Txoj Moo Zoo ntawm Kev Thaj Yeeb
Hauv lub caij Christmas no, tag nrho cov neeg ntseeg Khetos ua koob tsheej txog Yexus Khetos txoj kev yug los, “tus Tub Vaj Ntxwv ntawm Kev Thaj Yeeb.” Peb yeej xyiv fab vim tus tim tswv tau tshaj tawm txog Nws txoj kev yug los:
“Hnub no nej tus Cawm Seej twb yug los rau hauv Daviv lub nroog lawm, nws yog Khetos uas yog tus Tswv. …
“Tam sim ntawd muaj ib pab tim tswv ceeb tsheej coob coob los nrog tus tim tswv ntawd hu nkauj qhuas Vajtswv li no,
“Thov kom Vajtswv tus uas nyob saum ntuj ceeb tsheej tau koob meej, thiab thov kom cov neeg uas nyob hauv ntiaj teb txhua tus uas ua haum Vajtswv siab tau zoo nyob kaj siab lug!”1
Ib yam uas qhia zoo tias cov neeg ntseeg Khetos ua li cas hwm tus Cawm Seej yog los ntawm Charles Dickens tej lus uas nws sau rau nws cov me nyuam:
“Kuv cov me tub me ntxhais, kuv xav xav kom nej paub me ntsis txog Yexus Khetos zaj keeb kwm. Vim tsim nyog txhua tus yuav paub txog Nws. Tsis tau muaj leej twg uas zoo npaum li nws, muaj siab dawb siab zoo npaum li nws, thiab muaj kev tu siab thaum neeg ua txhaum npaum li nws.”
Hais li ntawd yog Dicken lus qhia ua ntej. Nov yog nws tej lus xaus:
“Nco ntsoov!—Yog kev ntseeg Khetos kom ua zoo tsis tu tsis tseg—tsis hais rau cov uas ua phem rau peb. Yog kev ntseeg Khetos kom hlub peb tus neeg zej zog ib yam li peb tus kheej, thiab ua raau tib neeg zoo li peb xav kom lawv ua rau peb. Yog kev ntseeg Khetos kom ua siab zoo, muaj kev hlub tshua, thiab zam txim, thiab muaj tej cwj pwm li no nyob ntsiag to hauv peb lub siab, thiab tsis txhob khav txog tej no, los sis tsis txhob khav txog peb tej kev thov Vajtswv los sis kev hlub Vajtswv, tiam sis peb qhia tias peb hlub Nws thaum peb txo hwj chim sim ua raws li qhov yog thaum peb ua txhua yam. Yog peb ua li no, thiab nco txog Peb tus Tswv Yexus Khetos lub neej thiab tej lus qhia, thiab sim ua raws li tej lus ntawd, ces peb yuav cia siab tias Vajtswv yuav zam txim pub rau peb tej kev txhaum thiab tej uas peb ua yuam kev, thiab ua rau peb nyob thiab tuag ntawm Kev Thaj Yeeb.”2
Ib yam li Dickens sau, “Peb tus Tswv Yexus Khetos lub neej thiab tej lus qhia” ua rau peb muaj kev thaj yeeb. Tus Thwj Tim Povlauj hais tias tus Cawm Seej tej lus qhia yog “txoj moo zoo ntawm kev kaj siab lug.”3
Cov lus kaj siab lug los sis kev thaj yeeb los muaj ob peb lub ntsiab hauv vaj lug kub. Thaum Yexus hais tias, “Nej cia li tau nyob kaj siab lug,” Nw shais txog kev kaj siab lug uas tus Yaj Saub Yaxayas tshaj tawm tias: “Thaum ntawd txhua tus yuav ua ncaj ua ncees, yuav muaj kev thaj yeeb thiab nyob kaj siab lug mus ib txhis.”4 Tus Cawm Seej twb ua kom muaj raws li tej lus qhia tej yuav muaj los yav tom ntej ntawd. Nws piav hais tias: “Kuv qhia tej no rau nej kom nej cov uas nrog kuv yuav muaj kev kaj siab lug.”5
Nyob hauv Nws tej lus qhia kawg, tus Tswv Yexus Khetos hais rau Nws cov Thwj Tim tias, “Kuv muab kuv txoj kev kaj siab tso rau nej; txoj kev kaj siab uas kuv muab pub rau nej, kuv tsis muab rau nej li neeg ntiaj teb muab. Nej tsis txhob txhawj, tsis txhob nyuaj siab thiab tsis txhob ntshai.”6
Ces tsis ntev tom qab ntawd, thaum Nws tuaj xyuas cov ncaj ncees hauv lub ntuj tshiab, tus Cawm Seej tau hais Yaxayas tej lus no: “Thiab tus Tswv yuav qhia koj cov me nyuam txhua tus; thiab koj cov me nyuam txoj kev kaj siab lug yuav loj heev.”7
Qhov uas tus Cawm Seej tau qhia txog kev kaj siab lug hauv ib tug neeg lub siab los Nws kuj hais txog kev kaj siab lug nyob hauv ib tsev neeg, kev thaj yeeb hauv ib lub teb chaws, thiab kev thaj yeeb hauv lub ntiaj teb no.
Tus Cawm Seej thiab Nws cov Thwj Tim tsis tau muaj ib lub txheej xwm kom muaj kev thaj yeeb hauv lub ntiaj teb no tsuas yog qhia kom txhua tus neeg ua ncaj ncees xwb. Lawv tsis tau tawm tsam Loos txoj kev kav los sis tawm tsam cov nom nyaum hauv zej zog. Lawv tau qhia kev ua neej ncaj ncees thiab qhia tias Vajtswv cov me nyuam yuav tsum hlub lawv cov yeeb ncuab8 thiab “nrog sawv daws nyob sib haum.”9
Muaj kev tsov kev rog thiab kev sib cav sib ceg yog los ntawm kev phem; kev kaj siab lug yog los ntawm kev ncaj ncees. Cov koob hmoov ntawm txoj moo zoo yeej yog pub rau txhua tus, thiab kev kaj siab lug zoo ib yam: cia li ua raws li Vajtswv cov lus txib.
Thawj Tswj Hwm Howard W. Hunter qhia li no:
“Kev thaj yeeb uas neeg ntiaj teb xav muaj yog ib lub sij hawm uas tsis muaj kev ntxub ntxaug; tiam sis tib neeg tsis to taub tias kev thaj yeeb tsuas yog qhov uas tib neeg ua neej nyob raws li tej yam uas Vajtswv tau teem tseg lawm. …
“… Yog peb ntsia tib neeg thiab tej kev ntawm lub ntiaj teb, ces peb yuav pom tej kev kub ntxhov thiab kev txhawj xeeb. Yog peb yuav tig mus rau Vajtswv, peb yuav nrhiav kev kaj siab lug rau tus uas nyuaj siab. …
“Kev kaj siab lug no yeej pov hwm peb kom txhob raug kev kub ntxhov ntawm lub ntiaj teb.”10
Nyob hauv kev tshwm sim hauv hnub nyoog no peb nyeem hais tias; “Tiam sis kawm kom paub tias tus uas ua tej hauj lwm ncaj ncees yuav tau txais nws nqi zog, uas yog txoj kev kaj siab nyob hauv sim neej no, thiab txoj sia nyob mus ib txhis nyob hauv sim neej uas yuav los.”11
Kev kaj siab lug yog peb tus Cawm Seej, thiab kev kaj siab lug yog peb lub hom phiaj. Kev kaj siab lug no yog qhov uas peb muaj kev zoo siab thiab kev kaj siab uas los ntawm kev ua raws li Nws cov lus txib. Thawj Tswj Hwm Spencer W. Kimball hais tias:
“Kev kaj siab lug yog lub txiv uas txi los ntawm kev ncaj ncees. Nyiaj yuav tsis tau, thiab pauv tsis tau lwm yam kom txais tau. Yuav tsum ua ncaj ncees kom txais tau.”12 Peb hu nkauj li no, “Txoj moo zoo ua rau peb muaj kev kaj siab lug,”13 thiab nyob hauv ib zaj nkauj qhuas Vajtswv ntxiv peb hu nkauj li no:
“Cia li muaj kev kaj siab lug hauv lub ntiaj teb
Thiab cia li pib ntawm kuv.”14
Peb yeej yuav tsis muaj kev thaj yeeb hauv peb tej lub teb chaws yog peb tsis muaj kev ncaj ncees hauv cov neeg uas nyob haud. Thaum lub caij uas muaj Kev Tsov Rog Thoob Ntiaj Teb thib Ob Txwj Laug John A. Widtsoe qhia li no tias:
“Tib txoj kev rau cov neeg muaj kev thaj yeeb yog kom muaj txiv neej thiab poj niam uas nyiam thiab tsim kev thaj yeeb. Txhua tus neeg, los ntawm Khetos cov lus qhuab qhia thiab Nws lub Koom Txoos, muaj kev thaj yeeb ntawm lu bntiaj teb hauv nws txhais tes.
“Qhov no ua rau kuv muaj kev lav ris rau kev thaj yeeb ntawm lub ntiaj teb thiab ua rau nej lav ris kev thaj yeeb ntawm lub ntiaj teb. Yeej muab tsis tau kev lav ris no rau lwm tus.”15
Peb caug xyoos tom qab ntawd, ib tug tuam thawj coj ntxiv, Eldred G. Smith, tau qhia qhov tseeb ib yam li ntawd:
“Yog txhua tus neeg yuav muaj kev kaj siab lug hauv nws lub siab, ces yuav muaj kev kaj siab lug hauv lawv tsev neeg. Yog muaj kev kaj siab lug hauv txhua tus neeg, ces yuav muaj kev thaj yeeb hauv lub teb chaws. Yog muaj kev thaj yeeb hauv tej lub teb chaws, ces yuav muaj kev thaj yeeb hauv lub ntiaj teb.
“Thaum peb hu nkauj, ‘Cia muaj kev thaj yeeb hauv lub ntiaj teb thiab cia pib ntawm kuv,’ thov kom peb hu li ntawd tiag tiag. Thov kom peb muaj lub hom phiaj no.”16
Ib zaj Christmas uas kuv nyiam tshaj tau muab luam tawm hauv ntawv xov xwm Deseret News 30 xyoos tas los. Zaj no qhia txog ib tug me ntxhais uas muaj 11 xyoos thiab tej yam uas nws kawm los ntawm nws txoj kev ntxhov siab vim nws tsis tau txais khoom plig li nws xav tau thiab nws muaj kev kaj siab lug thaum nws kawm lub ntsiab txog tej yam uas peb ua koob tsheej txog thaum peb muab khoom plig rau lwm tus. Qhov tseem ceeb kuv hais zaj no rau cov me nyuam thiab cov tub hluas ntxhais hluas.
Ib tug ntxhais uas muaj 11 xyoos tu siab heev vim nws tsis tau txais tus me nyuam roj hmab uas nws xav tau heev.
Nws niam sim nplij nws lub siab, hais tias, “Koj loj dhau lawm.” Nws puas loj dhau rau lub caij Christmas tiag tiag? nws tus ntxhais xav paub. Nws txiv piav hais tias:
“Kuv tus me ntxhais. Muaj kev mob heev, thiab kev xyiv fab heev thaum yus loj hlob tuaj. Me ntxhais es, koj tsis tau loj dhau rau Christmas lawm. Yog ib yam uas tseem ceeb tshaj. Koj tab tom loj hlob tuaj kom koj thiaj paub tej yam uas tseem ceeb dua li koj txawj to taub thaum koj yog ib tug me nyuam yaus. … Koj twb hnov hais tias peb pub khoom plig rau lwm tus hauv lub caij Christmas vim cov neeg yug yaj thiab cov neeg txawj ntse tau pub khoom plig rau tus Me Nyuam Khetos, tiam sis cia kuv qhia koj txog thawj lub txiaj ntsim ntawm lub caij Christmas.”
Ces nws txiv piav txog txoj kev hlub uas peb Leej Txiv Saum Ntuj Ceeb Tsheej muaj rau Nws Tub Hlob, “tus uas tau tso siab rau Nws dhau kev nyuaj siab thiab thaum lwm tus ntxeev siab rau Nws thiab tus uas tau pab Nws tsim lub ntiaj teb uas peb nyob tam sim no.” Nws tau qhia nws tus ntxhais txog qhov uas peb Leej Txiv Saum Ntuj Ceeb Tsheej tau pub Nws Leej Tub, tus Tswv Yexus Khetos, rau peb ua peb tus Cawm Seej.
Nws tau nyeem los ntawm Phau Ntawv Maumoos txog qhov uas Vajtswv Leej Tub “yuav nqis saum ntuj ceeb tsheej los nrog noob neej nyob, thiab yuav los nyob hauv ib lub cev av. … Thiab xyuas seb, nws yuav raug tej kev ntxias, thiab kev mob ntawm cev nqaij daim tawv, kev tshaib, kev nqhis, thiab kev sab, ntau tshaj li neeg nyiaj taus, tsuas yog raug kev tuag xwb; vim saib seb, ntshav tawm hauv txhua lub qhov hws los, vim nws txoj kev ntxhov siab rau nws cov neeg tej kev phem thiab kev qias yuav hnyav npaum li ntawd. Thiab nws yuav hu ua Yexus Khetos, Vajtswv Leej Tub, Leej Txiv ntawm lub ntuj thiab lub ntiaj teb, tus Tsim txhua yam txij thaum chiv keeb los; thiab nws niam yuav hu ua Maivliag” (Mauxiyas 3:5, 7–8).
Nws txiv kaw phau ntawv, thiab piav hais tias:
“Txawm yog peb Leej Txiv Saum Ntuj Ceeb Tsheej paub Nws Leej Tub yuav raug tej yam no, vim Nws hlub peb thiab muaj laj lim tswv yim mus ib txhis, Nws pub Nws Leej Tub rau lub ntiaj teb. Thiab qhov thib ob ntawm lub txiaj ntsim zoo kawg no yog qhov uas Khetos, Nws Leej Tub, twb paub li no thiab, es Nws txaus siab pub Nws tus kheej kom peb yuav muaj txoj sia nyob mus ib txhis.”
Ntau xyoo tom qab ntawd, tus me nyuam ntxhais uas loj hlob lawm sau hais tias:
“Hmo Christmas ntawd yog thawj hmo uas kuv nco qab tias kuv twb tsaug zog thaum tsis muaj kuv tus me nyuam roj hmab Christmas saum kuv lub hauv ncoo. Kuv twb muaj ib yam zoo dua. Nyob hauv kuv lub siab kuv muaj kev kaj siab lug tshiab. Kuv twb nrhiav tau ib lub txiaj ntsim uas yeej yuav tsis poob mus, ib lub txiaj ntsim uas kuv yuav hloov los ua neeg tsim nyog txais tau, nrog Vajtswv txoj kev pab. … Thiab kuv tau thov Vajtswv … hais tias muaj ib hnub kuv yuav muaj cov me nyuam, ces kuv yuav to taub txog lub Txiaj Ntsim uas yog kev Hlub tag nrho.”17
Kux xaus lus nrog Thawj Tswj Hwm Russell M. Nelson tej lus qhia hauv Thawj Pawg Thawj Tswj Hwm Kev Sib Ntsib Hawm Vajtswv Hauv lub Caij Christmas xyoo tas los: “Yexus Khetos yog Vajtswv lub txiaj ntsim—lub txiaj ntsim uas Leej Txiv pub rau tag nrho Nws cov me nyuam.”18
“Rau qhov Vajtswv hlub neeg ntiaj teb kawg li, nws thiaj txib nws tib Leeg Tub los rau hauv ntiaj teb. Tus uas ntseeg nws Leej Tub, tus ntawd yuav tsis tuag, tiam sis yuav tau txoj sia ntev dhawv mus ib txhis.”19
Kuv thov kom qhov tseeb mus ib txhis yuav pab peb ua txhua yam hauv lub caij Christmas, los ntawm Yexus Khetos lub npe, amees.