis taus ntxiv li lawm. Nim no ob tiam xeeb ntxwv ntxiv tau loj hlob tuaj nyiam noj cov ncuav Swedish no. Thiab txhua zaus peb ua, peb nco txog Pog Lundgren thiab nws lub txiaj ntsim los ntawm kev hlub.

Tej txiaj ntsim zoo tshaj plaws yog tej txiaj ntsim los ntawm peb lub sij hawm thiab peb tej txuj ci. Kuv ntseeg tias tej txiaj ntsim no dawb huv.

Nov yog ib lub caij thaum peb tos ntsoov txais tej khoom plig tshiab. Tiam sis, hmo no xav kom nej nco txog tej khoom plig uas nej twb tau txais lawm—thiab leej twg tau muab tej ntawd rau nej thiab vim li cas lawv muab rau nej.

Vajtswv tau muab tej lub txiaj ntsim rau peb txhua tus. Tej zaum nej yuav xav tias nej tsis tau txais, tiam sis nej muaj tej lub txiaj ntsim ntawm sab ntsuj plig uas Vajtswv tau pub rau nej kom foom koob hmoov rau lwm tus thiab kom paub Nws zoo dua.¹

Tus Cawm Seej tau muab tej lub txiaj ntsim twg rau nej?

Kuv hais ncaj hais tias, kuv yeej ib txwm tsis tau saib kuv tus kheej tias kuv txawj ua dab tsi. Kuv tsis txawj hu nkauj, seev cev, ntaus pob, kos duab, los sis ua lej, uas nim no … zoo li kuv yeej tsis muaj ib qho tshwj xeeb li.

Tej lub sij hawm kuv tau saib lwm tus tej lub txiaj ntsim zoo ua rau kuv xav tias kuv tsis muaj dab tsi. Tiam sis kuv tab tom kawm tias tej kev piv rau lwm tus li no yeej tsis muaj nqis dab tsi. Qhov tseem ceeeb, kuv tau kawm kom pom lub hwj chim dawb ceev ntawm Vajtswv “tej txiaj ntsim uas neeg tsis tshua pom tau” thiab zoo siab vim tej txiaj ntsim no qhia txog Nws txoj kev hlub thiab txoj kev ntseeg peb.

Txwj Laug Marvin J. Ashton qhia tias Vajtswv tej lub txiaj ntsim ntawm sab ntsuj plig kuj muaj tej uas “neeg tsis tshua pom tau,” xws li “lub txiaj ntsim thov; lub txiaj ntsim mloog; lub txiaj ntsim hnov tau thiab siv lub suab yau yau; lub txiaj ntsim txawj los kua muag; lub txiaj ntsim kom txhob sib cav; lub txiaj ntsim pom zoo; … lub txiaj ntsim nrhiav tej yam uas ncaj ncees; lub txiaj ntsim kom txhob txiav txim rau lwm tus; lub txiaj ntsim tos Vajtswv coj kev; lub txiaj ntsim ua ib tug thwj tim; lub txiaj ntsim saib xyuas lwm tus; lub txiaj ntsim xav ntsoov; lub txiaj ntsim thov Vajtswv.”²

Tej no puas pab nej pom tau nej tej lub txiaj ntsim? Yeej pab kuv heev.

Tej txiaj ntsim zoo no yeej txhawb nqa Vajtswv cov me nyuam npaum li lwm lub txiaj ntsim uas peb paub zoo txog lawm³—tej lub txiaj ntsim uas pab peb ua raws li tej lub hom phiaj tseem ceeb tshaj plaws hauv lub neej no. Tiam sis, tu siab heev, vim tej lub sij hawm peb saib peb tej txiaj ntsim tsis rau nqi, vim peb ntshai tias tej txiaj ntsim ntawd tsis zoo tag nrho, los sis xav tias tsis zoo npaum li peb nyiam.

Thaum peb tsis saib tej txiaj ntsim uas neeg tsis tshua pom tau no rau nqi, peb xiam tej lub cib fim thaum peb muaj peev xwm txhawb nqa Vajtswv cov me nyuam thiab hnov Nws txoj kev hlub.⁴

Cia kuv hais txog lwm lub txiaj ntsim—los ntawm kuv Yawg Lundgren. Yawg yeej xav kawm qoj xem xauv. Tiam sis, lub xem xau no twb nyob hauv nws lub txee thiab kuv li los hmoov av tau ntau xyoo—cov xov no tsis tau ua suab nkauj hlo li.

Muab qhov no piv rau kuv tus ntxhais xeeb ntxwv uas muaj rau xyoo, Scarlett. Nws muab ib lub txiaj ntsim uas nws xav pub rau peb hmo no.

[Scarlett qoj xem xau]

Ua tsaug, Scarlett. Koj qoj nkauj zoo kawg. Kuv hlub koj.

Tej txiaj ntsim uas Leej Txiv Saum Ntuj Ceeb Tsheej tau foom pub rau peb los Nws xav kom peb siv rau lwm tus. Scarlett lub xem xau tsis kim, thiab ib tug uas tau kawm qoj xem xau yuav paub thaum twg nws ua yuam kev, tiam sis vim nws rau siab heev nws thiaj li tau siv nws lub txiaj ntsim kom lwm tus muaj kev xyiv fab.

Cia li siv thiab saib tej lub txiaj ntsim uas Nws foom pub rau nej rau nqi, tsis hais tej uas neeg tsis tshua pom tau. Muab tej lub txiaj ntsim uas Nws tau foom pub rau nej nqa los ntawm lub txee los. Yog tias nej tau muab ceev cia vim nej tsis ntseeg nej tus kheej, cia li so hmoov av thiab sim ua seb. Muab tej lub txiaj ntsim ntawd rau Vajtswv thiab Nws cov me nyuam. Tej txiaj ntsim uas Leej Txiv Saum Ntuj Ceeb Tsheej tau muab rau peb los Nws xav kom peb siv pab lwm tus. Tag nrho tej txiaj ntsim uas Vajtswv foom pub rau nej ua rau neeg muaj kev xyiv fab thiab, thaum twg nej muab rau Vajtswv, ces yeej zoo nkaus li nej hu ib zaj nkauj qhuas Vajtswv.

Siv koj lub txiaj ntsim mloog lwm tus thiab mus xyuas ib tug phooj ywg uas kho siab. Koj puas muaj lub txiaj ntsim nplij neeg lub siab kom txhob sib cav sib ceg? Peb yeej xav tau tej lub txiaj ntsim ntawd. Siv tej no nrog nej tsev neeg, phooj ywg, thiab neeg zej zog. Qhia ib tug neeg uas ua loj leeb tias nej hlub nws, thiab caw nws los noj mov nrog nej. Qhia ib zaj lus qhia zoo. Sau ib tsab ntawv hais lus siab zoo. Siv nej lub txiaj ntsim kom ncav tes txhim tsa Xi-oos thiab txhawb nqa lwm tus neeg nyob ib puag ncig nej. Vajtswv xav tau txhua yam lub txiaj ntsim. Nws tau muab tag nrho tej lub txiaj ntsim no kom txhawb nqa Nws cov me nyuam. Cia li hu nkauj rau lawv mloog, puag khawm lwm tus, thiab pub kev zam txim rau lwm tus.

Thaum lub caij Christmas nyob rau xyoo 1832, cov Haiv Neeg Ntseeg raug kev kub ntxhov nyob hauv tseem fwv thiab cov pej xeem. Tus Yaj Saub Joseph Smith tau qhia tias thaum yav tom ntej yuav muaj kev tsov rog hauv lub teb chaws.⁵ Qhov no tsis yog ib qho zoo siab.

Tiam sis thaum lub Kaum Ob Hlis Ntuj 27, Joseph tau txais ib txoj kev tshwm sim ntxiv—tus Tswv “tsab xov kaj siab.”⁶ Nyob hauv lub sij hawm nyuaj no, tus Tswv tau qhia Joseph kom nco txog tej lub txiaj ntsim uas Nws tau muab rau Nws Haiv Neeg Ntseeg—qhov tseem ceeb yog lub txiaj ntsim tus Cawm Seej Yexus Khetos thiab kev cia siab tias yuav muaj txoj sia nyob mus ib txhis.

Kev xyiv fab hauv lub caij Christmas ntawd yog kev txais Vajtswv tej txiaj ntsim; qhov tseem ceeb yog “lub txiaj ntsim zoo tshaj plaws”⁷ uas yog tus Cawm Seej. Qhov no kuj tseem ceeb hauv lub caij Christmas no.

Nyov hauv kev tshwm sim uas Joseph txais, tus Tswv tau nug nws li no hais tias:

“Yog tias muab ib lub txiaj ntsim rau ib tug neeg, tiam sis nws tsis kam txais lub txiaj ntsim ntawd, ces yuav muaj nqi dab tsi rau nws? Saib seb, nws tsis zoo siab rau qhov uas tau muab rau nws, yeej tsis zoo siab rau tus uas tau muab lub txiaj ntsim ntawd rau nws.”⁸

Kuv cia siab tias peb txhua tus yuav pom thiab txais tej txiaj ntsim uas Vajtswv tau foom pub rau peb—tiam sis qhov tseem ceeb kuv cia siab tias peb txhua tus yuav zoo siab qhuas Vajtswv, tus uas foom pub txhua lub txiaj ntsim.

Kuv ua Vajtswv tsaug vim Nws muab Nws Leej Tub ua lub txiaj ntsim rau peb—ib Leej Tub uas tau yug los hauv lub ntiaj teb no ua ib tug me nyuam mos liab, uas nws leej niam muab qhwv ntaub thiab tso hauv ib lub dab nyuj. Ib tug me nyuam mos liab uas yuav kawm ib nqe lus ntxiv rau ib nqe lus mus txog thaum Nws yuav txo Nws txoj sia kom them nqi rau kuv tej kev txhaum. Rau nej tej kev txhaum. Rau tag nrho cov neeg uas nyob hauv lub ntiaj teb no tej kev txhaum thiab.

Peb yeej ib txwm hu zaj nkauj no:

“Ntiaj teb zoo siab, tus Tswv tau los; Cia li txais tus Vaj Ntxwv!”⁹

Lub txiaj ntsim uas yog Yexus Khetos los Vajtswv tau muab rau peb lawm! Tiam sis yuav tsum nug hais tias, peb puas kam txais Nws? Peb puas yuav cia Nws los thiab cia Nws kov yeej peb tej teeb meem? Peb yuav ua li cas?

Kuv ua tim khawv tias kev txais peb tus Vaj Ntxwv thiab Nws tej Txiaj ntsim yuav ua rau peb muaj kev xyiv fab—kev xyiv fab rau lub ntiaj teb thiab kev xyiv fab hauv lub ntiaj teb.

“Ua Vajtswv tsaug, rau qhov Vajtswv twb pub Vajtswv txoj koob hmoov uas muaj nqis kawg nkaus”¹⁰ uas yog Nws Leej Tub rau peb, los ntawm Yexus Khetos lub npe dawb huv, amees.