Divine Gifts
Los ntawm Thawj Tswj Hwm Russell M. Nelson
Kaum Ob Hlis Ntuj 6, 2020
Kuv cov kwv tij thiab cov muam, nov yog ib hmo zoo kawg nkaus. Cov nkauj thiab cov lus los twb txhawb nqa peb lub siab lub ntsws. Muam Craven tau hais txog tej kev puag saum ntuj thiab tej daim pam uas nplij siab. Txwj Laug Nielson tau tshoov peb lub siab thaum nws hais txog nws txiv lub neej, thaum nws ua tub rog nws tsis tau muaj Christmas tau peb xyoos lawm. Txwj Laug Holland tauqhia peb txog tus Cawm Seej ntawm lub ntiaj teb lub neej.
Thov cia kuv ua nej tsaug vim nej tau ua raws li kuv caw nej kom xa kev ua tsaug nyob hauv social media rau peb tej koob hmoov ntau heev. Neeg coob tau ua li ntawd. Thiab kuv ua nej tsaug vim nej tseem thov peb Leej Txiv Saum Ntuj Ceeb Tsheej txhua hnub, ua Nws tsaug rau Nws txoj kev pov hwm, kev tshoov siab, kev coj, thiab qhov tseem ceeb tshaj plaws rau lub txiaj ntsim uas yog Nws Tib Leeg Tub, Yexus Khetos.
Christmas ua rau peb nco txog tej yam zoo kawg. Ib xyoo tas los, Wendy thiab kuv wb muaj cib fim ua koob tsheej txog lub caij Christmas no nrog rau ib tug me nyuam ntxhais, Claire Crosby, uas hu ib zaj nkauj Christmas. Thov cia kuv tshaj tawm ib feem ntawm qhov uas tau muab kaw rau “Ci rau lub Ntiaj Teb.”1
Ib yam li Txwj Laug Holland qhia peb, muaj tseeb tiag, hmo puag thaum ub ntawd yog ib hmo uas dawb huv vim tus uas yug los twb tau qhia ua ntej tias yuav muab kev kaj siab lug rau neeg ntiaj teb thiab ua rau txhua tus neeg xav ua zoo.2 Yexus Khetos yug los kom foom koob hmoov rau txhua tus neeg tsis hais yav tas los, tam sim no, thiab yav tom ntej,
Thaum peb hu zaj nkauj “Hmo Muaj Hmoov Zoo,” hais txog tus Me Nyuam Mos Liab txoj sia los tsis tau pib nyob hauv Npelehees, thiab tsis tau kawg nyob hauv Khaulakhauthas. Nyob hauv lub ntuj ua ntej lub neej no, Leej Txiv tau tsa Yexus los ua tus Mexiyas, tus khetos, tus Cawm Seej thiab tus Txhiv Dim ntawm noob neej tag nrho. Leej Txiv tau tsa Nws ua ntej los theej peb txhoj. Nws tau raug mob rau peb tej kev txhaum thiab doog ntshav rau peb tej kev tsis ncaj ncees.3 Nws tau los kom peb sawv daws tsis txawj tuag tiag thiab muaj cib fim txais tau txoj sia nyob mus ib txhis.4
Qhov no txhais hais tais peb txhua leej txhua tus yuav sawv rov los—tsis hais cov uas nej hlub uas tas tau sim neej no nyob hauv xyoo ntxhov siab no, thiab cov uas nyob sab tim ub ntawm daim ntaub thaiv. Qhov no txhais hais tias peb txhua tus muaj peev xwm vam meej. Qhov no txhais tias peb vam rau tej yam zoo dua yav tom ntej.
Nej puas tau xav yog vim li cas tus Tswv tau xaiv yug los hauv qhov chaw ntawd? Nws yug qhov twg los tau. Tiam sis nws tau xaiv thaj av uas Nws tau ua kom dawb huv.
Yexus yug los nyob hauv Npelehees. Lus Henplais, bet lehelm, txhais tias, “lub tsev mov mog.” Yeej tsim nyog uas Nws, “cov mov uas cawm neeg txoj sia,”5 yuav los ntawm “lub tsev mov mog.”
Nws txoj kev yug los nyob hauv ib qho chaw tsis tseem ceeb nrog rau cov tsiaj. Nyob ntawd “Vajtswv tus Me Nyuam Yaj”6 yug los hauv ib lub caij Hla Dhau nrog rau cov tsiaj uas neeg tab tom npaj muab txi. Thiab thaum yav tom ntej, “lawv yuav coj nws mus ib yam li tus me nyuam yaj uas luag cab mus tua.”7 Nws yog tus Me Nyuam Yaj thiab tus Tswv Yug Yaj.
Lub sij hawm uas tus “tswv yug yaj zoo”8 yug los, cov neeg yug yaj yog thawj cov neeg uas tau txais kev tshaj tawm txog Nws txoj kev yug los.9
Thaum tus uas yog “lub hnub qub uas ci ci thaum yuav kaj ntug”10 yug los, muaj ib lub hnub qub tshwm los saum ntuj.11
Thaum tus uas hais tias Nws yog “txoj kev kaj rau neeg ntiaj teb”12 yug los,kev tsaus ntuj tau ploj mus thoob lub ntiaj teb ua ib lub cim txog Nws txoj kev yug los.13
Yexua tau ua kev cai raus dej hauv cov dej ntshiab uas qis tshaj hauv lub ntiaj teb, ua ib lub cim txog qhov uas nws yuav qis mus rau qhov chaw twg los cawm peb, thiab nws yuav sawv los nyob siab tshaj txhua yam—los cawm peb thiab.14 Los ntawm nws tus yam ntxwv, Nws tau qhia peb tias, peb kuj kov yeej peb tej teeb meem txhua yam thiab—peb tej kev tu siab, kev qaug zog, thiab kev txhawj xeeb—los ua neeg muaj yeeb koob li Vajtswv. Tag nrho tej no yog muaj los ntawm Nws txoj kev hlub tshua thiab txoj kev tshav ntuj.
Nyob hauv cov roob moj sab qhua, tus Cawm Seej tau qhia tej zaj lus rau cov neeg uas paub tias yuav zoo li cas thaum yus nqhis dej.
Yexus qhia tus poj niam nyob ntawm lub qhov dej hais tias:
“Txhua tus uas haus cov dej hauv lub qhov tshij no tseem yuav rov nqhis dua:
“Tiam sis tus uas haus cov dej uas kuv muab rau nws yuav tsis nqhis ib zaug li lawm. cov dej uas kuv muab rau nws yuav txhawv hauv nws lub siab thiab cawm nws txoj sia mus ib txhis.”15
Nqe vaj lug kub no ua rau kuv nco txog ib lub sij hawm nrog Txwj Laug Mark E. Petersen.16 Nws yog ib tug mej zeej hauv Pawg Kaum Ob tug Thwj Tim, thiab ua ntej tau hu kuv rau pawg ntawd, kuv tau muaj cib fim nrog nws mus rau Thaj Av Dawb Huv, uas yog qhov chaw kawg nws tau mus nyob hauv lub neej no.
Txwj Laug Petersen raug mob heev vim nws muaj cancer. Muaj ib hmo ntev uas mob mob nws heev, kuv sim nplij nws lub siab. Kuv pom tias nws tsuas noj thiab haus ib me ntsis xwb. Hnub tom ntawd nws yuav tsum hais ib zaj lus loj heev.
Thaum sawv ntxov ces Txwj Laug Petersen tau mus rau tim ntug Dej Kalilais sab qaum teb, es nyob ntawd ib pawg loj loj tos nws hais lus. Nws xaiv qhia los ntawm tus Cawm Seej Zaj Lus Qhia Nyob Pem Roob. Thaum Txwj Laug Petersen hais cov lus, “Lawv cov uas tshaib thiab nqhis txoj kev ncaj ncees tau koob hmoov,”17 nws los kua muag. Nws tsis saib nws daim ntawv, nws saib cov neeg, thiab nug hais tias, “Nej puas paub tias kev tshaib thiab kev nqhis zoo li cas tiag?” Kuv paub tias nws twb paub tiag. Ces nws qhia hais tias, “Thaum nej tshaib thiab nqhis txoj kev ncaj ncees, ces nej yeej yuav muaj peev xwm los ua neeg zoo li Yexus Khetos.” Txwj Laug Petersen yog ib tug uas ua yam ntxwv txog qhov ntawd. Tsis ntev tom qab ntawd, nws tau tas sim neej no.18
Thaum kuv xav txog kev tshaib thiab kev nqhis txoj kev ncaj ncees, kuv xav txog tus Thwj Tim zoo no uas nyob hauv nws zaj lus kawg tau qhia txog kev nrhiav tus Tswv Yexus Khetos tiag tiag, kev tshaib thiab kev nqhis txoj kev ncaj ncees, los ua neeg zoo li tus Cawm Seej.
Xyoo no, kuv tus poj niam thiab kuv wb tau pib ua hauj lwm yuav tej khoom qhia tias wb hlub wb tsev neeg. Thaum lub Kaum Ib Hlis Ntuj, Wendy hais tias wb npaj rau Christmas tas lawm. Kuv teb hais tias, “Auj, yeej zoo! Nim no peb yuav tsom ntsoov rau tus Cawm Seej.”
Nyob hauv xyoo no uas tsis zoo li lub xyoo twg, thaum txhua tus neeg raug tej yam xwm ntawm phaum mob thoob ntiaj teb, tsis muaj ib yam dab tsi tseem ceeb tshaj hauv lub caij Christmas tsuas yog kev tsom ntsoov rau tus Cawm Seej thiab lub txiaj ntsim uas yog Nws txoj sia.
Peb Leej Txiv Saum Ntuj Ceeb Tsheej “hlub neeg ntiaj teb kawg li, nws thiaj txib nws tib Leeg Tub los rau hauv ntiaj teb. Tus uas ntseeg nws Leej Tub, tus ntawd yuav tsis tuag, tiam sis yuav tau txoj sia ntev dhawv mus ib txhis.”19
Vajtswv Leej Tub tau cog lus rau peb tias “tus uas muaj sia nyob thiab ntseeg kuv, tus ntawd yuav tsis tuag ib zaug li.” 20 Yog tej txiaj tsim los ntawm Leej Txiv thiab Leej Tub uas tsis muaj dab tsi piv txog!
Kuv ua Vajtswv tsaug rau lub txiaj ntsim uas yog Nws Tib Leeg Tub. Thiab kuv ua peb tus Tswv Yexus Khetos tsaug rau Nws txoj kev txi thiab ntiag tug hauj lwm. Thaum zaus thib ib Nws tau los, Yexus tau los yuav luag ntsiag to xwb. Tiam sis thaum Nws Los Zaum Ob, tus Tswv lub yeeb koob “ci ntsa iab nthuav qhia rau neeg txhua tus pom.”21 Ces Nws yuav los kav ua “tus Vaj Ntxwv ntawm cov Vaj Ntxwv thiab tus Tswv rau cov Tswv.”22
Vim kuv yog tus tub qhe ntawm tus Cawm Seej, kuv xav foom koob hmoov rau nej txhua tus, kuv cov kwv tij thiab cov muam. Thov kom nej thiab nej tsev neeg nyob kaj siab lug, txawj mloog tus Tswv lub suab, thiab haj yam txais kev tshwm sim kom txawj paub tias peb Leej Txiv thiab Nws Leej Tub hlub nej, saib xyuas nej, thiab coj nej kev tag nrho cov uas nrhiav Nkawd. Kuv muab kuv cov lus koom nrog Maulaunais cov lus thiab “xav kom nej nrhiav tus Yexus no, tus uas cov yaj saub thiab cov tim thawj tau sau txog, xwv kom Vajtswv uas yog Leej Txiv, thiab tus Tswv Yexus Khetos, thiab tus Vaj Ntsuj Plig Dawb Huv, … lawv txoj kev tshav ntuj yuav muaj nyob hauv nej mus ib txhis.”23 Kuv thov li no, los ntawm Yexus Khetos lub npe, amees.