12CRAVEN-1
Thawj Pawg Thawj Tswj Hwm Kev Sib Ntsib Hawm Vajtswv hauv lub Caij Christmas
Kaum Ob Hlis Ntuj 6, 2020
Kev Qhwv thiab Kev Puag Los Saum Ntuj Los
Los ntawm Muam Becky Craven
Pab Cuam thib Ob hauv Koom Haum Ntxhais Hluas Pawg Tuam Thawj Tswj Hwm
Ib lub sij hawm uas kuv nyiam nco txog lub caij Christmas yog thaum kuv muaj rau xyoo. Yog Hmo Ua Ntej Christmas, thiab kuv pw tsaug zog hauv lub txaj tshooj sab saud nrog rau kuv tus niam hluas nyob hauv Berlin, Yelemes Teb. Kuv zoo siab heev tos ntsoov Christmas sawv ntxov—ntshe kuv pw tsis tsaug zog, vim kuv tsim los thaum kuv hnov tej tswb nrov. Ces kuv hnov wb lub qhov rooj maj mam qhib. Thiab thaum duab ci los ntawm chav sab nraud los txog kuv lub ntsej muag, kuv txawm sawv thiab ntsia lub qhov rooj. Qhov kuv pom los ua rau kuv ntseeg tsis taus. Nyob rau ntawm chaw nkag hauv chav tsev yog Santa Claus. Kuv tsis dag—yog nws tiag! Nws hais tias, “Hauj, hauj, hauj,” ces nws nug seb kuv puas xav lawv nws qab mus rau hauv chav nyob pom tsob ntoo Christmas uas muaj teeb ci ci lawm. Kuv yeej xav tsis thoob kuv thiaj tsis paub hais lus, tiam sis kuv nqis tus ntaiv thiab lawv nws qab mus rau chav nyob es nyob ntawd kuv niam thiab kuv tus nus hlob nyob rau ntawm tus ntoo. Tiam sis thaum kuv saib hauv chav nyob ntawd, kuv tsis pom kuv txiv—ua cas nws ho tsis nyob? Niam hais tias nws nqa khib nyiab pov tseg, tiam sis xyov ua cas nws siv sij hawm ntev ua luaj! Txog hnub no kuv tu siab uas nws tsis tau ntsib Santa Claus. Santa nug seb kuv puas ua ib tug ntxhais zoo, thiab kuv zoo siab qhia nws tias kuv tau ua zoo. Tom qab nws noj khoom qab zib thiab haus mis nyuj uas wb muab rau nws noj, kuv rov qab pw hauv txaj, thiab ob peb teev tom qab ntawd, tsim los thaum Christmas sawv ntxov.
Kuv tus txiv yawm txiv, Heaton Lunt, twb muaj ib hnub Christmas txawv heev thaum nws yog tub hluas nyob hauv tej chaw nyob hauv Mev Teb nyob rau tej xyoo 1800. Nws hais dab neeg no nyob hauv nws zaj keeb kwm: “Twb txog Christmas lawm, thiab peb muaj cov yaj nyob hauv nkuaj hauv tsev rau tsiaj, vim los daus lawm thiab nyob ntawd sov sov. Hnub Christmas kuv tau sawv thaum ntxov mus saib kuv cov yaj puas zoo. Kuv hnov ib lub suab quaj tsis tshua nrov nyob hauv lub nkuaj. Kuv mus haud thiab pom tias Nelly muaj ob tug me nyuam yaj lawm—me nyuam ntxaib. Kuv twb khiav rov qab mus tsev … [thiab] kuv npuaj tues thiab hais rau kuv niam, ‘Qhov kuv tau hnub Christmas no yeej zoo tshaj qhov nej tau: Laus Nelly yug ob tug me nyuam yaj.’ Tag nrho cov me nyuam tau tso lawv tej txiv kab ntxwv thiab tej khoom rau ntawm lub rooj, thiab lawv khiav mus rau lub tsev rau tsiaj pom ob tug me nyuam yaj uas Nelly muaj. Yog qhov zoo tshaj plaws uas peb tau nyob hauv txhua lub caij Christmas.”1 Xav tsis thoob uas tej xyoo tom qab ntawd, Heaton tus yaj no tau yug me nyuam yaj tshiab thaum hnub Christmas.
Thaum kuv xub hnov zaj dab neeg no, ua rau kuv xav txog ib tug Me Nyuam Yaj uas yug los thaum txog thawj hnub Christmas: Yexus Khetos, Vajtswv tus Me Nyuam Yaj. Ib yam li Heaton khiav mus saib nws ob tug me nyuam yaj tshiab, kuv xav tias cov neeg yug yaj tau khiav mus saib Vajtswv Leej Tub uas nyuam qhuav yug los. Nej puas muaj peev xwm xav txog tej uas lawv tau pom nyob hauv qhov chaw dawb ceev ntawd? Kuv xav txog Yauxej txoj kev saib xyuas nws tus poj niam, Maivliag, thaum nkawd xav txog tus Mexiyas txoj kev yug los. Zaj lus uas hais txog Maivliag txoj kev muab khaub ncaws qhwv nws tus me nyuam mos liab yeej yog ib zaj lus uas kuv nyiam tshaj.
Tsis ntev tas los kuv tsev neeg tau ib tug ntxhais xeeb ntxwv tshiab. Muaj ib hnub kuv pom thaum nws niam muab khaub ncaws qhwv nws, thiab puag nkaus nws. Kev qhwv txhais tias yus muab ntaub qhwv ib tug me nyuam. Nyob txhua lub caij nyoog tib neeg tau muab khaub ncaws thiab tej daim pam qhwv ib tug me nyuam uas txhov pob kom pab nplij nws lub siab. Thaum kuv pom kuv tus tub tus poj niam muab khaub ncaws qhwv nws tus me nyuam, ua rau kuv xav txog lwm tus uas xav tau dab tsi nplij lawv lub siab. Ib lo lus siab zoo, kev mloog lwm tus los sis kev muaj siab to taub yuav nplij tus neeg uas ntxhov siab heev.
Yuav luag peb xyoos tas los, kuv tus ntxhais tus txiv raug xwm txheej mob heev. Xwv kom paub yuav kho li cas, nws ua tej kev ntsuam xyuas thiab tej txheej txheem uas ua rau cov kws kho mob paub tias yuav tsum phais lub plawv. Thaum tab tom phais wb tus vauv lub plawv, wb tus ntxhais xa ib nqe lus rau nws neej tsa qhia tias nkawd tus tub zoo li cas. Nyob hauv lwm lub teb chaws vim nkawd ua tub txib, nws niam pog tau hais tej lus nplij siab no: “Xa kev puag saum ntuj rau koj.”
Tom qab ib me ntsis, ib tug kws tu mob taug kev mus dhau nws, ces tus kws tu mob nres. Nws pom wb tus ntxhais txoj kev los kua muag thiab nug seb nws puas xav ib daim pam, tiam sis wb tus ntxhais hais tias tsis ua li cas. Tus kws tu mob mus tiam sis thaum ib me pliag nws rov qab los nqa ib daim pam sov sov. Nws muab wb tus ntxhais vov pam thiab hais rau nws tias, “Kuv xav tias koj xav tau kev puag saum ntuj.”
Vajtswv tus Me Nyuam Yaj, uas hu ua tus Tswv Yug Yaj Zoo, paub txhua tus nyob hauv Nws pab yaj. Thaum twg peb xav tau, Nws txib cov tim tswv los rau peb, xws li tus kws tu mob pab wb tus ntxhais, kom muab txoj kev hlub qhwv peb thiab vov peb.2 Nws tau los rau hauv lub ntiaj teb kom coj kev kaj siab thiab kev ua zoo rau txhua tus neeg.3 Nws nplij cov uas xav tau kev nplij siab thiab nyuaj siab nrog cov uas nyuaj siab.4
Thaum kuv xav txog tus Tswv txoj kev hlub thiab saib xyuas peb, kuv xav ua ntxiv kom qhia lwm tus txog txoj kev hlub ntawd. Kuv kuj xav txawj to taub tej kev puag saum ntuj uas kuv tau txais tiam sis kuv tsis tau lees txais.
Nyob hauv ib lub ntiaj teb uas xav tau kev thaj yeeb, peb tej lus mos muag thiab peb tej kev ua siab zoo yuav pab lwm tus zoo li yus muab lawv qhwv hauv ib daim pam sov so. Kuv tau kawm hais tias thaum peb yim ua raws li peb tej kev tshoov siab kom pab lwm tus, tus Tswv yim muab lub ntuj tej daim pam rau peb faib rau lwm tus. Nej tau txais tej kev tshoov siab twg? Nej paub leej twg uas xav tau kev puag saum ntuj? Qhov uas peb ncav tes pab lwm tus tej zaum yuav txhawb nqa ib tug uas peb hlub, los sis ib tug uas peb tsis paub.
Kuv thov hais tias thaum peb ua koob tsheej txog peb tus Cawm Seej txoj kev yug los ces peb yuav paub txog Nws txoj kev hlub thiab txoj kev kaj siab lug, thiab peb yuav muab cov koob hmoov ntawd faib rau lwm tus. Thaum kuv xav txog lub txiaj ntsim uas yog Vajtswv tus Me Nyuam Yaj, tus me nyuam uas muab ntaub qhwv thiab tso pw hauv lub dab nyuj, kuv xav txog Heaton cov lus. Nws yog “qhov zoo tshaj txhua yam uas peb yeej ib txwm tau [los sis yeej yuav tau] nyob rau hnub Christmas.”5
Los ntawm Yexus Khetos lub npe, amees.